أمراض السرطان بين أطفال العالم العربي
– ماهية وأسباب مرض السرطان
– أنواع السرطان ونسب شفائها في المستشفى
– أهمية البحث العلمي ومنهجية العمل في المستشفى
– أعراض المرض والوقاية منه وسبل تطوير الرعاية الصحية
– طرق التبرع والمشروعات الجديدة ومستقبل علاج السرطان
 |
 |
أحمد منصور: السلام عليكم ورحمة الله وبركاته وكل عام وأنتم بخير، أحييكم على الهواء مباشرة من القاهرة وأرحب بكم في حلقة جديدة من برنامج بلا حدود. يفتك مرض السرطان سنويا بما يزيد على سبعة ملايين شخص حول العالم معظمهم في الدول الفقيرة ويشير المركز العالمي للأبحاث السرطانية التابع لمنظمة الصحة العالمية إلى أن السرطان قد يصبح من أشد الأمراض فتكا في العالم في العام 2010 متجاوزا أمراض القلب، وستكون الدول الأكثر فقرا هي العرضة لزيادة الإصابات التي عادة ما تنشأ عن التدخين أو الأطعمة الملوثة أو المشبعة بالدهون. لكن الغريب في أمر السرطان أنه لم يعد يقف عند حد الكبار بل أصبح يضرب بعنف في الأطفال بدءا من أيام ولادتهم وحتى سن الـ 15، حتى أن الزيادة في الإصابات بين الأطفال دفعت الخبراء إلى السعي للبحث عن الأسباب التي تؤدي إلى ذلك. وفي مصر قام عدد من العلماء والأطباء المتخصصين البارزين في علاج هذا المرض القاتل -على رأسهم ضيف حلقة اليوم- بإنشاء واحدة من أبرز المستشفيات في العالم لعلاج الأطفال المصابين بالسرطان، وفي هذه الحلقة نحاول التعرف على أسباب هذا المرض القاتل ووسائل مواجهته وعلاجه والعوائق والتحديات التي تقف أمام الأطباء العرب في مواجهته وذلك في حوار مباشر مع الدكتور شريف أبو النجا أستاذ طب الأطفال وأمراض الدم والأورام في جامعة القاهرة ومدير مستشفى سرطان الأطفال في مصر للبحوث والتدريب والعلاقات الخارجية، دكتور شريف مرحبا بك.
شريف أبو النجا: مرحبا يا أحمد، على فكرة أنا مش على رأسهم، أنا واحد منهم.
أحمد منصور: بداية ما هو مرض السرطان؟
شريف أبو النجا: أولا مرض السرطان هو مش مرض واحد هو أمراض عديدة، الناس متخيلة أن السرطان حاجة واحدة، السرطان أمراض كثيرة قوي، هو أن الخلايات بتنقسم انقساما جنونيا ما فيهوش تحكم، ربنا سبحانه وتعالى حط لنا قمة التحكم في الخلايا بتاعتنا، دائما كل خلية من الخلايا بتاعتنا فيها علشان تنقسم وتتطور ونكبر ونقدر نعيش الحياة بتاعتنا ففي بنزين بيدوس في الفرامل علشان يخليها تنقسم وتعيش في السكة الطبيعية بتاعتها وفي فرامل كمان At the same time يعني في بنزين وفي فرامل، وربنا سبحانه وتعالى عمل تناغما قويا جدا ما بين البنزين والفرامل.
أحمد منصور: توازن داخلي.
شريف أبو النجا: توازن، لما بيفقد هذا التوازن الخلية بتنقسم بسرعة جدا وبتملأ المكان بتاعها بتزق الخلايا اللي حواليها وبتبقى عندها قابلية جامدة جدا للانتشار بعد كده لحد ما تصل لمرحلة الوفاة.
أحمد منصور: نقدر نقول إن الخلية هي المكون الذي يتكون منه الإنسان بشكل عام يعني إحنا مجموعة خلايا أو ملايين الخلايا بتتجمع فتشكل جزءا.
شريف أبو النجا: بالضبط، خليني أشرح لك حاجة علشان وإحنا بنوضب الحلقة كنا قاعدين بنتكلم حنوصل المعلومة إزاي للناس بطريقة بسيطة، خليني أشرح لك موضوع الجينات والخلايا بطريقة بسيطة جدا، حضرتك إحنا الخلية اللي هي المكون الأساسي في الجسم عندنا بتتكون تقريبا من بروتينات كلها وجوه الخلية نواة، النواة فيها 23 زوجا من الكروموسومات دي مركز التحكم بتاع الخلية العقل بتاع الخلية، 23 زوجا من الكروموسومات عاملين كده بالضبط -علشان الناس تشوفهم وتفهمهم بمنتهى البساطة- ده كروموسوم فيه 23 زوجا من واحد لـ 23 هم مرقمون 1، 2، 3، 4، الكروموسوم نمرة واحد عندي زي الكروموسوم نمرة واحد عندك يا أحمد زي الكروموسوم عند أي حد عند كل المشاهدين شكلا وموضوعا ووظيفة، الكروموسوم عبارة عن ناحيتين كده ذراعين، الذراع ده بيجي من الأب والذراع ده بيجي من الأم، لو حضرتك حطيت إيديك كده حتبص تلاقي عندك شُرط على الكروموسومات عندك الشُرط دي هي الجينات، الجين من هنا ده مع ده الاثنان بيشتغلوا مع بعض هم اسمهم الرفقاء، كل اثنين بيشتغلوا هو جين واحد، علشان كده هم بيحملوا صفات وراثية لأنه جزء منه جاي من الأب وجزء منه جاي من الأم، الجين ده في آلاف الجينات على كل كروموسوم، ما هي وظيفة الجين؟ هي تكوين روتين معين في الجسم، أرجع أقول لك إن حضرتك البروتين اللي بيكون لون عينك أو الـ Enzyme أو الإنزيم اللي بيكون لون عينك هو جاي من جينات ده الشفرة بتاعة البروتين الشفرة اللي بتشفر البروتين اللي بيطلع هنا.
أحمد منصور: موجودة داخل الجسم.
شريف أبو النجا: وبالتالي إحنا بنقول الجينات دي حاملة الصفات الوراثية، هي أيوه بس هو كروموسوم شايل جينات الجينات دي هي التي تكون البروتينات كلها بتاعة الجسم، كل كروموسوم عليه آلافات الجينات. حضرتك لو تفتكر من فترة من الزمن الأميركان اخترعوا.. اكتشفوا الـ Genome، الـ Genome هو ده اللي أنا بأتكلم عنه، أن الكروموسوم نمرة ثلاثة في الحتة الفلانية عليه الجين اللي بيطلع البروتين الفلاني، البروتين ده..
أحمد منصور (مقاطعا): يعني خريطة جسم الإنسان بذاتها..
شريف أبو النجا: خريطة جسم الإنسان، ده الجينات بتاعتنا، كل بروتين..
أحمد منصور (مقاطعا): أي خلل في هذه الخريطة يمكن أن يؤدي إلى..
شريف أبو النجا: (متابعا): أي خلل في هذا الجين اللي هو الجين ده بيتكون من إيه؟ بيتكون من الأحماض الأمينية حمضين أمينيين عاملين على بعض كده وفيهم Amino Acids فيهم أحماض أمينية كده لفتين، لو واحد منهم تغير شكل البروتين حيتغير، لو شكل البروتين تغير وظيفته حتتغير وبتعتمد على قوة التركيبة بتاعة التغيير. في بقى اللي بنتكلم عليه سائد ومتنحي هذا..
أحمد منصور (مقاطعا): أنا وعدت ألا ندخل في تفصيل لا يستطيع المشاهد أن يدركه ولكن ممكن أن يقال إن المرض ينشأ نتيجة خلل في هذه التركيبة الطبيعية التي خلقها الله.
شريف أبو النجا: بالضبط كده.
أحمد منصور: ما هي الأسباب التي تؤدي إلى هذا الخلل؟
شريف أبو النجا: دائما السرطان بيبقى سببه حاجتان، دائما حاجة اسمها Double Hit Theory أو نظرية الضربة المزدوجة، الضربة الأولانية.. إحنا لسه كان عندنا عالم من أكبر العلماء بتوع أميركا في علم الوبائيات وهي العلاقات بتاعة الإحصائيات بتاعة السرطان وأسبابه، هم واصلين دلوقت في الأطفال أن هم ابتدؤوا يعملوا إحصائيات دقيقة جدا للأمهات وأنواع الأكل اللي بتأكله الأم والحاجات اللي بتشربها الأم..
أحمد منصور (مقاطعا): يعني يستطيع أن يكتشف ما الذي أصاب الطفل..
شريف أبو النجا: (متابعا): حضرتك دي الإحصائيات مهمة قوي، الإحصائيات دي بتتكون من إيه؟ هو ده البحث العلمي، بتتكون من معلومات دائما البحث العلمي بيبتدي من معلومات، كيفية تجميع المعلومات، تقوم أنت تحط المعلومات دي وتخزنها وتطلع بها بنتائج، المعلومة اللي هم واصلين لها دلوقت أن كل السرطانات مش في الأطفال، في الأطفال وفي الكبار..
