- أهل النوبة ومشوار التهجير
- التهجير ومشكلة التعويضات
- أثر بناء السد العالي على حياة النوبيين
- اللغة النوبية ومقاومة الاندثار
- الفرح النوبي.. خصوصية المكان

العم علي-مراكبي في أسوان: على النيل كانت سواقي الدنيا وفي الغابات بكار لتحن.. وأهلا بك يا بلدي.

جبريل على موسى: النوبة بلاد الذهب يعني باللغة النوبية الذهب كانوا بيسموه نوبريه.

حمدي الركابي– باحث في التراث النوبي: النوبة أرض العطر والذهب، شعب الصبر والمعاناة، الشعب الذي أحب النهر فأغرقه الطوفان.

أهل النوبة ومشوار التهجير

[تعليق صوتي]

صاحبوا النيل ستة آلاف عام عند انحناءته الممتدة بين أسوان المصرية ودنجلة السودانية فكشف لهم النهر عن أسراره وعلّمهم الصبر وصادقوا شمسهم العفية فأشرقت اسمرارا مضيئا في وجوههم، نسبهم الفراعنة إلى الذهب وهو بلغتهم نوب ولم يبقى الآن في أرضهم من مناجم الذهب القديمة شيء اللهم إلا الناس أنفسهم النوبة، النيل هو وطن النوبة الحقيقي وقدرة أهل النوبة على البقاء عبر كل تلك الآلاف من السنين وبداية الروح والعادات تشبه قدرة النيل على الجريان عكس كل أنهار العالم من الجنوب إلى الشمال.

 عبدوا آمون رع وحابي إله النيل ونطقوا باللسان المصري وبنوا المصاطب والأهرام وخدموا رماة نبالا في جيوش الفراعنة وظل النوبيون يعبدون آلهة المصريين حتى تحول هؤلاء إلى دين المسيح بعد قرنين من ميلاده، في القرن الثالث كانت النوبة كلها قد تنصرت. في عام 640 ميلادية فتح أربعة آلاف عربي مسلم يقودهم عمرو ابن العاص، فتحوا مصر في خمسة أشهر ولكنه عجز طوال عشر سنوات تالية من المناجزة عن فتح بلاد النوبة التي قال عمرو في أهلها إنهم خير رماة الأرض، فتحوا قلوبهم بعد ذلك للدين الحنيف الذي أتاهم مع قوافل التجارة، النوبة الآن مسلمون سُنة لعبوا طوال اثني عشرة قرنا دور الجسر الذي عبر الإسلام عليه إلى الجنوب. النوبة المصرية ينقسمون إلى ثلاثة فروع هي الكنوز والعليجات والفرجة والأخيرون هم أغلب سكان النوبة المصرية الذين هُجِّروا من أرضهم عام 1964 تاركين أرضا عاشوا عليها منذ أول التاريخ لتغرقها بحيرة ناصر الشاسعة خلف السد العالي ليقدموا لمصر أكبر تضحية جماعية على امتداد تاريخها.

منير الجوكي: النوبة القديمة طبعا اللي ما تتنسيش مهما يكن، مهما يكن اللي الأجيال اللي جاية ودخلنا تطورات ما تتنسيش.

عبد الستار سيف الدين– موجه في التربية والتعليم سابقا: كنا نعيش في النوبة القديمة عيشة السعداء لأننا كنا هناك نحلم بالأمن والأمان.

الحاجة سعيدة: الحياة كان كويس خالص يعني وصحيا الهواء نفسه الجو يعني الشتاء والصيف ده يعني ما كانش عندنا ولا شتاء ولا صيف، يعني الجو كان حلو خالص ما فيش جو بتاعه أصلا في حتة ثانية.

محمد سليمان جدكاب– رئيس جمعية التراث النوبي بالقاهرة: أنا اتولدت هناك في النوبة وتربيت في النوبة لغاية سن 13 سنة، قضيت الطفولة كلها هناك في البلد عشان تبقى الفكرة واضحة يعني ها أُلقي ضوء على الجغرافية بتاعت القرية وهم النوبة كلها 45 قرية ابتداء من الشلال في أسوان لغاية قرية أدينتان آخر قرية تبع محافظة أسوان، اللي حقوله على أدينتان ينطبق على تقريبا باقي القرى لأنه كانوا في الشرق وفي الغرب إحنا كنا في الشرق، لو تخيلت إنك أنت راكب مركب أو باخرة وداخل على القرية أول حاجة هتقابلك في الشط أشجار السنط.. غابات السنط يليها على طول غابات النخيل لمسافة كبيرة جدا لأن زي ما إحنا عارفين النخل كان هو الثروة الاقتصادية للنوبة كلها، بعد كده بتطلع على الأراضي الزراعية مسافة كبيرة جدا وبعدين بتطلع على البيوت ووراءهم الجبل دا كان جغرافية البلد.

