صورة عامة - وجهة نظر
وجهة نظر

نور لبنان

تتحدث الحلقة عن النور أو الغجر، من بين بقاع الأرض التي بلغها النور لبنان حيث انتشروا في كافة أراضيه شمالا وجنوبا مرورا بالبقاع. فمن هم هؤلاء القوم؟ ومن أين أتوا وما هو أصلهم؟ وما الذي أتى بهم إلى بلاد الشام؟

– نور الشمال ونور الجنوب
– أماكن السكن وعادات الزواج
– مصادر الرزق واللغة الدومارية
– الحصول على الهوية ووضع الأولاد

نور الشمال ونور الجنوب

ريم ماجد
ريم ماجد

ريم ماجد: الدوم، الغجر، النور، الريه، الجيبسي، البوهيميون، الفردوم، القرباط وغيرها من تسميات يراد بها قوم واحد، من هم هؤلاء القوم؟ من أين أتوا وما هو أصلهم؟ وما الذي أتى بهم إلى بلاد الشام؟ محاولة الإجابة على هذه الأسئلة ستمنحنا بعض الحقائق وكثيرا من الأساطير. من بين بقاع الأرض التي بلغها النور كان لبنان حيث انتشروا في كافة أراضيه شمالا وجنوبا مرورا بالبقاع، في طريقنا إلى محافظة البقاع بحثا عن النور. السلام عليكم.


أبو عماد: وعليكم السلام، تفضلوا.


ريم ماجد: وصلنا لتونا إلى دير زنون في منطقة البقاع، سنكون في ضيافة الشيخ أبو عماد والشيخ بديع، علنا نجدهما في الديوانية حيث يجتمع شيوخ العشائر حول القهوة المرة.


أبو حاتم: الله حياك.


أبو عماد: يا هلا بالشيخ أبو حاتم.


أبو حاتم: الله يخلي لي ياك.


أبو عماد: وربعك.


أبو حاتم: الله يطول عمرك.


أبو عماد:  والمجية تبعك.


أبو حاتم: الله يبارك فيك.


أبو عماد: ووجوه الطيبة الحاضرة هون كبيرها مع صغيرها.


أبو حاتم: أولا السلام عليكم جميع، ومن طرح السلام هو من أهل السلام، والذي لا يطرح السلام لا هو من أهل السلام ولا يعرف السلام. أخ أبو عماد طول عمرها قهوتك مشروبة أنت..


أبو عماد: الله محييكم.


أبو حاتم: ونحن جايينك بمشكلة خطيفة هالبنت الحلال وتحل لنا إياها، إذا فيها خير خلينا نشرب قهوتنا، ما فيها خير خليها قهوتنا محلها يا ابن الحلال.


أبو عماد: اشرب يا شيخ أبو حاتم وتوكل على الله، مجية القوادم شرواك ووجوه الطيبة ماشي كلامكم ويا مائة أهلا وسهلا فيكم.


أبو حاتم: كف لأبو عماد يا قوادم. هلق هون المشكلة انحلت، بدنا نحكي فيها.


أبو عماد: يا أهلا وسهلا بالشيخ يا مائة أهلا وسهلا.


ريم ماجد: وإيه قصة الديوانية؟


أبو عماد: ها، هذه الديوانية أساسية لجدودنا، قهوة مرة وبنعمل في وقت.. منحب العشائر يعني بيجينا ضيف أهلا وسهلا منكرمه بفنجان قهوة ومنعمل له ديوانية ومائة أهلا وسهلا، واللي جاي من محل بعيد كمان بيستاهل خاروف منعمل له خاروف، بيستاهل دجاجة منعمل له دجاج، يعني منقدم له اللي منساوي له إياه.


ريم ماجد: كلمني شيخ أبو عماد عن عشيرتك، اسمها؟


أبو عماد: عشيرة بيت الحسن، العشاير كثير هون موجودة يعني.


ريم ماجد: من ساكن معك هنا في المنطقة من العشاير؟


أبو عماد: والله كثير عالم ساكنين بالمنطقة، الله سبحانه وتعالى الله خلقنا عشائر وقبائل، كلهم بيعرفوا بعضهم يعني الغجر.


ريم ماجد: طيب أنا ألاقي فين اللي بيشتغلوا بالطبل وبالزمر.


