- علاقة الأسر الحاكمة بصراع الإمبراطوريات
- الجدران الوهمية الحاكمة للحكام

- خلافات الملك عبد العزيز مع أبنائه


محمد حسنين هيكل: مساء الخير، هذه المرة هأبتدي.. بأستأذن في إنه هأراجع بسرعة اللي إحنا بنتكلم فيه، الحاجة الأولانية إن إحنا بنتكلم في محاولة استشراف المشهد الذي وجده جيلي بأتكلم على مشهد.. بأتكلم على (land escape) اللي بيسموه الصورة العامة.. الصورة الشاملة، في هذه الصورة الشاملة أنا وقفت قلت إمبارح أو من الأسبوع اللي فات تكلمت على إنه لأول مشهد طالعنا هو مشهد القوة الأميركية التي تبدو وكأنها انتصرت في الحرب ضد النازية وهي فعلا كانت منتصرة لكن هي اللي كانت قادمة ترث كل الإمبراطوريات وإحنا لاقيناها على حافة الأفق في الشرق الأوسط هي دخلت في صراع إمبراطوري مع كل من سبقها وجاءت لترث في النهاية إمبراطوريتين بقيا في التاريخ وهما الإمبراطورية البريطانية والإمبراطورية الفرنسية وتزيح جانبا الاتحاد السوفيتي وهو الإمبراطورية الروسية القديمة القيصرية وجاءت هي متقدمة، ده كان المشهد أو كانت البقعة الأولى التي لفتت نظري ضمن جيلي يمكن يكون فيه ناس غيري في جيلي لما نطل عادة على مشهد معين مشهد واسع.. بانوراما واسعة بعضنا ممكن يبص على الغابة بعضنا ممكن يبص على النخيل بعضنا ممكن يبص على النهر بعضنا يحط على الجبل لكن أنا.. وكل واحد فينا بيشوف مشهد معين يعني بيشوف الصورة العامة كلها البانوراما نتشارك فيها جميعا لكن نقط التركيز قد تختلف من أحدنا إلى الآخر، بالنسبة لي أنا بدا لي إنه أهم حاجة في المشهد الجديد اللي إحنا طالعين فيه هو الظهور الأميركي الذي كان واضحا، الحاجة الثانية اللي لفتت نظري على طول في هذا المشهد وأظنها.. أما حد النهارده يتكلم يقول والله لفت نظري يبقى بيتكلم لفت نظره فيما مضى حينما رأى ولفت نظره أيضا بالتجربة الثقافية اللي تكونت فيها مداركه واهتمامه بالشأن العام، أنا لفت نظري مباشرة بعد الإمبراطورية الأميركية الأسر الثلاثة الحاكمة في العالم العربي لأنه كان موجود الأسرة العلوية الملك فاروق ابن الملك فؤاد في مصر، الملك عبد العزيز أو الأسرة المالكة السعودية في السعودية وكان موجود الهاشميين موجودين في عاصمتين عربيتين وهما بغداد ودمشق.

علاقة الأسر الحاكمة بصراع الإمبراطوريات

"
القنصل الفرنسي دروفتي لعب دورا في تنصيب محمد علي باشا في ظل الصراع البريطاني الفرنسي، كالدور الذي قد تكون لعبته حكومة الهند في الشرق مع أسرة آل سعود
"
الأسر المالكة في اعتقادي مسألة كانت في منتهى الأهمية لأنه الدور اللي لعبوه في التاريخ لعبته هذه الأسر والرجال المؤسسين لها ضمن الصراع الإمبراطوري على المنطقة وهذه مسألة ينبغي أن لا تغيب على بالنا لحظة بمعنى إن إحنا إذا قلنا.. إذا رجعنا ثاني للخريطة طبقا لرأي ديغول وقلنا إنه الزحف كان باستمرار.. الزحف الإمبراطوري متقدم من شمال البحر الأبيض إلى جنوبه باستمرار في اتجاه الشاطئ الجنوبي وإذا قلنا.. افتكرنا إنه في القرن السابع عشر والثامن عشر تمهيدا للقرن العشرين إنه آسيا هنا كان فيها صراع إمبراطوري كبير.. ثلاث إمبراطوريات تتصارع، الثلاث إمبراطوريات المتصارعة في واقع الأمر هي الإمبراطورية البريطانية والإمبراطورية الفرنسية والإمبراطورية الروسية.. القيصرية في ذلك الوقت، الثلاث إمبراطوريات دي كانت واقع الأمر إنها لما نفتكر إنه فرنسا تمركزت بالهند الصينية لما نفتكر إنه روسيا القيصرية تمددت ووصلت إلى الباسفيك المحيط الهادي وإنجلترا مالية الهند وبتزحف وبعدين أهمية النزول جنوبا.. لأنه هنا النزول جنوبا كان جزء منه مهم قوي لو نفتكر كنا بنتكلم على محاصرة طرق التجارة وفتحها للاستيلاء على البحر الأبيض وفتح طرق التجارة في العالم العربي والإسلامي وهنا كان فيه أوروبا بتنزل وهنا كان فيه الإمبراطوريات الأوروبية بتتمدد والعالم العربي الإسلامي محصور بين الاثنين محصور بين البحر الأبيض الموجود هنا ومحصور بين الخليج الموجود هنا والزحف من الهند ماشي والبحر الأبيض والزحف هنا ماشي من هنا، في هذا الجو بنفتكر إنه الأسر المالكة الثلاثة الموجودة في العالم العربي واللي شافها جيلي كلها نشأت تقريبا في هذه الفترة بمعنى إنه أسرة محمد علي قامت في مصر سنة.. أو قامت في مصر في أول قرن والأسرة المالكة السعودية بدت لأول مرة في التحالف بين الأمير سعود الكبير وبين محمد بن عبد الوهاب في نفس الوقت تقريبا الأسرة الهاشمية كانت موجودة خفية لسة في الحجاز ولم تكن ظاهرة وكان حتى الشريف حسين وهو مؤسس الأسرة كان موجود لا يزال في اسطنبول لكن هنا الأسر المالكة الثلاثة اللي بقت في أيديها مقادير الأمور محليا على الأقل لازم نلاحظ إنها واحد نشأت في ظل أو في حركة أو ضمن حركة.. هنا مش بتكلم على إنها من صنع ده بأقول إنها نشأت في ظل صراع إمبراطوري ولم يكن ممكنا أن تكون بعيدا عنه.. مش ضروري إنها تبقى نتيجة من نتائجه لكن هي في ظل تفاعلاته وضمن حركته واللي بمعنى إنه الأسرة المالكة السعودية لم تكن بعيدة قط عن حكومة الهند اللي هي الحكومة اللي كانت بتحكم ولو أنا ما عنديش.. ما حدش عنده وثائق كافية ولا مراجع كافية عن الدور اللي لعبته حكومة الهند في الدولة السعودية.. في قيام الدولة السعودية الأولى لكن نستطيع أن نتصور إنه لما عقدت أول معاهدة سنة 