أحمد منصور: حتى في الكبار.
شريف أبو النجا: حتى في الكبار، بتتكون في رحم الأم.
أحمد منصور: في رحم الأم! خلال فترة الحمل.
شريف أبو النجا: خلال فترة الحمل، وخليني بس أقول لحضرتك معلومة علشان الناس ما تبقاش تقول لي إن السرطان وراثة، هو جزء من السرطان وراثي وفي عائلات بيبقى فيها السرطان وراثيا وفي أنواع من السرطان وراثية زي سرطان العين في الأطفال، دي سرطانات وراثية وفي عائلات بتحمل.. بس مش كل السرطانات وراثية، لكن أنا بأقول إن الأم لما بتتعرض لمؤثرات معينة أثناء فترة الحمل هي اللي بتعمل الضربة الأولى لهذا الجين فالجين بيبقى جاهزا ويسهل قوي الضربة الثانية عليه من الوسائل المؤثرات البيئية اللي ممكن تحصل له وهو عنده سنة وهو عنده عشر سنين وهو عنده 15 سنة فده يعتمد نوع..
أحمد منصور (مقاطعا): يعني الطفل حينما يولد يكون حاملا للضربة الأولى؟
شريف أبو النجا: بالضبط كده.
أحمد منصور: فبيكون مهيأ إلى أن يصاب بالضربة الثانية سواء في مرحلة الطفولة أو في أي مرحلة من حياته.
شريف أبو النجا: أو في أي مرحلة، وهي دي النظرية الجديدة التي ابتدؤوا يصلوا لها فعلا في علوم الوبائيات بتاعة السرطان.
أحمد منصور: لكن بيلاحظ أن انتشار الإصابات قبل ذلك كانت في الكبار، الآن أصبحت في الأطفال، يعني حينما جئت إلى المستشفى أكثر من مرة لاحظت أن في أطفال عمرهم أسابيع مصابين بالسرطان.
شريف أبو النجا: ما إحنا ما هو نتيجة اللي أنا عايز أقوله ما هو أصل أنا ما أقدرش أفرق أن أقول ده كبير وصغير، هو القصة كمان في الموضوع أن التشخيص بقى عاليا قوي، إحنا كمان التكنولوجيا عندنا بقيت في البلاد بتاعتنا وفي البلاد العربية بقيت عالية، يعني يمكن ما تلاقيش في الدول الأفريقية والبلاد النامية مش حتلاقي فيها نفس الإحصائيات في نفس.. لكن أنا عايز أقول لك بس معلومة علشان الناس ما تتخضش، هو دائما السرطان مثلا في.. حنشوفه مثلا في إنجلترا سنة 1920 لحد النهارده في إنجلترا السرطان بتاع الأطفال ما زادش نسبته، ومن سنة 1940 لحد دلوقت السرطان في أميركا ما زادش نسبته ومن سنة 1960 لحد دلوقت في اليابان ما زادش نسبته، هي الـ Periods معلش خليني أقولها بالإنجليزي Periods of Maximum Industrialization أعلى مرحلة في التصنيع اللي وصلت لها هذه الدول لما كان التصنيع عندهم قويا جدا وطبعا Definitely السرطان له علاقة بالبيئة وتلوث البيئة.
أحمد منصور: إيه طبيعة العلاقة بين البيئة بين تلوث البيئة وبين الإصابة بالسرطان؟
شريف أبو النجا: علاقات كثيرة قوي، العلاقة الأساسية مثلا حتكون عندك بعض الفيروسات يعني في بعض الفيروسات بتسبب سرطان، في فيروسات في Africa في أفريقيا اسمه شتانبرفيروس بيعمل نوعين من السرطان سرطان في الأمعاء في الأطفال وبيعمل سرطان في الـ Nasal Pharynx الحلقوم يعني، في أنواع Viruses بتعمل زي مثلا Hepatitis B بيعمل سرطان في الكبد التهاب الكبد الوبائي B، في أنواع من الـ Viruses بتعمل سرطانا في عنق الرحم في السيدات وابتدؤوا يكتشفوا له Vaccine دلوقت ابتدأ الـ Vaccine ده والطعم ده يتاخد للسيدات، خلينا نتكلم على الـ hydrocarbons الملوثات البيئية من مكونات البنزين هي عالية جدا، البدانة..
أحمد منصور: السمنة لها دور في الإصابة بالسرطان؟
شريف أبو النجا: السمنة ودورها لها علاقة الجينات بالتكوينة بتاعة الجينات كمان هنا.
أحمد منصور: يعني مش مجرد السمنة الآن السكر والضغط وهذه الأشياء؟
شريف أبو النجا: كل العلاقات دي والأدوية اللي بتتاخد معها والتركيبة، يعني حضرتك العلاقات معظمها يعني عايز أقول لحضرتك إن 43% من أسباب السرطان الوفيات بالسرطان -حاجة غريبة جدا- من التدخين 30% و13% مجمعة ما بين الأسباب الأخرى منهم الـ Unhealthy Habits الحاجات الصحية الغير سليمة..
أحمد منصور: يعني التدخين لوحده 30%.
شريف أبو النجا: والبدانة.
أحمد منصور: قل لي العادات الصحية غير السليمة اللي أصبح الناس يمارسونها الآن؟ إيه شكل هذه العادات الصحية غير السليمة اللي ممكن تؤدي إلى السرطان؟
شريف أبو النجا: ما فيش رياضة، الأكل الـFat اللي هو فيه..
أحمد منصور: فيه دهون مشبعة.
شريف أبو النجا: دهون عالية جدا، معظم الـ Fast Foods..
أحمد منصور: الوجبات السريعة.
شريف أبو النجا: الوجبات السريعة، المحفوظات أكل المحفوظات العلب المحفوظة بكثافة جدا، يعني حضرتك إحنا عندنا الجسم بتاعنا والخلايا بتاعتنا كلها توازن رائع، ربنا سبحانه وتعالى..
أحمد منصور (مقاطعا): يعني لازم نعود إلى الأكل الطبيعي وإلى الأكل الطازج.
شريف أبو النجا: بالضبط.
أحمد منصور: والابتعاد عن الدهون وهذه الأشياء لأن هي ليست سببا لما يقال عن أمراض السمنة والشرايين وغيرها ولكن أيضا تؤدي إلى السرطان.
شريف أبو النجا: وأنا عايز بس أرجع ثاني أقول إن 43% من الوفيات في السرطان اللي أنا عايز أقول لحضرتك من تقرير منظمة الصحة العالمية اللي النهارده منقول إنه في 6,7 مليون شخص بيموتوا سنويا من السرطان، ده التقرير بتاع سنة 2002، التقرير الجديد حيبقى أعلى من كده بكثير لأن حضرتك عندك Expected أن أنت عندك عشرة أو تسعة من عشرة.. 11 مليون حالة سرطان في العالم وأنا بأتكلم عن الحتت اللي فيها إحصائيات، كل سنة في 11 مليون حالة جديدة، الـ 11 مليون دول حيزيدوا سنة 2020 حيبقوا.. حيزيدوا 50% سنة 2020.
أحمد منصور: طيب دكتور هنا موضوع التدخين وأن 30% من الإصابة بالسرطان تأتي عن طريق التدخين..
شريف أبو النجا: (مقاطعا): يعني مش بأقول الإصابة بالسرطان دي الوفيات بتاعة السرطان، أقوى من الإصابة بالسرطان.
أحمد منصور (متابعا): الوفيات، 30% من الوفيات من التدخين، طبعا النسبة هي الأعلى في الولايات المتحدة، في الدول الأوروبية، في سويسرا في غيرها.
شريف أبو النجا: لا، دي ما بقيتش أعلى في الدول الأوروبية حضرتك.
أحمد منصور: هم علشان انخفاض التدخين لكن عقد مؤتمر في سويسرا في أبريل اللي فات بيثبت أن التدخين هو الرقم واحد، إحنا بنتكلم الأب أو الأم يمكن أن يكون مدخنا مباشرا، هل هذا له تأثير على الطفل؟ سواء هو وهو في رحم أمه كما قلت أنت إن الضربة الأولى تأتي في الرحم، أو أن الأب أو الأم مدخنون داخل المنزل.
شريف أبو النجا: One Hundred Percent.
أحمد منصور: 100%.
شريف أبو النجا: حضرتك الأم اللي بتدخن النيكوتين اللي بيخش واللي بيسري في الجسم بتاعها بيصل للطفل الصغير عن طريق الحبل السري.
أحمد منصور: ده اللي في رحمها لسه أثناء الحمل.
شريف أبو النجا: ده اللي في رحمها، سواء هي بتشمه من زوجها أو بتدخن السيجارة نفسها. خليني أرجع ثاني لموضوع الأكل المتوازن أثناء الحمل بالعناصر المختلفة، منظومة ثاني أن ربنا سبحانه وتعالى الأكل المتوازن والأكل الطبيعي يؤثر على الطفل في بطن والدته فوق خيال حضرتك.
