- المؤثرات الأولى ودور العائلة
- المؤلفات الموسيقية والعلاقة مع الفنانين
- العلاقة بين الفن والسياسة والدين
- أهمية الموسيقى ومسار الموسيقى العربية

المؤثرات الأولى ودور العائلة

 
 سامي كليب
 عمر خيرت

سامي كليب: مرحبا بكم أعزائي المشاهدين إلى حلقة جديدة من برنامج زيارة خاصة تنقلنا هذه المرة إلى القاهرة. من منا لم يسمع بفيلم ليلة القبض على فاطمة؟ من منا لم يسمع بفيلم السفارة في العمارة أو بالتوزيع الجديد لأغاني الموسيقار الكبير الراحل محمد عبد الوهاب أو بتلك الموسيقى الجميلة جدا حول حرب أكتوبر؟ كل هذه الروائع الفنية والموسيقية يقف خلفها ضيفنا المؤلف الموسيقي والموسيقار المصري الكبير عمر خيرت. لم يكتشف عمر خيرت الموسيقى عن طريق الصدفة وإنما ترعرع في كنفها وعاش في ربوعها، فمن جده إلى عمه إلى والده كانت حياة عائلته زاخرة بالأنغام والمؤلفات نهل ما استطاع منها ثم صقلها بالدراسة فأصبح مدرسة، مسيرة طويلة وغنية نستهلها معه بالمؤثرات الأولى.

عمر خيرت: اللي ساعدني في حياتي أن أكون وصلت للمرحلة اللي أنا فيها دي أن البيئة اللي أنا اتوجدت فيها كانت مساعدة قوي لاهتمام الأسرة لي بالثقافة وبالفن إلى جانب..

سامي كليب: الوضع المريح كمال اجتماعي يعني عائلة أرستقراطية وعندها وضع مالي جيد يعني..

عمر خيرت: لا، لا أبدا مش المادة في الموضوع خالص هي المسألة ثقافية بحتة اهتمام قوي جدا من الجد اللي هو محمود خيرت..

سامي كليب (مقاطعا): واللي كان محاميا.

عمر خيرت (متابعا): وكان محامي وكان سكرتير مجلس الشيوخ وكان أديب ومترجم ورسام وموسيقي وكان  encyclopediaفي الموسيقى وكان عنده دائما في بيته..

سامي كليب (مقاطعا): مجلس للموسيقى.

عمر خيرت: صالون دائم للفن عموما مش موسيقى بس، وكان بيحضره أئمة الفنانين في ذلك الوقت مثال سيد درويش ومحمود مختار المسال والمنفلوطي في الأدب وغيرهم، ومما يذكر أن أم كلثوم وعبد الوهاب أول ما التقوا في حياتهم وهم شباب صغيرين التقوا مع بعض في البيت ده.

سامي كليب: آه والله!

عمر خيرت: في شارع خيرت في وجود سيد درويش وغنوا هم الاثنين قصاده دويتو كده من أوبريت العشرة الطيبة..

سامي كليب (مقاطعا): الآن فهمت يعني سبب حبك لعبد الوهاب أيضا يعني وإعادة توزيع موسيقاه، سنتحدث عن الموضوع بعد قليل.

عمر خيرت (متابعا): بالضبط، فهي دي يعني..

سامي كليب (مقاطعا): طيب حضرتك واعي لهالفترة يعني أنه فترة جدك بالمجلس؟

عمر خيرت: لا دي طبعا ده تاريخ موجود سمعته من الوالد ومكتوب بقى طبعا في المقالات وفي الصحف في ذلك الوقت يعني، إنما أنا يعني اتولدت في البيت ده وأعمامي الأربعة كانوا يعني عايز أوريك أن الجد ده قد إيه اهتمامه بالفنون يعني في الوقت ده ما كانش في أسر تعلم أولادها كلها الموسيقى يعني وتجيب لهم أستاذ يعلمهم وكده يعني فاهم قصدي إزاي..

سامي كليب: حتى كان غير مستحب.

عمر خيرت: بالضبط آه إنما هو بقى إلى جانب طبعا أنهم وصلوا في حياتهم العملية إلى مستويات كبيرة جدا في يعني كمهندس أو دكتور أو يعني أنا والدي كمان مهندس وهم الأربعة تعلموا الموسيقى وهم صغيرين..

سامي كليب (مقاطعا): والدك كان يحب الموسيقى؟

عمر خيرت: والدي يحب الموسيقى..

سامي كليب: كان يعزف؟

عمر خيرت: آه الله يرحمه لحد ما توفى تقريبا يعني قبلها كان بيعزف تعلم أصول العزف على البيانو وكان له دراية بالفن وكان مهندسا معماريا أيضا ومتخصصا في الجوامع في بناء الهندسة الإسلامية يعني، وأبو بكر خيرت كان مهندسا..

سامي كليب: عمك.

عمر خيرت: عمي اللي هو أسس معهد الكونسرفتوار ويبقى مؤلف موسيقي كبير ورائد الموسيقى السيمفونية في مصر.

سامي كليب: وفهمت حتى أن البيانو الفرنساوي اللي عندك هو لعمك كان بالأساس.

عمر خيرت: بالضبط هو يعني له قصة كمان يعني..

سامي كليب: شو قصته خبرني.

عمر خيرت: قصته بقى هي أن أبو بكر خيرت بعث في بعثة إلى فرنسا باريس لدراسة الهندسة بعدما تفوق هنا في جامعة القاهرة جامعة فؤاد الأول كان اسمها، واتبعث بعثة لفرنسا وهو في فرنسا كان بيدرس كمان الموسيقى إلى جانب الهندسة، المهم أنه في الهندسة طلع الأول في الكولديبوزار في قسم العمارة..

سامي كليب (مقاطعا): يعني كلية الفنون الجميلة الشهيرة في فرنسا.

عمر خيرت (متابعا): الشهيرة في فرنسا درس فيها وطلع الأول عليها، وكان لها قصة دي كمان أن هم إزاي واحد عربي يطلع الأول على الأوروبيين وعلى الفرنسيين لدرجة أن رئيس اللجنة قال لهم أنا حأستقيل من عملي لو الرجل ده ما أخدش ما طلعش الأول، لأن كان شغله واضح جدا أن قد إيه كان رجلا..

