- الشعر والسياسة والسجن
- العلاقة بالوالدة وبداية التعلق بالشعر
- الأستاذ.. بيرم التونسي
- التعلق بالمقاومة، الانتماء للشيوعية والكتابة للتصوف

سامي كليب: مرحباً بكم أعزائي المشاهدين إلى حلقة جديدة من برنامج زيارة خاصة، أنا عشقته من النظرة الأولى وهو رماني في المحاكم والسجون هكذا يختصر ضيفنا قصته مع الشعر أما شعره فهو يختصر الكثير من قصصنا وقضايانا، إنه الشاعر والمناضل المصري أحمد فؤاد نجم يروي لنا قصة حياته التي بدأت باليتم والفقر وربما تنتهي بالفقر أيضاً.

الشعر والسياسة والسجن

أحمد فؤاد نجم - شاعر ومناضل مصري:

يعيش أهل بلدي وبينهم ما فيش تعارض يخلي التحالف

يعيش كل طائفة من الثانية خايفة وتنزل ستاير بداير وشيش

لكن في الموالد يا شعبي يا خالد بنتلم صحبة ونهتف يعيش

يعيش أهل بلدي يعيش يعيش يعيش

يعيش المثقف على مقهى ريش يعيش يعيش يعيش

محفلط مظفلط كثير الكلام عديم الممارسة عدو الزحام

بكام كلمة فاضية وكام اصطلاح يفبرك حلول المشاكل قوام

يعيش المثقف يعيش يعيش يعيش

يعيش أهل بلدي

سامي كليب: ابن البلد هو من الشعب جاء وبين قضاياه ترعرع وحين وصلت لعند الشاعر الملتزم أحمد فؤاد نجم وجدته جالسا في هذه الغرفة على السطح والتي تحتضن بين حنياها وعلى جدرانها الكثيرة من أشعاره الشعبية السياسية التي ترعرعت عليها أجيال عديدة. أنا يسعدني جدا أنك تكون ضيف في البرنامج.

أحمد فؤاد نجم: ربنا يخليك يا سامي يا أبني وأنا سعيد خالص أنت عارف أنا بحبكم قوي.

سامي كليب: والله وأنا بحبك.

أحمد فؤاد نجم: وأنا شايل الجزيرة هنا دي في مصر صليب على صدري.

سامي كليب: هو جمهور الجزيرة يحبك والجزيرة يحبوك.

أحمد فؤاد نجم: وأنا أحبهم كمان جدا.

سامي كليب: طيب في بداية اللقاء قرأت في مقدمة الأعمال الكاملة في نشرتها على الأقل الأعمال الشرعية للمرة الأولى.

أحمد فؤاد نجم: الشرعية الطبعة الشرعية الأولى أه.

سامي كليب: نعم قلت ما يلي وقعت في شباكه من أول نظرة ومن يومها وهو مشحتفني ومجرجرني وراءه في المحاكم طبعا عن الشعر.

أحمد فؤاد نجم: أيوه.

سامي كليب: طيب ندمت؟

"
الشعر هو الذي حرسني طول الفترة التي مضت ولغاية اليوم وخاصة في فترة الاضطهاد والسجون وهو يبقى أنيسي ورفيقي في الزنزانة
"
أحمد فؤاد نجم: أبداً ده هو يا سامي اللي حرسني طول الفترة اللي فاتت دي لغاية دلوقتي، في فترة الاضطهاد دي والسجون وبتاع كان هو يبقى أنيسي ورفيقي في الزنزانة، أنا ما كنت بأكتب قصيدة في الزنزانة يكفي أن الحرص الغلاظ الشداد دول يسمعوها وينقلوها لبعض ويقولوها كانت حاجة جديدة ده الشعر ده الديوان العربي كانوا بيقولوا وهو إحنا عندنا فن غيره العرب عملوا ما عملوش حاجه غيره؟

سامي كليب: أبداً، على كل حال نحن في عصر يعني الناس بطلت تحب الشعر زي الأول ولكن أشعارك تقريبا يحفظها كل الأجيال العرب.

أحمد فؤاد نجم: طيب عايز إيه بقى.

سامي كليب: ممتاز.

أحمد فؤاد نجم: أندم على كده؟

سامي كليب: لا أبداً.

أحمد فؤاد نجم: ده أنا سعيد وفرحان خالص.

سامي كليب: ولكن هل ندمت أنك مثلا ربما لو توليت وظيفة معينة في حياتك لو كنت في مكان آخر ربما أوضاعك المالية تحسنت أكثر من قبل؟

أحمد فؤاد نجم: أه ما هو أنا أوضاعي المالية دي مش حاسبها كويس يعني مش حاسبها زي الناس ما بيحسبوها، أنا احتياجاتي يا سامي أن أنا أكل كل ما أجوع وأشرب السيجارة ما عنديش احتياجات ثانية وأوفر الأكل والكساء والتعليم لبنتي زينب وخلاص مش عايز حاجه ثاني، إيه اللي ممكن أعوزه ثاني؟

سامي كليب: أبدا والاكتفاء الذاتي ما فيه أحلى منه بالحياة.

أحمد فؤاد نجم: أمال إيه.

سامي كليب: وخصوصا لشاعر ملتزم ومناضل مثلك.

أحمد فؤاد نجم: الحمد لله.

سامي كليب: كتبت شعر لحبيبتك؟

أحمد فؤاد نجم: في الأول لا إنما لما بقى دخلت في السياسية وبتاع وقرأت ناظم حكمت وقرأت بريخت وقرأت باقي العشاق ولوركا والعشاق المجانين دول اللي علموني، ناظم حكمت ده علمني أكتب القصيدة لحبيبتي إزاي يعني بلدي وحبيبتي دي من وحي ناظم حكمت.

سامي كليب: قل لي إياها شويه؟

أحمد فؤاد نجم:

الغرام في الدم سارح والهوى طارح معزة

والحنين للقرب بارح والنوى جارح يا عزة

سامي كليب:

يا ابتسامة فجر هلت بددت ليلي الحزين

أحمد فؤاد نجم: طيب يا عم ده أنت..

سامي كليب: يا ندى الصبح اللي تأتأ

أحمد فؤاد نجم: فوق خدود الدبلانين

سامي كليب: كنا قال..

أحمد فؤاد نجم: وأنتِ قال في جنينة خضراء.. أنا قاعد مع أحمد فؤاد نجم بقى هي دي بقى وكذا قصيدة كده وراء بعض، إنما هو في المنطقة دي بالذات اللي واكل دماغي عم ناظم حكمت شاعر تركيا العظيم، بيقول يا وطني العظيم أنا لا أملك ما أهبه لك سوى تفاحة حمراء في مثل قبضة اليد هي قلبي، إيه الجمال ده إيه الجنان ده.