أحمد منصور: هل أنتم في المستشفى بدأتم تسألون الأمهات عن العادات اللي الأم بتقوم بها أو التي كانت تقوم بها خلال فترة الحمل حينما أصيب ابنها بالسرطان؟
شريف أبو النجا: أيوه يا أحمد، وعندنا Department كامل بتاع بحوث دلوقت.
أحمد منصور: قسم.
شريف أبو النجا: قسم بحوث كامل وهو علم الوبائيات، عندنا أستاذة دكتورة بتاعة علم وبائيات ومعها مجموعة كاملة لما بتخش الأم أو الأب بنأخذ تاريخا كاملا لعلاقات حضرتك لا تتخيلها.
أحمد منصور: زي إيه؟
شريف أبو النجا: الأولاد لما حتى لما هي كانت صغيرة كانت بتخش الـ Toilet كم.. يعني مع ناس كثير في نفس المكان، كانت بتأكل إيه، إيه أنواع الوجبات بتاعتها، حد عندهم في الأسرة..
أحمد منصور (مقاطعا): كل ده يمكن يقودك إلى نتائج تستطيع أن تفهم بها سر إصابة الطفل بالسرطان.
شريف أبو النجا: حتدينا إحصائيات مؤكدة في وقت معين، حتدينا إحصائيات أقدر أصل بها زي ما هم وصلوا بره للأسباب بتاعة السرطان.
أحمد منصور: هل هناك علاقة بين الغنى والفقر والإصابة بالسرطان أم أن المرض لا يفرق؟
شريف أبو النجا: لا هو ما بيفرقش بس هو له علاقة بالجهل.
أحمد منصور: بالجهل.
شريف أبو النجا: أيوه، له علاقة حقيقية بالجهل.
أحمد منصور: قل لي يعني كيف يقود الجهل إلى الإصابة بالسرطان؟
شريف أبو النجا: عايز أقول في جهل تطوري يعني مثلا على سبيل المثال في مصانع في بلاد كثير قوي عندها مصانع زي ما كنت بأقول لحضرتك وصلوا للمرحلة التصنيعية الكبيرة، كان عندها مصانع اكتشفوا أن المصانع دي بتضر بالبيئة وبتضر بالمواطنين بتاعتهم ولقوا أنهم بيصرفوا على علاج هذه الأمراض أكثر كثير قوي فابتدؤوا ينقلوا المصانع من المناطق بتاعتهم ويبيعوها للدول النامية، إحنا دي بتعتمد على فقر.. حضرتك فاهم قصدي؟
أحمد منصور: أيوه، الآن هناك مصر على سبيل المثال هناك حملة في بعض الصحافة المستقلة المصرية حول التلوث الموجود في المزروعات أنها تسقى بمياه الصرف الصحي، حول أن البحيرات ونهر النيل أيضا ترمى فيه مخلفات المصانع وهذا بيهدد الثروة السمكية، الناس بتأكل سمك ملوث، بتأكل خضار ملوثة، بتشم حياة ملوثة بالكامل، هل هذا له تأثير أيضا في ارتفاع نسبة الإصابة بالسرطان؟
شريف أبو النجا: Definitely مؤكد أن هو أي تلوث بيئي.. يعني عايز أقول لحضرتك ماء المجاري فيها مش بس.. يعني عايز أقول أبسط حاجة فيها هي المخلفات العضوية، المخلفات العضوية اللي هي البراز بتاعنا والحاجات دي، اللي أسوأ منها هي المخلفات الكيميائية سواء جاية من المصانع وبتحتوي المجاري على نسب أملاح عالية جدا مثلا من الكاديوم والألمنيوم..
أحمد منصور: كل ده بيترسب في المزروعات والناس بتأكله.
شريف أبو النجا: كل ده بيترسب وبعدين هو ما بيحصلش هنا بس، ده بيحصل في كل حتة في العالم ما فيهاش اتباع للنظم ويبقى عليها Control وبيغيب فيها ضمير البني آدم. يعني عايز أقول لحضرتك حاجة برضك في الآخر أي حد فينا ممكن يعمل أي حاجة، يعني إحنا كنا بنعمل دراسة مرة على بعض أنواع الفراخ بيدوا لهم حاجة سالمونيلا بتيجي لهم حاجة اسمها فيفري، فكنا عملنا دراسة مرة على ناس -الكلام ده من عشر سنين- أن لسه مزارع بيدوهم مضاد حيوي اسمه كلوراما فينيكول لما بتيجي لهم الحالة دي، الكلوراما فينيكول ده من الأسباب اللي بتسبب السرطان وبتسبب الـ Aplastic Anemia بتسبب الأنيميا..
أحمد منصور (مقاطعا): تعطى للدجاج اللي الناس بتأكله.
شريف أبو النجا: ساعات بيدوها.. المفروض أن الكلوراما فينيكول ده بيقعد في جسم الدجاجة مثلا شهر على بال ما يطلع فبمجرد مثلا ما كان يدوه للفراخ ولما الفرخة.. دماغها يروحوا ذابحينها، فإحنا بنأكل مضاد محرم دوليا، لما طلع التقرير ده اتمنع خالص، وهنا دي فائدة الصحافة المستقلة فائدة وجود عين أخرى أنها تشوف وترقب ويا عيني عليهم..
أحمد منصور (مقاطعا): بس الآن ده يعني الشعب المصري بقى له عشرين سنة عمال يأكل زبالة، وده موجود في شعوب أخرى..
شريف أبو النجا: بس عايز أقول لحضرتك حاجة يا أحمد، يا عيني عليهم اللي ما عندهمش صحافة مستقلة.
أحمد منصور: ما هو ده إحنا بنقول إنه في شعوب أخرى..
شريف أبو النجا: (مقاطعا): إحنا عندنا، أنا بص أنا حأقول لك حاجة، يا عيني عليهم اللي ما عندهمش صحافة مستقلة، فأعتقد أن ده تطور عندنا الحمد لله أن إحنا شايفين وباصين وابتدينا نوعى، الحمد لله.
أنواع السرطان ونسب شفائها في المستشفى
أحمد منصور: هل أنواع السرطان التي تصيب الأطفال مثل أنواع السرطان التي تصيب الكبار؟
شريف أبو النجا: لا ولا نسب الشفاء بتاعتهم كده.
أحمد منصور: قل لي الأطفال إيه الأنواع اللي بتصيبها ونسب الشفاء عندها قد إيه؟
شريف أبو النجا: أولا أنواع للأطفال.. معلش أنت اتفقت معنا ما فيش تعليمات علمية بس صعب قوي في بعض الحالات أني أنا أقولها.
أحمد منصور: حنحاول.
شريف أبو النجا: سرطان الكبار بيجي لحاجة اسمها كالسينوما، الصغيرين بيجيهم حاجة اسمها سالكوما، الأطفال الصغيرين الخلايا بتاعتهم متجددة قوي وبتستحمل الضربة القوية جدا بتاعة العلاج الكيميائي والإشعاعي.
أحمد منصور: الأطفال بيستحملوا العلاج الكيميائي أقوى من الكبار؟
شريف أبو النجا: مئات المرات ونسبة الشفاء في الصغيرين بتصل لـ 80%، 85% في الدول المتقدمة، وأنا لما بأتكلم على الشفاء أنا بأقول شفاء كاملا يعني..
أحمد منصور: يعني حياة طبيعية كاملة؟
شريف أبو النجا: حياة، مش عايز طبيعية هي دي بقى الدور بتاعنا دلوقت بالتقنية الحديثة وإزاي يبقى عندنا مستشفيات حديثة أني أنا أعرف أن الولد ده حيخف بإذن ربنا سبحانه وتعالى بس العلاج اللي إحنا بنديه هو علاج هو نفسه متعب قد السرطان، لأنه هو علاج سام للخلايا Cytotoxic Drugs سواء العلاج الإشعاعي أو العلاج الكيميائي فكيفية تطوير هذا العلاج علشان ما يبقاش ما يديش أعراض جانبية تؤدي مثلا أني أنا مثلا في يوم من الأيام الولد ما يخلفش أو ما يطولش أو يبقى عنده قتب أو مثلا الكلى بتاعته تبوظ أو مثلا الكبد بتاعه يتأثر، هو ده الفن دلوقت في العلم الحديث بتاع علاج السرطان.
أحمد منصور: أنت من أكثر من عشرين سنة وأنت مهتم بعلاج الأطفال تحديدا من السرطان.
شريف أبو النجا: 25.
أحمد منصور: 25 سنة، نسب الشفاء بتلاحظ أنها بتتقدم؟
شريف أبو النجا: آه قوي، قوي ما شاء الله.