سامي كليب (مقاطعا): يعني بعد كل هالمقدمة أستاذ عمر، كان يعني الإنسان ممكن يسألك يعني لماذا أصبحت موسيقارا أو موسيقيا كبيرا؟ أنا برأيي كان لازم نسألك أنه شو كان ممكن تطلع إن لم تطلع موسيقيا؟

عمر خيرت: لازم أطلع موسيقي، ما عنديش حل ثاني.

سامي كليب: طبيعي من العائلة..

عمر خيرت: وبعدين أكمل لك قصة البيانو فكان أبوه يبعث له واللي هو جدي يبعث له مصروف يساعده شوية في البعثة اللي هو فيها دي فكان يحوش كل الفلوس اللي بتجي له علشان يجيب البيانو ده، وكان صغيرا جدا يعني كان عنده 21 سنة أو 22 سنة ورجع به وكاتب حتى تحت كده اسمه والتاريخ اللي جابه فيه فله قصة مهمة جدا، والبيانو ده صديق الفنان المؤلف الموسيقي لا يستطيع الحياة بدون البيانو.

سامي كليب: طبعا وهو صديق العائلة عندك صار يعني صديق البيت، طيب هو اللي قدمه لك يعني عمك أبو بكر؟

عمر خيرت: لا هو بعد وفاته أنا ورثته.

سامي كليب: طبعا فيما بعد درست في الكونسرفتوار ودخلت في سن مبكرة جدا، حسب ما فهمت 11 عاما دخلت إلى الكونسرفتوار وكان عندك أساتذة بينهم إيطاليون؟

عمر خيرت: هو مايسترو فينسينزو كارو ده كان أستاذي الإيطالي وكان رئيس قسم البيانو في الكونسرفتوار.

سامي كليب: كنت حابب من صغرك أنك تصبح موسيقارا ولا كان عندك اتجاه آخر؟

عمر خيرت: خالص يعني هو بدأت من سن خمس سنين على فكرة، أنا بأسمع الوالد طبعا يوميا كان يقعد يعزف الأعمال الموسيقية العالمية موزارت وبيتهوفن وشوبان وحاجات زي دي.

سامي كليب: يبدو كان يعزف بيتهوفن أكثر من غيره لأنه تأثرت كثير فيه ولا لا؟

عمر خيرت: آه أنا بقى درست طبعا بعد كده في الكونسرفتوار وفي الترينيغي كوليج في إنجلترا بالمراسلة، إنما كان يعني وضحت الموهبة دي من سن صغير يعني علشان أقول إنه مش بس علشان هو عمي أو آخر خيرت لا، هو واضح أنه في كل جديد في الأسرة دي بيبقى في واحد له في الفن يعني.

سامي كليب: بالجيل المقبل مين في؟

عمر خيرت: الله أعلم بقى عندنا أحفاد كثير جدا..

سامي كليب: وفي منهم موسيقيين؟

عمر خيرت: ده أبوي يعني.. آه كلهم بيحبوا الموسيقى.

المؤلفات الموسيقية والعلاقة مع الفنانين

سامي كليب: ولأنهم جميعا يحبون الموسيقى ولأنهم تناقلوها عبر الأجيال فإن عائلة خيرت صارت علامة فارقة في الموسيقى في مصر، ولكن ضيفنا عمر أخذ النصيب الأكبر من الشهرة بعدما أدخل موسيقاه عالم الأفلام حيث صار اسمه يقترن بأهم الأفلام التي عرفتها الشاشة المصرية في السنوات الثلاثين الماضية ويقترن أيضا بكبار النجوم وبينهم فاتن حمامة التي قدم لها مقطوعته الشهيرة دعاء. أستاذ عمر هذه المقطوعة هي مقطوعة الدعاء على ما أعتقد شو قصتها؟ لأن يبدو أن لها قصة مع فاتن حمامة كمان، تفضل.

عمر خيرت: الدعاء ده كان في رمضان السنة اللي قبل اللي فاتت وطُلب أن أنا أعمل خلفية موسيقية أو تيتر لبرنامج حتقول فيه أدعية السيدة فاتن حمامة.

سامي كليب: وشو السبب يعني شو كان الهدف منها؟ إن طلب منك هذا العمل ولا إيماني ولا رغبة منك ولا..

عمر خيرت: لا ما قلت لك دي تبقى حاجة ظريفة أن طلب منك حاجة فيها فكر إيماني أو فيها تضرع أو فيها حاجة زي كده خصوصا هو لما نيجي بقى قبل رمضان كلنا نبقى حاسين بالناحية الروحانية دي، فعارف الحاجات اللي بتيجي لك وتبقى تقول الحمد لله إنها جاءت لي يعني إنها جاية في وقت حلو وأنا بنبقى محتاجين للإحساس ده كلنا يعني.

سامي كليب: طيب لو طلبت منك تشرح لنا بشكل خصوصية موسيقية يعني لمقطوعة الدعاء التي أدتها السيدة فاتن حمامة هل لها خصوصية موسيقية لم نجدها في موسيقى أخرى مرتبطة بمناسبة دينية معينة مثلا؟

عمر خيرت: يعني هي بتديك إحساس بالهدوء النفسي وإحساس سماوي كده يعني تحس أنها الموسيقى، طبعا أنا بأعزفها بالبيانو بس هي معمول لها توزيع أوركسترالي بالآلات الوترية وآلات النفخ وحاجات زي كده، فبيبقى لها شكل ثاني يعني، تصور الكمنجات لما تعمل الجملة دي (عزف على البيانو).. بالكمنجات رفيعة قوي (عزف)...

سامي كليب: حلو. على كل حال التعاون مع السيدة فاتن حمامة كما تفضلت لم يقتصر لا على الدعاء ولا "ليلة القبض على فاطمة"، حتى صار في صداقة كما الصداقة مع الكثير من كبار الممثلين..

عمر خيرت: صداقة واحترام طبعا ويعني..