سامي كليب: أحمد فؤاد نجم انتقل إلى بيته الجديد والمتواضع هنا بعد الزلزال الذي قضى على بيته الفقير حيث كان يسكن فيما يشبه الغرفة والتي فيها كان مع رفيق دربه الشيخ إمام يلهبان حماسة الجماهير الطامحة للتحرر من قيود الاستعمار الخارجي أو من قيود الاستبداد الداخلي وحين زرته كان يشكك بأن ثمة مًن لا يزال ينهب أمواله وأموال مواطنيه ليحرمهم حتى من البيت المتواضع.

أحمد فؤاد نجم: فلوس شقتي دي أنا ما ليش دعوة بالمؤسسات والقطاع العام اللي باعوه دول له صحاب يدوروا عليه، أنا فلوس الشقة بتاعتي دي مين اللي أخذها؟

سامي كليب: في جميع الأحوال بيتك هون أفضل من اللي كان، كان عندك غرفة حسب ما فهمت.

أحمد فؤاد نجم: أه لا مش بيتي ده الزنزانة كانت أفضل من الغرفة بتاعتي ودي كانت الحدوتة اللي فهمينها هم، يقول لك نجم إزاي قاعد 18 سنة في الزنزانة ما الزنزانة أنظف من غرفتي عندي سرير فيها بأكل فيها ثلاث مرات ما بعملش الحكاية دي في البيت.

سامي كليب: كنت تحب السجن أكثر من البيت؟

أحمد فؤاد نجم: لا ما فيش حد بيحب السجن، السجن ما يتحبش إنما ظروف المعيشة كانت بتبقى أفضل من البيت اللي كنت قاعد فيه مع الشيخ إمام.

سامي كليب: حين قرأت جزء من قصة حياة أحمد فؤاد نجم المولود في الثاني والعشرين من شهر مايو من عام 1929 فوجئت بأن الشاعر الغني بتراثه الشعري والفقير بحياته اليومية هو أبن عائلة انتقلت من الهناء إلى الفقر المدقع وفي الشعر بدأنا هذه الحكاية.

أحمد فؤاد نجم: الشعر ده حاجه بديعة.

سامي كليب: طيب يعني حضرتك بصراحتك المعروفة دائما تقول أنه ما فيه مشكلة وأنه أنا أتعاطى الحشيشة ولكن لا أشرب المسكرات، عملت لك مشاكل بين جمهورك في مصر في الخارج في الدول العربية؟

أحمد فؤاد نجم: لا ما هو بيقولوا إيه حبيبك يبلع لك الزلط، أنا عشان الناس بتحبني بتفوت لي الفارغة يعني أنا فاكر لما رحت سوريا المرة الأخيرة أنا رايح أشوف الشعب السوري مش رايح للرئيس ولا بتاع لكن بعض أصدقائي في لبنان زعلوا وواحد قابلني في معرض الكتاب هنا وقال لي بنمرقها لك في لبنان قلت له طيب ليه بتفوتها لي؟ عشان إحنا بنحبك قلت له لا بس أنت هتحسب عليه تمريقة قلت له أنا ما كنتش رايح.

سامي كليب: للرئيس.

أحمد فؤاد نجم: لا خالص عمري ما رحت لرئيس ما أنا لو عايز أروح للرؤساء ما أنا عندي رئيس أهو يملى حلة.

سامي كليب: تلقيت جوائز من رؤساء من خلال مسيرتك الفنية؟

أحمد فؤاد نجم: لا الحمد لله لا.

سامي كليب: كنت ترفض أم هم لم يقترحوا؟

أحمد فؤاد نجم: والله هو مرة واحدة القذافي كنت قاعد معه وقال لي إيه الدعم اللي أقدر أقدمه لك قلت له أنك تبعد عني.

سامي كليب: يعني حضرتك طبعا شاعر منذ صباك وبدأت الشعر السياسي بعد الهزيمة ولكن للتعرف عليك أكثر يعني خصوصا لجيل جديد ربما يعرف أشعارك ولكن لا يعرف الكثير عن قصة حياتك، وددت في البداية أن نتحدث قليلا عن الوالد والوالدة وفق ما حضرتك وصفت فيما كتبت، تقول أبويا محمد أفندي عزت ضابط البوليس الحليوة المعجباني اللي مقطع السمكة وذيلها وملهلب قلوب النسوان ومسهر العذارى في المضاجع، هو ده كل أبوك؟

أحمد فؤاد نجم: أه ما هو أبويا ده.. فيه مفارقة غريبة جدا يعني دلوقتي يعتبر من الناس اللي في الوطن العربي كله واللي حسيته أنا عدو الشرطة رقم واحد.

سامي كليب: طبيعي.

أحمد فؤاد نجم: إنما اللي ما حدش عارفه أن أبويا محمد أفندي عزت ده هو أول ضابط شرطة مصري.

سامي كليب: أول ضابط شرطة في..

أحمد فؤاد نجم: في مصر.

سامي كليب: مع الإنجليز؟

أحمد فؤاد نجم: لا كانوا الإنجليز هيسلموا الإدارة للمصريين فعملوا حاجه اسمها الكونسطبلات طلعت أول دفعة من الضباط أبويا كان أول الدفعة دي، أنا كنت في سوريا في سوريا يا سامي أولا ما كانش بيحصل إن تاكسي يشوفني فيروح مفرمل وراجع بظهره ده في سوريا دي خطيئة بالنسبة.. أخش المطعم ما يرضوش يأخذوا فلوس، أخش القهوة ما يرضوش يأخذوا فلوس أخش..

سامي كليب: الطبيعي، كل الناس تعرفك..

أحمد فؤاد نجم: أخش الصيدلية يقولوا والله ما بيصير، يا جدعان ما بيصير إيه بس ده أكل عيشك وحرام وبتاع أبداً..

سامي كليب: انتبه لرأسك..

أحمد فؤاد نجم: السوريين غرَّقوني حب عشان كده أنا بأخاف عليهم وبأحبهم..



العلاقة بالوالدة وبداية التعلق بالشعر

سامي كليب: السوريون أغرقوه بالحب يقول وكذلك الكثير من الدول العربية التي كان يزورها حتى ولو أن بعضها منعه من زيارتها نظرا لمواقفه التي لم تكن تحسب حسابا لرئيس أو لضابط أمن ولذلك أمضى جزءا كبيرا من حياته في السجن وقبل الدخول إلى مراحل السجن المختلفة وددت أن أسأله عن والدته خصوصا أنه كتب عنها أشياءً لافتة. في الحديث عن الوالدة طبعا الوالدة اهتمت بك بعد وفاة الوالد وتقول حضرتك فيما كتبت عنها أنه الوالدة تزوجت عن عمر 13 سنة وكان يُدفع آنذاك مهر العروس خمسة جنيهات وهي حصلت على 15.