1860 بين حكومة الهند وبين الأمير سعود.. بالأمير فيصل بن سعود وقتها في ذلك الوقت أشير فيها إلى علاقات سابقة حتى الملك عبد العزيز لما جاء يتكلم بعد كده ويعمل معاهدة هو مع الإنجليز قال استكمالا للصداقة القائمة بين عائلتي وبين الحكومة البريطانية، أسرة محمد علي لو نفتكر نشأت بعد نابليون فرنسا.. الصراع بين إنجلترا وفرنسا الصراع الإمبراطوري اللي كان موجود في البحر الأبيض كان إنجلترا وفرنسا بالدرجة الأولى هذا هو نفس الصراع اللي كان موجود لإنجلترا وفرنسا بس كانت زائدة عليه روسيا لكن روسيا كانت بعيد شوية وكان فيه بقايا البرتغال والأسبان إلى آخره لكن إنجلترا وفرنسا كانوا هنا بيتسابقوا في هذه المنطقة ويتسابقوا في هذه المنطقة والهدف هو فتح طرق التجارة والاستيلاء على المنطقة جانب شواهد البترول اللي كانت على أوائل القرن بالذات أوائل القرن العشرين يعني في هذه الفترة نشأت هذه الأسر ولما أقول مثلا على سبيل المثال لما أقول إنه إذا كنت بأقول إن أسرة سعود نشأت بعلاقة ما مع حكومة الهند وإن فيه شواهد كثير قوي بتقول لي الكلام ده لازم أقول أيضا إنه أسرة محمد علي نشأت بنفس الطريقة وبعلاقات ملتبسة جدا بين فرنسا وإنجلترا في ظل صراع إمبراطوري، جاء نابليون غزا ولكن نابليون لما جاء مصر ما كنش هدفه مصر في حد ذاتها بنتكلم على نابليون لو حد.. لو نفتكر كويس قوي وهذه مسائل في منتهى الأهمية لأنه إحنا لما مع الأسف لما جينا ندرس تاريخ بلادنا بعد كده درسنا كل بلد على حدة لوحده خالص دون علاقة بآخرين بينما لو بصينا على الخريطة الشاملة تتضح الصورة قدامنا أكثر لأنه ما كان يجري في المنطقة كان يجري لمنطقة بحالها والصراع عليها وهذا طبيعة تاريخ الصراع عليها مش كان بيجري على حدود الصراع كان على إرث الإمبراطورية العثمانية على إرث الخلاف على الإرث العربي الإسلامي الموجود.. المتمثل في دولة الخلافة في ذلك الوقت واللي هي كانت وريثة دولة المماليك إلى آخره، إذاً يصعب جدا إنه إحنا نتصور إنه الأسر المالك الحاكمة التي نشأت في هذا الوقت نشأت في عزلة عن الصراع الدولي هي موجودة لكن نحن لم نلتفت بالقدر الكافي في دراستنا للتاريخ حتى في المدرس إلى العلاقة الكبرى الموجودة والتي صنعها صراع على إقليم على منطقة بحالها وليس على بلد.. بلد، لما نابليون جاء مصر ما كنش بيتكلم على مصر بحد ذاتها كان بيتكلم على طريق الهند لأنه الصراع أكبر قوي كان من مصر يمكن كان صراع إمبراطوريات ماهيش ممالك بس، محمد علي لما جاء.. لما أنشئت أسرة محمد علي.. أسرة محمد علي لما حد يقول لي والله إنه محمد علي إحنا درسنا في المدارس كلها في مدارسنا وإحنا شباب وإحنا صبية صغار إنه أسرة محمد علي بايعه العلماء وثائق التاريخ كلها بتقول إنه علماء الأزهر آه محمد علي كان قائد تركي محلي له شعبية بين الناس لكنه ما أتى به في الفراغ اللي نشأ بعد سقوط.. بعد انسحاب نابليون من مصر في هذا الفراغ الذي نشأ هو الصراع البريطاني الفرنسي اللي محمد علي استفاد منه أو ما استفدش منه اقترب منه أو ابتعد منه بدرجات لكن القنصل الفرنسي في ذلك الوقت في مصر دروفيتي لعب دورا في تنصيب محمد علي زي الدور اللي ممكن تكون حكومة الهند لعبته في الشرق مع أسرة آل سعود، حاجة غريبة قوي لما حد يبص يشوف كيف.. ماذا تقول لنا وثائق التاريخ لأنه هنا إحنا أنا أظن إن إحنا قرأنا التاريخ كثير قوي بعيد عن وثائقه لكن أنا ما بأهتمش.. بأهتم جدا طبعا بالكتب الناس اللي بيأرخوا لكن ما يهمني أكثر في واقع الأمر هو الوثائق لأنه الوثائق ممكن تدينا نظرة أوسع إلى ما كنا.. إلى ما نحن بصدد أن ندرسه وأن نفهمه الوثائق لما بتقع في يد مؤرخ فرنساوي ولا في يد مؤرخ إنجليزي هو يتصرف فيها برؤية معينة، إذا أنا بمنظور محلي شفت وثائقي الأصلية أقدر أبص فيها بطريقة مختلفة، لما أبص ألاقي وثائق فترة محمد علي وإحنا جبناها يعني هأتكلم يمكن فيها مرة بعدين الثانية لكن وثائق نابليون والفترة المحيطة بها كلها أنا بأعتقد إنها كلها موجودة في حوزتي واهتميت بها قوي وأظن جبتها بجهد خارج عن جهد الدول لكن ده موضوع ثاني هأتكلم فيه حالا، لكن لما نقرأ وثائق القنصلية الفرنساوية اللي كاتبها دروفيتي اللي هو كان القنصل اللي سابه نابليون نعرف إلى أي مدى الصراع الفرنسي الإنجليزي لعب دورا في تنصيب محمد علي وإلى أي مدى محمد علي في واقع الأمر يكاد يكون اشترى ولاية مصر من القنصل من فرنسا في مواجهة صراع مع إنجلترا والثمن اللي دفعه محمد علي هو.. وهذا ملفت للنظر جدا هو آثار مصرية أن تصرح لدروفيتي.. دروفيتي هو القنصل الموجود هنا والفرنسيون مبهورين بالآثار المصرية، القنصل الإنجليزي والقنصل البريطاني بيتصارعوا مع هذا الأمير الألباني أو هذا الجندي الألباني اللي جاء في مصر واللي الظروف في مصر إدته فرصة هايلة يتقدم الصفوف في الحامية التركية في مصر ويصبح إلى حد ما الأكثر شعبية بين الضباط الأتراك الموجودين والمتصارعين على الولاية بعد هزيمة نابليون وبعد كسر أسطوله في أبو قير إلى آخره، دروفيتي بيلعب هو والقنصل الإنجليزي بيلعبوا أدوار مهمة جدا والغواية اللي بيدفعها محمد علي هي تصريح بنقل وبحث والاستيلاء على كمية آثار وهذا الرجل في حد ذاته لوحده دروفيتي أنشأ متحف بحاله هو متحف توريم في إيطاليا لأنه على أي حال لأن