سامي كليب: ويعني من الصعب أن نسرد كل الأفلام التي وضعت لها الموسيقى، على ما أعتقد أكثر من ستين مقطوعة سينمائية وتلفزيونية أبرزها كما تقول حضرتك في بعض المقابلات "اليوم السادس" ليوسف شاهين، "إعدام ميت" لعلي عبد الخالق، "الهروب من الخانكة"، "سكوت حنصور"، "السفارة في العمارة" إضافة طبعا إلى "النوم في العسل"، و"مافيا" أخذت جائزة أوسكار...

عمر خيرت: "مافيا" و"الجزيرة".

سامي كليب: و"الجزيرة" فيلم سياسي، أوسكار آخر عن فيلم "السفارة في العمارة" طبعا واستفتاء الجمهور لأحسن موسيقى تصويرية عام 2005 عن مسلسل "العميل" مش كده؟

عمر خيرت: مع "العميل" آه 1001.

سامي كليب: إضافة طبعا إلى مهرجانات عالمية كثيرة، افتتاح دورة الألعاب الآسيوية في قطر 2006 كانت مغامرة موسيقية طبعا كبيرة لك، افتتاح دورة الألعاب العربية بالقاهرة..

عمر خيرت (مقاطعا): 2007.

سامي كليب (متابعا): أعياد.. آه 2007، أعياد وطنية كبيرة من سلطنة عمان إلى أوبريت الشيخ زايد إلى إيطاليا، حتى الاتحاد الأوروبي دعاك في مرحلة معينة..

عمر خيرت (مقاطعا): السنة دي.

سامي كليب (متابعا): السنة دي لتفتتح الرئاسة الفرنسية للاتحاد.

عمر خيرت: آه تسليم رئاسة الاتحاد الأوروبي لفرنسا.

سامي كليب: طيب شو كانت يعني كيف حصل هذا الأمر؟ لأنه أن يستدعي الاتحاد الأوروبي موسيقيا وموسيقارا ومؤلفا موسيقيا عربيا يعني أمر لافت.

عمر خيرت: يعني حاجة الحمد لله أنا كنت سعيدا جدا جدا بها وتشرفت بها فعلا أنهم الأوروبيين عاملين احتفالية لتسليم رئاسة الاتحاد الأوروبي من سلوفانيا لفرنسا، وحصلت إزاي؟ أن هو أنا دعيت من قبل السفير أحمد فاروق اللي هو سفيرنا في لوبليانا اللي هي عاصمة سلوفانيا أن نعمل حفلة أنا والفرقة بتاعتي مش بالأوركسترا يعني. قبل يعني في مارس 2008 فرحت عملنا الحفلة وكان لها draw back أو تأثير حلو جدا جدا حصل بعدها أن حتى كتبوا في الجرنال هناك أنه إزاي تجيبوا لنا الموسيقى دي يوم واحد بس؟ كانوا عايزين أكثر من كده، وكان وكلهم أجانب يعني الحقيقة كانوا كلهم أوروبيين في الحفلة كان مسرحا كبيرا وكانت الحمد لله مليئة على الآخر وكان رد فعل حلو يعني كان.

سامي كليب: اخترت الأصالة الشرقية وطعمتها بنفس غربي اللي نجحت ولا كيف؟

عمر خيرت: اللي هي الموسيقى آه الشكل الموسيقي بتاعي هم بالنسبة لهم طبعا شيء جديد عليهم فشد انتباههم جدا وطلبوا مني بقى بعدها بثلاثة شهور على في يونيه أواخر يونيه أن أعمل concert بقى مع الاثنين أوركسترا يعني 120 عازف والقائد كان فرنساوي..

سامي كليب (مقاطعا): فهمت أن معظم العازفين كانوا من الأجانب.

عمر خيرت: بالضبط وأنا واخد معي مجموعة من سبعة أشخاص سبعة فنانين من مصر اللي هو علشان الآلات الشرقية اللي بتعزف زي القانون والأوكورديون والإيقاعات الشرقية والحاجات دي، فكانت لها رد فعل كبير قوي الحمد لله وكانت الحفلة دي فيها فنانين من دول أخرى أوروبية ومن أميركا ومن دول كثير قوي وبعدين حطوني أنا في الجزء الأخير يعني قبل النهاية فورا ودي برضه حاجة..

سامي كليب: طبعا يعني تكريم إضافي للشخص طبعا.

عمر خيرت: تكريم إضافي وكان فيها بيحضرها طبعا رئيس الجمهورية ورئيس الوزراء ووزراء الخارجية في أوروبا كلها.

سامي كليب: بس إن شاء الله ما كانت في الهواء الطلق لأنه..

عمر خيرت: كانت في الهواء الطلق.

سامي كليب: في الهواء الطلق كمان لأن إحنا عندك فقط لأشير للمشاهدين أنه بعد ثلاثة أيام من المرض بسبب حفلة في الهواء الطلق هنا في القاهرة.
عمر خيرت: يعني لحظي.

سامي كليب: في العودة إلى القاهرة طبعا كان لك أيضا موسيقى جميلة في بعض المسرحيات على الأقل يعني في الواقع لم أستطع أن أحصي كل ما ألفت حضرتك بس منها مثلا مسرحيتا "كارمن" يسرا و"كعب عالي" لمحمد صبحي و..

عمر خيرت: (مقاطعا): لا، "كارمن" محمد صبحي و"كعب عالي" ليسرا.

سامي كليب: شفت معلوماتي المسرحية ضئيلة. طيب وربطتك بيوسف شاهين على ما يبدو علاقة أيضا خاصة، يوسف شاهين يعني من أهم على الأقل السينمائيين ليس فقط العرب ولكن أيضا العالميين في مرحلة معينة -رحمه الله-.

عمر خيرت: الله يرحمه.

سامي كليب: وحتى لعبت معه أحد الأدوار، شو سر العلاقة بينك وبينه وماذا قدمت له وقدم لك يوسف شاهين؟

يوسف شاهين فنان كبير وله اهتمامات كبيرة بالموسيقى، وأنا أشعر بمتعة حين أعمل معه
عمر خيرت: طبعا قدم لي كثيرا أو قدم للسينما كثيرا جدا، يوسف شاهين الله يرحمه فنان يزن كثير قوي من الفن يعني وله اهتمامات كبيرة قوي بالموسيقى يعني ده اللي خلاني أحس قد إيه العمل معه متعة لأنه فاهم كويس قوي في الموسيقى وعنده مكتبة موسيقية كبيرة جدا.