أحمد منصور: يعني بتحققوا نسب إيه في المستشفى؟
شريف أبو النجا: حضرتك لو تكلمت على المستشفى إحنا لسه فاتحين ما بقى لناش سنتان يعني إحنا سنتين بالضبط 7/7/2009 كان بقى لنا سنتان، عندنا المبدأ في السرطان وفي العلم عندنا بنقول إني أنا ما أقدرش أطلع إحصائيات لأن معظم الأطفال دول بيأخذوا علاجا من ثلاث لخمس سنين، علاج السرطان طويل قوي، أي علاج فيه ست شهور لتسع شهور، فلازم يعدي على العيان بعد ما يخلص العلاج ثلاث لخمس سنين علشان أقول إن المجموعة دي مجموعة معينة وبحجم معين أن 80% منهم بيخف. لكن أقدر أقول لحضرتك حاجة، كان لسه عندنا مؤتمر كنا عازمين فيه 36 أستاذا من أميركا وأوروبا فكنا بنطلع الإحصائيات بتاعة المستشفى والجميل اللي أنا عايز أقوله لك الإحصائيات بتاعتنا بقيت كلها بالكمبيوتر دلوقت، يعني العلم مهم قوي والإحصائيات قوي قد الدواء ما هو مهم، حقيقي يا أحمد الإحصائيات عندنا دلوقت 15,2% من العيانين بتوعه توفوا في الفترة اللي فاتت.
أحمد منصور: بتعتبرها نسبة قليلة؟
شريف أبو النجا: بالنسبة للي قبل كده؟ آه طبعا، لأنه في كان أولاد كثير قوي بيموتوا في المستشفيات الثانية ولسه لحد النهارده في المستشفيات في كل الدول النامية ما عندهمش قدرة مثلا بتاعة العناية المركزة اللي عندنا، عندنا ما شاء الله عشرين وحدة عناية مركزة على أحدث النظم، عندنا دكاترة متخصصون جدا وقاعدين يعني عندنا أساتذة جامعة في المستشفى بيبقى شغلانتهم من الساعة ثمانية للساعة ستة بعد الظهر قاعد للمريض بقى Full-Timer لا بيروح عيادته..
أحمد منصور (مقاطعا): يعني ليس مدحا في المستشفى لكن أنا زرت مايوكلينيك وزرت مستشفيات كثيرة في أوروبا، حينما أدخل مستشفى سرطان الأطفال لا أشعر أني في مصر على الإطلاق، مستوى عالي مستوى عالمي في كل شيء موجود في المستشفى، وإن كانت الزيارات مؤلمة ولكن أنا بأتكلم على الجانب العلمي وجانب الاهتمام والجانب اللي موجود في المستشفى.
شريف أبو النجا: أنا فخور بالكلام اللي أنت بتقوله..
أحمد منصور: لا ده أقل كلام ممكن أقوله فيها.
شريف أبو النجا: بس أنا عايز أقول لك حاجة المستشفى دي صناعة مصرية وإن كنا استعنا بخبراء أجانب في كل حاجة بس حضرتك شفت كل الوجوه مصرية في المستشفى والصناعة..
أحمد منصور (مقاطعا): هي المستشفى بتؤكد أن العجز اللي موجود في كل القطاعات اللي موجودة في مصر هو عجز إرادة وليس عجز الإنسان المصري، وفعلا هي مستشفى تعتبر صرحا في هذا الموضوع بكل القائمين عليها، حتى الناس عندكم غير أي مكان يعني كأن إحنا في مكان عالمي أيضا الوضع مختلف.
شريف أبو النجا: هو توفر ثقافة أخرى، ثقافة توفرت للناس أن أنت حضرتك ريحته ماديا ونفسيا ومعنويا وقبل كده وكده هي عملية الحاجة المهمة الأساسية، في عالم إدارة يا أحمد اسمه بيتر دراكر ده أستاذ علم الإدارة تقريبا في القرن العشرين قال حاجة مهمة قوي قال إن الموارد الرئيسية والحقيقية للبلاد ما هياش Capital ما هياش مصانع وما هياش Natural Resources ما هياش فحم وبترول ومنغنيز.
أحمد منصور: المصادر الطبيعية نعم.
شريف أبو النجا: وما هياش بني آدمين، كانت وستظل العلم والمعرفة. اهتمام المستشفى والقائمون عليها بالعلم والمعرفة.. بأقول لحضرتك إحنا كل يوم.. يعني حضرتك بتتكلم عن نسبة الوفيات في المستشفى، إحنا الست الشهور الأولانيين الوفيات فيها غير الست شهور الثانيين غير الست الشهور الثالثين غير الست الشهور الرابعين، إحنا بنقيّمها كل ستة شهور. حضرتك عارف السجادة العجمي لما بتدوس عليها بتزيد قيمتها -مع احترامي للتشبيه يعني- فعلا المستشفى كل ما ده في mode الناس بتشتغل مع بعضها وفرت لهم جوا وفرت لهم ثقافة معينة ورغم أني أنا عايز أقول لحضرتك حاجة حضرتك كنت بتقول إنها بغض النظر عن مصر وبغض النظر عن معظم الدول العربية لأن المستشفى دي..
أحمد منصور (مقاطعا): أنت تستقبلون مرضى من كل العالم المرضى.
شريف أبو النجا: أيوه يا أفندم.
أحمد منصور: تستقبلون الفقير والغني يعالج مجانا.
شريف أبو النجا: حضرتك شفت بنفسك.
أحمد منصور: يعني لاحظت مساواة بين الغني والفقير يكفي أني قابلت ناس بسطاء جايبين أولادهم وبيشيدوا بأنه إزاي عوملوا باحترام وبمستوى عالي، مش لأنه فقير اتركن وابن الغني دخل، لا، يعني دي كانت أيضا من الأشياء اللي أنا لمستها بنفسي في الموضوع. أنا حضرت في أكثر من زيارة للمستشفى حضرت في مكتبك اجتماعات وكانت بخصوص الإحصاءات وأنا كانت معاناتي معك طول الفترة اللي فاتت -إحنا من سنة بنحضر للحلقة- هي الإحصاءات مش لاقيين إحصاءات، ما فيش إحصاءات علمية دقيقة بتتكلم عن السرطان في مصر والعالم العربي ولا عن الحالات ولا عن هذه الأمور، إيه المشكلة؟
شريف أبو النجا: هي مشكلة التفاعل جوه المجتمع العربي لعناصر مختلفة هي أهمية العلم وأهمية البحث العلمي..
أحمد منصور (مقاطعا): إيه أهمية الإحصاءات في العمل عندكم؟
شريف أبو النجا: عايز أقول لحضرتك في مبدأ في الإدارة برضك قاله بيتر دراكر قال لك "لا تستطيع إدارة ما لا تستطيع حسابه"، هو حضرتك تقدر تعمل قناة الجزيرة من غير ما يكون عندك مراقب حسابات وعندك دفتر حسابات؟ أنت صرفت قد إيه وإديت مرتبات قد إيه وخرجت قد إيه، مش ممكن واحد يبقى ماشي وهو مش شايف قدامه، مش ممكن واحد تاجر أو واحد عنده مصنع ما يعرفش هو صرف قد إيه وبيطلع قد إيه وبيبيع بقد إيه، هي ده القصة في الموضوع، أنت عندك كم عيان دخل وكم عيان أخذ العلاج وكم عيان -لا قدر الله- ماتوا، طيب اللي مات ده مات ليه؟ هو إيه البحث العلمي؟ حضرتك، تعريف البحث العلمي كلمتان Data Management أو تداور المعلومات، أن أنت يبقى عندك معلومات وتقدر تدور هذه المعلومات علشان تطلع منها بنتائج وSimply بس بمنتهى البساطة أن أنت تسأل نفسك سؤالا، حتسأل نفسك سؤال إزاي وأنت ما عندكش مادة أو حاجة ماسكها في يديك تسأل بها؟ فإحنا يعني عملية الكمبيوتر بالنسبة لنا.. اللي هو إيه الكمبيوتر إحنا لسه متخيلين أن الكمبيوتر لسه النهارده يا دوبك هو إيميلات ولا Games الأولاد بتلعبها ولا شوية حسابات على الكمبيوتر أو لو حضرتك جئت قلت أنا النهارده كان عندي حاجة جميلة قوي النهارده واحد من قطر عندكم النهارده أنا محتاج كمبيوتر في مستشفى، واحد بيكلمني من قطر عندكم ومدير الأعمال مصري فبأقول له بيقول أنتم عايزين إيه؟ قلت له أنا عايز Computers ثاني، Computers يا شريف؟ -هو السنة اللي فاتت تبرع لنا- قلت له أيوه Computers، فدخل الرجل رئيس مجلس الإدارة بتاعه، قال له آه قل له أنا حأدفع فلوس الزكاة بتاعتي في Computers لأني أنا من خلال الـ Computers دي أنا بأتكلم مع الدكاترة في المستشفى..
أحمد منصور (مقاطعا): بتتكلم على نوعية معينة من الـ Computers؟
شريف أبو النجا: لا، هو كمبيوتر عادي.
أحمد منصور: على شبكة كمبيوتر.
شريف أبو النجا: على الشبكة بتاعتنا اللي إحنا حنعمل عليها شبكة قومية للمعلومات بالتنسيق مع وزارة الصحة، حنوصل مع 15 مركزا لعلاج السرطان بتوع الأطفال، عندنا Data Centre كبير قوي حنفتحه إن شاء الله في خلال شهرين.