هو كان من أصل طلياني لكن عرش مصر في هذه الفترة أسرة محمد علي مع مطامع محمد علي ومع الدور المهم اللي يكون لعبه محمد علي ومع القيمة اللي موجودة عند محمد علي ومع تصورات محمد علي.. محمد علي كان موجود في إطار صراع فرنسي بريطاني لعب دورا في توليته بأكثر مما لعب علماء الأزهر مع تقديري لكتب التاريخ، خلي بالنا أنه في هذه الفترة.. كتب التاريخ اللي درسنها يعني لكن أنا في هذه الفترة وكل فترات غيرها أفضل جدا الرجوع إلى الوثائق الأصلية لكي نتبين ماذا كان في ذهن المتصارعين والمخططين والقوى الإمبراطورية المتصارعة والأمور تتكرر في بلادنا بشكل أو آخر حدث شيء من هذا النوع تقريبا في الشرق من شبه الجزيرة العربية حكومة الهند كانت بتلعب دور في منتهى الأهمية في الأوضاع اللي في شبه الجزيرة العربية والمتاخمة للخليج والمتاخمة للهند والقريبة من المطامع والمصالح الإمبراطورية المتصارع عليها في هذه المنطقة، فيما بعد جاء دور الأسرة الهاشمية، واقع الأمر أنه لو بصينا على خريطة العالم بنشوف الدور اللي اتعمل في الصراع في المنطقة.. الزحف الإمبراطوري من البحر الأبيض ومن المحيط الهندي طيب نركن دي، لو بصينا في خريطة أخف نقدر نشوف الصلة ما بين.. أنا اللي عاوز باستمرار أحضَّر منه أو على الأقل ألفت النظر إليه.. ألفت النظر إلى أنه التاريخ والصراعات الإمبراطورية والصراعات العالمية لا تعرف الحدود السياسية زي ما إحنا رسمناها وزي ما إحنا بنتصورها، الصراعات شاملة والصراعات مقتحمة والصراعات داخلة فاللي كان بيجري هنا في شبه الجزيرة العربية في الشرق مجاورا لحكومة الهند كان له مثيل في الغرب على البحر الأبيض في أوضاع مصر وبعدين بقى له أثر هنا ثاني، لو أنا سبت دول وبعدين جئت بقى وهنا أهم حاجة بالنسبة لي اللي هي الأسر المالكة آه بأتكلم أهم حاجة بالنسبة لي في هذه اللحظة في هذا الموضع من حديثنا في هذه النظرة على المشهد العام في المنطقة ألاقي إيه؟ ألاقي وهنا فيه موضوع لازم نبقى فيه قد ما نحس بالحساسية لازم نؤكد أولا أنه إحنا بنتكلم في أي حد إحنا بنتكلم عنه باحترام شديد جدا لأنه ببساطة التاريخ صراعات والتاريخ ليس ألعوبة وليس مؤامرة لكن المؤامرة موجودة واللعب بالناس وبالمقادير موجود يعني على أي حال لكن لما إحنا جيلنا تفتَّح على المشهد العام اللي بعد الحرب اللي هي الفترة اللي بتكلم عليها الفترة اللي شوفتها الفترة اللي ممكن أقول إن أنا عشتها وهي الفترة ما بين نهاية الحرب الساخنة الحرب العالمية الثانية أو قرب نهايتها إلى نهاية الحرب الباردة وهي لا تزال مستمرة معانا بأتكلم على ثلاث أسر لعبت أدوار مهمة جدا وبأتكلم عنها بكل احترام لكن أيضا بنتكلم بكل واقعية ونحاول قدر ما يمكن أن إحنا نستند بالوثائق، كل واحد كل أسرة من هذه الأسر كل ملك من دول أنا لما جيت أحضر نفسي عشان أتكلم في هذا الحلقة لاحظت حاجة غريبة قوي لاحظت أنه كل ملك وكل رئيس دولة من هؤلاء الناس السعوديين والمصريين والهاشميين كل واحد فيهم كان محصور داخل مربع تقريبا فهمَّا كانوا ثلاث ملوك.. ثلاث أسر حاكمة داخل أربع جدران.

الجدران الوهمية الحاكمة للحكام



"
الملك فؤاد رأى أن مصر التي تحتضن الأزهر لها الحق في الخلافة، والملك عبد العزيز ألمح إلى قبوله الخلافة إذا أراد العرب خلافة عربية إسلامية، أما الشريف حسين فتصور أنه من نسل الرسول (صلى الله عليه وسلم) وبالتالي الخلافة من حقه الطبيعي
"
الجدار الأول هو قبل أي حاجة نظرة كل واحد فيهم لنفسه كل واحد فيهم الملك فؤاد كان شايف نفسه أو محمد علي حتى محمد علي لغاية الملك فؤاد كان شايف نفسه بشكل، الشريف حسين شايف نفسه بشكل، الملك عبد العزيز شايف نفسه بشكل، الملك فؤاد شايف نفسه أنه والله هو موجود في البلد العربي الأكثر تقدما والأكثر أهمية هو الأسرة اللي بقيت حاكمة أو موجودة من أوائل القرن الثامن عشر لغاية قرب القرن العشرين.. نصف القرن العشرين، هو شايف أنه هما عندهم صلات بأوروبا وعندهم علاقات وأصلهم أتراك وأصلهم ألبان بشكل أو بآخر بينظروا لنفسهم نظرة متميزة مختلفة عن بقية.. حتى في المحادثات الخاصة للملك فؤاد لما كلهم كانوا عاوزين الخلافة لما وقعت الخلافة كانوا بيشتركوا جميعا في أنهم.. الإمبراطوريات متخانقة مع بعضها لكن الإمبراطورية العثمانية اللي ورثوها وورثوا ممالكها كلها كان عندها حاجة ثانية كان عندها سلطة شبه دينية.. شبه دنيوية وهي سلطة الخلافة وبقوا الملوك الثلاثة الموجودين دول كمان لما نفتكر الإمبراطوريات اللي كانت ساعية للسيطرة على المنطقة كانت بترث الخلافة العثمانية بترث الإمبراطورية العثمانية كنا قدام حاجتين، قدام الإمبراطورية العثمانية المالكة لهذه المناطق وقدام الخلافة الحاكمة بالهيبة الدينية على هذه المناطق ولازم نفتكر أنه حتى أيضا لفظ ملك.. كلمة ملك تعني حاجتين اثنين حتى في أي تعريف سياسي يعني تعني شيخ مدني.. شيخ قبيلة في واقع الأمر شيخ قبيلة مدني وله طابع ديني أو أخذ سلطة دينية كمان ولذلك حتى في ملوك أوروبا لما كانوا يقولوا والله حتى لغاية النهاردة ملكة إنجلترا لما تيجي تتكلم تقول بنعمة الله وبإرادة شعبي، فكرة الملك اللي هي فكرة زعيم القبيلة أو رئيس القبيلة.. الملكية اللي فيها السلطة الدينية والسلطة الدنيوية ملتبسين بتصورات نعمة الله وإرادة البشر.