[تعليق صوتي]

"
رغبة المصريين في ترويض النيل لم تنقطع يوما ففي عام  1902 بنوا خزان أسوان وعندها بدأ أهل النوبة مشوار هجرتهم الصعبة ضحايا لصراع مصر مع النيل العنيد
"
تقرير مسجل
رغبة المصريين في ترويض نهرهم الجامح لم تنقطع يوما ولعلهم ظنوا عام 1902 أنهم قد فعلوا عندما بنوا خزان أسوان وفي ذلك التاريخ عينه بدأ أهل النوبة مشوار هجرتهم الصعبة ضحايا لصراع مصر مع النيل العنيد الذي أبى أن يحني رأسه للخزان وكان على النوبيين أن يتركوا بعض أرضهم كلما ارتفع الخزان مرة، فقد ارتفع الخزان مرتين في عامي 1912 و1932.

محمد سليمان جدكاب: لما بنوا الخزان التعلية الأولى والتعلية الثانية والتعلية الثالثة كل ده كان أيه انتقال من.. عرضي يعني يسيبوا كدة ويطلعوا لفوق يطلعوا لفوق، ده ما يعتبرش تهجير إحنا لما نقول تهجير نقصد به تماما اللي هو تهجير سنة 1964 بعد إنشاء السد العالي وتكون البحيرة الكبيرة اللي هي أخذت أو أغرقت النوبة كلها بالنسبة لمصر وجزء من نوبة السودان حوالي 17 قرية ووادي حلفا.

جبريل علي موسى: تهجير 1964 طبعا راحوا بتوع.. خيروهم، كان فيه كارت يدوهم على أساس راح تكون قبلي السد ولا بحري السد، أنا كنت معهم.. في أيه طبعا السد العالي لانشات وعوامات كانوا فيه موظفين كانوا أيه، إحنا كنا نساعدهم في الكتابة.. هتسكنوا قبلي السد ولا بحري السد يعني تقريبا 80% قالوا قبلي السد في الآخر أيه اللي جرى كلهم اتهجروا قبلي السد.. بحري السد.

الحاجة سعيدة: أول حاجة جاؤوا حصرونا سنة 1960، حصروا البيوت اللي قاعدين واللي مش قاعدين، كم نفر في البيت، الوجود هنديله بيت واللي مش موجود هنكتب غائب، الناس برضه دخلوا في دوامة أكثر واحد في المياه عملوه غائب واحد في مشوار عملوه غائب والعمدة والمشايخ يعني كانوا خايفين يكتبوا ده كدة ده كدة، عايزين يكتبوا الصح نقوله يا ولدي ده في المية ده بيجيب المية من تحت أو في مشوار اكتب عندك يقولوا لا أكثر البيوت برضه مغتربين.

عبد الستار سيف الدين: إحنا جئنا حوالي 566 أسرة عندنا في 800 أسرة مغتربين، لحد دلوقتي قاعدين في مصر واسكندرية مغتربين.. المغتربين قاعدين في مصر وإسكندرية وكان لهم بيوت عندنا هنا، كان لهم بيوت فوق يعني في الصيف أي حد ما يسمعوا حاجة بيجيؤوا يقعدوا معنا ويرجعوا ثاني، ساعة التعداد سنة 1960 ما كانوش موجودين، طيب الناس الموجودين هتعملوا فيهم أيه يا بتوع الشؤون الاجتماعية وزارة الشؤون، قالك دول هنعملهم دلوقتي هنكتبهم مغتربين ولكن لما نروح هناك في التهجير كل واحد هنبني له بيت زيكم زيهم، طيب ماشي كتبناهم مغتربين لما جئنا هنا إحنا لحد دلوقتي أكثر من 34 سنة، سنة 1960 أو 33 سنة ما فيش أي حاجة.

إدريس علي- أديب: أنا مثلا واحد من المتضررين أخذت 16.5 جنيه تعويض البيت اللي كان عندي في النوبة علشان آخذ بيت بعد كدة ما خذتش لغاية دلوقتي بيت سنة 1964 لغاية سنة 2003 ما أخذتش بيت يعني فيه نوع من الاحتيال والنصب الحكومي، إنما مش مشكلة أنا مش عايز البيت بس ليه يعني؟

الحاجة سعيدة: فرزوا اللي موجودين بالضبط والغائبين بالضبط وطلعوا البطاقات وخلاص يالة إحنا كنا فرتقنا البيوت يعني فرقتنا جبنا المراكب من أسوان نزلناهم بعناهم يعني بيتنا في الشلال، السقوف بس المكان اللي إحنا قاعدين بس حتة درى وقاعدين وعفشنا مكوم ثلاثة أشهر وخيَّط العفش بتاع أبويا.. ثلاثة أشهر جبنا الخيشة والأبرة وده ونخيَّط ونشون والبورش والصحن والحلل كله كل اللي في البيت نخيَّطه ونرصه قاعدين كدة زي المهاجرين ولا كأنه، قاعدين في خيمة وبعدين البواخر جه واللي معه بهائم واللي معاه فراخ حية كل واحد بيشيل على مزاجه بقى، يالة كومنا نصف العفش ضاعت وبقى الناس يعني نهاريها كان يوم قيامة ثانية يمكن يوم القيامة ارحم، ما حدش لاحق الثاني ولا ما حدش عارف بيته فين، خلاص وشنا شكلنا حتى غير والله العظيم كان وشنا ده كان خلاص شبهنا اصلا أتغير كان يالة، قالوا كل واحد دور دور ده نأخذ بتاع الشؤون نجري وراهم أنا واحد كم نفر جيرانك ندور لغاية فوق ما لقناش بيتنا نرجع ثاني قالوا ده بيتكم، لقينا فئران وقرف البيت مليان وساخة البيوت اللي أنت شايفها دي ولا نقدر نقعد نأكل ولا نقدر نقعد حتى عفشنا، نكنس كدة شوية شوية الوساخة والقرف والكلور والحاجات دي يعني بهدلة ما حصلش، يعني الناس اتبهدلوا بهدلة ما حصلش أصلا في الدنيا ذاته.