سامي كليب: ويبدو كان عنده لحن وزعته له إياه صحيح؟

عمر خيرت: بالظبط في الفيلم ده كان فاجأني بأنه بيقول لي أنا عندي لحن أنا حأعمل لحن في الفيلم ده لو ما أعجبكش ما.. قل لي لا مش حينفع.

سامي كليب: عجبك؟

عمر خيرت: عجبني آه، قال لي لو أعجبك حتوزعه لي بقى.

سامي كليب: تتذكره شوي اللحن ولا لا؟

عمر خيرت: طبعا يعني فاكره كويس قوي بس ده يعني عارف معمول غناء orchestration وحاجات زي كده يعني ممكن..

سامي كليب: يعني صعب تأديته على البيانو صعب؟

عمر خيرت: صعب دلوقت صعب. وبعد كده طلب مني أن يصورني بقى في الفيلم فدي أنا يعني افتكرت أن هو يخليني أمثل يعني فقال لي لا مش حتمثل ولا حاجة أنت حتطلع اسمك عمر خيرت زي ما أنت وقاعد بتعزف مع الأوركسترا الأغنية اللي أنت عملتها اللي هي لمصر مع غناء لطيفة، قلقت شوي في الأول وبعدين قلت حتى لو أطلع ده يوسف شاهين اللي حيصورني وبعدين أنا طالع ما بأعملش حاجة، بأعزف يعني، إلا أن في حركة كده في النصف في الأغنية اللي هو قال لي لما تيجي لطيفة تحاول تضايقك وأنت بتعزف تيجي تقعد جنبك، اعمل نفسك أنك مش مبسوط من.. زق كده. فكان عملا جيدا جدا واتسجل الفيلم ده كله في فرنسا مع أوركسترا من فرنسا..

سامي كليب: وفهم آنذاك أن يوسف شاهين كمان حاول أن يكرمك يعني كفنان مصري موسيقار كبير وعملت معه وكان يحب على ما يبدو ما تقوم به.

عمر خيرت: الحمد لله طبعا يعني كان في توافق فني ما بيننا كبيرا يعني الحقيقة لأن اهتمامه بالموسيقى ده شدني له كمخرج أيضا.

سامي كليب: في العودة يعني أبعد من يوسف شاهين قليلا أعدت توزيع أغاني الفنان الموسيقار المصري الكبير محمد عبد الوهاب ولكن الأهم من إعادة توزيع موسيقاه أنه هو أيضا أحب ما قمت به، صحيح هالكلام؟ وصار في علاقة بينك وبينه شخصيا؟

عمر خيرت: لا هي يعني الحقيقة الله يرحمه الأستاذ عبد الوهاب أول حاجة عملتها في التلفزيون كان مسلسلا اسمه "اللقاء الثاني" فوجئت أنه بيتصل في التلفون في البيت فبيقولوا له مين؟ قال لهم محمد عبد الوهاب، فافتكرت واحد بيهزر لأن لسه كنت صغيرا يعني، رحت أرد في التلفون افتكرت واحد بيهزر فعلا فألو مين؟ قال لي أنا محمد عبد الوهاب، فعرفت من صوته على طول أن هو ده محمد عبد الوهاب، ما تتصورش بقى حضرتك السعادة اللي أنا كنت فيها، بيكلمني يهنيني على الموسيقى اللي سمعها في المسلسل يعني ده يوري لك قد إيه الناس العظماء دول.

سامي كليب: وسمع إعادة توزيع بعض أغانيه؟

عمر خيرت: آه طبعا سمع وعمل تعليقا قال إن دي أحلى هدية جاءت لي، هو كان عيد ميلاده في الفترة دي لما نزل الألبوم وذكر ده في الإذاعة وأن دي أحلى هدية جاءت ها السنة دي، توزيع الأغاني بتاعته اللي عملها عمر خيرت يعني..

سامي كليب: منها مثلا أغنية "أنت عمري".

عمر خيرت: "أنت عمري" و"لا مش أنا اللي أبكي" و"حسدوني وباين في عينيهم" عارف يعني اخترنا شوية حاجات كده مهمة جدا، وكانت مفاجأة بالنسبة له قال لي أنت اخترت حاجات كمان من كل فترة زمنية علشان توري قيمة التوزيع الموسيقي حيقدر يعمل إيه في الحاجات دي، وفيها حاجات شرقية بحتة زي "حسدوني وباين في عينيهم" التوزيع بيبقى صعب جدا فيها لأن فيها ربع تون وثلاثة أرباع تون وحاجات زي كده.

سامي كليب: صعبة يعني تعزفها على البيانو مثلا "أنت عمري" ولا لا؟ بتوزيع شوي حديث..

عمر خيرت (مقاطعا): لا ما بقى بتتعزفش الحاجات دي لأنها لازم تنسمع بالـ orchestration ده كله يعني "أنت عمري" معروفة لما تتعزف إنما لازم تتعزف بالتوزيع الأوركسترالي ده أنا ممكن لو في فرصة أن أحطها في أسمعها لك في الأستوديو يعني.
سامي كليب: طيب ممكن بس خلينا نسمع ولو مقطوعة بسيطة لعمل لمحمد عبد الوهاب خصوصا أن بذاكرة الأجيال كلها لا يزال قائم..

عمر خيرت (مقاطعا): لا برضه شوف..

سامي كليب: صعب جدا على البيانو ولا؟

عمر خيرت: لا مش صعب هي الفكرة أني أنا ما عزفتش فيها غير جزء صغير قوي، وإنما التوزيع الأوركسترالي هو الموضوع أنك بتسمع إزاي ده متوزع وإزاي صوت المطرب بيقول، العود إزاي وإمتى بيقول القانون وإمتى بتقول الآلات الوترية وآلات النفخ وبقى الموضوع لازم يتسمع كامل إنما ما يتسمعش بس على البيانو.

سامي كليب: طيب حضرتك..