أحمد فؤاد نجم: أيوه حصل.

سامي كليب: يعني كان وضعها أفضل، تقول اعتقد والدك أن هي فلاحة وعبيطة لا راحت ولا جاءت محتاجة الرعاية والتغذية زي أي جاموسة في زريبة الشيخ نجم الكبير ولكن سرعان ما أثبتت العكس.

أحمد فؤاد نجم: اتعلِّمت له الطاولة.. كان بيلعب طاولة هو واتعلِّمت له الكونكان واتعلِّمت له الضرب، الكيف مناقدة تقعد تحشش معاه وبتاع عشان ما ينزلش على القهوة وبعدين هي عملت كده في الفترة الأولى وبعد كده جابت 13 بطنا منهم أربعة مجوِز يعني جابت 17 مواطنا، أنا كنت عضوا في المجوِز الأخير ونزلت لوحدي وأختي نزلت ميتة اللي اسمها.. سموها فاطمة.

سامي كليب: الله يرحمها، يعني أنت أصغر اخوتك عمليا؟

أحمد فؤاد نجم: لا، فيه بعدي واحد، نجم، أنا قبل الأخير.

سامي كليب: طيب واخوتك في العائلة كانوا اتجهوا اتجاهات سياسية مثلك؟

أحمد فؤاد نجم: لا، عبد العزيز أخويا كان بيشتغل في شركة نقل ركاب، محمد الله يرحمه والله يرحم الجميع بقى، محمد كان شغال في السياحة من بدري فبقى ملياردير يعني ومات يعني.

سامي كليب: الله يرحمه، ببدايتك طبعا عشت الفقر وعشت الجوع ولكن عملت في الكثير من الوظائف يعني عملت حارسا وعملت بسكك الحديد وكواه..

أحمد فؤاد نجم: آه مكوجي.. آه..

سامي كليب: مكوجي..

أحمد فؤاد نجم: وجزمجي وترزي.

سامي كليب: كمان؟

أحمد فؤاد نجم: آه.

سامي كليب: طيب وبعدين فهمت أنك عملت أيضا في كرة القدم.

أحمد فؤاد نجم: أيوه.

سامي كليب: كنت تلعب كرة القدم؟

أحمد فؤاد نجم: كنت لاعب كويس كمان آه كنت لاعب يعني أنا ما بيعجبنيش حد من اللي بيلعبوا دول.

سامي كليب: اللي بيلعبوا اليوم..

أحمد فؤاد نجم: اللي عندنا في مصر هنا طبعا.. البرازيل أنا ما بأتفرجش إلا على البرازيل دي اللي بتمتعني كرة وهنا في مصر أنا أهلاوي يعني أنا ما بيملاش عيني في الأهلي دلوقتي وأقعد أتفرج عليه إلا بركات وأبو تريكة، دول اثنين لاعِّيبة سوبر دول أتفرج عليهم إنما الباقي ما هو اللي بيعمله ده أنا كنت بأعمله.

سامي كليب: طيب شو كنت تحب تصير في بدايتك يعني حين بدأت تتعلم يعني العلوم الأساسية أو بدأت تقرأ وتكتب شو كان طموحك انك تصبح في المجتمع؟

أحمد فؤاد نجم: الحقيقة من بدري قوي كنت عايز أبقى شاعر، ليه؟ كانوا مرة..

سامي كليب: من البداية كنت تريد أن تصبح شاعرا؟

أحمد فؤاد نجم: أنا كنت بأشتغل في بيت عمي وكنا بنجيب الحمام من الأبراج الصغير ونذبحه، إيه.. بيحوشوا حمام ليه؟ عشان فيه راجل شاعر كبير هييجي يتعزم عندنا يوم الجمعة الجاية عند عمي، في بيت عمي..

سامي كليب: مين كان؟

أحمد فؤاد نجم: كان أحمد رامي وقلت الله كل ده عاملينه للشاعر، طب ما أنا ممكن أبقى شاعر يعني كانت أي حاجة بالنسبة لي أقول طب إيه يعني مش مستحيل هو ده مش زيي عنده رجلين وإيدين ودماغ أنا زيُّه.

سامي كليب: يعني تبقى شاعر عشان تأكل حمام؟

أحمد فؤاد نجم: آه عشان.. لا..

سامي كليب: والاستقبال طبعا..

أحمد فؤاد نجم: والاحتفاء بالشاعر ده، أنت عارف من زمان في أمتنا يا سامي القبيلة العربية اللي كانوا قاعدين في الرمل دول، أما كان يتولد شاعر في القبيلة كان من مظاهر الاحتفال أنهم يولَّعوا أمام المضارب مثلا النار ثلاث سنين يعني يبقى الراجل مشايخ القبيلة ونسوانها وعيالها بيلمُّوا حطب من الصحراء عشان يولَّعوه اتولد شاعر في القبيلة، نبي ومخلد للقبيلة ومعلمها.

سامي كليب: هكذا بدأ أحمد فؤاد نجم مشواره نحو الشعر، كان يحلم بالشهرة والمال وحياة أفضل خصوصا أنه وبعد وفاة والده عاشت عائلته فقرا مدقعا فوالدته اضطرت لبيع أسنانها الذهب لكي تربي العائلة ويبدو أنها كانت أيضا تحب الغناء والشعر.

أحمد فؤاد نجم: هي أمي دي حاجة يعني رئتي قلبي هي اللي عملتني وكنت بأحبها قوي وهي كانت فيها مناطق جذب كثيرة، صوتها يفكرك بصوت فيروز.

سامي كليب: كانت بتغني؟

أحمد فؤاد نجم: آه، يا عيني عليها أما كانت تغني زي اليمامة، أُمَّال أنا بأعبد فيروز ليه؟ الصوت الهامس ده هي كانت زي صوت فيروز وأقعد أسمعها وهي عارفة إن أنا جمهورها الوحيد وأما تقول بقى في المغنى اللي هو الهم ده الموروث الشعبي ده أقعد أعيط أقعد جنبها ودموعي نازلة وبتاع وأسمعها أبقى متعلق بها جدا كنت أحبها قوي..

سامي كليب: لذلك ابنتك بتغني اليوم زينب؟

أحمد فؤاد نجم: آه زينب بتغني وزينب كمان فيها حاجة من ستها إنها شاطرة في الطبيخ قوي، مش شاطرة نَفَسها حلو يعني حتى لو عملت بيضتين بالسمنة وبتاع تأكل تلاقيها مختلفة.