[فاصل إعلاني]

محمد حسنين هيكل: إخواننا دول الملوك الثلاثة أو الأسر المالكة الثلاثة لما جُم هما الأسر نشأت في القرن التاسع عشر أوله لكن بعد ما وقعت الخلافة والإمبراطوريات اللي وقعتها موجودة جنبهم هما أيضا نشأت ممالكهم بتقسيم الخلافة لكن أيضا هما كل واحد فيهم أيضا طامع إلى أن يحل محل خليفة لأسبابه، الملك فؤاد مثلا على سبيل المثال ضيع وقت كبير جدا في لعبة الخلافة لأنه متصور أنه والله في هذه المنطقة في العالم العربي الإسلامي وهو ملك على مصر وفيها الأزهر هو الأحق بالخلافة فهو اللي ممكن يرث.. ده في نظرته لنفسه، الملك عبد العزيز عنده حاجة غريبة قوي يشرحها الكاتب العظيم اللبناني أمين الريحاني لما راح.. لما كتب كتابه ملوك العرب وراح شاف كل الملوك، الملك عبد العزيز وهو بيكلمه قال له إيه؟ قال له أنت عاوز الخلافة؟ قال له نحن لا نطلبها لكن يسعوا إلينا فنقبلها وحتى فيه.. أمين الريحاني لفت نظره أنه الملك عبد العزيز قبل ما يتكلم يقول نحن يقول حِنَّا العرب فهو كان بيقول والله إخوانا الهاشميين دول في الحجاز دول أتراك ولا لهم دعوة بالعرب نصفهم أتراك ملهمش دعوة بالعرب، الملك فؤاد على عيني ورأسي وفوق تاجنا ورأسنا وكل اللي انتووا عاوزينه لكنه ألباني وتركي لكن نحن العرب فإذا أراد العرب خلافة عربية إسلامية فيجولنا وإحنا في هذه الحالة نقبل فالملك عبد العزيز كان يتصور أنه عنده حق، الملك حسين أو الشريف حسين يتصور أنه والله نسل الرسول وبالتالي فالخلافة حقه الطبيعي حتى بالإرث والإنجليز شجعوه على هذا الوهم وبالتالي الشريف حسين بقى فعلا متصارع من أجل الخلافة طيب يبقى كل واحد في نظر نفسه هو ينظر إلى الخلافة بشكل معين لكن نشوف بقى كل واحد فيهم المربع الذي يحاصره.. الأربع جدران اللي حوالين ملك نلاقيه إيه؟ نلاقي فيه أربع جدران حوالين كل واحد فيهم، أول حاجة.. المربع الأول هو القوة الأجنبية الساندة لهم والثلاثة القوة الساندة لهم كانت إنجلترا من غير مناقشة لأنه في الصراع الإمبراطوري على هذه المنطقة بالذات خرجت بريطانيا.. خرجت الإمبراطورية البريطانية متفوقة سواء في الهند بضغط حكومة الهند أو بأسطول البحر الأبيض أو بالسيطرة على مصر بعد الاحتلال فإنجلترا كانت هي الدولة الموجودة الساندة لكل.. وها نشوف إزاي دلوقتي حالا.. لكل هذه النظم، الحاجة الثانية كل واحد فيهم كان عنده مشكلة مع شعبه بشكل أو بآخر لأسباب أو لأخرى الملك فؤاد كان عنده مشكلة مع سعد زغلول مع حزب الأغلبية.. الحيطة الأولنية قولنا النفوذ الأجنبي أو القوة الأجنبية الساندة، الحيطة الثانية هي شعبه في مرحلة الملك فؤاد الوفد.. الوفد بيتكلم على حاجة ثانية وبيتكلم على دستور وبيتكلم على تحديد سلطة الملك إلى آخره، الحاجة.. الحيطة الثالثة هي الأسرة.. الأسرة طالع فيها زعيم لكنه ليس الزعيم الذي لا يقاوَم ولا يناقَش علشان يفرض سلطته اقتضاه الأمر صراع داخل عائلته ثم اقتضاه الأمر أن يتصارع مع غيره من المطالبين بيه يعني الملك مثلا فؤاد كان عنده.. جه بعد خلع عباس حلمي.. بعد خلع عباس حلمي الثاني وجاء بعد تولي السلطان حسين كامل لفترة محدودة وجاء بعد الأمير حسين ابن السلطان حسين كامل.. حسين كامل ما اعتذر عن ولاية العرش في ظل الحراب البريطانية لأنه متصور الخلافة لا يزال متصور الخلافة كانت مصر أعلنت الحماية عليها سنة 1914 والأمير حسين كمال الدين متصور أنه الخلافة هي اللي توليه ومش الإنجليز والإنجليز جابوا الملك فؤاد، فيه ثورة شعبية في مصر جاية وبتطالب بدستور وبقيادة سعد زغلول فالملك فؤاد عنده مش بس خناقة مع شعبه لا عنده خناقة مع أسرته، فرع حسين كامل يعتقد أنه معتدي على العرش أخذ عرش من غير حقه فرع الخديوي عباس حلمي يعتقد وفضل يعتقد ولغاية آخر يوم فرع طوسون وفرع حليم وفرع الخديوي توفيق كانوا مصممين أنه.. أو في اعتقادهم أنه الملك فؤاد اغتصب عرشا ليس من حقه وأنه ما كنش له حق يخده فعنده إشكال مع عائلته، الحاجة الثالثة أنه.. الرابعة.. الحيطة الرابعة يعني أن كل واحد فيهم عنده مشكلة مع غيره من الأمراء المتنافسين في حالة الملك فؤاد أنا قلتها عائلته كلها متخانقة معه فبقى كل من دول عنده مشكلة عنده قوة ساندة عاوزة تحجمه وهو يدين لها بالولاء لكن ما هواش قابل ده قوي وعنده شعب فيه مشاكل له معاه وبعدين عنده علاقة مضطربة مع أسرته وعنده علاقات مضطربة مع الأمراء التانيين بيكرهوا بعض كلهم الملك فؤاد ما بيحبش رأيه أنه الهاشميين يعني على عيني ورأسي والملك عبد العزيز رأيه أن دول مش عرب فكل واحد فيهم في خناقة مع القوة الأجنبية اللي بتسنده في خناقة مع شعبه في خناقة مع أسرته في خناقة مع غيره من الأمراء وكلهم في هذا الوضع الأربعة، لو نيجي نشوف وأنا هنا بأقترح أن إحنا