عمر خيرت: إنما أنا ممكن أسمعك توزيع لحاجة لسيد درويش مثلا.

سامي كليب: تحب ليش لا؟..

عمر خيرت: لأنها اتكتبت للبيانو ودي عملها أبو بكر خيرت..

سامي كليب: اللي هو عمك.

عمر خيرت: اللي هو عمي، عن مقطوعة اسمها طقطوقة "إيه العبارة" للسيد درويش. آه حلو طيب نسمعها؟ تفضل.

[فاصل إعلاني]

العلاقة بين الفن والسياسة والدين

سامي كليب: حين كنا نصور هذه الحلقة عند الموسيقار المصري عمر خيرت كانت نغمات البيانو تتقاطع مع أزيز الرصاص وأصوات القذائف في غزة، فكان لا بد أن يسكت صوت الفن للفن قليلا وأن تتصدر السياسة كل أحاديث القاهرة بما في ذلك صالونات الثقافة والفن، وعمر خيرت أدخل موسيقاه إلى عالم السياسة منذ أكثر من ثلاثين عاما حين كانت حرب أكتوبر بحاجة إلى من يرسم لها بالنغمة ملحمة العبور.

عمر خيرت: الفنان بيتأثر بالأحداث اللي بتحصل، وترجمة الفنان الموسيقي بتبقى أعمال موسيقية طبعا فده وارد طبعا أن..

سامي كليب (مقاطعا): حصل؟

عمر خيرت: حصل في الفترة دي، بس حصل في فترات كثيرة في حياتنا يعني مثلا حرب أكتوبر في 1973 من الأعمال اللي أنا بأعتز بها جدا "بانوراما العبور" ألفت عمل قصيد سيمفوني عن ملحمة حرب أكتوبر..

سامي كليب (مقاطعا): ولكن يبدو أن لهذه الحرب قصة في حياتك، أنك كنت في لندن واستمعت إلى مقطوعة موسيقية من شخص يهودي وبكيت بسبب الهزيمة عام 1967.

عمر خيرت: آه طبعا تأثرت تأثرا شديدا جدا، جدا لأن.. طبعا إحساسنا بعد 1967 كان كعرب كلنا وكمصريين بالذات كان في تأثر كبير قوي، قوي وأنا في الغربة بقى ولقيت استمعت لموسيقى وأنا ماشي كده في البلد في الأوكسفورد ستريت محل أسطوانات حاطط موسيقى شدتني الحقيقة فدخلت أسأل إيه دي؟ قالوا لي ديه عمل موسيقي معمول عن حرب 1967..

سامي كليب: من الجانب الإسرائيلي؟

عمر خيرت: من الجانب الإسرائيلي، مؤلف إسرائيلي يعني، اشتريت الأسطوانة ورحت أضايق نفسي بقى بها وتمنيت أن يجي يوم من الأيام أني أنا أقدر أرد بعمل موسيقي يعبر عن انتصارنا إحنا. والحمد لله حصل في 1973 أنه كان احساس في منتهى السعادة أنني جاءت لي الأمنية يعني..

سامي كليب (مقاطعا): حصل كمان بطلب من..

عمر خيرت: وبعدها بعشر سنين.

سامي كليب: حصل بطلب رسمي لأنه كان وزير الثقافة أعتقد صفوت الشريف..

عمر خيرت: لا، وزير الإعلام.

سامي كليب: كان وزير الإعلام آنذاك وأمين بسيوني رئيس الإذاعة..

عمر خيرت: بالضبط، فكان عمل الحقيقة أنا بأعتز فيه قوي يعني وموجود على فكرة في المبنى بتاع البانوراما اللي هو بيحكي بالصورة المجسمة عن الحرب ومجريات الحرب يعني حصلت إزاي وكده هو لمدة ثلث ساعة.

سامي كليب: طبعا من الصعب أن نسأل موسيقار مؤلف موسيقي كيف تضع موسيقى معينة بأي ظروف، ولكن حرب 1967 لها يعني محطة خاصة في قلوب كل الشباب آنذاك الذين كانوا بعمرك على ما أعتقد كنت 19 سنة تقريبا من العمر..

عمر خيرت: تقريبا كده هو.

سامي كليب: وعشت الهزيمة وطبعا من يعيش الهزيمة لا يمكن أن يأتي بعد عشر سنوات بموسيقى إلا فيها نوع من المرارة أيضا وليس فقط الزهو بالجيش وبالانتصار وما إلى ذلك الذي جاء فيما بعد في عام 1973، ولكن في أي ظروف وضعت هذه الموسيقى؟ يعني ماذا فعلت هل عدت وشاهدت مثلا صورا من الحرب؟

عمر خيرت: لا، لا خالص، أصل دي صور دي مطبوعة جواي أو الحالة اللي أنا حسيت بها وأنا في إنجلترا في لندن اجتريتها يعني غصب عني عايشة معي لأن دي حاجة ما بتروحش، الإحساس ده ما بيروحش يعني، فلقيت نفسي في ظرف عشرة أيام وده طبعا رقم قياسي شوية في التأليف الموسيقي يعني الأوركسترالي أنك تؤلف عملا كبيرا ثقيلا بس في عشرة أيام، إنما ده يوريك الشحنة اللي أنا كنت حاسس بها من الانتصار والمرارة اللي كنت حاسس بها ساعة الهزيمة اجتمعوا مع بعض وحسيت أني أنا بأعمل العمل ده والحمد لله ربنا وفقني فيه يعني. نحن عايشين في اللي بيحصل في الدنيا كلها والفنان بيبقى برضه إيه؟ يعني يمكن إحساسه بيبقى مرهف شوية أكثر لأنه بيترجم ده أو محتاج للـ mod ده أو للحس ده أنه يقدر ينتج به فغصب عني بأبقى موجود وعايش في الأحداث اللي بتحصل ومتأثر بها وده بيطلع في أعمالي وفي شغلي يعني.

سامي كليب: في أعمال كثيرة سياسية على كل حال كتبت لها الموسيقى وألفت لها الموسيقى عدد من الأعمال لا بأس به يعني.