محمد حسن حداد– ناظر مدرسة ثانوية سابقا: من وادي النيل إلى وادي جهنم كما سمعنا بهذا الاسم من سكان كوم أمبو في هذه المنطقة، بعد أن وصلنا قالوا لنا أن هذه المنطقة كنا نسميها وادي جهنم لأنهم كانوا بيطلعوا مسلحين في هذه المنطقة اللي إحنا سكنا فيها علشان يأخذوا السماد الخفافيش وكدة للزراعة فكانت منطقة مهجورة، صحراء جرداء اللهم إلا هذه المباني التي بُنيت لنسكن فيها بعضها ووجدنا بعضها لم تبنى بعد.

سميحة: والله قالوا لنا إحنا يعني سيبوا الحاجات اللي في يديكم ما تعملوش حاجة ما تشيلوش حاجة، يعني أي حاجة أنتم تحتاجوها تروحوا تلقوها هناك في البلد اللي أنتم رايحين فيها، يعني ما عملناش أي حاجة ما جبناش معنا حاجة إللي عنده بقر اللي عنده أي حاجة سرائر وشبابيك وبيبان بعناهم وجئنا إحنا، من الأساس هما هيقعدونا في حتة حلوة فجئنا أول ما جئنا نزلنا إحنا رجعنا بالحتة اللي جئنا شفناها فينا، يعني جئنا قعدنا نعتبر جبلاية جئنا قعدنا فيها.

حمدي الركابي: إحنا بنقولوا إحنا زي السمكة لو طلعنا من جوة البحر نموت، فإحنا حياة القرى النوبية منذ الأزل منذ نشأتها على ضفاف نهر النيل الخالد، فراحوا في منطقة صحراوية فتأثروا تأثير كان صعب جدا، الوضع كان صعب أولا ما فيش مرافق ما فيش يعني زي المستشفيات وحاجات زي كده، الطرق ما كنتش ممهدة، الأراضي ما كنتش مستصلحة البيوت مبنية من الأسمنت وطبعا منافي للظروف الطبيعية حر جدا فأدى إلى فقدان يعني في أطفال اتولدوا سنة 1964 في قرى كلهم ماتوا.

محمد حسن حداد: الجيل جيل التهجير قُضي عليه، جيل الأطفال اللي ولدوا في هذا الوقت قُضي عليه حتى لدرجة إن إحنا في أولى ابتدائي في زمن ما ما لقيناش طلبه.

ثابت شريف: للأسف إن هم طبعا سكنوا في بيوت، بيوت مبنية بطريقة عشوائية ملهاش ولا أسمنت ولا حديد ولا حاجة، البيت بعد شهرين تلقاه مشقوق تشوف جارك اللي بيستحمى من جوه تشوفه من الناحية التانية نتيجة الإهمال والإسراف، ما كنش في رقابة من الدولة في 1964 في مباني التهجير.



التهجير ومشكلة التعويضات

[تعليق صوتي]

لأهل النوبة أن يشعروا بالحنين الأليم لقراهم الجميلة هذه التي تقبع الآن كسفينة غارقة تحت ماء بحيرة السد العالي، قرى هندسوها بأنفسهم لتبدو للنظار فن خالص ولتكون لهم سكن وقرة أعين، بيوت تتوازن مع البيئة من حولها فتحاتها تسمح للشمس بالدخول وتمنع القيظ، ترحب بنسمة النهر الرطيب وتحجب برد الليل وما من زاوية في البيت إلا وتطالعك برمز أو إشارة، البوابة المزخرفة تطرد الشياطين والكف لصد الحسد والديك لجلب الخصوبة والمنمنمات كي يعتدل المزاج والفخار المعلق لحرق البخور المُمَسك. ثم وقعت الواقعة، قالت لهم الحكومة المصرية ضحوا من أجل الوطن وجاء مهندسو الحكومة وبنوا لهم بيوت رآها النوبيون صناديق من الأسمنت بنيت في منطقة أقرب إلى الصحراء منها إلى النهر.

أمير محمد حسن- رئيس جمعية كلابشة الخيرية: كان الوعود اللي كانت بيجي لنا إنه كل واحد يأخذ بيت قصاد البيت ولو إنه هنا بتختلف شوية، هناك كان الواحد عنده حوش كبير وبيوت زي ما أنت عايز مساحة الأرض زي ما أنت عايز إنما هنا مش ممكن هنا يعني ضيق الحقيقة وكمان هتحصل أزمة اكثر لما إن شاء الله تعالى أولادنا وأولاد أولادنا لما يجوا مش هيلاقوا أماكن يعني كفاية.