أبو عماد: بدك تدوري عليهم دوارة هدول، بتلاقيهم.. أنا والله بالضبط بالضبط، في بجبجنين، بالقرعون يعني مناطق هيك يعني.


ريم ماجد: قالوا لي بالعبدة..


أبو عماد: بطرابلس كله بيلتقى، بتمشيها من الشكى لتصل فيها لطرابلس لحتى تصلي فيها لوادي خان.


مشارك1: منسمع عن النور، منسمع من أهلنا يعني أنا مثلا والدي مواليد عام 1889، لما طبعا كان بيحكي عن لما كان عمره 12 سنة بيعرف أنه كان في نور وسمعها من بيه أنه كان في نور، فهم مجموعات بشرية من وين إجت ما منعرف، ما حدا كان يحكي عن تاريخها، ولكن عاداتها وتقاليدها ولغتها منعرفها، طبعا نحن ما منعرف لغتهم بس منعرف اللغة اللي بيحكوا فيها شو هي اللغة اللي بيحكوا فيها، أماكن تواجدهم بالبقاع الأوسط بالبقاع الشمالي، منطقة عكار، بخلدة، وبالجنوب، هذه أماكن تواجدهم.


ريم ماجد: نحن الآن في طريقنا للتعرف على نور شمال لبنان. نحن هنا في منطقة العبدة في شمال لبنان على الحدود السورية في ضيافة عشيرة أبو عمر العبد الله.


أبو عمر العبد الله: أنا بتشكركم جميعا لأنكم اهتميتم فعلا وجيئتم تسألوا عن بشر قاعدين بعهدة النسيان، بأعتقد ما لها لحالكم في الحياة مشان هيك أنا هلق رح أحكي لك كل شيء، كل شيء عني وعن جماعتي وعن ربعي وكل إنسان عايش بالخيمة، هيدي الخيم نحن منعشقها لأنه منحس بالحرية فيها وكل إنسان بيجي لعنا نحن على فكرة جماعة مضيافين ومنحب العالم ومنحب البشر. بيجي واحد بيوقف هون إجمالا يعني ناس بيجوا بيقفوا هون بيتفرجوا من الجسر عالطريق، بيحكوا مع بعض وبيضحكوا، بيضلوا سياراتهم وبيمشوا، ما حدا بيسألنا، لا حدا بيقول لنا أنتم كيف عايشين؟


مشارك2: أنا عندي ثلاث أولاد، عامل بأشتغل على باب الله، حياتنا بالصيفية حريق وبالشتوية غريق، هيدي الأرض نحن مستأجرينها أجار ممنوع نحط فيها خفانة ممنوع نزرع فيها شجرة، مستأجرينها أجار بالشهر مندفع يعني كل بيت بيدفع عشرة دولار، ما بتعرف أي ساعة بيكحشنا من هون يعني هلق شفتينا هون يمكن بعد شهر تيجي ما تلاقينا هون، هلق في ناس ساكنة على البحر لأنه ما معهم يدفعوا عشرة آلاف أو عشرة دولار… هيدا حمامنا، هلق نحن في عنا حمام بس في ناس كثير ما عندهم حمام، ميتنا هيك بتيجي كلها نقل على الرأس، هاي هي، هذا بيعطينا غالون ماء، يوم بيعطونا يوم ما بيعطونا كمان، مش كل يوم بيعطونا يعني بيقول لك مقطوعة الكهرباء وما في ماء.


مشاركة1: أنا مرت خيه لأبو عمر، وكان جوزي يعني شيخ العشيرة كلها إيه توفى هلق، وهلق عايشين، منروح منبيع وعايشين أنا والبنت، هذه الشنتة منبيع فيها بضاعة، شغلة فيها تعب، لازم تروحي تجيبيها من سوريا وتيجي لهون وتروحي تبيعيهم، فيها تعب ما في شيء بيجي بسهولة يعني.


مشاركة2: رجالنا بشغله ونحن بياعين منروح منبيع أغراض بالدور هذه حياتنا، عايشين ببطننا الحمد لله. ما عنا لا غسالات ولا برادات ولا في إشي، عنا رحمة الله.


مشاركة3: السلام عليكم.


ريم ماجد: صباح الخير، مالها؟ صباح الخير، عاملة إيه؟ أنتم مش في الشغل ليه؟


مشاركة3: ما أروح أشتغل..


ريم ماجد: أنت مش في الشغل ليه؟


مشاركة4: نحن ما منشتغل، عنا أولاد صغار بالمرة.