عمر خيرت: زي إيه بقى؟

سامي كليب: يعني مثلا إذا يحضرني بعض الأفلام مثلا بما في ذلك "ليلة القبض على فاطمة" أول فيلم لك وانشهر مثلا كان فيلم في له جانب بالجاسوسية، بالعمل السياسي، بالعمل الفدائي، بالعمل الأخلاقي وصولا..

عمر خيرت: و"إعدام ميت" كمان.

سامي كليب: وصولا إلى "السفارة في العمارة" يعني عمل سياسي بامتياز كمان..

عمر خيرت: و"الجزيرة" كان فيلم "الجزيرة"..

سامي كليب: طبعا لسه سنتطرق إلى كل هذه الأفلام، ولكن هل يعنيك هذا الجانب بشكل عام يعني؟

عمر خيرت: أكيد طبعا.

سامي كليب: هل تشعر مثلا أنك كموسيقار لك وضعك في العالم العربي كأيضا تعمل عملا ضد إسرائيل مثلا أو ضد الهيمنة الأميركية أو مثلا..

عمر خيرت: طبعا ممكن أعمل أعمال كثير قوي بتعبر عن أحاسيسنا إحنا كعرب وكمصريين وده متهيأ لي في أكثر أعمالي أنني بأحس أنني بأمثل العرب أو المصريين في العمل اللي أنا بأعمله أو الموهبة اللي ربنا سبحانه وتعالى إداها لي، بأحس أن من المسؤوليات الكبرى عندي أن أنا أعبر بها عن شعوبنا وعن حالنا وعن أحاسيسنا وكده.

سامي كليب: لا بد لمن يزور منزل الموسيقار المصري عمر خيرت من أن يرى على الحائط فوق البيانو خطا عربيا أنيقا ومنمقا كتبت به خاتمة سورة البقرة، ويبدو أن جمع الدين بالموسيقى في غرفة كان مقصودا، وعمر خيرت يقول إنه يتوجه إلى الله قبل كل عزف على البيانو وقبيل كل ولوج إلى المسرح، فهل ثمة رابط في حياته بين الموسيقى والإيمان؟ وهل هذا الأمر أساسي في مسيرته؟

عمر خيرت: أساسي، أساسي لأن هو يعني لما قلت ربنا سبحانه وتعالى هو اللي أعطاني هذه الموهبة فكوني يعني لازم أحس بها ولازم أحس أن قيمتها قد إيه وقد إيه هي شيء كبير إداه لي ربنا يعني الحمد لله، وبيديني بقى المسؤولية اللي بأحكي لحضرتك عليها أن أحس إن أنا في حاجات لازم أعملها أشكر بها ربنا يعني وبتكون في عملي إنني أعمل حاجات تساعد الإنسان وتساعد وجدان الإنسان وروحه وأحاسيسه في أن يكون يعني شيء تدي له شيء إيجابي في مشاعره في أحاسيسه في حياته فدي الموسيقى بتعملها وده فن الموسيقى ده فن من أصعب الفنون ومن أهم الفنون لأنها بتتعامل مع الأذن والأذن هي أهم حاسة عند الإنسان يعني تذكر تقريبا في القرآن الكريم أن دائما يجيء السمع قبل البصر.

سامي كليب طبعا أنا أسألك هذه الأسئلة واسمح لي أن أدخل بالسياسة والدين في بداية حديث لموسيقار..

عمر خيرت (مقاطعا): لا، تفضل.

سامي كليب (متابعا): ولكن لأسباب كثيرة، أنت تعرف اليوم في العالم العربي الكثير من الذين يصدرون بعض الفتاوى في الواقع وغير المستندة إلى أي علم ديني فعلي أو إلى أي فقه فعلي، يقولون إن الموسيقى تتناقض مع الدين وإنه المفترض أن الإنسان لا يتعاطى مع الموسيقى، أنا شايف أن عندك العكس أن الموسيقى عززت الشعور الديني عززت الإيمان في شخصك.

عمر خيرت: طبعا، طبعا هي لها أهمية كبيرة جدا يعني للإنسان فعلا وللشعوب يعني أنت بتتعرف على الشعوب من موسيقاها في الدنيا كلها، ومن قديم الأزل الموسيقى دي لها تأثير مباشر على الإنسان وعلى روحه أو وجدانه ولها أهمية كبيرة جدا يعني مش بأقول كده علشان أنا موسيقي يعني إنما دي حقيقة.

أهمية الموسيقى ومسار الموسيقى العربية

سامي كليب: منزل عمر خيرت يشرف كما الكثير من بيوت القاهرة على الشوارع المزدحمة بالناس وأبواق السيارات وهموم الحياة، وكنا ونحن نسجل هذه الحلقة ونجول معه في عالمه الفني الحميم على واقع الموسيقى في مصر والعالم العربي كنا نسمع نبض الشارع يجتاح الغرفة الهانئة بالبيانو والمؤلفات العالمية الشهيرة، وكأن من في الخارج يسعى للقول لمن في الداخل إن الموسيقى لم تعد من الأولويات وإن للقمة العيش الصدارة، لكن لعمر خيرت رأيا آخر يقول إن النغمة قد توازي في حياته رغيف الخبز.

عمر خيرت: الموسيقى تعني كل شيء بالنسبة لي يعني هواء زي الهواء، الغذاء الروحي اللي هو بأعتبره أهم من غذاء المعدة، هي تخاطب وتتعامل مع الروح وهي هامة جدا للإنسان، فكل شيء الموسيقى في حياتي الحقيقة.

سامي كليب: هل تستطيع أن تعيش بدون موسيقى؟

عمر خيرت: أبدا، أبدا فعلا يعني.

سامي كليب: قرأت لك في مقابلة سابقة تقول إن الإنسان بحياته يجب أن يكون متوفرا لديه الرغيف والموسيقى، الموسيقى بأهمية الرغيف بحياة الإنسان؟

عمر خيرت: بحياة الموسيقي بأهمية الرغيف بس بالنسبة للإنسان طبعا لازم علشان يقدر يحس بالموسيقى لازم يكون مش جوعان يعني يأكل الأول وبعدين تقدر تدي له الموسيقى، يعني بس بالنسبة للمؤلف الموسيقي أو الموسيقي تتساوى أنه ما يقدرش يعيش من غير موسيقى فعلا.