سامي كليب: ابنته زينب هي من زوجته الحالية وأحمد فؤاد نجم تزوج وأحب مرات عديدة ولكن ابنته الحالية تسير على دربه، تحب شعره وتنهل منه لأغانيها وفي أثناء تصويرنا هذه الحلقة معه كانت في جوارنا تستمع إلى كل كلمة يقولها وكأنها تسمعها للمرة الأولى وهي أخبرتني أنها حافظة لكل شعره تقريبا وحافظة لكل ألحان رفيق دربه الشيخ إمام وهي كوالدها متعلقة بقضايانا العربية وخصوصا القضية المركزية الراسخة في القلب والوجدان والصوت.

أحمد فؤاد نجم: يا فلسطينية والبندقاني رماكم

للصهيونية تقتل حمامكم في حِماكم

يا فلسطينية وأنا بدي أسافر حَداكم

ناري في إيديا وإيديا تنزل معاكم

على رأس الحيَّة وتموِّت شريعة هولاكو

[مقطوعة غنائية]

زينب أحمد فؤاد نجم:

يا فلسطينية والبندقاني رماكم

للصهيونية تقتل حمامكم في حِماكم

يا فلسطينية وأنا بدي أسافر حَداكم

ناري في إيديا وإيديا تنزل معاكم

يا فلسطينية والغربة طالت كفاية

والصحراء أنِّت من اللاجئين والضحايا

يا فلسطينية والغربة طالت كفاية

والصحراء أنِّت من اللاجئين والضحايا

والأرض حنِّت للفلاحين والسقاية

والثورة غاية والنصر أول خُطاكم

يا فلسطينية والبندقاني رماكم

للصهيونية تقتل حمامكم في حِماكم

يا فلسطينية وأنا بدي أسافر حداكم

ناري في إيديا وإيديا تنزل معكم

على رأس الحيَّة وتموِّت شريعة هولاكو

أحمد فؤاد نجم: يعيش الغلابة في طي الربوع

نهارهم سحابة وليلهم دموع

سواعد هزيلة لكن فيها حيلة

تبدر تخضَّر جفاف الربوع

مكن شغل كايرو ما يتعبش دايرة

لا يأكل ولا حتى يقدر يجوع

يا غلبان بلدنا يا فلاح يا صانع

يا شحم السواقي يا فحم المصانع

يا منتج يا مبهج يا آخر حلاوة

يا هادي يا راضي يا عاقل يا قالع

لا تتعبش عقلك في شغل السياسة

وشوف أنت شغلك بهمة وحماسة

وعوِّد عيالك فضيلة الرضا

لأن إحنا طبعاً عبيد القضى

ورزقك ورزقي ورزق الكلاب

ده موضوع مؤجل ليوم الحساب،

كمان الصحافة هتكتب في حالتك

وتنشر مناظر لخالك وخالتك

وتطلع يا مسعد عليك الغناوي

وتسمع باسمك في قلب القهاوي

تحبَّك مشيرة وبنات الجزيرة

وقصة غرامك تشيع في الغداوي

يعيش عم مسعد يعيش يعيش

يعيش أهل بلدي

[فاصل إعلاني]

سامي كليب: أخذت حضرتك عن الوالد والوالدة؟

أحمد فؤاد نجم: أبويا ما لحقتش آخذ عنه حاجة، استندل وسابني ومشي وأنا عندي ثمان سنين.

سامي كليب: ثمانية أو ست سنين؟

أحمد فؤاد نجم: ست سنين، آه.

سامي كليب: ست سنين.

أحمد فؤاد نجم: أمي علمتني القناعة والرضا، الرضا ده مسألة جميلة يبقى عندك تبقى متوازن تبقى مش عايز حاجة من حد، إن ذراعك مش مَلوِي.

سامي كليب: تعلمت القناعة في كل شيء من والدتك إلا في السياسة؟

أحمد فؤاد نجم: إلا في السياسة ما فيهاش قناعة دية آه، أنا عايز أقول لك على معلومة يمكن ما قلتهاش لحد دلوقتي، أنا من دراويش المتنبي والمتنبي حين يمدح يبقى زي القيثارة أنا والله العظيم يا سامي نفسي..

سامي كليب: إنك تمدح حد؟

أحمد فؤاد نجم: أكتب قصيدة في حاكم عربي مدح مش مدِّيِنِّي فرصة همَّا ما يستهالوش المدح هم {.....}

سامي كليب: بالمقابل مَدحت الكثير من الرجال العرب عبر التاريخ يعني مدحت الكثير من الشعراء الذين أحببتهم.

أحمد فؤاد نجم: أُمَّال إيه؟ عنترة بن شداد، أنا فاكر مظفر الله يشفيه يا رب أنت عارف هو مريض دلوقتي في الشام مريض مرض خطير يعني، يعني بيودَّع وإحنا في باريس فقالوا له أنت إيه رأيك في أحمد فؤاد نجم؟ قال لهم عنترة قال رأيه في أحمد فؤاد نجم وقال البيتين بتوع عنترة اللي أنا بأعشقهم.

سامي كليب: اللي همَّا؟

أحمد فؤاد نجم:

هلا سألتِ الخير يا ابنة مالك إن كنتِ جاهلة بما لم تعلمي

يخبرك من شهد الوقيعة أنني أخشى الوغى وعفة مغنمي

هو ده عنترة ده الفارس.

سامي كليب: وهذا مظفر نواب قاله عنك؟

أحمد فؤاد نجم: آه، قال عنترة في.

سامي كليب: الله يشفيه، نحن حاولنا كمان إنه نستضيفه ولكن للأسف مريض.

أحمد فؤاد نجم: الله يشفيه وأرجو من اللي يشوفوا البرنامج ده يدعوا لمظفر ربنا يشفيه ويخفف آلامه يا رب.



الأستاذ.. بيرم التونسي

سامي كليب: إن شاء الله وأيضاً كنت أُعجبت أيضاً ببيرم التونسي.

أحمد فؤاد نجم: أُمَّال، عمِّنا.

سامي كليب: إعجاباً كبيراً.

أحمد فؤاد نجم: عمِّنا؟ ده أستاذنا ده.

سامي كليب: قلت إنه كان أستاذك.