ريم ماجد: ليه؟ عشان معكم أولاد صغار.


مشاركة4: إيه هاللي من جيل هذه مثلا..


ريم ماجد: يعني لما يكون في سن كام تبتدي شغل؟


مشاركة4: يعني بالثلاثينات أربعينات، خمسة وثلاثين..

أماكن السكن وعادات الزواج


ريم ماجد: شكرا. السلام عليكم… أنا عايزة أعرف أنتم على أي أساس بتختاروا أماكن المخيم بتاعكم وبتسكنوا إزاي؟ في ترتيب معين للسكن؟


مشارك3: هنا أول شيء القرايبين بتوعي كلهم يعني كل قرايبيني محل ما بكون أنا قاعد أغلب شي هم بيجوا بيسكنوا معي حواليي لأنه نحن منشوف وين في أرض فضاء بعيدة عن الناس بعيدة عن العباد منسكن فيها، تفضلي لنفوت لجوه، فمنشان هيك نحن منضلنا ملتزمين مع بعضنا، فهيدي الخيمة مثلا هيدي خيمة بنتي، الخيمة هيدي عبارة عن خشب مثلما تفضلت شايفتيها، خشب ورق كرتون، كرتون تبع برادات.


ريم ماجد: السقف خشب والحيطان ورق كرتون.


مشارك3: إيه خشب والحيطان ورق كرتون وهيدا منغلفه بجيلاتين نايلون تبع مشاريع بتاع الخضرة منغلفه كله بالشتوية ومننزله للأرض والأرض هيدي منعليها، على فكرة بتصير دافية كثير بالشتوية هذه.


ريم ماجد: والمطر؟


مشارك3: لا، لا ما بيفوت عليها لا ماء ولا بيفوت عليها شيء بس الهواء العاصف بيؤثر علينا شوي ليلة اللي بيصير عاصفة ما مننام يعني لا أنا ولا الأولاد ولا شيء يعني وقت العاصفة القوية ما في نوم أبدا مش أنا بس كل الظعن ما حدا بينام.


ريم ماجد: الله يكون في العون.


مشارك3: الله يحفظك ويرضى عليك.


ريم ماجد: في سبب معين باختياركم دائما مكان قريب من الماء من بحر من نبع من نهر؟


مشارك3: نعم مشان ما نعمل ثقلة على الناس منجي منقعد محل في ماء مشان مثلا الماء سر الحياة، النظافة والغسيل يعني مثلا مشان نحن هلق إذا كنت قاعد مثلا بأرض غير أرضنا نحن أو غير مثلا أرضنا إحنا عندنا أولاد مثلما شفت، الأولاد هذه بتعمل مشاكل بتفوت على الأراضي الزراعية وبتصير تخربط وبتصير كذا مشان هيك نحن منضل بعاد شوي مشان ما نعمل مشاكل مع الناس.


مشارك4: طبعا نحن منعاني من تواجدهم لأنه ما فيك تقدم لهم ولا خدمة يعني ما في مجرور يستعملوه ما في ماء يستعملوها بيجيبوا ماء من بره، فحياتهم مانها يعني ما فيها نوع من الرخاء يعني حياة بؤس بطبيعة الحال، وبيسببوا مشاكل للجيران الأرض اللي حواليهم بيستعملوها بيكبوا فيها أوساخهم بيستعملوها كمراحيض يعني الناس بتعاني منهم لكن نحن أحيانا منقول من الناحية الإنسانية ما عاد في محلات يروحوا عليها فأحيانا منغض النظر أحيانا منخالفهم أحيانا منرحلهم.


مشارك3: نحن أسياد حرية بس نشوف البحر منشوف الحرية كلها، الإنسان حتى ولو كان في قيود بينه وبين الناس بس بينه وبين الطبيعة مش لازم يعمل قيود يعني، البحر بيعطينا أشياء حلوة كثير، منحس بالأمان، الحياة حلوة حد البحر.


ريم ماجد: السلام عليكم.


مشاركة5: تفضلي. هيدا بيتي أنا، هيدا المطبخ هون، نحن قعدتنا قعدة عربية، هذه فرشة مننام عليها ومنقعد عليها هيدي منحط الثياب هون بالأقفاص، هيدا هو وبيجيب شوية أدوات مطبخية، هيدي حياتنا البسيطة كثير. عشان هيك ما في عنا حياة، هذه أنا، شوفي هيك.