"
النوبيون تركوا بيوت أبائهم وأجدادهم وتركوا أملاكهم وأراضيهم في سبيل بناء السد العالي غير أن الحكومة لم تعوضهم التعويض الكافي مقابل كل ذلك
"
عبد الستار سيف الدين
عبد الستار سيف الدين: طبعا نحن سبنا بيوت أجدادنا وسبنا أهالينا وسبنا أراضينا والحكومة برضه ما كافأتناش بالقدر الكافي، يعني أي واحد نوبي لما تيجي تسأله هل أنت يعني الحكومة أدتك حقك؟ يقول لك لا، في قرارة نفسي يعني وفي قرارة نفسي إن أنا ما ختش حقي.

إدريس علي: يعني البيت اللي هم قدروه بثلاثة جنية كان الباب بتاعه بس مكلف خمسين جنية في أسوان الباب بس لوحدة فقدروا البيت كله بمبلغ هايف جدا.

يوسف عبد الذاكر- مدير التعليم الثانوي والإداري إدارة مصر التعليمية: هو لا كانوا ممكن يتعوضوا بأحسن من كده لأنه الناس اللي هجروا في حرب 1967 ناس يمكن خدوا شوية مساكن وبتاع، إحنا شفناهم وأنا يمكن عملنا عدة زيارات لغاية هناك، وضع يعني كان أفضل من هنا بكتير يعني.

العم بشير: والله أنا صراحة يعني بالتحديد أنا ما نعرفش المبلغ اللي أدوه إنما إحنا كان عندنا بيوت يادوبك صرفوا لنا 52 جنية كتعويض.

أمير محمد حسن: هم الحقيقة أدونا فعلا لكن يعني{ بَخْسٍ دَرَاهِمَ مَعْدُودَةٍ } زي ما القرآن بيقول في سورة سيدنا يوسف عليه السلام، حاجات تاني بسيطة جدا يعني حاجات مش تذكر يعني.

ذاكي إدريس- تاجر في الميناء القديم بمنطقة الشلال: والله ثلاثة وستين وأربعة وستين أنا ما أعرفش التعويضات اللي هم أخذوها يعني إنما اللي أنا أعرفه مثلا بنوا لهم بيوت وبيوت كويسة جدا يعني وهم زودوا فيها البيوت، طبعا البيوت الدولة أدتهم هم زودوا فوق منه وما شاء الله النهاردة حضرتك لما تروح النوبة هناك دلوقتي عندهم.. دق ناعم وكبير وأراضي كويسة وزراعتهم بتنتج النهاردة سواء القصب أو الخضار بتاعهم ومبسوطين يعني.

علاء أحمد محمد صالح- مرشد سياحي- أسباني: لما جم أهالي اتعوضوا في النوبة القديمة أخذوا فلوس وصرفوها إنما الأساس اللي هي النخلة والبيت اللي مفروض إن أنا كنت هأتورثهم لو كان أبويا مثلا على سبيل المثال كان عنده ستمائة نخلة في قرية أسمها أبريم في النوبة القديمة، تخيل لو أنا بحسابات السوق بتاعة النهاردة عندي ستمائة نخلة النخلة بتدخل ألف جنية في السنة يبقى أنا كان مفروض يخش لي ستمائة ألف جنية بالحساب بتاع النهاردة.. والدي خد ستين جنية على الستمائة نخلة صرفهم في وقته، كانت مبلغ كبير يقول لك إنك في الستينات برضه كانت الستين جنية كانت فلوس بس مهما كانت الفلوس ديت اتصرفت، إنما النخلة لو كانت موجودة لغاية النهاردة والبيت كان بحالته موجود لغاية النهاردة بيت على النيل جنب.. حوالين منه آثار معبد الليثية وقصر أبريم وحوالي عشرين كيلو من معبد أبو سمبل كان ممكن يغيِّر حياتي وحياة أولادي بعد مني.

الحاجة سعيدة: التعويض ده ملاليم مليم كان.. ملاليم ولا ما يستهلش تهجيرنا ولا تعبنا ولا فراق البلد ولا ميتنا اللي سبناهم مثلا يعني لمؤاخذة يعني كل أوضه بعشرة جنية الأوضه، يعني في أوضتين اللي عنده أوضتين في البيت أديله عشرة جنية، اللي الحوش واسع عشرة جنية يعني مثلا أوضتين والحوش واسع ده ثلاثين جنية هو ده التعويض ومن ده كمان نصه ونصه التاني بعد مدة أدونا، يعني ما يستهلش كان عشان رخص البلد ورخص الحياة بس فرحوا الناس يعني عشان كان الدنيا رخيص.

الحسني داوود- مدرس تاريخ في قرية دار السلام النوبية: أنا حاسس النوبيين القدام أضروا وما أخذوش التعويض المناسب ليهم وفي ناس كتير ماتت يمكن بحصرتها.

العم بشير: أنا رأيي ده ما يعتبرش تعويض ده حسنة.