"
بيرم التونسي لم يكن شاعر عامية فقط بل كان زعيما سياسيا ومعلما وفيلسوفا
"
أحمد فؤاد نجم: أُمَّال إيه؟ أستاذنا، أي حد يكتب عامية.. أنا هأقول لك على حاجة ممكن تندهش لها بس لو سألتهم هيقولوا لك أي حد بيكتب عامية في مصر في لبنان في سوريا في تونس في أي بلد عربي لازم يبقى طالع من بيرم، بيرم ما كانش مجرد شاعر عامية بيرم كان زعيما سياسيا ومعلما وفيلسوف.

سامي كليب: شو حافظ له من الشعر يعني مثلاً قصيدة تحبها؟

أحمد فؤاد نجم: هو ما يعني قصائده كلها لمَّا حركة رجوعه لمصر، لمَّا رجع متخفيا وبتاع رجع في قصيدة اسمها التغريبة بيقول:

غُلبت أقطع تذاكر وشبعت يا رب غربة

بين الشطوط والبواخر من بلدنا لأوروبا

وقلت على الشام أسافر إياك ألاقي لي تربة

فيها أجاور معاوية وأصبح حماية أمية

شوف لما هو هيعدِّي على كل البلاد العربية هيلاقيها يا عيني تعبانة ومحتلة والمجد القديم اللي هو متربي عليه انتهى.

وقلت على الشام أسافر إياك ألاقي لي تربة

فيها أجاور معاوية وحماية أمية

جاورت قسيون وجيرته توحش ولا فيهش حاجة

ده أحسن وصف اتقال لجبل قسيون قبل ما يشجَّروه، ما فيش حد جاورت قسيون وجيرته توحش ولا فيهاش حاجة.

سامي كليب: تغير اليوم جبل قسيون.

أحمد فؤاد نجم: أُمَّال إيه؟

وعزرائيل انتظرته ما جاش وجاني الخواجة

نافخ وسايق إمارته وقال لي شوف السماجة

البر تحت انتدابنا اخرج دية ما هياش وصية

رجعت للبحر ثاني مقهور وراجع فرنسا

فيه بقي طعم البوداني.. ما أعرفش البوداني ده إيه واضح إنه طعام شعبي هناك

رجعت للبحر ثاني مقهور وراجع فرنسا فيه بقي طعم البوداني..

سامي كليب: هذا البودان هو نوع من المأكول بالجزر.

أحمد فؤاد نجم: آه، كده.

سامي كليب: اسمه بودان هو نوع من الدم المحشو في المصارين.

أحمد فؤاد نجم: آه يبقى هو كده،

في بقي طعم البوداني فاكره ولا عمري ما أنسى

وإن رحت تونس كفاني عذاب أنا والتوانسة

جملان محضَّر مدافن للأمة والأمة حية

الأول راح تونس لقى جملان محضَّر مدافن للأمة والأمة حية

في بور سعيد السفينة رِسْيت تفرَّغ وتملى

والبائعين حوَّطونا بكارت بوستال وعُملة

لكن بوليس المدينة ما تفوتش من جنبه نملة

يا بور سعيد والله حصرة ولسه يا إسكندرية

سامي كليب: غريب حتى من أيام بيرم التونسي حتى اليوم بعده البوليس ما تُمرش حدُّه نملة.

أحمد فؤاد نجم: أُمَّال إيه؟ ده أيام ابن زيدون، فاكر الشاعر اللي قال

جاءت معذِّبتي في غيِّها بالغسقِ كأنها الكوكب الدُري في الأفقِ

فقلت نورتني يا خير زائرةِ أما خشيت من الحراس في الطرقِ

مش من اللصوص همَّا موجودين من زمان.

سامي كليب: طيب، فهمت إنه أول كتاب قرأته وتأثرت به جداً كان كتاب الأم لمكسيم جوركي.

أحمد فؤاد نجم: آه.

سامي كليب: شو السبب؟ شو سبب تأثرك فيه؟ هو بسبب تعلقك بالوالدة أم بمكسيم جوركي؟

أحمد فؤاد نجم: بالاثنين، هو فنان كبير قوي وأنا فوجئت بأن المثقفين والنقاد بيقولوا إن هو مش أعظم الأدباء الروس إن ديستوفيسكي وتولستوي والناس دول أعلى منه وتريجينيف، بس هو الرواية دي الأم اللي مصوَّرها هي أمي، الأم اللي مصورها في اللي.. وآخذة خبطة هنا دي من جوزها وتلمهم كلهم في حضنها ومش فاهمة حاجة همًَّا بيعملوا إيه لكن أمينة جداً وفرحانة بيهم، ده شيء جميل.

سامي كليب: وبعدين كيفية وقوفها إلى جانب ابنها حين ذهب للمقاومة.

أحمد فؤاد نجم: أُمال إيه، هأقول لك على حاجة أنت عارف إن اللي عامل الملحمة الخالدة العظيمة دي بتاعة الشعب الفلسطيني مين؟ المرأة الفلسطينية هي اللي عملاها مش الراجل، أنا شوفت أخت فلسطينية متزوجة واحد كندي وقاعدين في أسبانيا وعندها ثلاث عيال تقول لي العيِّل أول ما بينطق يقول فلسطين عربية، شوف الجمال.



التعلق بالمقاومة، الانتماء للشيوعية والكتابة للتصوف

سامي كليب: طيب أستاذ أحمد فؤاد نجم حضرتك يعني حين تشاهد اليوم على التلفازات ما يحصل في العراق، ما يحصل في فلسطين في بعض دول عربية يعني ما بيوحي لك الأمر بكتابة قصيدة اليوم مثلا؟

أحمد فؤاد نجم: والله هأقول لك على حاجة وما تتصورش إن أنا بأهرب، اللي بيحصل في العراق وفلسطين هو ده القصيدة، هي دي القصيدة اللي ما حدش يقدر يكتبها لأن دي معلَّقة بقى، طبعا بيوحي لي إن أنا أكتب، أنا بأقعد بأبقى في.. وأنا بأتفرج على.. أنت عارف أنا ما بتفرجش إلا على الجزيرة وأنا بأتفرج على اللي بيحصل.. عشان كده تركزوا شوية على العراق لأنه كنتم أوقات بيبقى خبر كده ثانوي لا..

سامي كليب: لا والله فيه حتى برنامج دائم عن العراق.

أحمد فؤاد نجم: آه أنا عارف آه المشهد العراقي وركزوا على المقاومة وفرَّحونا يا أخي، ما إحنا بنشوف الهباب والهم وأحدث ما أنتجت مصانع الموت في أميركا وأوروبا وبيتصب على دماغ إخوتنا وأولادنا في فلسطين وفي العراق، قدموا لنا صور المقاومة.