مشاركة6: تفضلي، أنا هيدا بيتي هون بنام نحن، بنفرش وبننام وخزينات ما عنا نحن وهذه حياتنا نحن إيه.


مشارك5: يا أهلا وسهلا، أنا ابنه لأبو عمر الكبير وهدول الاثنين نسواني، سمية الجاسم وجميلة الشيخ، انتبهت كيف، والحمد لله رب العالمين مثل ما شايفتيهم، بخير من الله نحن، وبنات حلال اثنيناتهم وعايشين مع بعض والصلاة على النبي. أنا عندي سبع أولاد، ستة من سمية وولد من جميلة.


ريم ماجد: العادات والتقاليد التي ورثها النور عن أسلافهم هي دستور حياتهم والمصدر الرئيسي لقوانينهم الداخلية وطقوس أفراحهم وأتراحهم، عادات وتقاليد قد لا تخلو من الغرابة أو على الأقل الخروج عن المألوف ولكن تلك هي نظرة الآخر التي لا يعبأ بها النور كثيرا.


مشاركة6: أنا ابنته لأبو عمر.


مشاركة7: وأنا مرته لأبو عمر، وهيدي مرته لأبو عمر..


مشاركة6: هذه بنت خالته.


مشاركة8: أنا عمري كان 13 سنة، جوزني بيي عطاني لابن عمي، حبيته، بالأول ما كنت بحبه صغيرة لأني ما بعرف الحب.


مشاركة9: عنا عادي بيجوزوها للبنت مشان إذا كبرت ما تأخذ غريب.


مشاركة10: نحن وصغار هيك بيعلمونا بلغة ثانية نحكي كغجر، إيه ونكبر يعني نحن البنات ما منشتغل هون، في منا بيشتغلوا بالأراضي في منا ما بيشتغلوا، الزراعة يعني، إيه منكبر 14، 15 سنة بس إذا إجا نصيبها بتتجوز.


مشاركة11: أنا ما بحبه لجوزي، ما بحبه لأني ما درست ولا شيء، كان عمري 13 سنة عطوني تجوزت، ولا درست ولا شيء دغري خلفت وما انبسطت ولا شيء.


مشارك6: أنا بيي جوزني كان عمري 14، 15 سنة وأنا عم أجوز ابني هيك، نحن عشائر، هلق إذا كبرت عشيرتي بأكبر أنا، أختي، هذه طريقتنا في الحياة يعني هذه عاداتنا وتقاليدنا.


مشاركة12: يعني ما منضل سنة، سنتين بيخطب البنت، لا، بس خطبها خلص، البنت حبت هذا بدها ياه خلص بيجي بيروح لأهلها بيخطبوها بيعطوا نقدها شيء خمسين ألف ستين ألف مائة ألف يعني مقدم ومؤخر بيقدم لها بالمحكمة، يعني ألفين دولار ثلاثة آلاف دولار هيك شيء، بيعطوا نصفها للبنت والنصف الثاني بتأخذه أم البنت، بيجهزوها فيهم وبيأخذوها وبالليل بيحنوها بيحطوا لها حنة وبيجيبوا لك هالطبل وهالزمر وبيدقوا، بعد ما بيعملوها وبيلبسوها الفستان الأبيض بيظبطوها منيح وبيجيبوا لها هالسيارة بيحطوها بهالسيارة هي وخطيبها وبيأخذوها على مفرق العابدين، هون على مفرق العابدين بيجوزوها بمفرق العابدين منجيبها على بيتها ولوين بدنا نفوتها يا ستنا؟ على الخيمة.


مشاركة13: هيدي متجوزة وحبلة عمرها 13 سنة، إيه عنا البنت بيبيعوها يعني مهرها، أنا مهري مائة ألف. بيجيبوا لها ذهب فيهم وثياب.