أحمد منصور: مركز معلومات.
شريف أبو النجا: مركز معلومات بيتناول جميع.. حنحاول نوصل المركز ده بجميع مراكز السرطان في المستشفيات الثانية الـ 15 على مدار مصر وأي مركز في الدول العربية عايز يخش معنا.
أحمد منصور: أنا لاحظت حاجة في آخر زيارة أنك أو أنكم عاملين وقفا للبحث العلمي يعني البحث العلمي الآن له حساب خاص وله تبرع خاص وله وقف أنتم عاملينه حتى تصلوا، ما فائدة البحث العلمي في مجال السرطان وإفادة الناس وإفادة الأطباء؟ اسمح لي نسمع الإجابة بعد فاصل قصير.
شريف أبو النجا: ممكن جدا.
أحمد منصور: نعود إليكم بعد فاصل قصير لمتابعة هذا الحوار مع الدكتور شريف أبو النجا مدير مستشفى سرطان الأطفال في مصر للبحث العلمي والعلاقات الخارجية فابقوا معنا.
[فاصل إعلاني]
أهمية البحث العلمي ومنهجية العمل في المستشفى
أحمد منصور: أهلا بكم من جديد بلا حدود من القاهرة مع الدكتور شريف أبو النجا مدير مستشفى سرطان الأطفال للبحوث والتدريب والعلاقات الخارجية. كان سؤالي لك قبل الفاصل حول وقفية البحث العلمي التي آخر ما أسس عندكم في المستشفى.
شريف أبو النجا: كويس أن أنت قلت إن هو آخر ما أسس لأن إحنا مهتمون قوي يا أحمد بحاجة مهمة قوي أن فلوس المتبرعين نبقى محترمين وإحنا بنتعامل معها بمعنى مهما كان أن إحنا عندنا فكر ورؤية إحنا بنحاول أن نوجه فلوس المتبرع للمكان اللي هو عايز يوديها، في ناس عايزة تودي في دواء فبنوديها في دواء في ناس بتوديها في أجهزة وصدقة جارية بنوديها في صدقة جارية، في ناس لسه مش مقتنعة بماهية البحث العلمي..
أحمد منصور: طبعا المستشفى كلها قائمة على التبرع.
شريف أبو النجا: كلها، إحنا ما عندناش.. إحنا المرتبات بتاعة الموظفين بتطلع من التبرعات، حضرتك، الناس إحنا عندنا 1450 واحدا بيشتغلوا في المستشفى أو خليني أقولها بطريقة ثانية 1450 بيت بيتفتح، 1450 واحد بيتدربوا، ما شاء الله إحنا عندنا أخذنا معونة كبيرة من الصندوق الاجتماعي للتنمية علشان التدريب، إحنا ما فيش واحد في المستشفى يا أحمد ما بيتدربش، الناس اللي بتأخذ الـ MBA الناس اللي بتأخذ كورسات في إدارة الرعاية الصحية من الجامعة الأميركية في ناس بتأخذ حاجات بتسافر بره علشان تتدرب منجيب أساتذة من بره بتيجي تدربنا كل ده على حساب صندوق تدريب عامله الصندوق الاجتماعي للتنمية، حتى بيبقى في حوار بيننا طيب ندرب كل الناس طيب افرض الناس دول تدربوا وبقوا كويسين وسابونا ومشيوا، عارف ردنا إيه يا أحمد؟ الرد أن هم حيروحوا يفيدوا البلد في حتة ثانية أو حيطلعوا بره مصر حيجيبوا دخلا لمصر، فهو ده دور المجتمع المدني دور من أدواره. خليني أرجع أقول لك ثاني على البحث العلمي، إحنا بنوجه الفلوس بتاعة الناس في المكان اللي هي عايزة توديها فيه علشان نحترم الزكوات والصدقات والعشور بتاعة الناس.
أحمد منصور: بتعتبر إيه أهمية البحث العلمي في نطاق عملكم؟
شريف أبو النجا: أهم حاجة في الدنيا أهم حاجة في المستشفى لأن الحاجة اللي ما بتزيدش بتنقص وعمرنا ما حنفضل يا أحمد مستنيين الأجانب أوروبا وأميركا علشان تدينا البحث العلمي..
أحمد منصور: أنا أول مرة زرتك كنت لسه بتؤسس وحدة البحث العلمي..
شريف أبو النجا: تأسست..
أحمد منصور: وآخر مرة زرتك كنت برضه عامل اجتماعا للبحث العلمي.
شريف أبو النجا: حضرتك شفت في كم واحد، بقى عندنا 16 واحد كان عندنا مؤتمر، ما شاء الله عليهم والله يا أحمد العقلية المصرية عقلية يجب احترامها وتقديرها فوق مستوى الخيال، الناس في هذه الفترة لا تتخيل -تعينوا في 1/11- لا تتخيل كم الإنجاز اللي عملوه في هذه الفترة والمساعدة.. الجميل أن المستشفى خلقت team عمل متكامل، الناس قاعدة فاضية للعلم وكلهم بيساعدوا بعضهم..
أحمد منصور: الجو النفسي عندك متغير تماما عن أي مكان ثاني في مصر.
شريف أبو النجا: هو مش أي مكان ثاني في مصر، أي مكان عايز ينجح في العالم، ما هو عايز أقول لحضرتك حاجة أنا سافرت مستشفيات كثيرة في أوروبا وأميركا الصراعات هي الصراعات في كل حتة، هي بتعتمد على الناس والقيادة عايزة إيه، يعني الناس اللي موجودة عندهم هدف ورؤية واضحة وحاطين لها آليات علشان يتحركوا بها ولا هم بيعملوا إيه؟ الناس ممكن تضيع في النص ممكن تكون الناس عندها أحلام حلوة وجميلة بس الآليات بتاعتها ما تنفعش أنها تتحقق.
أحمد منصور: التجربة هذه هل هناك مجال لتكرارها في دول عربية أخرى لا سيما الدول التي تعاني من ارتفاع نسبة عالية للسرطان مثل الكويت والعراق والسودان وأنا في اليمن أيضا أخبروني أن نسبة السرطان عالية بين الأطفال وربما يعني اتصلت بك لترتيب زيارة لمستشفى هناك أيضا.
شريف أبو النجا: بالمناسبة خليني أرجع لكذا موضوع بالنسبة لأسباب السرطان جزء من أسباب السرطان هو التعرض للإشعاعات النووية وبعدين الإشعاعات النووية دي قصة في جميع أنحاء العالم يعني تشرنوبل لما حصل وحصل التسرب منه الإشعاعي الدائرة بتاعته حصل فيها نوع من أنواع سرطانات الدم (رايكيدمايدروكيميا) والدائرة كل ما كانت بتبعد عنها كل نسبة الإصابة بتقل، أي تسرب إشعاعي أو أي نفايات نووية ممكن بتترمي ممكن بتكون سبب..
أحمد منصور: كان ضيفي قبل عدة أسابيع آخر حلقة قبل إجازتي كان بروفسور بريطاني هو من أكبر خبراء الإشعاع في العالم وتحدث عن أثر إشعاعات حرب غزة حتى على مصر والمصريين.
شريف أبو النجا: وعلى إسرائيل نفسها وعلى إسرائيل يعني "وعلى نفسها جنت براقش" يعني..
أحمد منصور: بس جنت على الفلسطينيين والمصريين أولا.
شريف أبو النجا: ما هو جنت علشان هم criminals بس، بس وهو عن الضرر الضرر بهم ومش بس كده هم حيتضرروا أكثر مننا يعني يوم ما يحصل تسرب في أي حاجة عندهم حيتضرروا هم..
أحمد منصور: المشكلة الآن هي في تصاعد النسب يعني هذه الدول التي وقعت فيها حروب زي حرب الخليج الأولى 1991 كان فيها الكويت والمنطقة الشرقية في السعودية وأنا استضفت خبراء يورانيوم يومها وقالوا إن هذه المناطق لا تصلح للحياة الآدمية الآن، نسب السرطان مرتفعة جدا في العراق، هل هناك تواصل هل هناك حالات بتأتيكم من هذه المناطق؟
شريف أبو النجا: إحنا بيجي لنا حالات من جميع الدول العربية وبنعالجها ببلاش خالص بس هو الشرط الأساسي أن الحالات دي لما تيجي أنها ما تكونش أخذت علاجا قبل كده، إحنا شرط أساسي، حضرتك عارف المستشفى أكبر مستشفى سرطان في العالم، 185سريرا، طبعا لما نقول الرقم 185..
أحمد منصور: أنتم أكبر مستشفى سرطان في العالم؟
شريف أبو النجا: في العالم، المستشفى اللي بعدنا متخصصة في سرطان الأطفال 45 سريرا.
أحمد منصور: اللي هي فين؟
شريف أبو النجا: في السان جود في أميركا اللي هي الـ model اللي إحنا مشينا عليه في الـ example بتاعنا، طبعا الأرقام اللي بتخش عندنا إحنا بنعالج دلوقت 53% من الأطفال اللي عندهم سرطان في مصر وأخذنا تقريبا دلوقت أكثر من مائتي طفل من الدول العربية و53% من الأطفال..