سامي كليب:طيب حين تشاهد قلت لي إنه بماذا تشعر؟ يعني هل تشعر إنه طالع على بالك تكتب قصيدة مثلا أو فقط يعني تتأثر وتشاهد وتقفل التلفزيون؟

أحمد فؤاد نجم: لا عايز أكتب بس مش قادر ما أضحكش عليك، أنا ما أقدرش أؤلف حاجة إذا الشعر ما نزلش من جوَّايا كده على طول لوحده ما بأكتبش، ما أقعدش أمسك دماغي وأشيل الكلمة دي.. الكلمة دي فده مش شعر.

سامي كليب: طيب غريبة، من أيام يعني الاختلاف مع الشيخ إمام حتى اليوم لم تكتب؟

أحمد فؤاد نجم: لا كتبت كثيرا.

سامي كليب: لا ولم تكتب يعني أشياءً كالتي كتبتها ما قبل الخلاف.

أحمد فؤاد نجم: آه.. لا كتبت..

سامي كليب: شو السبب؟

أحمد فؤاد نجم: كتبت آخر قصيدة.. بسبب الإحباط العام، إحنا في مناخ إحباط من المحيط إلى الخليج إحباط وقالت لي جميلة بو حريد مرة حلِّت المشكلة دي، أما كنت عندها فقالت لي يا نجم زمان الأديان كان اسمهم جاك وجورج هم موجودين دلوقتي بس اسمهم محمد وحسين وحسني وبتاع.

سامي كليب: متى التقيت بها المناضلة الجزائرية؟

أحمد فؤاد نجم: في الثمانينيات، زي القمر قلت لها أنت زي القمر أنت عندك 26 سنة، قالت لي أنت مجامل، قلت لها، لا قالت لا.. أنت مجامل وكريم، لمَّا قالت لي بقى إيه.. قلت لها أنتِ مجنونة يا أمَّا، قالت لي أنا قلت لبو ميديان قلت لها، الأول عايزين نعمل حوار بيني وبينك قالت لي مش هينفع الحوار بيني وبينك، قلت لها ليه؟ قالت لي أنت راجل بتؤمن بالقلم أنا بأؤمن بالقنبلة مش هنتقابل، قلت لها لا.

سامي كليب: والله كلنا حاولنا، أنا حاولت عدة مرات إني أستضيفها لا ترضى..

أحمد فؤاد نجم: آه.. لا، أنا أجيبها لك.

سامي كليب: لو عندك واسطة معها أتمنى أستضيفها.

أحمد فؤاد نجم: أنا أجيبها لكم، أنا خذوني على حسابكم الجزائر وأنا أجيب لكم ست الستات معي وآجي.

سامي كليب: من فلسطين إلى الجزائر إلى العراق وسوريا ولبنان كان أحمد فؤاد نجم الشاعر المصري الملتزم يعبر بخياله وكلامه الشعبي العميق على بساطة الغني معنىً وسياسة رغم فقر الحال يعبِّر عن كل قضايانا ويعبر الوطن العربي من محيطه إلى الخليج رغم أن الكثير من هذه الدول كانت تمنع شعره خوفا على أنظمتها ولا يزال أحمد فؤاد نجم حتى اليوم ومن على عمره المديد وجسده النحيل يتمتع بقلب ينبض بكل قضايانا وهو لم يتردد في الذهاب إلى جنوب لبنان واللقاء بسيد المقاومة هناك الشيخ حسن نصر الله وزعيمها.

أحمد فؤاد نجم: زعيم الأمة العربية ده الصحيح، هو زعيم الأمة العربية زعيمي أنا عن نفسي، زعيم الشارع العربي، انزل السوق كده عند الناس اللي ما بتعرفش تقرأ ولا تكتب قل لهم حسن نصر الله، النسوان بتدعي له وده فارس العرب اللي غاب من أيام عنترة.

سامي كليب: كيف كان لقاؤك معه تتذكر؟

أحمد فؤاد نجم: هأقول لحضرتك حاجة، السواق اللي جاء يأخذني أولا راجل مهذب جدا وبيقول لي بيكلمني بصيغة الجمع حضرتكم وبعدين وإحنا.. قال لي يمكن يحصل يعني احتياط أمني كده.

سامي كليب: صحيح.

أحمد فؤاد نجم: أرجو إنك ما تضايقش منه، قال لي ممكن نغمِّي عينيك؟ قلت له كتفني، كتِّف يدي ورجلي، قال لي طيب.. أول ما وصلنا هيبتدي بقى إيه حكاية الغُمة دي فتح الباب لقيت حسن نصر الله واقف عامل لي كده، فاتح لي حضنه، رحت مَرمِي في حضنه وما عرفتش أتكلم معه، قعدت أبُص.. اتفرج عليه وأنا كان اللي يهمني استمرار هذه التجربة العبقرية العظيمة فبأقول له طب أنتم ما عندكمش جهات تمويل؟ قال لي لا، الله لأن الأمة.. الأنظمة العربية كلها من أولهم متواطئين عليهم، بلاش متواطئين سايبينهم زي ما سايبين الشعب الفلسطيني، قلت له كمان.. قلت له أنت عارف أنا هأقول لك على معلومة ما أعرفش هي عندك ولاَّ لا، قال لي إيه هي؟ قلت له من أشد المتحمسين لحزب الله أصدقائي الأغلبية منهم قبط.. مسيحيين، قال لي أنا عارف هنا المسيحيين المصريين قبط المصريين..

سامي كليب: صحيح هذا حال موقفهم دائما كان..

أحمد فؤاد نجم: أُمَّال إيه يا سيدي..

سامي كليب: مُشرِّف.

أحمد فؤاد نجم: أُمال إيه؟ ده نصف الأمة الثاني

أنا المصري كريم العنصرين

عم بيرم، العنصرين العنصر الإسلامي والمسيحي.

بنيت المجد بين الهرمين

جدودي أنشؤوا العلم العجيب ومجرى النيل في الوادي الحبيب

لهم في الدنيا آلاف السنين ورثنا الكون وهم موجودين

القبط المصريين دول حاجة بديعة.

سامي كليب: طيب رحت على لبنان طبعا والتقيت بالسيد حسن نصر الله..

أحمد فؤاد نجم: أُمَّال إيه، آه..

سامي كليب: ذهبت إلى الجنوب لا شك؟

أحمد فؤاد نجم: آه ورحت كمان قابلت زياد الرحباني.

سامي كليب: زياد الرحباني.

أحمد فؤاد نجم: زياد ده ابني، ابني النجيب الجميل.

سامي كليب: طيب شو سبب عدم التعاون حتى اليوم يعني طبعا زياد مثلك زياد الرحباني موسيقي مهم جدا ومؤلف عبقري.

أحمد فؤاد نجم: عبقري آه.

سامي كليب: وأيضا..