نبص بصة في الملفات.. في الملف عشان نشوف إلى أي مدى.. دي على فكرة دي وثائق أصلية يعني أنا عندي مشكلة مع الوثائق الأصلية وجايبة لي.. أنا عندي هواية الوثائق الأصلية لكن جايبة لي مشكلة في نفس الوقت لأنه بعض الناس بيتصوروا أنه والله أنا خدت وقت عبد الناصر أنا كنت موجود وده ليس صحيحا، أنا جمعت وثائق.. جمعت وثائق كانت ضائعة سواء في عصر عبد الناصر أو في غيره بمعنى أن أنا على سبيل المثال أنا عندي هنا أوراق كرومر طبعا ما جبتش كل الأوراق معايا يعني لكن أنا في لندن ماشي يوم من الأيام في شارع بوم ستريت وفيه مزاد على أوراق كرومر أوراق كثير كده حاجات بتتباع وبعدين أنا دخلت فيه بيتباع عفش وأثاث وحاجات كده كلها وبعدين بأتفرج أنا ببص كده لقيت فيه أوراق ولقيت أوراق كرومر بعضها قد لا يعنيني قد لا يهمني لكن أنا وقفت قلت لو كان يبقى فيه سعر معقول أنا والله أخش أشتريها وبعدين لقيت أوراق كرومر جت وما حدش.. هي بعض مجموعاته السياسية كلها كانت راحت في الأرشيف لكن فيه اللي كان عند عائلته بعض الأوراق اللي كانت عند عائلته جزء منها شخصي وجزء منها سياسي عائلته باعتها وراحت وإلى آخره يعني ودخلت لقيت الثمن معقول اشتريتها، بعض الناس طيب تشتري ورق كرومر ليه؟ بالنسبة لي أنا بأعتقد أنه أنا أريد أن أطل مش.. فيه فرق مش عايز الماضي أنا الماضي الناس يروحوا يشوفوه في الآثار لو عاوز أشوف الماضي أروح أتفرج على الهرم وأروح أشوف أبو الهول وأروح الكرنك إلى آخره لكن إذا كنت أنا مهتم بالتاريخ وهو الجاري الحاضر وهو التيار المتدفق للحوادث والمؤثر فيها لأنه إمبارح مش في عزلة عن النهارده بيبقى بتهمنا فأنا بأتصور أنه فيما يتعلق بي وأنا راجل راغب بحكم المهنة.. راغب في متابعة التاريخ وفي أصول الحوادث لأنه لا يكفي أن ننظر إلى سطح الحوادث وراجل راغب في أني.. أن أراجع عن طريق المصادر الأصلية فأنا عباس حلمي وورق عباس حلمي الثاني.. يعني أنا مثلا هنا فيه صورة غريبة جدا في العلاقات لو أنا بأتكلم عن علاقات الملك فؤاد بعائلته على سبيل المثال فيه صورة للملك فؤاد واقف جنب الخديوي عباس لكن حاجة غريبة قوي الصورة تحتها.. مكتوب تحتها بالآلة الكاتبة أنه ده الخديوي واقف مع عمه هو كان عمه.. الملك فؤاد واقف مع عباس حلمي الثاني لكن على ظهر الصورة فيه ورقة كانت بالقلم الرصاص بتقول.. أنا آسف أقول الكلام ده بس مش أنا اللي قائله حد كاتب ورقة أنه السيد والكلب، أنا هنا بأبص في دي.. دي بتعنيني في حاجات لأنها بتدي صورة لما هو في الداخل أبص ألاقي مثلا إيه في الملك فؤاد في علاقاته مع سعد زغلول الوثائق المصرية كلها مليئة بالخلافات اللي بين الملك وبين شعبه سواء على الدستور مليانة وكلنا عارفين فيه حاجات كثيرة قوي فالعلاقات اللي جوه مع عائلته أيضا يعني فضلت لغاية آخر يوم تقريبا أنا بأعرف نبيل عباس حليم مثلا، عُمْر عباس حليم ما اعترف بأن فاروق ملك إطلاقا وحتى وفاروق ملك أنا سمعت من نبيل عباس حليم وقتها سمعت أنا كنت بأعرفه معرفة شخصية لفترة طويلة يعني وشفته عن قرب يعني وهو كان راجل بيحاول يبقى شعبي وبيحاول يبقى يرأس الحركة العمالية وكان شخصية غريبة شوية لكن شفت كراهية الأسرة لعميدها وهو الملك فؤاد وبعدين الملك فاروق، عباس حلمي مثلا وهو بره حاجة غريبة قوي الكلام اللي كان بيهتم جدا عباس حلمي فضل لغاية آخر يوم مات فيه يسعى ويتآمر للعودة إلى العرش بكل وسيلة وكل.. وكان عنده جواسيس في مصر وأنا لما أقرأ مثلا الجوابات ألاقي الجوابات.. التقارير اللي مرفوعة له أو التعليمات اللي نازلة منه وهو في المنفى وهو في اسطنبول مرات أو في برلين مرات أو في مونت كارلو مرات قاعد يتابع ما يجري في مصر ويتصور أنه كل أزمة سوف تستدعيه، حاجة غريبة قوي أنه مثلا لما حصل إنذار لسعد زغلول في سنة 1925 بسبب بعد اغتيال سردار الجيش المصري السير ليستاك الإنجليز وجهوا إنذار لسعد زغلول واستقالت الوزارة وتصور عباس حلمي أنه هذه الأزمة سوف تصل إلى الملك فؤاد وسوف تنتهي بعزله، كمية الناس اللي عمالين يكتبوا خطابات من مصر للخديوي عباس حلمي على الملك فؤاد وأنه الأزمة اللي جاية دي سوف تطيح به والشعب عمال ينادي بأنه سموَّك ترجع للعرش ثاني وفي الغالب كله نصب يعني أنا عارف أنه الخديوي عباس حلمي الثاني كان له شيء من الشعبية في مصر وأنا فاكر أنه أنا وأنا طفل كان من الحاجات اللي كنا بنتكلم عليها وما كنتش أعرف معناها إيه أنه كان يقولوا الله حي عباس جاي وما كنتش أدرك أنه هذا شعار يُلقَى في الشارع أو أُلقي في الشارع في وقت الخناقة اللي بين سعد زغلول وبين الملك فؤاد على الدستور وفي وقت الأسرة متخانقة مع الملك فؤاد إلى آخره ما كنتش باخد بالي من إيه الله حي عباس جاي وضرب البومبة في ظهر العمدة