مشاركة14: أنا ماني من جماعتهم، أنا بدرية، غريبة عنهم، حبيت زوجي من الطفولة كنت صغيرة تعرفت عليه وحبيته وظل الحب بيني وبينه، طلبني من أهلي أهلي ما قبلوا عدة مرات أهلي ما قبلوا فيه، يمكن مع الحياة اللي عايشينها مع الحياة اللي انا عايشتها ما عرفت شو السبب، أنه هي حياتهم ما عادت خيمة هم عاملين بيت حجر وعرفت كيف أنه عندهم عادات عند أهلي أن هم عرب وطبعا من عشيرة لعشيرة يكونوا قراب على بعضهم عرفت كيف يعني بيلاقوها هم صعبة أنه بنتهم مثلا تقعد بخيمة وهيك، إيه أنا ما رديت على حكي أهلي كان قلبي بيحس أنه بده إياه أكثر من أنه بدي أهلي وصار النصيب وأخذته ضد إرادتهم، رحت معه خطيفة.


مشاركة15: شفته مرة بالدكاكين، كان بيروح ويجي لعنا، حبيته وأخذته ورحت معه خطيفة ظليت يعني شي 13 سنة ما أحكي مع أهلي، في أخواتي الله يرحمهم ماتوا وما بيحكوا معي، عنا صعبة عنا كثير صعبة التقاليد.


مشارك7: العرض بيقولوا الدم نفس الشيء، نحن عنا هيك، العرض بينفدا بالدم، فهمت علي كيف؟ مشان هيك بتلاقيهم مثلا واحد خطف واحدة بيتعند، بعض أوقات واحدة بتحب واحد مثلا بتهرب معه ما بيعطوه ياها بيروح وياها خطيفة، بيجي خيه بيتعند أنه بده يأخذ واحدة بدلها، ما بده مال ولا بده صلحة ولا كذا هيك بنعطيه واحدة بدالها بيمشي الحال وبيتصلحوا.


مشاركة16: منلبس هيك طويل يعني، ما منلبس هيك يعني، بيحكوا علينا إذا لبسنا قصير كثير بيحكوا يعني بيقولوا فلتانات، نحن منلبس طويل مشان هيك. ومنحني شعرنا وإيدينا، إذا مات ميت ما بنحني.


مشاركة17: منحب نلبس ملون يعني، هيك ملون هيك.


مشاركة16: بتلاقيهم مهاجرين، لما بتكون من عشيرة بتعمل حالها مثل عروس، بتظبط حالها لجوزها، حمرة وبودرة ومكياج وحمرة كل شيء منحط.

[فاصل إعلاني]

مصادر الرزق واللغة الدومارية


مشارك8: السلام عليكم، هودي الشعب كله هودي نور هودي، لا جنسية ولا شيء، حيايا ما حيايا بيناموا. شعب ومواطن هذه البيوت هيك لا عمار ولا شيء، منترجى من كل رئيس يساعد المواطنين، بس والسلام عليكم. خاطركم.


مشارك9: يا أهلا وسهلا، تفضلوا شرفوا، تفضلوا. في نور حصل اش كام منا، في نور يعني غير عن الفئة هدوليك، في نور يعني بيروحوا بيتسولوا في نور هيك يعني، نحن في هون في نور بيرقصوا يعني رقاصين، في يعني أشكال ألوان هدول النور، ما كل النور مثل بعضها.


مشارك10: نحن جماعتنا عشيرتي أنا بالذات يعني جماعة منختلف تماما عن كل الفئات الموجودة هون اللي عايشين بلبنان أو بغير لبنان، نحن جماعة عمال يعني الزلم هي اللي بتشتغل والنسوان هي اللي بتصرف، إي نعم، وغيرنا العكس، نحن جماعة عمال على باب الله منشتغل ومناكل هيدي حقيقتنا، والمجتمع اللبناني كله بيعرفنا وبيعرف أنه نحن بنشتغل.


مشارك11: الحمد لله رب العالمين، الوضع المادي حلو ما إشبه شي مثل ما قال المثل لا فوق السطوح لا تحت السطوح، منقول إنه نحن عايشين، عرفت كيف، والناس برجالها والناس برجالها أو برجالها أو بماديتها.


مشارك12: عند اللي أنت عم تحكي عليهم قدامهم مرتبتات وكذا، جماعة فنانة، بيشتغلوا في عندهم حجيات وفي عندهم سهرات وفي عندهم.. أنا ربعي ما بيقدروا يعملوا هالشي هذا لأنه ما منعرف نعمله مش متعودين عليه، نحن متعودين أختي، واحدنا بيروح.. أنا بأشتغل بالأسنان، أنا بالشهر أو بيجي لي زبون أو زبونين يعني بأشتغل لي بمائتين ثلاثمائة ألف ليرة يا دوبك بيكفوني حق خبز، وما بأقبل أني أكون مثلهم أنا بصراحة يعني.