أحمد فؤاد نجم: ومش عايز حاجة..

سامي كليب: بالأفكار السياسية مثلك، طيب ليه ما تعاونتم؟

أحمد فؤاد نجم: وجِّه السؤال ده.. السؤال ده متوجِّه لك يا ولد يا زياد، يا زياد أهو بأقول لك على الجزيرة أهو ليه أنت ما تعملش شغل ليَّه؟ ما تيجي يا زياد تقعد معي يومين في مصر نعمل شوية شُغل ونكسَّر بهم الدنيا يا آجي لك، شوف حل.

سامي كليب: زياد الرحباني الفنان اللبناني الملتزم أيضا كان بدأ مسيرته الفنية صغيرا بتأثير مباشر من عائلته حيث أنه ابن العائلة الرحبانية الشهيرة وابن السيدة فيروز ولكنه سرعان ما اختار لنفسه خطا فنيا يساريا خاصا رصد من خلاله نبض الشارع اللبناني الساخر من أهل السياسة والغارق فيما أسماه الرحباني فيلما أميركيا طويلا ويعتبر زياد الرحباني اليوم من أهم المؤلفين الموسيقيين العرب.

أحمد فؤاد نجم: هو بيقول أنا ابن أحمد فؤاد نجم وده خلَّى رقبتي قدّ كده، زياد ده حاجة جميلة آه.

سامي كليب: لك علاقة طبعا دائمة بأي مقاومة في الدول العربية..

أحمد فؤاد نجم: أُمَّال إيه.

سامي كليب: وحين حصل الاجتياح الإسرائيلي للبنان أول عاصمة عربية تُحتل بعد فلسطين..

أحمد فؤاد نجم: آه، أُمَّال إيه.

سامي كليب: كتبت لمقاومة كانت في طليعة المقاومات ثناء محيدلي.

أحمد فؤاد نجم: ..ثناء محيدلي آه.

سامي كليب: شو كتبت؟

أحمد فؤاد نجم: ثناء الورد كنت بأقول

ورق.. ورق.. ورق.. ورق.. ورق..

ورق أفكار وورق ثوار ورق ثورات

ورق شعار ورق شعارات ورق

كل اللي حوالينا في الآخر بأقول لها جزء منها بأقول لها..

آه يا ثناء الجرح يا بنت الألم كل الرايات اتنكِّست وأنتِ العلم

ثناء دي حاجة بديعة خالص عيِّلة عندها 16 سنة وعشان تكبَّر نفسها تقول أنا عندي 18 سنة وتكذب عشان تروح تموت عشان تزف تقول والله عندي 18 سنة وهو ده اللي راعب..

سامي كليب: آه يا وطن على الورق..

أحمد فؤاد نجم: آه يا وطن على الورق..

سامي كليب: الحلم فيك على الورق..

أحمد فؤاد نجم: على الورق والعلم فيك على الورق..

سامي كليب: وخدعني فيك؟

أحمد فؤاد نجم: صوت الورق..

سامي كليب: وسافرت فيك على الورق..

أحمد فؤاد نجم: على الورق..

سامي كليب: وحلمت بك..

أحمد فؤاد نجم: برَّه الورق..

سامي كليب: بستان ظليل..

أحمد فؤاد نجم: بستان ظليل ومشربية وحمام هديل..

سامي كليب: وناس ونيل ومشربية وحمام هديل بنت حلوة..

أحمد فؤاد نجم: وواد جميل..

سامي كليب: وواد جميل..

أحمد فؤاد نجم: آه، طلع الحلم..

سامي كليب: هجموا التتار..

أحمد فؤاد نجم:

هجموا التتار كلاب ورق قتلوا الرسوم على الورق

وقالوا حملك مستحيل حتى ولو كان على الورق

وكمِّموني بالورق وكتفوني بالورق

وكفِّنوني بالورق ورق ورق ورق

آه يا وطن على الورق

ثناء محيدلي دي.. ما هو ده اللي مخوِّف الأميركان والأوروبيين إن دي تنتشر تبقى ثقافة الإنسان القذيفة ده تعمل له إيه؟ فاكر ريغان لمَّا سألوه في الكونغرس بعد مذبحة المارينز في لبنان فقال لهم الله طب إحنا واخدين القوات دي والجيوش دي والأساطيل دي عشان نخوِّف الناس دول من الموت، ده رايح يموت أعمل له إيه؟

سامي كليب: ثناء محيدلي التي باتت قصيدة في قلب وديوان أحمد فؤاد نجم كانت قد نفَّذت عملية استشهادية باسم الحزب القومي السوري وكانت أول فتاة لبنانية وربما عربية أيضا تنفذ هكذا نوعا من العمليات بسيارة مفخخة ضد قافلة عسكرية عند معبر قرية باتر في جبال لبنان، إسرائيل اعترفت آنذاك بمقتل ضابطين على الأقل وجرح آخرين وقد خطر لي ونحن نتحدث عن هذه المقاومة أن أسال أحمد فؤاد نجم عن رأيه بالمقاومات الإسلامية السائدة اليوم في أكثر من مكان.

أحمد فؤاد نجم: أي مقاومة أنا متعاطف معها، هو حسن نصر الله مش مسلم؟ ما هي دي حركة إسلامية، بس إسلامية عارف يعني إيه الإسلام اللي أنا أفهمه واللي يخش دماغي وغير كده ما يخشش دماغي، الواقعة الرجل اللي كان بيلاقي سيدنا رسول الله ماشي كده يقول له متى تقوم الساعة يا رسول الله؟ يقول له عِلْمُها عند ربي، أكل دماغه فقال له والله ماذا أعددت لها؟ تعالى بقى، قال له لا شيء لكني أحب الله ورسوله، قال له أنت مع مَن تحب، هو ده الإسلام.

سامي كليب: طب يعني مثلا أسامة بن لادن يعني لك شيئا؟

أحمد فؤاد نجم: أسامة بن لادن أصله مع الأسف الشديد هو تربية الـ (C.I.A) ده اللي ما خلِّيه أهو قلب عليهم وأتمنى له أن ينتصر عليهم إنما ما هواش حسن نصر الله.

سامي كليب: طب حين نتحدث عن الإسلام وهذا التعلق بالمقاومات أيضا ذات الصبغة الإسلامية اليوم يعني شخص مثلك بدأ حياته شيوعيا..

أحمد فؤاد نجم: أيوه..

سامي كليب: هل تعني له هذه المسألة الإسلامية في حياته، هل يعني لك الدين الإسلامي؟

أحمد فؤاد نجم: الدين الإسلامي دين الفطرة، دين بسيط خالص ودين العدالة ودين المساواة هو ده وحِش؟ مش وحِش ده حاجة جميلة جدا وأنا فخور بانتمائي للثقافة الإسلامية وكان عم بيرم كده برضه يقول..