أحمد منصور: بس الشرط الأساسي أن ما يكونش أخذ علاجا..
شريف أبو النجا: الشرط الأساسي أنه ما يكونش أخذ علاجا قبل كده لأن عايز أقول لحضرتك هي قصة..
أحمد منصور (مقاطعا): طيب الشرط ده بيصعب على كثير من الأسر والعائلات.
شريف أبو النجا: عليك انتقاء.. في تقريبا تسعة آلاف طفل بيجي لهم سرطان في مصر..
أحمد منصور: سنويا؟
شريف أبو النجا: سنويا، ده غير اللي في الدول العربية فأنت عليك تنتقي من اللي حيخش المستشفى في 53% فتعمل إيه؟ هل تأخذ واحد وأنت تشخصه صح بالأجهزة بتاعتك والتشخيص في مرحلة الأولى بالأجهزة وبالتقنية الحديثة بيسهل عليك العلاج قوي وبيقلل الأعراض الجانبية على المدى البعيد، كيف تنتقي الـ 53%؟ هل أنتقيهم بالواسطة ولا بأولاد الناس ولا أقول إنني حآخذ عيان fresh وأطلع به بنتائج؟ أنا محتاج أحقق نتائج ومحتاج أحط standard ستاندر بالرعاية الطبية علشان القدوة للمستشفيات الثانية، المستشفيات الثانية زي إيه؟ السودان بيبني مستشفى دلوقت وإحنا بنساعدهم بقى لنا سنة ونصف اسمها 99199 لسرطان الأطفال، شكل المستشفى، الـ design التنظيم بتاع المستشفى التدريب بتاع المستشفى التدريب بيتدربوا عندنا الصيادلة ابتدت أول مجموعة من الصيادلة التدريب، في مستشفى دلوقت في مجموعة دكاترة بريطانيين في إنجلترا في أربعمائة ألف عراقي في إنجلترا عملوا مجموعة وبيجهزوا دلوقت وبعثوا أول مهندس بتاعهم علشان يبتدوا يشوفوا المستشفى وحيأخذوا نفس تصميم المستشفى اسمها مستشفى نوح..
أحمد منصور: حيعملوها في العراق.
شريف أبو النجا: حيعملوها في العراق، مجموعة دكاترة من العراقيين اللي عايشين في بريطانيا، في مجموعة جاءت من اليمن، بالمناسبة برضك إحنا بنعمل جوه مصر دلوقت مستشفى ثانية..
أحمد منصور: مستشفى ثانية.
شريف أبو النجا: في طنطا أربعين سريرا بتمويل كامل وتحت إدارة كاملة لـ 57357.
أعراض المرض والوقاية منه وسبل تطوير الرعاية الصحية
أحمد منصور: طيب عندي سؤالان، الأول كيف تستطيع الأسرة أو العائلة أن تتعرف إيه الأعراض اللي ممكن تظهر على الطفل وتؤدي إلى أن هم يحاولوا يكتشفوا إذا عنده سرطان ولا لا؟
شريف أبو النجا: المشكلة برضك السؤال ده صعب لأن السرطان بيجي في كل حتة في الجسم، يعني في سرطان في العين في الأطفال بيجي وهم لسه عندهم شهرين فتشوف ماء بيضاء في العين، يعني شوف حضرتك قد إيه ملاحظة، تشوف مثلا أن بطن الطفل انتفخت بزيادة أو حست مثلا أن فيها تضخم في أي عضو من الأعضاء بتاعتها، النزيف سرطان الدم، أن الطفل يقوم الصبح من النوم كل يوم ويرجع سرطان المخ، أو يحس أن الطفل عنده عدم اتزان سرطان المخ، أنيميا شحوب، جايز أن suspect أن هو ممكن يكون عنده سرطان في الدم أو نتوقع أن هو يكون عنده سرطان في الدم، العظم بيجي سرطان في العظم فممكن نشوف في سرطان العظم الرجل انتفخت، زي.. مش بس كده يعني عايز أقول لحضرتك برضه ميزة من ميزات الدعاية الإعلانية اللي إحنا عملناها على مدار الـ 15 سنة في معهد الأورام وإحنا ومستشفى 57357 وهم امتداد لبعضه لأن إحنا الاثنين حاجة واحدة أن اللي حصل أن الدعاية دي ما جابتلناش فلوس بس، أن الناس ابتدت تعرف أن في سرطان في الأطفال، عارف أول ناس عرفوا أن في سرطان في الأطفال من يا أحمد؟ الدكاترة بتوع المراكز الرعاية الصحية، ما شاء الله عليهم بقوا بيشخصوا كثير قوي دلوقت لأن بقى عندهم وعي وابتدؤوا يقرؤوا فهذا الموضوع..
أحمد منصور: يعني يحول عليك مبكرا.
شريف أبو النجا: إحنا كنا زمان بنشوف سرطان العين، العين جاية مدلدلة تحت، دلوقت ما بنشوفش الكلام ده، كنا بنشوف سرطان العظم الورم طالع من العظم..
أحمد منصور: بسبب التأخر في التشخيص.
شريف أبو النجا: بسبب التأخر في التشخيص، دلوقت بقى فيه ما شاء الله وبقى في مراكز علاج كثيرة جدا لعلاج السرطان في مصر وعلى مستوى واسع، الأدوية الحمد لله بدأت تكون متوفرة بكمية كويسة.
أحمد منصور: السؤال الثاني المهم هو الوقاية، هل يمكن الوقاية وتقليل النسب بدلا من إنفاق المليارات على المرضى أن ينفق أقل من ذلك على الوقاية؟ لا سيما وأن إحنا الآن في جزء رئيسي من الإصابات هو نتيجة سلوكيات مش عايزين نقول خاطئة ولكن سلوكيات إجرامية بحق هذا الشعب وبحق الناس البسطاء والفقراء.
شريف أبو النجا: أنا حأقول لك حاجة، definitely الوقاية مهمة جدا، أول حاجة في الوقاية أن أنت تقي ابنك، ما تدخنش قدامه، تقي ابنك ما تدخنيش وهو في بطنك، إحنا الوقاية المفروض إحنا نبقى حرصاء عليها، أنا أبقى حريصا عليها يعني أنا لما أمشي وأرمي مخلفات المصنع بتاعي المصنع الخاص بتاعي في مياه النيل أنا مش عايز.. ما ينفعش يبقى في ضابط على كل واحد في البلد، إن ما كانش الوعي والضمير بتاعنا والتوعية تصل لكل واحد أن هو يحس أنه جزء من هذا المجتمع، ما ينفعش أن الرجل اللي بيدي للفراخ هرمونات علشان يكبر الفرخة بسرعة أو يدي هرمونات في المزارع السمكية ما حدش حيفضل يجري وراء الناس، الناس لو ما كانش عندها ضمير، لازم الرجل ده يعرف من الأول أن وهو بيدي الهرمونات دي أن الهرمونات دي حتطلع في الفراخ والفراخ دي حيأكلها أولاده حيأكلها هنا أو حيأكلها هنا وحيحصل، الناس تبطل تحلق ذقنها عند الحلاق علشان الـ Hepatitis C، دكتور الأسنان يبقى عنده وعي أن هو لازم يعقم كويس ومش مهم أن هو يكسب أكثر بس يعقم كويس لأن هو لو إدى للعيان بتاعه الـ Hepatitis C التهاب كبدي C حيجي لواحد واثنين وثلاثة ويمكن يصل له في يوم من الأيام. أنا بأقول إن الوعي هو وعي الشعوب إن الشعب لو وعي هو حيقوم، الشعب لازم يبقى واعيا، أنا مش محتاج أحد يقول لي إن أنا ما أرميش زبالة في الشارع، لو رحت رميتها يبقى عايزين عسكري لكل مواطن، حضرتك، السلوكيات بتاعة الناس لازم يبقى فيها إحساس، الناس تعرف أن الفلوس بتاعتها في الزكاة أن الناس في المستشفيات مش لاقية سرنكة، ما فيش بلد في العالم يا أحمد تستطيع الإنفاق على الرعاية الصحية ولا حتى أميركا، خليني أقول لك أنا حضرنا مجموعة من عندنا..
أحمد منصور (مقاطعا): دي أزمة الرئيس الأميركي الآن موضوع الرعاية الصحية.
شريف أبو النجا: بالضبط كده، أنا عايز أقول لك حاجة يا أحمد، إحنا بنحضر مؤتمر اسمه الـ AFP، Association of foundation Professionals مؤتمر جامعي التبرعات في أميركا، عارف الأميركان بيجيبوا التبرعات بيطلعوا تبرعات في السنة بكام؟ بـ 390 مليار دولار، 63% منهم بيروحوا للصحة والتعليم. كل المستشفيات اللي أنا أعرفها واشتغلت فيها بره لا تستطيع أن التأمين الصحي -حتى التأمين الصحي الأميركي- أنه هو يغطيها، ولا الـ private، ولا الرعاية الخاصة كلهم بيعتمدوا على التبرعات، لازم نقف ونقول يا جماعة أنا ما أديش لأي حد أنا ما أعرفش هو محتاج ولا مش محتاج وأروح أشوف المستشفى اللي جنبي ولا أروح أبني المدرسة اللي جنبي لأن بالتعليم أنا حأعمل درجة من الوعي ممكن الناس ما تخشش المستشفيات. عايز أرجع لنقطة يا أحمد معلش..