[فاصل إعلاني]

أثر بناء السد العالي على حياة النوبيين

[تعليق صوتي]

يقول المقريزي في خططه النوبيون يشبهون النيل فيهم كرم وسماحة ولعلنا نستطيع أن نضيف الآن أن فيهم حزنا وشجنا غائرين تماما كالنيل بعد أن روضه السد.. غيَّر السد العالي إذاً حياتهم تماما كما غيَّر الحياة في مصر كلها ولكن وعلى عكس السد الذي تتفق الآراء على إيجابياته الملموسة فإن للتهجير وجوها سلبيةً كثيرة من وجهة نظر أهل النوبة وإن كانت له إيجابيات لا ينكرها النوبيون أنفسهم سواء أكانوا في النوبة أو في القاهرة.

"
التهجير الذي تم في حق النوبيين في مصر ليس له أي مثيل في العالم حيث تم تهجير بلاد بأكملها ودثر قرى فلابد أن يتبع ذلك  سلبيات كثيرة
"
محمد سليمان جدكاب
محمد سليمان جدكاب: هذا التهجير ما تمش في أي حتة في العالم إلا هنا في مصر، تهجير بلاد بحالها بناسها بحالها لابد يكون فيه إيه سلبيات وإلا إحنا نبقى بنضحك على نفسنا.

إدريس علي: هي تقريبا كلها سلبية لأن ليه بقى؟ هم لما عملوا ساعة التهجير كان في جهاز اسمه تعمير الصحاري كان مهمته استشارية، يعني مهمته لما في صحراء عايزين يفرغوها ويعمروها يعملوا فيها أيه ما حدش سألهم هو كانت تعليمات أو أمر من عبد الناصر شيل وحط، كان المفروض.. كان ممكن أوي حل هذه المشكلة اللي عملت مشكلة دلوقتي إنه بنوا المعابد فوق الجبال، كان ممكن نقل القرى في نفس المستوى وانتهت المشكلة هم ما عملوش كده، أنا بيتهيأ لي كان في حاجة متعمدة وفيها محاولة فصل النوبة المصرية عن السودانية لأن هم نقلوا السودانية لأنهم نقلوا السودانيين بقسم القربة ونقلوا النوبيين هنا بتوعنا في كوم أمبو وحاولوا فصل هذه الجماعة البشرية عن بعضها، دي فيها تعمد يعني فيها سوء نية أنا ما أعتقدش إنها فيها حسن نية.

عبد الستار سيف الدين: لو كنت أنا قاعد في مكاني وبالمرتب اللي أنا كنت بأخذه دلوقتي كنت هأبقى ملك هناك مش حصرف حاجة ولا مش حشتري حاجة.. كل حاجة موجودة عندي في البيت كنت هأبقى ملك وكان هايوصلنا التيار الكهربي كان هايوصلنا المياه الحلوة كانت هاتوصلنا، كل الوسائل الموجودة دلوقتي وسائل الاتصالات وسائل المواصلات كل حاجة كان هايوصل للنوبيين ما كناش هنتعب في أي حاجة.

سميحة: الطعام اللي إحنا كنا بنجبوها من الزراعة ما فيش البلح اللي إحنا كنا بنجبوها من الأشجار ما فيش، أي حاجة كنا بنجبوها من هناك لكن كل حاجة هنا عايز فلوس وما فيش المعيشة غالية اللي معاه نفرين ثلاثة، أربعة الله يكون في عونه يعني صعبة، المدارس كان ببلاش المدارس دلوقتي الرسوم بيأخذوها من كل نفر 30.. 31 جنيه على النفر.

[تعليق صوتي]

جهات الإحصاء المصرية لا تقدم أرقاما من أي نوع تتعلق بالنوبة، لا تخبرنا بأعدادهم ولا بنسبة الأمية بينهم، الأرقام تأتي من تقرير اليونسكو الألفي الذي أشار إلى أن نسبة من يتلقون تعليما نظاميا في إقليم النوبة المصري هي الأعلى في كل أنحاء مصر باستثناء المدن الرئيسية.

عبد الستار سيف الدين: السلبيات اللي كانت بقى في النوبة عندنا ما كانش في مدارس، يعني لو في عندنا زي ما أنا قلت كانت حوالي 17 كيلو كان في مدرسة واحدة في الشرق وفي أغلب القرى والنجوع الثانية ما كانوش أولادهم ما كانوش بيجوا المدرسة ليه؟ بعيدة عنهم عندنا المواصلات بقى بين الشرق والغرب كان بالمراكب الشراعية هايجي إزاي يوميا رايح جاي لو في ريح ما فيش ريح المركب الشراعية أهم شيء الريح بيمشي بالريح فما كانوش بيجوا، بعد.. يعني قبل الهجرة بثلاثة أربعة سنين عملوا مدرسة في الغرب ومدرسة في الجنوب.. ده من السلبيات النوبة القديمة، من الإيجابيات اللي هنا في كل قرية تلاقي مدرسة ابتدائية، عندنا هنا في كل قرية بنلاقي مدرسة ابتدائية، مجموعة القرى بتلاقي مدرسة إعدادية مدرسة ثانوية، ثانوية تجارية، ثانوية صناعية جميع مختلف المدارس موجودة هنا.