سامي كليب: المؤلف الموسيقي قادر على العيش في دولنا العربية يعني قادر أن يوفر لقمة العيش بشكل شريف إذا كان يهتم فقط بالموسيقى دون أن ينزلق إلى مستوى تجاري معين؟

عمر خيرت: عايزة كفاح بقى شوية، عايزة كفاح وتحمل وصبر.

سامي كليب: كيف مثلا شو..

عمر خيرت: أنك ما تبصش للمادة على أنها مادة أنك أنت عايز تعيش بس علشان تقدر تشتغل وتقدم ما بداخلك من فن فمحتاج تبقى عايش مستور.

سامي كليب: كما تسمع وأسمع في القاهرة الأصوات كثيرة ومتعددة، عندك الهدوء اليومي لكي تعمل بالموسيقى؟ وكيف تعمل بشكل عام؟

عمر خيرت: يعني أنا من ستر ربنا وكرمه أن عندي الأستوديو بتاعي اللي أنا بأشتغل فيه قريب من البيت حتى ما بأسوقش تقريبا يعني أروح مشي..

سامي كليب: رايحين نشوفه بعد شوية.

عمر خيرت: أروح مشي لحد هناك فده شال عني عبء كبير قوي لأن طبعا الحياة صاخبة جدا في القاهرة وفيها زحام، والبيت اللي أنا عايش فيه برضه يعني لما بأقفل الشبابيك وكده بأحس أنني منعزل لحد ما وبعدين لما بأحب ألف أكثر وأبقى لوحدي عندي بقى البحر أروح الإسكندرية أروح الغردقة أروح..

سامي كليب (مقاطعا): بتؤلف مقابل البحر؟

عمر خيرت: آه يعني عندي بيت في الإسكندرية قصاد البحر على طول البحر أمامه ووراءه وفي الدور السادس ما بأشوفش غير البحر، وأنا بأحب البحر يعني بيديني إحساس أحاسيس جميلة يعني بأحتاج لها.

سامي كليب: الغريب أن مثلا بعض الكتاب الكبار مثل نجيب محفوظ، جمال الغيطاني كانوا يذهبون إلى بين الناس ويسمعون كل هذه الأصوات حتى خان الخليل المكان المزدحم جدا لكي يبدعوا أدبا، بيعني لك الناس بشكل عام بشكل يومي مشاهدات الناس؟

عمر خيرت: لا، هو في اختلاف هنا ما بين الكتابة الأدبية أو التأليف القصصي أو الأدبي والموسيقى يعني الموسيقى اللي بيؤلف موسيقى بيبقى له احتياجات معينة إنما الأديب أو كده بيحتاج للناس لأنه بيستشف منهم بيأخذ منهم الكتابات بتاعته..

سامي كليب (مقاطعا): طبعا الوحي، يومي.

عمر خيرت (متابعا): الوحي بتاعه بالضبط.

سامي كليب: أنت البحر.

عمر خيرت: أنا البحر بقى والطبيعة والحاجات الحلوة دي.

سامي كليب: كويس.

عمر خيرت: والإنسان طبعا يعني.

سامي كليب: عمر خيرت الموسيقار المصري الذي صار له باع طويل في التأليف الموسيقي المصري وخصوصا السينمائي منه كان قد بدأ حياته متأثرا بالتراث الموسيقي لعائلته ولكنه بدأها أيضا متمردا على بعض الأنماط الكلاسيكية وساعيا لإيقاعات تلائم نبض حياة الستينيات والسبعينيات، فقرر أن تكون إيقاعات الطبول رفيقه وبدأ عازفا أو ضاربا على آلة الدرامز.

عمر خيرت: زي ثورة على الروتين وثورة على الواقع وكده ويمكن ده اللي عمل مني مؤلفا في الآخر أنني عندي اتجاهات وأفكار موسيقية مالهاش دعوة بأحد، يعني يمكن تعلمت من كل اللي أنا درسته من كل اللي أنا أُعجبت بهم إنما أنا عايز أضيف شيئا، اللي ساعدني اللي هو الاختلافات اللي أنا عشت فيها التناقضات دي يعني من كلاسيك في البيانو وموزار وبيتهوفن زي ما حضرتك بتقول إلى الدرامز وألفيس بريسلي والبيتلز وحاجات من نوع ثاني خالص، حتى في الأسرة كان في زي نوع من التحفظ شوية من غير ما يقولوا لي يعني إنما الوالد كان..

سامي كليب (مقاطعا): لا قالوا لك بمرحلة معينة..

عمر خيرت: لا كان يعني كان، الآن بس ما يقدرش يقول لي ما تعملش، سابني أعمل وفي الآخر واضح أن ده أنا استفدت من المرحلة دي في تكويني أنا كمؤلف موسيقي لأن مهم أنك تطلع على أنواع كثيرة من الموسيقى علشان تبقى مؤلف وتجد لنفسك الأسلوب بتاعك الخاص بك.

سامي كليب: فادتك في الموسيقى التصويرية كثيرا في الأفلام.

عمر خيرت: فادتني آه بالضبط في التأليف الموسيقي عموما لأن الإيقاع ده شيء هام جدا، فالموسيقى بتتكون من ثلاثة عناصر اللحن والإيقاع في النصف والهارموني، دول العناصر الثلاثة اللي بيعملوا العمل الموسيقي المتكامل.

سامي كليب: وأنت جيت بالهارموني من الغرب يعني رجعت بها..

عمر خيرت (مقاطعا): بالضبط الدراسة بقى درست التأليف ده لأهمية الهارموني ده كبيرة جدا للموسيقى يعني.

سامي كليب: طيب أستاذ عمر يعني لكي لا نكسر النصال على النصال كما يقال في العالم العربي، ولا نقول دائما إن الغرب تقدم ونحن تراجعنا وما إلى ذلك، بس هل فعلا أن العرب تراجعوا بموسيقاهم كثيرا وأن الغرب تقدم وأنه كان في أسباب ربما جعلت هذه الموسيقى تتأخر جدا عن موسيقى الغرب؟ لأنه كمان بنشوف أنه في منارات في العالم العربي بالموسيقى يعني اليوم وفي سيمفونيات وفي عمل أوبرالي وسيمفوني وكذا حتى ولو كان لا يزال مقتصرا على بعض الدول القليلة، لكن هل فعلا تراجعنا كثيرا في الموسيقى العربية؟

عمر خيرت: لا، إحنا توقفنا مش تراجعنا، توقفنا عند مرحلة معينة والغرب تطور بالعلوم الموسيقية اللي أنا ذكرتها..