وهو جاي وكلام كده من النوع ده لكن هذا في واقع الأمر كان كلام في السياسة العليا وإحنا بنقوله في المدارس المدرسة الابتدائي ولا.. ونحن لا ندري معانيه لكنه وراه كان أشياء كثير جدا، لما أقعد أقرأ الجوابات إزاي إخوانا اللي قاعدين يبعتوا للخديوي عباس يقولوا والله الشعب يطالب بعودتك والمسألة منتهية، على أي حال مش عايز أضيع وقت كثير أي فيها لكن في الوثائق كلها الخديوي عباس وهو قاعد بره كان عَمال ناس تبعت له تقارير حتى على سهرات الملك فؤاد ومع صديقاته ومع عشيقاته وبيودي مين في قصر عابدين وبيقابل مين بالليل وما بيقابلش مين بالليل فكله مشغول طيب الملك فؤاد مشغول بالخديوي عباس والخديوي عباس مشغول بالملك.. والملك فؤاد مشغول بالإنجليز وها يخلوه يبقى سلطان بعد.. يبقى ملك بعد ما كان سلطان ولا ها يمنعوه من إيه وها يسبوه يبقى خليفة وما يرضوش يبقى خليفة وإلى آخره وقاعد قلقان من السعوديين ها يعملوا إيه وما يعملوش إيه وها يسبقوه للخلافة ولا مش ها يسبقوه للخلافة وبيعتقد أنه هو أحسن منهم وبعدين عنده مشاكله مع عائلته وعنده مشاكله مع شعبه وعنده مشاكله مع الإنجليز فكله.. الشريف حسين.. الشريف حسين أيضا لو أنا بصيت في كان فيه حاجة دائما بيعملوها معانا لما الواحد يبص في وثائق الشريف حسين وأوراقه وهي كلها بقت متاحة لكن يلاقي فيه حاجه لا تزال مستمرة في العلاقات مع الإنجليز وأنا بأتكلم باستمرار بأقول نحط في ذهننا باستمرار ونحن نتكلم عن هذه الأسر المالكة التي لفتت نظرنا الثلاثة في المشهد لفتت نظري أنا في المشهد الذي شاهدته بعد.. في بداية وعيي أو في بداية الوعي وغيري قد يكون التفت إلى غيره باستمرار هؤلاء الملوك الثلاثة داخل هذه الجدران الأربعة لأنها هذه لعبت أدوار مهمة جدا في تشكيل حياتنا وفي حاضرنا وفي مستقبلنا، لما بدا الشريف حسين راخر بيتكلم مع الإنجليز.. ماهو إنجلترا هي الدولة الإمبراطورية اللي خرجت منتصرة وهي الدولة التي في يدها أن تقيم الممالك وأن تزيلها وكله بيحاول يصلح علاقته مع الإنجليز أو بيحاول يتصل بالإنجليز كما أنه نشأتهم جميعا ليست بعيدة على الإطلاق عن النفوذ الأجنبي وأوله النفوذ الإنجليزي دون أن أقول أنه هؤلاء ناس كانوا عملاء.. أنا لا أتصور أني أقدر أقول كده أبدا لكن الناس دول كلهم كانوا موجودين في وقت صراع سواء استفادوا من الصراع.. الصراع أفادهم لكن على وجه اليقين هما كانوا نتيجة أو ظاهرة من ظواهر نشأت في أجواء صراع إمبراطوري معين ولا أستطيع أن أعزل نشأتهم عن هذا الصراع الإمبراطوري.. فيه حاجه همَّا عملوها معانا ولا تزال تجري حتى هذه اللحظة لما بدوا يتراسلوا معانا هما عرفوا ملوك الشرق كويس عرفوا منطق الحاكم الشرقي.. الحاكم الشرقي عايز التبجيل عايز تفخمه جدا تمدحه وتطريه وتتكلم عن مزاياه وتوري أنه هو منبع الحكمة إلى آخره يعني لأنه يتصور بهذا الحاكم الشرقي وفيه غيبة ديمقراطية حقيقية فيه غيبة نمو طبقي وفيه غيبة أشياء كثيرة جدا من وسائل العصر الحديث يتصور أنه مديحه أولا يرضيه ويقويه قدام بقية الأمراء لكن حاجه ثانية كمان أنه يفيده قوي قدام شعبه لأنه الجماعة الأقوياء شوفوا بيكلموني إزاي يعني لما ألاقي مثلا إيه ... في أول رسالة له بيبعتها للشريف حسين عشان يقول له تعالى انضم معانا لاحظ المقدمة إلى السيد الحسيب النسيب سلالة الأشراف وتاجر الفخار وفرع الشجرة المحمدية والدوحة القرشية الأحمدية صاحب المقام الرفيع والمكانة السامية السيد ابن السيد والشريف ابن الشريف السيد الجليل المبجل دولة الشريف حسين سيد الجميع أمير مكة المكرمة قبلة العالمين ومحط رجال المؤمنين عمة بركته الناس أجمعين بعد رفع الرسوم وافر التحيات العاطرة والتسليمات القلبية الخالصة من كل شائبة تعرض لنا الشرف بتقديم واجب الشكر إيه ده.. إيه ده لغاية النهاردة فيه كلام قريب من النوع ده بس أكثر حداثة يعني أكثر حصافة على أي حال في مناسب العصر لكنه كانُم.. إحنا كنا بنتكلم في لو أنه الأمر اقتصر على ما في الداخل ما كانش عندي مشكلة فيه لكن المشكلة أنه هنا فيه أوطان ضاعت فيه مع الشريف حسين على سبيل المثال وأنا رجل مقدر جدا هو كان عايش في أي ظرف هو راجل حتى كان عنده في النهاية مشاكله مع أبنائه كان رجل بيعتبر أنه أبناءه خانوه يعني هو لما قعد مع الريحاني وجاب له سيرة أبناءه لأنه هو عنده ابنه الملك فيصل راح من وراه تفاوض وراح على عرش سوريا وراح على عرش العراق وعنده ابنه عبد الله راح شرق الأردن وجه تشرشل رسم له مملكة هناك كده على حتى ما قدروش يلاقوا لها اسم فسموها شرق الأردن فالملك الشريف حسين والريحاني بيكلمه بيقول له ما تكلمنيش على الأبناء لأنه الأبناء بيقول له تقريبا أسكت يا أستاذ الأفاعي بيتكلم على أبنائه باعتبارهم خانوه.