جبريل علي موسى: ما كانش بيحصل سرقات ولا قتل ولا يعني مشاكل ما كانش في عندنا في النوبة القديمة، أي إشكال بسيط يحل بمجلس عرب واللي يحكم المجلس خلاص هي المحكمة لكن دلوقتي المشاكل في البيت طبعا المدنية تأثر فينا.

مشارك: الموضوع ما فيهوش إيجابيات هو بالضبط الموضوع فيه سلبيات لأنك أنت نقلت من قرية فيها الشكل المتعارف عليه للقرية اللي أنت ملتصق فيها.. بها اللي فيها قبورك وقبور أجدادك يعني وفيها مزارعك وفيها نخيلك وفيها كل حاجتك واللي هي فيها الشكل الأقرب إلى.. اللي أنت عملته يعني اللي أنت حوالي 30 سنة قاعد تنمي فيها القرية وبعدين تنقل لمكان آخر أنت ليس لك به أي علاقة من أي نوع ومكان مقفر وصحراء جرداء ومطلوب منك إن أنت تصنع منها جنة وبلا أي يعني لا دافع ولا أي دعم مدياهولك الدولة طبعا.

الحسني داوود: هو النوبيين طبعا الناس هجرت وجات ولا حول لهم ولا قوة هتقعد هتقعد، ما عنديش بيت ما أنا سبت وطني أنا وطني نفسه مش لاقيه، إحنا النهاردة على الخريطة ليه.. الخرائط اللي جاية من أميركا واليونيسكو واليونيسيف خرائط موجودة كلها وتُدرس في المدارس للأسف بيتجاهلوها بعض المدرسين مكتوب مملكة النوبة وبلاد النوبة.. النيل النوبي، إذاً ده كل دي موجودة لكن للأسف الخرائط بتاعتنا تلاقيها مش موجودة، النهاردة مصر تتشاكل مع السودان على خط 22 على حلايب تبع مصر.. طب أنت ناسي إن في مملكة في النصف؟ فين مملكة النوبة، فين.. أنت عامل متحف النوبة فين النوبيين فين بلدهم الأصلية فين بلدهم فين خط طول العرض إديني المساحة بقتها فينها؟ أيوة النهردة السد العالي خير عم على الكل وإحنا ماشي تمام والكهرباء والأراضي وحمانا من أخطار الفيضان ماشي والجفاف وكده لكن النهاردة فين أنا، أنا تعويضي فين، فين مملكتي فين جنسيتي أنا نوبي؟



اللغة النوبية ومقاومة الإندثار

[تعليق صوتي]

"
اللغة النوبية حالة فريدة إذ تجمع بين طبقات متراكبة من كل لغات حوض النيل المتعددة تاريخيا منذ الهيروغليفية والديموطيقية وحتى العربية بل وبها من اليونانية القديمة ومن الفارسية أشياء
"
تقرير مسجل
اللغة النوبية حالة فريدة إذ هي تجمع بفرعيها الكبيرين الكنوز والفدجة بين طبقات متراكبة من كل لغات حوض النيل المتعددة تاريخيا منذ الهيروغليفية والديموطيقية وحتى العربية بل وبها من اليونانية القديمة ومن الفارسية أشياء، النوبية إذاً هي اللغة المحكية الوحيدة القادرة على إسماعنا جرس الماضي الموغل في القِدم.

محمد سليمان جدكاب: اللغة النوبية قديمة آلاف السنين وبعدين النوبيين الأقباط في مصر لما حبوا يكتبوا اللغة القبطية اللي هي المصرية القديمة لجؤوا إلى أحرف اللغة اليونانية القديمة وكتبوا بها اللغة القبطية بعد ما أضافوا لها سبعة حروف، اللغة.. الأول اللي عايز النوبة كان بيروح للنوبة لأنه كان أيه البلاد معزولة قبل ما تهاجر فما كانش في خوف على اللغة، اللغة موجودة وإحنا لما كنا بنروح البلد منين أما ننزل من الباخرة ما نتكلمش عربي بنتكلم لغة نوبية لكن النهردة لما جينا هنا في منطقة التهجير طبعا حوالينا ناس وبنختلط ونتكلم والأطفال هم اللي أيه يلقطوا من هنا ومن هنا فقولنا لا نحافظ على اللغة إزاي؟ إن إحنا نوجد حاجة تضمن الاستمرار، أحسن حاجة تضمن الاستمرار التدوين الكتابة، طب ما اللغة النوبية بطلت الكتابة بها طب نعمل إيه؟ كان في المرحوم الأستاذ الدكتور مختار خليل كباره شاب من أبو سمبل وهو كان أستاذ في كلية الآثار وهو بيعمل رسالة الدكتوراة في جامعة بون في ألمانيا لجأ إلى الكتابات الألمانية لأن هما أكثر ناس كتبوا عن اللغة النوبية فأخذ من المراجع دي زائد من البرديات المختلفة اللي هي من قصر أبريم وموجودة في المتحف القبطي وفي المتحف المصري وفي الخارج وطلَّع من ده كله من أحرف اللغة النوبية القديمة أربعة وعشرين حرف وطلَّع كتاب اسمه اللغة النوبية كيف نكتبها وباللغة النوبية (كلمة بلغة أجنبية).