مشارك13: أول مرشح للانتخابات النيابية أول مرشح اللي ترشح بين النور لا بسوريا لا بالأردن لا بلبنان، عرفت كيف، إلا هو الشيخ بديع المصطفى اللي هو أنا نعم.


ريم ماجد: أن يكون رب البيت بالدف ضاربا وأن تكون شيمة أهل البيت الرقص لهو من صميم ثقافة النور ومن المصادر الأساسية لكسب عيشهم، فمن أهم المهن التي يعرف بها النور إحياء الحفلات والأعراس بما يطلقون عليه الطبل والزمر.


مشارك14: نحن بيقولوا لنا الرياس لأن اللي بيعزفوا هودي بيسموهم رياس.


كريم: اسمي كريم كريش، أنا عندي صبيان وبنات وهذا تراثنا الفن بس انفردت بقضية هالموسيقى اللي طالع جديد الفلكلوري، هيدي الأساس الطبل والمزمار والبزق، هدول الأصل هم اللي يتجوزوا الأفراح ما كان لا في تلفزيونات ولا في كان في فيديوهات ولا في هيك الموديل.


مشارك14: ونحن محل ما نقعد منعلق الطبل، يعني اللي رايح مسافر وجاي من سفره أو عنده ولد أو بده يعمل عرس أو بده يطهر أولاده بيدعينا لإلنا نحن عالطبل.


كريم: أنا بالأول أنا وأخوتي كنا ممشيين الفرقة هلق طلعوا أولادنا، هون ابني وابن خيي وأولاد عمي كلياتنا ولادنا نحن أخذوا منا هالتراث، علاء ابن ابني هذا عم يشوف شو الموضوع وعم يستلم من هلق يعني بيشتغل بالفن، هيدي شغلتنا. البنات بيرقصوا لأنه ما بيصير حفلة إلا بس يكون في بنات وشباب، هذه البنات بالأساس كانوا مزروكين ففي منهم بنات بيصيروا بدهم يتأهلوا هديك بتضل مزروبة بالبيت ما حدا بيشوفها بقى بيصيروا يتداخلوا بنات وشباب لما بيصير مناسبة الشباب بيدبكوا وبيرقصوا مع بعضهم وبيجوا البنات يعني ربما شي واحدة تحتى شاب يشوفها.


ريم ماجد: رايحين على فين؟


مشاركة18: هلق بدنا ننتقل لخيمة.. ثمانية بس، وفي المجموعة اللي هلق رايحين نشوفها بتعيش في هالمنطقة.


ريم ماجد: مرحبا، عليا التركماني ساكنة هون؟


مشارك15: هديك اسأليها وين بيت عليا بيدلوك.


ريم ماجد: دوماري أو لغة الدوم هي اللغة التي يتحدث بها النور فيما بينهم، هي لغة غير مكتوبة تتوارثها الأجيال شفهيا، تختلف هذه اللغة من مكان إلى آخر باختلاف ألسنة القوميات التي يعيش بينها النور. مرحبا عليا.


عليا: أهلا يا حبيبتي كيفك، كيف صحتك؟


مشاركة18: بخير الحمد لله. عليا هي يللي ساعدتني وقت عملت.. هي بتحكي عن دراسة عصية لغوية، لغة الدوماري اللي بيحكوها الدوم اللي نحن بنعرفهم بالنور، فعليا كانت من الأشخاص النادرين يللي بيحكوا هيدي اللغة وساعدتني بكثير أشياء.


مشارك16: الإثبات الوحيد لأصل الواحد هي لغته، دراسة اللغة النورية أو الدومري هي اللي بتدل منين أجوا الجماعة وفعلا تبين خلال أول واحد أشار لها واحد اسمه طومسون بأول القرن الماضي وقال إنه من خلال دراسته للغة النورية الدوماري أو الروماني بأوروبا تبين أنه لها أصول هندية وحتى قريبة من السنسكريتية يعني الهندي القديم وهيدي إثبات قاطع أنه هم من الهند.