أحمد منصور: تفضل.
شريف أبو النجا: أنت كنت سألتني على البحث العلمي وخرجنا من الموضوع..
أحمد منصور: لا، إحنا لسه فيه.
شريف أبو النجا: البحث العلمي هو كل شيء والناس لازم تطلع من القوقعة..
أحمد منصور (مقاطعا): أنت عندك الأطباء الذين يعملون في البحث العلمي متخصصون وأظن متخرجون من الولايات المتحدة، شفت أكثر من حد دارس بره يعني.
شريف أبو النجا: إحنا ابتدأنا نأخذ الناس اللي راجعة من الولايات المتحدة عايزين يرجعوا وابتدأنا نجيبهم عندنا في المستشفى، يعني حضرتك شفت مثلين قدامك ناس كانوا عايزين يرجعوا وجاؤوا وإحنا إديناهم فرصة أن هم يجوا بـ qualification بس على شرط أن هم يبقوا جايين عايزين يرجعوا يخدموا البلد بتواضع، حضرتك فاهم؟ لأن هي دي مشكلة لأن في كثير قوي من الناس الراجعين ما يرجعولناش بالـ superiority أن هو جاي، هو جاي ومستعد أن هو يتقبل أن هو ينزل معنا ويشمر ذراعه ويستخدم العلم بتاعه أن إحنا نقوم مع بعضنا. كان عندنا مؤتمر البحث العلمي -بس حأرجع للنقطة الأساسية في البحث العلمي- الناس واخدة البحث العلمي أن هم الأميركان والبريطانيون الوحشين والدول الأوروبية جايين -شركات الأدوية بتاعتهم- جايين يجربوا الأدوية في العيانين بتوعنا، وده لا يحدث على الإطلاق، مش لا يحدث من ناحيتنا بس لأن في عندنا revision جامدة جدا في وزارة الصحة، لا، هم كمان ما يوافقوش بسبب، كل شركات الأدوية العالمية دلوقت لما بتيجي تعمل بحث عن الدواء عايزة نتائج حقيقية فمش مستعدين أن هم يأخذوا نتائج مفبركة لأن هو لو أخذ نتائج مفبركة ولا تخضع للقوانين الدواء اللي حيطلع ده حتطلع نتائجه غلط والدواء ممكن يطلع غلط وممكن الشركة تقفل..
أحمد منصور (مقاطعا): أيوه بس في قصص كثيرة حول الموضوع ده.
شريف أبو النجا: كلها برضك قصص ثانوية، أنا عايز أقول قصص ثانوية، البحث العلمي النهارده كل البحث العلمي يا أحمد داخل جوه النواة بتاع الخلية..
أحمد منصور: أنا لاحظت أيضا أن صار عندكم بروتوكولات للعلاج من تصميم المستشفى من تصميمكم أنتم.
شريف أبو النجا: هي مش من تصميمنا هي بروتوكولات تُعارف عليها دوليا وإحنا أخذناها ووضبناها، في علم اسمه علم الـ pharmaco genetic أو علم الجينات بتاعة تقبل الأدوية، أنا قلت لك إن الجينات بتاعتنا هي بتطلع بروتينات البروتين ده بيطلع enzyme الـ enzyme ده لما أنت بتخش..
أحمد منصور (مقاطعا): مش عايز أدخل في حاجة المشاهد مش حيفهمها.
شريف أبو النجا: آه، يعني عايز أقول إن علم الأدوية بيعتمد على الجينات هو كمان وبيعتمد على الوراثة بتاعتنا.
أحمد منصور: عندي ضغط من المشاهدين، بس حآخذ اثنين أو ثلاثة فقط علشان أكمل معك. خديجة صالح من السعودية سؤالك يا خديجة.
خديجة صالح/ السعودية: لا مش سؤال، مداخلة عندي. أولا نبغى نعرف..
أحمد منصور: تفضلي باختصار.
خديجة صالح: أتمنى على كل اللي يحبوا يتصدق بأموالهم يعرفوا أن مكان الصدقات اللي حتروح له مش مساجد وبس، الأمة مش محتاجة مساجد وبس محتاجة ترعى الأطفال اللي مفروض توفر لهم الرعاية الصحية كانت أو العلمية علشان يكبروا ويروحوا المساجد ويطلعوا صح، هذه نقطة. النقطة الثانية أنه نبغى توعية في المدارس أكثر بأنه عدم إفساد المأكل والمشرب على الفقير قبل الغني هو مش رفاهية فيا ريت هذه النقطتين يكونوا..
أحمد منصور: شكرا لك يا خديجة، أشكرك. سعد القطبي من السعودية، أخ سعد.
سعد القطبي/ السعودية: السلام عليكم ورحمة الله.
أحمد منصور: وعليكم السلام ورحمة الله. سؤالك؟
سعد القطبي: لي مداخلة بسيطة يا أخي الكريم، أحببت أن أشير إلى كلام الدكتور وبأن أقول بأنني سعيد لأن هناك كفاءات في هذا العالم بمثل هذه الكفاءة وأتمنى منهم أن يربطوا، أن يتركوا الرمزية الطبية وأن يتجهوا إلى علم الروحانيات ودمجها مع الطب حيث أن الله سبحانه وتعالى يقول {ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي الْنَّاسِ..}[الروم:41]، فومن يقرأ كتاب كيبر آل غور "الحقيقة المؤلمة" ومما يرى فيه من الأسباب التي جعلت الناس يعني تأتيهم مثل هذه الأمراض في هذه الأوقات يعلم أنه ما أفسد عليهم إلا هذا الكائن البشري بنفسه، وأن يربطوها بأشياء روحانية لتكون هناك السعادة. والفقر الذي أنتم تتكلمون عنه ليس فقرا إنما نحن في هذه البلدان وإن أخذنا الوضع بشكل أرستقراطي لا نجعل كل شخص..
أحمد منصور (مقاطعا): شكرا لك. عبد الله حفيد الجدين من السعودية.
عبد الله حفيد الجدين/ السعودية: السلام عليكم.
أحمد منصور: وعليكم السلام ورحمة الله، سؤالك.
عبد الله حفيد الجدين: معك عبد الله سوداني، كل عام وأنتم بخير.
أحمد منصور: تفضل. وأنت بخير، سؤالك.
عبد الله حفيد الجدين: والله يا أخ منصور والله البرنامج ده جميل جدا وهو برنامج إنساني وشيء يشرح القلب، والدكتور جزاه الله خيرا انشرح قلبنا لما قال في مستشفى في مصر أكبر مستشفى في العالم، ده شيء مشرف بالنسبة لنا إحنا مصر دي أم الدنيا كلها، فلكن يعني بالنظر للسودان برضه جزاه الله خيرا فعندي وجهة نظر شوي عن السودان فالسودان ده والله فعلا مستشفى الأطفال..
أحمد منصور (مقاطعا): شكرا لك يا أخ عبد الله، أشكرك كثيرا. دكتور الآن خديجة أكدت على معنى مهم جدا هو أن الصدقات ليست فقط للمساجد ولكن يجب أن توجه إلى مثل هذه المشروعات، وسعد أشار إلى نقطة أخرى خاصة بسبب أن الإنسان هو السبب في الضرر من خلال سلوكياته فيما يحدث..
شريف أبو النجا: ده هو نفس الكلام اللي أنا كنت بأقوله.
طرق التبرع والمشروعات الجديدة ومستقبل علاج السرطان
أحمد منصور: نفس الكلام اللي حضرتك قلته، إحنا أيضا للإشارة لمن أراد أن يتبرع لأن المستشفى هي مستشفى قائمة على التبرعات، هناك أرقام حسابات لمن أراد أن يتبرع من أي مكان في العالم إلى هذا الصرح الطبي العالمي الموجود والأرقام الآن موجودة على الهواء وأيضا موقع المستشفى على الإنترنت لمن أراد أن يدخل عليه ويتعرف على الأشياء.