عبد الستار سيف الدين: أطفالنا الصغيرين اللي طالعين دلوقتي ما بيتكلمووش نوبي، الطفل الصغير اللي بيطلع دلوقتي بيتكلم عربي وده من السلبيات اللي إحنا بنعاني منها ليه؟ اللغة النوبية هتندثر فيما بعد.

مشارك أول: تعلمت اللغة النوبية من يعني الاحتكاك أكثر مع الأم.

مشاركة: جوزي بكلمهم بالنوبي في البيت أنا والعيال علشان يعني هما برضه يتعلموا النوبي على طول، علشان كلنا نوبيين طيب أعلمهم بالعربي اكلمهم بالعربي ازاي طيب.

إدريس علي: كل أولادنا اللي هنا في مصر ما بيتكلمووش حتى أولادنا اللي هناك ابتدوا يتكلموا عربي يعني لما عيال أخويا لما أكلمهم في التليفون يكلموني عربي، أطلب معهم يتكلموا بالعربي يعني إذاً احتكاكهم بالمنطقة اللي موجودة حاليا وتعاملهم مع المدارس والباعة حولهم.. نسيوا اللغة وإحنا بنجاهد دلوقتي أن إحنا نستعيد لكن صعب قوي.

مشارك ثان: اللغة النوبية اُستعملت في حرب 1973 وكان لها الفضل بعد الله سبحانه وتعالى أن إحنا نعدي بها خط بارليف ونهزم إسرائيل.

إدريس علي: النوبية لغة مش البشرة اللغة، البشرة ممكن أي واحد اسمر لكن اللغة، اللغة لو أندثرت تبقى النوبة دي انتهت.

العم بشير: ابتدت اللغة النوبية في الانقراض لأن هناك قبلي ما كانش فيه اختلاط كلهم نوبيين ما بيتكلمووش عربي إلا في حالات الناس اللي شغالة في التجارة بحكم التعامل مع المحافظة هنا بينزلوا هنا مع التجار بيتكلموا عربي غير كدة هناك ما كانتش اللغة مش للدرجة اللي وصلت الآن فيها، هنا طبعا ابتدوا يختلطوا مع التكنولوجيا والتطور والتليفزيون والدش والكلام ده يعني حتى اللي بيتولد بيتكلم عربي دلوقتي في التهجير.

مشارك ثان: اللغة اندثرت في الوقت الحالي وده مع الأسف الشديد جدا يعني دلوقتي إحنا لما أتهجرنا من نوبيتنا القديمة، أنا دلوقتي لما أجيء أتكلم نوبي قليل جدا معرفهش اتكلم نوبي أو ما فهماش كثير في اللغة النوبية.

مشارك: اللغة النوبية ما اندثرتش عندنا ومش هيندثر.



الفرح النوبي.. خصوصية المكان

[تعليق صوتي]

كان العرس النوبي قبل طوفان بحيرة السد يشبه موالد الأولياء في دلتا مصر وصعيدها، سبعة أيام من الفرح الجماعي للقرية كلها تنطلق الدفوف في عنف إفريقي تضبط إيقاع رقصات الرجال الرشيقة في دائرة تحيط بإحدى قريبات العروس التي تتهادي بخيلاء وهي ترتدي ثوبا ينسدل على الأرض ويسمى الجرجار، في اليوم السابع كانت القرية كلها تصطحب العروسين إلى النهر كي يتطهرا في مياهه قبل أن يشرعا في حياتهما الجديدة، التطهر في النيل لم يعد من طقوس العرس النوبي هذه الأيام، ظل العرس محتفظا بحالة الاحتشاد الجماعي كما في الموالد كل شيء يُمَارس جماعيا إعداد وتناول الطعام والرقص والغناء.

الحسني داوود: الأفراح بتاعنا لسه برضه موجودة حتى لو دخلت عليها بعض الآلات الحديثة والأورج وكده لكن برضه هو برضه في تراث.

"
النوبيون مجتمع له خصوصيته ويعتبر حفل العرس هو حالة الترفيه الرئيسية عندنا فلا يتوافر في قرانا دور السينما أو المسرح "
علاء أحمد محمد
علاء أحمد محمد صالح: إحنا مجتمع له خصوصيته إن إحنا ما عندناش هنا ترفيه فالفرح ده بالنسبة لنا كنوبيين هو السينما وهو المسرح وهو المكان اللي ممكن الأب يأخذ أولاده ويجمعهم ويطلعوا المكان عشان هيسهروا فيه اللي هو الفرح، تيجي تحط لي تشريع إن الأفراح كلها تخلص الساعة 12 إحنا الساعة 12 يا دوب بنكون مخلصين العشا بتاع الناس لأن إحنا بنيجي الشاب مننا بيروح جايب بقرة دابحها وبيأكل قرية، فعلى ما أأكل قرية وأحط لهم سلطة وعيش وأكل ويخلصوا أكل والستات تأخذ الأطباق دية تغسلها وتنضف المكان بحيث بعد كده بنقف عشان نعمل الفرح الكلام ده بيكون بعد 12 بمراحل.