[فاصل إعلاني]

محمد هيكل: لما جاؤوا الملوك وهم بيحاولوا كل واحد فيهم أخذ موقع قدم بدأ كل واحد يرسخ موقعه حيث هو ويتصور أن هذه هي حدود الرؤية وبالتالي فيه أشياء كثيرة جدا ضاعت، أنا تكلمت مثلا على وثائق الملك فؤاد والخديوي عباس، أشرت إشارة سريعة جدا لوثائق الهاشميين لأنها معروفة، السعوديين أنا.. السعوديين وهذا وده ما هياش سر هذا كله موجود وهذا كله بيباع بمعنى أنه كلية سان أنتوس في إنجلترا اللي هي مهتمة بالشرق الأوسط بتسجل كل الوثائق المرسلة فأنا مشتريها.. فاتورة الوثائق مجموعة وثائق وهي أربعة مجلدات أنا مشتريها من سان أنتوس، ما عرفش ليه إحنا ما بنحاولش نجيب مرة الناس المسؤولين عنا يجيبوا مرة.. يحطوا أمامهم اللي بتعمله الدول كلها ما فيش سر فيه الوثائق كلها بعد مدة معينة بتبقى موجودة متاحة بعد مدة أطول حوالي مثلا سبعين أو ثمانين سنة بتطلع كلها في مجموعات بتبيعها الجامعات وبتبيعها الأرشيفات الدولية وفيها كل حاجة موجودة حتى الحاجات الشخصية، يعني غريبة جدا مجموعة وثائق الملك عبد العزيز على سبيل المثال فيها جوابات حتى وهي بعضها مهمة قوي.. فيها جوابات على سبيل المثال الملك وأنا بأتكلم عن الخلافات.

خلافات الملك عبد العزيز مع أبنائه



"
لورانس العرب كان ضابطا في المخابرات تولى إدارة شؤون العالم العربي بعد الحرب العالمية الأولى، وفي تسجيلاته لمحاضر الجلسات بين إنجلترا وفرنسا شرْح لما تم بينهما من صفقات على تقسيم المنطقة
"
الملك عبد العزيز أبناؤه الكبار اشتكوا أنه والله الملك بيغدق على أبنائه من الزوجات القدامى.. على أبنائه من زوجاته الجدد.. المحظيات الجدد بأكثر مما بيدي القدامى وحصل تقريبا أن الملك حس أو سمع الملك عبد العزيز أن أبناءه الكبار الأربعة وهمَّا أمير سعود اللي بقى ملك بعد كده والأمير فيصل اللي بقى ملك بعد كده والأمير محمد ما كانش عنده فرصة يبقى ملك والأمير خالد اللي بقى ملك بعد كده، الثلاثة سمع أنهم مش مبسوطين شوية من حاجات فكتب لهم جواب.. من عبد العزيز بن عبد الرحمن الفيصل إلى الأبناء سعود وفيصل ومحمد وخالد بعد ذلك من طرف أربعة الأمور التي سأذكرها لكم أدناه وهي، واحد أولا أن تكونوا يدا واحدة فيما بينكم.. بسيطة دي لكن بقى الأهم، ثانيا أن كل شيء آمر فيه تنفذونها ولا تعترضونها أو تعارضوا من وكلت إليه أمرها، ثالثا كل ما سألتكم عنه أو لزم رفعه إليه تصدقوني فيه بأي حال من الأحوال، رابعا أن لا تعترضوا أمور ماليتي لا قريبها ولا بعيدها في قليل ولا كثير، هذه الأمور الأربعة افهموها واحرصوا على تنفيذها بتنفيذ موجبها وكل شيء يصير منكم مخالفا لشيء منها اجزموا أنه سيكون سببا لسخطي عليكم يكون معلوما لكم، ختم عبد العزيز، كتبوا له الأربعة تحتها أو بعثوا له رد، بسم الله الرحمن الرحيم أدام الله وجودكم، بعد لثم أياديكم الشريفة كل ما ذكره جلالتكم أعلاه عن الأربعة أمور فهمها مملوكينكم.. المملوكين بتوعه وإن شاء الله نعمل حسب ما بها وترون ما يسركم ويرضيكم بحمد الله وقوته مملوككم سعود، مملوككم فيصل، مملوككم محمد، مملوككم خالد، إحنا ما فيش سر في الوثائق.. الوثائق غريبة قوي أن الوثائق حتى فيه وثيقة غريبة قوي موجودة فيهم.. فيهم.. فيه وثيقة من أولى زوجات الملك.. الملك عبد العزيز أنا ما عرفش اتجوز قد إيه لكن هنا فيه القنصل.. كان فيه قنصل مهم جدا قعد في إنجلترا ودي جواباته.. مجموعة جواباته مش مذكرات ولا حاجة.. دي مجموعة جواباته لعائلته ده سير لايدر بولارد كتب.. كان بيكتب جوابات لعائلته لكن هو هنا كان بيقدر بشكل آخر في واحد من الجوابات كان بيقدر أنه الملك عبد العزيز في حسابه هو مائة وخمسين واحدة مش مشكلة يعني لكن دي عملت مشاكل كبيرة قوي لكن ها نتكلم فيها برضه ثاني، بمعنى أنه حتى الوثائق الشخصية للملوك كلهم موجودة ومتاحة وما فيش فيها سر وبعدين الملك عبد العزيز مثلا في العلاقات مع الإنجليز الملك عبد العزيز هنا ومجموعة الوثائق كلها مليانة.. ده أربعة أجزاء أنا جايب معي جزء واحد بس لكن.. ومع الملك مع شريف حسين الملك عبد العزيز وشريف حسين الاثنين بيأخذوا بيطلبوا.. الملك فؤاد ما كانش بيطلب معونات مالية عنده دولة كبيرة وما عندهوش مشكلة معونات مالية لكن الملك عبد العزيز من الأول خالص كانت طلباته وهي طلب الفلوس كل شوية بيطلب ذهب عايز مائة ألف روبية عايز سلاح وبعدين في الآخر بتقول له بيجي له جواب رسمي يقول له ليكن معلوما لديكم أنكم منذ الآن تحت حماية حكومة الهند طبعا، حكومة الهند البريطانية، إحنا الملك.. شريف حسين كميات طلباته من الفلوس والسلاح لا تنتهي، الملك عبد