مشاركة18: الدومار هي لغة بتشبه لغة موجودة بالهند، بالهند في كثير لغات، سبعة، والدوماري شبيهة بأحدى هذه اللغات وهذا شيء بيؤكد أن الدوم هم أصلهم من الهند وحتى عليا خبرتنا أنه جدها قال لها، مظبوط عليا؟


عليا: إيه مبلى مظبوط إيه، إيه جدي كان قال إنه نحن أصلنا من الهند وكلنا منروح صوب هيدي شو اسمها إيه فلسطين، بس أنا مو عدوري يعني عدوره هو، قال لي تعلمي هيك هيدي لغتنا، لا بيقرؤا ولا بيكتبوا وتعلموها، هلق بيخلق الطفل الصغير عنا بيتعلم مثلنا.


مشارك16: في أحد الأشياء الملفتة أن النور بالمجتمعات اللي عاشوا فيها تبنوا دائما الدين السائد فيها، مثلا نور إيران عملوا شيعة، نور الشرق الأدنى عملوا سنة مسلمين سنة، نور أوروبا وأميركا مسيحيون.


مشارك17: هي جاي أنا هلق عم أعمل طقم سنان، يعني هيدي آخذينها عن أبا وجد بالوراثة، واحد بيعلم الثاني وكل إنسان حسب تجاربه بعدين، نحن منتعلمها من الصغر ونحن صغار منتعلم هالصنعة ومنصير نشتغل فيها ومنصير نروح نتعرف عالزبائن منشتغل بالضيع، ما بيسمحوا لنا نفتح مختبرات نشتغل فيها لأن هيدي المهنة بدها شهادات جامعات يعني حتى يمشي الحال.


ريم ماجد: بيلاحقوكم؟


مشارك17: لا ما كثير يعني هل والله عم يغضوا نظر عنا كثير هالأيام هذه، قديم كانوا يلاحقونا شوي، قديم كانوا يمنعوا.

الحصول على الهوية ووضع الأولاد


ريم ماجد: ما أكثر الحدود التي عبرها النور ذهابا بلا إياب حاملين خيامهم على ظهورهم منذ أن كتب عليهم الترحال إلى أن انتهى المطاف بمجموعات منهم في بلاد الشام، لكن الحدود تأبى إلا أن يكون لها دور فاعل في حياتهم وإن اختلف، اليوم يعبرون الحدود ذهابا وإيابا حاملين على ظهورهم لقمة العيش.


مشاركة19: بصارة براجة بشوف الودع. تعالي أبصر لك تعالي تعالي. نحن هيك بنشتغل وزلمنا بتقعد هيك بالبيوت.


ريم ماجد: أنت اللي بتشتغلي والرجل قاعد في البيت ما بيعملش حاجة؟


مشاركة19: أيوه لا ما بيعمل شيء.


ريم ماجد: وأنت كل يوم قاطعة ما بين لبنان وما بين سوريا؟


مشاركة19: كل يوم إيه هيك رفقاتي كل يوم عطول يعني هيك كل رفقاتي، في ناس متأخرين هلق.


ريم ماجد: بتبصري بالكف بس ولا؟


مشاركة19: إيه بس ليكي أنت محبوبة كثير… يالله قرب وجرب التبصير بألف، يالله بصارة.


مشاركة20: طلعت من هون بترجعوني من هونيك والدورية ما خلتني، الدورية ما خلتني إلا من فوق.


ريم ماجد: ليه؟


مشاركة20: قالوا قال يا الله ارجعي، منوين؟ قالوا لي من هون، قلت لهم من هون بروح بأقصر، ما خلوني، يعني منروح هريبة هريبة، يعني بس يطلعوا من فوق مع العالم ما بيخلونا عطول من روح تهريبة، اللي معه هوية من الزلم بيقطعوا ما معه هوية بيروح من العريضة، معي ربطة خبز جبتها عطاني إياها واحد، أطلع معي رفقاتي أنا شي أربعة، لسعتهم عم يبرموا على الطريق عم بيشتغلوا عم بيبرموا على رزقتهم بيدوروا يعني بيدقوا على أبواب الناس هيك.


مشارك18: النوري ما كان يحمل جنسية كرمال ما ينتسب لوطن، النوري بسوريا جبروه جبر بالآخر يأخذ الجنسية لأنه بده شي يعرف عليه، بلبنان كان يحمل جنسية قيد الدرس يعني بس صار تحديد صار في حدود بين سوريا وبين لبنان وبين الأردن يعني صار هيدا بده يقعد ضمن المنطقة اللي هو فيها. بطاقات قيد الدرس منحت لهم من قبل الأمن العام، عرفت علي كيف، بتخدم سنة أو كذا أو كان يعطوهم مثلا مثل بيان عيلة الأب والعيلة معه، ما يجددها تنتهي صلاحيتها، يلقطه الأمن العام يرجع يجددها ويدفع رسوم عليها عرفت علي كيف، يعني بمرسوم الجنسية بس صار تقديم طلبات هم بيقدموا طلبات يعني كل الناس قدموا طلبات مثلما قدمت هالعالم طلباتهم، وحصلوا على الجنسية اللبنانية بموجب المرسوم.