يا شرق فيك جو منوَّر والفكر ظلام

وفيك حرارة يا خسارة وبرود أجسام

وفيك ثلاثمائة مليون زلمة لكن أغنام

لا بالمسيح عرفوا مقامهم ولا بالإسلام

ما هو إحنا مشكلتنا هو فين الإسلام؟ طب ما هو السعودية دولة إسلامية وقطر دولة إسلامية والكويت دولة إسلامية ومصر دولة إسلامية وسوريا دولة إسلامية وإيران دولة إسلامية فين الإسلام؟ فين الإسلام الحقيقي؟

سامي كليب: بتصلي، بتصوم حضرتك؟

أحمد فؤاد نجم: لا الشعائر دي مليش دعوة بها، إنما أنا عارف..

سامي كليب: بتخاف من الموت؟

أحمد فؤاد نجم: لا أنا ده حقيقة، حد يخاف من الحقيقة؟

سامي كليب: طب كتبت للتصوف، يعني لك شعر راقٍ جدا حين تتحدث عن كيفية الوصول إلى حالة من الاستشراق، كتبت شعرا عن التصوف عن حلقة متصوفين، شو كان سببها؟

أحمد فؤاد نجم: أنا من دراويش سيدي عمر بن الفارض سلطان العاشقين وهو شاعر، ده اللي قلت لك أول ما قابلته.. قابلته على الورق والرجل بيلف لي حتة جبنة قرأت بقى..

أباركن بدا من جانب الغور لامع أم ارتفعت عن وجه سلمى البراقع

"
التصوف شيء جميل ومن غير التصوف يصبح الدين الإسلامي دينا عسكريا كله أوامر ونواهي
"
التصوف ده حاجة جميلة خالص وأنا رأيي إن التصوف ده هو الزواء بتاع الإسلام، عارف من غير التصوف الدين الإسلامي يتهيأ لك إنك قاعد في معسكر، دين عسكري كله أوامر ونواهي وشتيمة وبتاع..

سامي كليب: بس أنت انتميت للمتصوفة؟

أحمد فؤاد نجم: أبدا، أنا بأحبهم بس؟

سامي كليب: يعني انتمائك الفكري والسياسية كان فقط مع الشيوعيين؟

أحمد فؤاد نجم: أُمَّال إيه؟ مع العدالة.

سامي كليب:أُعجبت بأفكار الأخوان المسلمين بفترة معينة؟

أحمد فؤاد نجم: لا، ما هو.. ما أنا.. هم جايبين من الإسلام، الإسلام أنا عارفه الإسلام بتاعي أنا لوحده ما حدش لعب فيه، أنا علاقتي بربنا وعلاقتي بالناس.. الدين المعاملة، الدين الإسلام إيه؟ المسلم هو من سَلِم المسلمون من لسانه ويده، أنا لساني معروف على مين ويدي أنت شايفها فاضية آهُه ما فيهاش حاجة آه.

سامي كليب: تتذكر شو كتبت عن الدراويش؟

أحمد فؤاد نجم:

الله حي الله حي وسَّع سكة يمر الضيّ

شيخنا العاشق جاي وراشق سهمه وماشي حادي بادي

الله حي الله حي وسَّع سكة يمر الضيّ

يا سيد يا بدوي يا سيدنا الحسين

مَدَد يا أم هاشم يا كُحل العينين

مولانا الرفاعي يا طب الأفاعي

يا سيدي إبراهيم يا دسوقي أنت فين

بَنادي عليكم يا أهل الطريقة

وجوّايا شوق للغَزَل والحقيقة

وبراية عالم مشعلل حريقة

فزعني ولسعني وكوى قلبي كيّ

الله حي.. الله حي وسَّع سكة يمر الضيّ

وغانم يا سلمى

أنا عشقت سلمى وغانم غواها

وأنا لمّا بَعشَق ما بأرجعش أتوب

تاخدني المعاصي آدم جدي عاصي

وأنا راضع معاصي وشبعان ذنوب

ولو قالوا عشق المحاسن خَطيَّة

ألمّ الخطايا وأفوز بالعطيَّة

وأسافر بحِملي سعيد المطيَّة

عزيز الخطاوي ما يلويني شيّ

وغانم يا سلمى يحب السلامة

ولأجل المغانم يبيع العِمامة

ويبعد ويقرب ويعشق لمأرِب

وفي الجد يهرب ليوم القيامة

وأنا اللي في هواكي سبقت الميعاد

يا سلمى يا عشق البنات والأولاد

وطلَّعت صورتك في كل البلاد

وكبرت فيها الأمل في اللي جاي

الله حي الله حي يا سيدنا الحسين

يا إمام يا شهيد وهل بت عالِم ورأيك سديد

لمين ود سلمى في شرع الطريق

مين القريب ومين البعيد

ومين اللي قايل ومين اللي شايل ومين اللي طايل

ومين اللي يثبت في وقت الهوايل

ومين فينا ميت ومين فينا حي

الله حي الله حي غانم رايح عاشق جاي

شيخنا الشايب ماشي وسايب كلمة بسيطة لأهل الحي

كل ما تمشي قدم على السكة كل السكة ما تشبع ضيّ

الله حي الله حي

سامي كليب: من طفولة الفقر إلى حياة التشرد والسجن ومناهضة الأنظمة السياسية عرف الشاعر الشعبي الملتزم أحمد فؤاد نجم معظم صنوف الحياة وتياراتها الفكرية والدينية فمن التصوف الذي تعلق في بعض طرقه إلى الشيوعية التي سحرته بعض أفكارها الداعية إلى المساواة كان أحمد فؤاد نجم يبحث عن مرسى يعتقد أن فيه بصيصا من الأمل لشعبه وأهله، كتب عن كل شيء بما في ذلك ضد السيدة أم كلثوم دفاعا عن شاب عضه كلبها، القصيدة كانت بعنوان كلب الست ومنها..

أحمد فؤاد نجم:

هيَّص يا كلب الست هيَّص لك مقامك في البوليس

بكرة تتولِّف وزارة للكلاب يأخذوك رئيس

آه دي غاظتها قوي.

سامي كليب: لم تكن أم كلثوم وحدها تغتاظ من شعر أحمد فؤاد نجم وفي الحلقة المقبلة سنتحدث عن آرائه السياسية وعن فترات سجنه.

أحمد فؤاد نجم: أمتعتوني وونِّستوني وهلكتوا بدني، تعالي يا بنت يا زينب، أيوه كده.