محمد سليمان جدكاب: إحنا موضوع الزواج لغاية النهاردة ما بنزوجش لغير النوبي وقلنا في خطين كده وماشيين كلنا في النصف، إذا الولد طلع يطلع يعني يتجوز من الخارج هيبقى معه الكراهة، يعني أيه؟ يعني هو هيحس بشوية مشاكل يقوم لما يجيب أولاد يبتدي يجوزهم نوبيين عشان يصحح نفسه فيبتدي يخش في المسيرة ده الولد ولذلك ما بندقش عليه لو يعني معصلج قوي نروح بس النهاردة ما بيتجوزوش بقى من.. يعني بيتجوزوا برضه من النوبة من القرى الأخرى يعني العملية أيه عادية نوبي، إنما البنت بقى لو أنت طلعت البنت عن الخط هيحصل أيه؟ إذا اتجوزت غير نوبي ما إحنا اتفقنا إن ممكن تتجوز نوبي من قرية تانية ما فيش مشكلة، إنما إذا اتجوزت غير نوبي هيحصل أيه اللي هيأخذها هيبتدي يحس شوية مشاكل مش هيقدر يمشي معانا ليه؟ لأن إحنا زي ما قلت لحضرتك مرتبي مشترك فيه القرية كلها هل هو هيقبل طبعا لا، ما أخذهاش عشان يضيع نفسه فيبتدي يعمل أيه لما يجيب أولاد بقى يجوزهم من بره مش هيجوزهم نوبيين عشان مش عاوز دوشة وبالتالي هيبقى أيه التشتت هيزيد عشان كده إحنا حريصين جدا إن البنت لا تتزوج غير النوبي عشان المسيرة تفضل ويفضل الخط ماشي يعني.

مشارك أول: أنا شاب مصري نوبي الأصل لأنه إحنا بتكلم في هذا الوطن في تعدد أعراق وتعدد أصول أنا من أصول الأصول المصرية الأكثر إلى إنها تبقى جذور إفريقية أنا نوبي.

جبريل علي موسى: فإحنا طلعنا إحنا مصريين بس يعني إحساسي طبعا منتمي للنوبة.

أمير محمد حسن: أولاً الواحد ما يرضاش يقول أنا من أصل مصري نوبي لا أنا نوبي مصري.

مشارك ثالث: أنا بعتبر نفسي قاهري من الدرجة الأولى.

مشاركة أولى: يعني أنا بعتبر نفسي مصرية عربية.

مشارك رابع: أنا الجنسية مصري والديانة مسلم الحمد لله ونوبي أبا عن جدا.

مشارك خامس: مسلم وعربي ونوبي وكله لأنه ما فيش دلوقتي فرق بين ده وده يعني.

محمد حسن حداد: مصري نوبي ولو لم أكن نوبيا لوددت أن أكون نوبيا.

مشارك سادس: لأن أنا مصري بس نوبي.

مشارك سابع: لا عامة إحنا كلنا مصر بس نوبيين إحنا.

إدريس علي: هو النوبي في مكان شايل النوبة في الوجدان سواء في أميركا في فرنسا في إنجلترا في مصر في أي حتة شايلها في الوجدان، مش مهم إنه يرجع أو ما يرجعش إنما النوبة موجودة جوه منه.

الحاجة سعيدة: أنا أقول لك أصلا أساس المصري هو النوبي.

العم بشير: هو من ناحية مصري مصري، مصري نوبي إنما الانتماء كله للنوبة.

مشارك ثامن: طبعا أنا مصري وأبن مصر مواليد وكل حاجة بس يعني نوبي.

الحسني داوود: أنا بأعتز بنوبيتي جدا لكن أنا النهاردة عندي 36 سنة قاعد في مصر فبعتبر نوبي مصري لأن أنا ما فيش حاجة بأيدي المفروض أكون نوبي نوبي طب فين ما عنديش موطن وطني خلاص أنا وطني بقى هنا فبقيت نوبي مصري فدلوقتي باعتز بمصريتي لكن كان نفسي يكتب نوبي مصري.

مشارك تاسع: أنا نوبي نوبي أصلي مش يعني صعيدي في ناس تقول ده صعيدي لا أنا نوبي أصلي.

عبد الستار سيف الدين: في بعض الأحيان الواحد بيحس بالبرارة لما يشوف الأمور اللي موجودة هنا.

مشارك عاشر: أغلبية يعني الآنسات والأمهات يعني بيلبسوا لازم أسود ده من الزعل.

إدريس علي : الأجيال اللي ما شفتش النوبة ما اعتقدش إن في عندهم مرارة يعني.

مشاركة أولى: يعني اللي إحنا فيها دي إحنا تعبانين فيها إحنا زعلانين جدا.

مشاركة ثانية: إحنا لما بيحطوا سيرة النوبة دي بنعيط.

مشارك تاسع: من يوم ما جينا هنا تعبانين خالص.