مشارك19: وقت اللي عطونا الهوية الحمد لله رب العالمين يعني صار إلنا حقوق شوي، أقل الإيمان يعني صرنا نعلم ابننا بالمدرسة فهمت علي كيف، أنا بيي مثلا أنا بيي كان يقول لي روح ارع الجحش، ما يقول لي روح على المدرسة يا ابني، أنت بيك عم يجبرك للبكالوريا، أنا بيي ما جاب لي البكالوريا بيي كان بيحملني خرج يقول لي روح جيب حشيش للجحش، شفت الفرق وين بين الهوية؟ إيه، هلق أنا ابني ما بدي أقول له روح جيب حشيش للجحش أنا بدي أقول لابني روح تعلم لأنه صار معك هوية وجنسية يا ابني، روح تعلم مشان تصير مثلك مثل هالبشرية، ما تعيش أنت مثل ما عشت أنا.


مشارك20: عبد القادر مصطفى من النور ساكن بحمص.


مشارك21: أنا يتيم ما معي هوية.


ريم ماجد: كيف بتروح عالمدرسة إذا ما معك هوية؟


مشارك21: قالوا لي بتكمل للسادس وبتطلع ما بتكمل.


باسم: أنا اسمي باسم وبأشتغل بويجي.


ريم ماجد: بتروح على المدرسة يا باسم؟


باسم: لا.


ريم ماجد: ليه؟


باسم: ما في هوية، ما في يعمل لي هوية.


ريم ماجد: إذا صار عندك هوية شو بتعمل؟


باسم: بروح على المدرسة.


ريم ماجد: قل لي ليش بتشتغل وشو بتعمل بالمصاري يللي بطالعهم؟


باسم: المصاري، بيأخذهم بيي بيجيب فيهم أكل.


ريم ماجد: أنت شو أكثر شغل بتحبها بالحياة؟


باسم: ولا شي.


مشارك22: هذا بيشتغل، ببيع كل شيء.


ريم ماجد: ليش بتشتغل؟


مشارك23: بأشتغل مشان أدرس.


مشاركة21: نحن هيك بسوريا بيي حاططني بالمدرسة، بصف الرابع، ومنجي هون بالصيف، بيي بيشتغل بالأسنان وأمي بتبيع كانت.


مشارك23: هذه أختي متعلمة بسوريا صف رابع، بتشتغل هون بتبيع بضاعة.


مشاركة22: اسمي شمسة وبالمدرسة بتعلم وبجي هون بلبنان ببيع قلوم مشان أتعلم.


مشارك24: نحن ما فينا ننكر أصلنا يعني نحن هيك عايشين الحمد لله رب العالمين نحن مسلمين إلنا إيمان، أكلنا وشربنا وأهلي وأمي وأبوي كلهم يعني كل إنسان يعني متعود على طبعه.


مشاركة23: هذه العيشة متعودين عليها نحن لأنه مالنا غيرها يعني.


مشاركة24: أولادنا متعودين هيك نحن والله منتركهم على الشمس طول النهار، على الشمس بيبروموا حفيانين متعودين عندهم مناعة يعني الحمد لله ما مثل أي ولد غيره يعني فلاح وقاعد ببيت حجر، هلق في أولاد بيطلعوا لبره دغري بتضربهم الشمس بيمرضوا، لا أولادنا الحمد لله مو هيك نحن.


مشاركة25: بأتمنى أولادي يضلوا بخير وبتمنى أولادي يتعملوا مثلنا مثل هالعالم كلها يتعلموا ويفهموا ويقدروهم العالم هذه اللي بأتمناه ما بأتمنى شي أكثر من هيك.


مشاركة26: بأتمنى أنه نعيش نصير مثل العالم والناس ما حدا يضحك علينا.

مشاركة27: حياتنا تتغير على طول ما بدنا نضل هيك، مانا مبسوطين بهالحياة.