العزيز بتروح له الفلوس داخل سحارات ويتكلموا عن السحارة الكلام كله عن السحارة دي وصلت لي من المركب واتأخرت والسحارة اللي فيها ذهب والذهب ده له مصدر أرجو أن دي تبقى في الذاكرة لأنه هأرجع لها فيما بعد في حلقة قادمة كمية الذهب اللي بتتصرف واللي بتتطلب والحاجات دي كلها كمية مهولة، فيه فاضل حاجة مهمة جدا نتكلم فيها على علاقته مع القوى الحامية وماذا أخذت منه هذه القوى الحامية وماذا أعطت له، أنا في هذه اللحظة معي جايب معي عدد قليل جدا من صور وثائق، أنا هأسيب على جنب خالص ماذا في هذه الفترة وهؤلاء الأمراء يسعوا إلى رضى بريطانيا ويسعوا إلى أنها تثبتهم في مماليكهم وتسعوا.. كل واحد منهم يسعى إلى أنه الحكومة البريطانية لا تعترض مسعاه للخلافة والحكومة البريطانية رافضة كل مسعى للخلافة مش علشان حاجة ثانية رافضة لكل مسعى لسببين، السبب الأول أنها لا تريد أن تعطي لأحد منهم قيمة تتعدى حدوده لأنه مطلوب أن كل واحد منهم يلزم حدوده ولا يخرج منها والقيمة الثانية أنها لا تريد حاجة موحدة لا تحت فكرة عروبة ولا تحت فكرة إسلام، أول حاجة أنا ها أحطها هأسيب على جنب أن في هذه الفترة وضمن علاقتهم مع الملوك وضمن الكلام بتاع السيد الدوحة القرشية وأمير الأمراء وخاتمة مش عارف إيه ده كله في هذه الفترة أعطوا حاجتين مهمين جدا عملوا اتفاقية سايكس بيكو قسموهم كلهم ممالك صغيرة والحاجة الثانية أعطوا وعد بلفور أعطوا وطن قومي في وسط المنطقة دي كلها لليهود طيب كيف تعاملوا مع القضايا؟ كيف تعاملوا مع قضايانا إحنا كلنا رحنا في الحرب العالمية الأولى وقفنا جنبهم يعني مش جنبهم وقفنا أتحنا كل حاجة لهم والشعوب متصورة شيء والملوك متصورين شيء، الشعوب متصورة أن هم بعد الحرب ها يبقى فيه نوع من الاستقلال وفيه نوع من الوحدة بين هذه الأمة سواء كانت خلافة أم مش خلافة لكن المسائل عائمة ومائعة لكن الإنجليز والفرنساويين في هذه اللحظة عملوا حاجتين، عملوا أولا (كلمة غير مفهومة) اتفاق البوديه اللي هما بمقتضاه سنة 1904 قسموا المنطقة بينهم جاؤوا على الشهر اللي فات كانوا بيحتلفوا الدولتين بمرور مائة عام على الوفاق الودي بين الدولتين لكن على أي حال الوفاق الودي بين دولتين كي يصطلحوا علينا إحنا وإحنا مش دريانيين عملوا اتفاقية سايكس بيكو فرنسا وإنجلترا قسموا العالم العربي وإحنا مش دريانيين أدوا وعد بلفور وإحنا مش دريانيين وبعدين تعال بقى نبص في الوثائق ونشوف كيف تعاملوا مع قضايانا؟ أنا الحقيقة يعني بأحس مش بس بأسى بأحس بإهانة أحس لما أشوف مثلا إيه؟ ألاقي هنا فيه أهمية ده فيه اعتقادي أنه ده أوراق لورانس.. لورانس ده كان ضابط المخابرات اللي تولى إدارة شؤون العالم العربي تقريبا كله بعد الحرب العالمية الأولى فأوراقه.. أهم حاجة في أوراقه ماليش دعوة بيقول إيه هو لكن أنا بيهمني جدا تسجيله لمحاضر الجلسات وأوراقه في شرح ما جرى أو في رواية ما جرى لأنه كان موجود كتب محاضر بيقول إيه؟ بيقول مثلا على سبيل المثال بيحكي عن اجتماع بين لورين جورج رئيس وزراء إنجلترا المنتصرة مع كليمنسور رئيس فرنسا المنتصرة والاثنين مجتمعين في ظرف مؤتمر الصلح في فرساي في باريس سنة 1919 كليمنسور بيقول لروين جورج بيقوله إيه؟ عايزين ننتهز الفرصة ونسوي بيننا بدل ما نروح في المؤتمر متخانقين أنت عايز إيه؟ قل لي أنت طلباتك إيه؟ فبيقوله إيه جورج لورين بيقوله العراق وفلسطين هو سأل كليمنسور قول لي أنت عاوز إيه ففرنسا فأخونا رئيس وزراء فرنسا بيقوله أنا عايز الموصل فجورج بيقوله ها تأخذها.. بتكلم عن أقاليم في العالم العربي بتكلم عن أوطان وبعدين يقوله إيه عندك حاجة ثانية يقوله آه عايز القدس، ده الإنجليزي بيقول للفرنساوي.. الفرنساوي بيسأله أنت عاوز إيه ثاني؟ قاله والله عايز القدس قاله خلاص ها تأخذ القدس، أنا.. هنا إحنا بنلاقي نفسنا أمام أوضاع أمام حقائق نشأت تاريخيا أمام لمحات من المشهد العام من الصورة في المنطقة أمام مشاهد لا تزال مؤثرة علينا أمام خريطة نحن نظرنا إليها باستمرار بلد.. بلد والعالم تعامل معها منطقة بحالها وإحنا تكلمنا فيها ملوك وعروش ولم نتكلم فيها كقضايا ولاقينا أوطاننا على جيلي أنا لما جاء وأطليت أو أطل غيري آلاف الشباب وقتها في أعقاب.. في نهاية الحرب العالمية الثانية لاقينا أمامنا في ضمن الساحة هناك مشهد عالم عربي غريب قوي لا تدري كيف وصلت به الأمور لهذا الشكل إلا أنه عالم نشأ في صراعات هو لا يعلم بها على خريطة هو لم يقرأها مسجلة في وثائق هو لم يطلع عليها ثم أنها حاكمة في مصائره وفي مقاديره يومها وإلى غد غير منظور، تصبحوا على خير.