[معلومات مكتوبة]
الموقع الإلكتروني للمستشفى: http://www.57357.com
للتبرع لمستشفى سرطان الأطفال في مصر 57357 في أحد البنوك التالية:
– البنك التجاري الدولي: رقم الحساب EGP: 0190031443، رقم الحساب USD: 0190331443، السويفت كود: CIBEEGCX001
– البنك الأهلي المصري: رقم الحساب EGP: 01001067700، رقم الحساب USD: 011001067706، السويفت كود: BEGEGCX009
– HSBC: رقم الحساب EGP: 009057357001، رقم الحساب USD: 009057357110، السويفت كود: EBBKEGCXXXX
للتبرع لحساب برنامج كفالة السرير في أحد البنوك التالية:
– البنك الأهلي المصري/ العاصمة: رقم الحساب EGP: 010010677044، رقم الحساب USD: 011010677040، السويفت كود: NBEGEGCX009
– HSBC: رقم الحساب EGP: 00957357002، السويفت كود: EBBKEGCXXXX
للتبرع لحساب البحث العلمي:
– بنك أبو ظبي الوطني/ المعادي: رقم الحساب 21444، السويفت كود: NBADEGCAMAD
[نهاية المعلومات المكتوبة]
أحمد منصور: عندي ثلاثة أشياء، عندي التبرع الحسابات العامة وهناك تبرع لكفالة السرير لمن أراد أن يكفل سريرا لأن الأسرة محدودة وطبعا بينفق عليها مجانا، المريض لا يدفع مليما حينما يدخل إلى المستشفى وإنما بالتبرع، وهناك حساب البحث العلمي وأنا أصريت أن آخذ من الدكتور حساب البحث العلمي وهو حساب جديد ربما يعلن عنه للمرة الأولى، حساب للبحث العلمي الذي يسهم في هذا الموضوع..
شريف أبو النجا: على فكرة الحساب ده فيه دلوقت 55 ألف جنيه، خمسون ألف جنيه من دكتورة نيرة وهي أستاذة دكتورة عندنا حطت فلوس الزكاة بتاعتها، وخمسة آلاف جنيه من والد دكتورة اسمها دينا، أول 55 ألف جنيه حطيناهم في الحساب وحنحط فيه الناس اللي عايزة تحط للبحث العلمي. كان عندنا دكتور أحسن دكتور في أميركا بتاع سرطان في المخ، سرطانات المخ، اسمه مارك كيغن الرجل ده كنا إحنا بعد ما خلصنا المؤتمر فكان ماشي معنا في مركب في النيل، عارف قال لي إيه؟ قال لي أنا متأسف أن مصر والمسلمين على الفكرة اللي أنا كنت واخدها عنهم قبل كده، لما جاء وقعد معنا وجاء أربع مرات مصر دلوقت يزور المستشفى. إحنا بنجهز دلوقت علشان نعمل بحثا علميا معهم، عايز أقول لك إيه هو البحث العلمي دلوقت..
أحمد منصور: لا، قل لي -لأن باقي ثلاث دقائق- في مشاريع جديدة إيه بتعملوها في المستشفى؟
شريف أبو النجا: طيب خليني أقول لك الحتة دي، أنا لو قلت لي من سنة السرطان حيخف؟ كنت حأقول لك لسه قدامه كثير قوي، الـ Genome اللي هم عملوه ابتدؤوا يكتشفوا الجينات اللي بايظة في السرطان وابتدؤوا يوجهوا أدوية مضادة له..
أحمد منصور: مباشر.
شريف أبو النجا: حضرتك دلوقت بيعملوا macro check صغيرة كده تحط فيها عينة الدم أو الورم بعشرة آلاف دولار، الـ Genome تكلف عشرين مليار دولار علشان يكتشفوه الواحد بس، ثمنها عشرة آلاف دولار حيحطوه يكتشفوا فيه الجين، اكتشفوا أن سرطان الثدي اللي بينتشر فيه سبع جينات حاصل فيهم خلل فابتدؤوا يدوهم سبعة أدوية فابتدؤوا يخفوا خالص، فبأقول لك في أمل كبير دلوقت أن أنت في خلال الخمس سنين الجايين أن السرطان يقضى عليه بالكامل.
أحمد منصور: ده سؤال مهم، مستقبل الصراع مع السرطان؟
شريف أبو النجا: أنا بأقول لحضرتك النهارده أنا من سنة ما كانش عندي هذا الأمل، دلوقت لما ابتدأنا نخش في هذا الموضوع ابتدأ يخش هذا الأمل.
أحمد منصور: أنتم الآن بتؤسسوا يعني ملحقات أخرى يعني المستشفى بتتحول إلى شيء علمي منظم..
شريف أبو النجا: حاجة جميلة فوق ما حضرتك تتخيل يا أحمد، حاجة آدمية مش بس للمرضى اللي جواها وأسرهم..
أحمد منصور: أنا لولا أن أنا مش متعود أمدح في حاجة بس..
شريف أبو النجا: بس هو ليه ما تمدحش؟ هو ليه مش متعود؟ ليه مش متعود؟ إحنا نعودك بقى..
أحمد منصور: يعني تجربة المستشفى الحقيقة تجربة بتبعث على الأمل العالي جدا جدا في.. مش عايز أمدح..
شريف أبو النجا: طيب ما تمدحش يا أحمد بس..
أحمد منصور: بس يعني المجال يكون للناس للذهاب لزيارة هذا المكان والشعور بالأمل.
شريف أبو النجا: المستشفى دي وراءها مجلس إدارة محترم قوي وما بيظهرش وما حدش شايفه، ناس محترمة قوي ومش عايزين يقولوا هم مين. المشاريع الجديدة بتاعتهم بنعمل مستشفى في طنطا، الأطقم التدريبية الكاملة دلوقت ممرضات وصيادلة ابتدؤوا يتدربوا في الستشفى، حنفتح مستشفى أربعين سريرا وتمهيدا أن إحنا بعد سنتين أو ثلاثة إن شاء الله نفتح مستشفى ثانية في الصعيد وحتبقى كلها تحت إدارة 57357 واللي حيديرها أبناء البلد اللي هم عايشين فيها حيتدربوا عندنا، بالـ system بتاع الكمبيوتر اللي عندنا حيبقى التخاطب عن بعد، العمليات حتُشاهد وحتتعمل، التدريب اليومي حيبقى بيننا وبينهم على طول بالتالي ندرس..
أحمد منصور (مقاطعا): الآن برضه في نقطة مهمة أنت قلت لي عليها، علاقتكم بالمستشفيات العالمية التي في نفس الموضوع وإدخال المستشفى ضمن أهم المستشفيات في العالم بالنسبة..
شريف أبو النجا: في مستشفى مهمة قوي في العالم اسمها السان جود ده النبراس بتاع سرطان الأطفال في العالم بناها واحد لبناني من زمان اسمه داني توماس الرجل ده عملها والعيانين كلهم بيتعالجوا فيها ببلاش وإحنا أخذنا منهم الفكرة وهم بيساعدونا من زمان قوي ومش عايزين مننا حاجة ساعدونا قوي ساعدونا نبني المستشفى، دلوقت بنشتغل مع هارفرد في أميركا في بوسطن في children hospital، بنشتغل مع مستشفى اسمها غريت أولمن ستريت في إنجلترا وبنفتح علاقات مع مستشفيات ثانية، لسه فاتحين مع أوهايو وجون هوبكنز، مش بس في علوم الطب في علوم الرعاية الصحية عامة، الرعاية الصحية حاجات كثيرة. بتسألني عن مشاريع، طنطا، بنعمل دلوقت جنبنا فندق للعيانين الغلابة اللي جايين من الأقاليم والأرياف والدول العربية لأنهم ما بيبقاش عندهم مقدرة أنهم يروحوا يأخذوا العلاج كل يوم ودي حتزود سعة المستشفى تقريبا هي كمان ثمانين سريرا لأن العيانين اللي بيأخذوا علاجا خارجيا.. المستشفى فيها 185 سريرا إحنا بندي كل يوم ستمائة عيان في العيادة الخارجية وبيروحوا بيوتهم فبدل ما يروحوا بلدهم بيناموا في الفندق ده ببلاش خالص وبيأكلوا ويشربوا ويناموا ببلاش، وحتة الأرض دي الحقيقة تبرعت لنا بها مدام سوزان مبارك جانب المستشفى.
أحمد منصور: أنت من سنة قلت لي أنك عندك أمل أنك تأخذ قطعة أرض وتبني عليها حاجة وبعدين من يومين قلت لي إنكم أخذتموها وحتبنوا عليها..
شريف أبو النجا: آه الحمد لله..
أحمد منصور: مركز معلومات أو مركز تدريب..
شريف أبو النجا: برضك هي مركز تدريب للعلوم الطبية اللي هي التمريض، العلوم الإدارية بتاعة الرعاية الصحية، مدرسة للفنيين وفي نفس الوقت مركز للأبحاث بس دي..
أحمد منصور: كل ده على مستوى عالمي.
شريف أبو النجا: بس دول حيتم تمويلهم بداية دلوقت في واحد حيبتدي رجل أعمال يبتدي المرحلة فيها الأولانية.
أحمد منصور: أشكرك كثيرا، الوقت انتهى.
شريف أبو النجا: متشكر.
أحمد منصور: كما أشكركم مشاهدينا الكرام على حسن متابعتكم داعين الله ألا يصيب أيا من أبنائكم بهذا المرض اللعين. في الختام أنقل لكم تحيات فريقي البرنامج من القاهرة والدوحة وهذا أحمد منصور يحييكم بلا حدود من القاهرة والسلام عليكم ورحمة الله وبركاته.