سامي كليب: طيب شو السبب؟ عدم اهتمام؟

عمر خيرت: لا مش عدم اهتمام يعني حصلت تغيرات كبيرة جدا في تاريخ العرب كمان فاهم قصدي إزاي، إنما الحاجات دي موجودة بس لم تتطور.

سامي كليب: وربما تقدمت الأغنية على الموسيقى في مرحلة معينة يعني؟

عمر خيرت: لا، هي فضلت برضه زي ما هي، ليه؟ لأن العنصر الهارموني ده أو عنصر العلوم الموسيقية الهارموني والكاونتر بوينت ده عمل طفرة كبيرة جدا في التأليف الموسيقي، إحنا وقفنا عند اللحن والإيقاع فقط فبقيت يعني بدائية شوية مع أنها في منتهى الثراء اللحني، عندنا ثراء لحني كبير قوي.

سامي كليب: طيب صحح لي المعلومة إن كانت خطأ يعني بأسمعها في إطار كل المؤامرات اللي منسمعها في عالمنا العربي أنه مثلا إسرائيل متقدمة على الكثير من الدول العربية في المجال الأوركسترالي والسيمفوني وما إلى ذلك، صحيح؟

عمر خيرت: والعزف.. آه ده صحيح، بس ده عادي يعني مش..

سامي كليب: ليش عادي؟

عمر خيرت: مش ضدنا يعني.

سامي كليب: عنا فلوس أكثر منهم ليش عادي؟

كان هناك توجه واهتمام بإيجاد نهضة موسيقية عربية في زمن الراحل عبد الناصر
عمر خيرت:
لا، الفلوس مالهاش دعوة، لا، في توجه واهتمام بالفن ما كانش موجودا عندنا في اللحظات دي، إنما مع بداية الثورة هنا في مصر أيام الرئيس عبد الناصر كان التوجه والاهتمام بإيجاد نهضة موسيقية عربية علشان كده أبو بكر خيرت ده أختير أن يؤسس الكونسرفتوار ويعمل فيه الدراسة العالمية دي علشان يواكب ما يحدث في العالم ويبقى النهارده عندنا تأليف موسيقي يُسمع في العالم كله.

سامي كليب: على كل حال في إحدى مقابلاتك إن لم أكن مخطئا تربط النهضة الموسيقية بعهد عبد الناصر وتتوقف عند ذلك، طيب بعده ما صار إكمال لهذه المرحلة يعني اهتمام أكثر تطوير لما بوشر به في عهد عبد الناصر؟

عمر خيرت: ما هو اللي إحنا فيه بقى دلوقت وجود مؤلف زيي ومؤلفين غيري من المصريين أو العرب يعني أنت لما تعمل بذرة أنك بتؤسس أكاديمية للفنون بتنتظر لحد ما يطلع فيها الأجيال اللي حتوري الدراسة دي عملت إيه.

سامي كليب: كم سنة مثلا؟

عمر خيرت: والله ما تتحسبش بالسنين يعني كمان لأن المواهب بتتعد على الأصابع في الدنيا كلها مش بس عندنا.

سامي كليب: بس لأن عندك أنا عم أسألك لأن عندك بعض الآراء كمان حول طبيعة الإنسان العربي بشكل عام والمصري على وجه الخصوص في التعامل مع هذه الموسيقى ربما الغريبة على أذنه قليلا، يعني موسيقى الأوبرا ولا موسيقى السيمفونيات الكبيرة، تقول إن المصري يتعامل مع الأوبرا بمبدأ أن الناس دي بتصرخ كده ليه!

عمر خيرت: آه بالفعل ده..

سامي كليب: وكمان في لك تعبير آخر أنه كيف الإنسان حين يفتش عن الرغيف، يكون همه التفتيش عن رغيف في البداية كيف سيبحث في الموسيقى؟

عمر خيرت: طبعا دي مقولات صح جدا إنما هو علشان نيجي للنقطة الأولى إن الأذن تتعود على سمع الأغنية فقط زي ما إحنا قلنا صعب أن يسمع أوبرا لأن إحنا لنا طبيعة خاصة جدا في الغناء وهي جميلة قوي يعني كل المطربين العظماء اللي هم في تاريخنا إدوا جرعة كافية ومهمة جدا للأذن العربية أو المصرية، لما تيجي بعد كده عايز تعمل موسيقى لناس تعودت بس أنها تسمع أغنية بيبقى صعب في البداية ولها مقومات معينة أو طرق معينة أنك إزاي تصل للشعب بتاعك ده بموسيقى خالصة وهو متعود بس أن يسمع الأغنية.

سامي كليب: طيب حضرتك مولود عام 1948 مش هيك؟

عمر خيرت: نعم.

سامي كليب: أيام النكبة للأسف يعني طيب بعد ستين سنة من العمل والجهد وحضرتك قدمت الكثير للموسيقى العربية في الواقع، هل تشعر أن الإنسان المصري تطور في كيفية الاستماع إلى ذلك مثلا إلى هذا العمل الموسيقي الخالص؟

عمر خيرت: الحقيقة آه، يعني هو ده اللي حصل فعلا وده اللي بنلاقيه في الحفلات اللي بأقوم بها أو في الموسيقى اللي الناس بتنتقيها علشان تسمعها.

سامي كليب: يتربع عمر خيرت على عرش كبير من التأليف الموسيقي وإذا كان فيلم "ليلة القبض على فاطمة" قد أرخ لبداية شهرته فإنه قلما يضع موسيقى لفيلم أو مسلسل أو مسرحية دون أن يضيف إلى رصيده نجاحا جديدا وإلى رصيدنا الموسيقي والفني والثقافي العربي نغمة جميلة في هذا العالم المليء بالأشواك.