مقدم الحلقة:

كوثر البشراوي

ضيف الحلقة:

نضال الأشقر.. ممثلة ومخرجة مسرحية

تاريخ الحلقة:

08/03/2002

- التغيير وعلاقته بالمسرح الناجح
- إمكانية عمل مشروع ثقافي إبداعي في الوقت الراهن

- دور المثقفين العرب في أزمة الثقافة الحالية

- ترتيب الفن في الحياة

نضال الأشقر
كوثر البشراوي
كوثر البشراوي: أصدقاءنا المشاهدين، السلام عليكم ورحمة الله وبركاته.

نضال الأشقر:

يا أصدقائي

ما هو الشعر إذا لم يعلن العصيان؟

وما هو الشعر إذا لم يسقط الطغاة والطغيان؟

وما هو الشعر إذا لم يحدث الزلزال في الزمان والمكان؟

من أجل هذا

أعلن العصيان.

كوثر البشراوي: هكذا صرخت الفنانة القديرة نضال الأشقر على خشبة مسرح (الدسمة) بالكويت، وللعصيان انتقت سيدة المسرح مختارات عديدة من حوالي 40 قصيدة لشعراء عرب تفاوتت أزمنتهم، ولكن توحدوا في رغبة الحب والتحدي والعصيان، من الحلاج إلى بدر شاكر السيَّاب وصولاً إلى نزار قباني وسميح القاسم وسعاد الصباح وغيرهم من فرسان الكلمة جميعهم حضروا ضيوفاً على مهرجان (القرين) باختلاف أزمنتهم، جاءوا ليعلنوا بالعشق عصيانهم.

"كلمات تعشق النغم" هو عنوان العرض الشعري الغنائي الذي قدمته الفنانة نضال الأشقر رفقة أصوات معروفة وشهيرة مثل جاهدة وهبي، وخالد عبد الله من لبنان.

رندة أسمر:

جنوب دافئٌ كالأجداد

جزع كرهينة

جنوب

يا خارطتي المقلوبة

يا جنوب

جهاد الأندري:

يا جنوب..

يا من أود أن أعده بوطن

وبحدائق غنية حول الليطاني

أكتب كلمات حب على جسدك المعذب

وأهدي أطفالك

شمساً لبنانية.

كوثر البشراوي: هذا العرض جاء ليمزق مسافات الزمان والمكان وليمزق أيضاً صمت القبور وصمت الحنجرة العربية التي ازدادت ارتباكاً في الأشهر الأخيرة.

راندة أسمر:

يا قدس

يا مدينة تفوح أنبياء

يا أقصر الدروب بين الأرض والسماء

جهاد الأندري:

حزينة عيناك

يا مدينة البتول

يا واحة ظليلة..

مر بها الرسول

حزينة.. حجارة الشوارع

حزينة.. مآذن الجوامع

محمد عقيل:

يا قدس..

يا مدينة تلتف بالسواد

من يقرع الأجراس

في كنيسة القيامة

صبيحة الآحاد؟

من يحمل الألعاب للأولاد

في ليلة الميلاد؟

كوثر البشراوي: "كلمات تعشق النغم" عمل راقٍ يستحق منا الالتفات والانتباه حوله ويستحق أيضاً الغوص في حديث ممتع مع الفنانة القديرة نضال الأشقر، فأهلاً بها في برنامج (إشراقات).

نضال الأشقر:

في هذا الزمن العصيب

نلجأ إلى الإنسان

إلى اللغة.. إلى الشعر

كي نُسيِّج به هذا الوطن المعذب

كوثر البشراوي: سيدة نضال الأشقر أولاً مرحباً بكِ في برنامج (إشراقات).

نضال الأشقر: شكراً.

كوثر البشراوي: كيف تصنفين هذا العمل، هل هو كونسرتو؟ هل هو سيمفونية؟ هل هو عرض مسرحي غنائي؟ هل هو إنشاد روحي؟ كيف تصنفين هذا العمل؟

نضال الأشقر: ليس من المهم التصنيف، إنه كل هذا في آن واحد، يعني كل ما قلتيه، وكل ما شعرتيه، هو هذا المهم، لماذا نريد أن نضع دائماً مثل عنوان لكل شيء؟ هذا.. هذا العمل، نابع من شي 25 سنة من قراءة الشعر أمام الجمهور، وأنتِ بتعرفي لأنه نحنا بنعرف بعضنا من زمان، إنه أنا رحت بكل العالم، قرأت الشعر، عندما شعرت بإحباط شديد أيام الحرب اللبنانية، وكل ما يأتيني هذا الإحباط ألتجئ إلى الشعر، كأنه بأحس إنه الإنسان بحاجة دائماً أن يلتجئ إلى الصدق.. إلى النبع، إلى الكلمة التي تنبع من.. من.. من روح الإنسان، وبتعرفي أنتِ كمان إنه ها الجولات في العالم العربي –وأنا أقرأ الشعر أيام الحرب وبعد.. وبعد- كوَّنت عندي نوع من.. يعني -كيف بدي أقول لك- تأكدت إنه هايدا الشعر يدخل إلى قلب الجمهور وبيحدث بقلب الجمهور شجن وحنان وبيرجع كل إنسان بَعَد عن النبع بيرجع، يعني هلا نحنا بوقت.. بحاجة جداً إلى هذا (الكونسرتو) أو هذه القصيدة من القصائد العربية التي نبعت في وقت ما من روح الشعراء، من قلمهم، من عقلهم، من وجدانهم.. فلجأت إليهم وقمت بتوليفة كأنها قصيدة واحدة تبدأ من الغزل في المدن: بيروت، لبنان، والغزل بكل.. بالحب، هي قصيدة عن الحب مروراً بكل الحالات الصوفية والإنسانية والإحباطية حتى نصل إلى الأرض، وأنا ما بأعرف شو السبب.. شعرت إنه في هذا الوقت هل نحن المثقفين والفنانين والكتاب والشعراء والعمال كلنا في العالم العربي، ما بقى عندنا قاسم مشترك، ما بقى فيه شيء بيجمعنا، نحنا وصغار بس كنا بأول شبابنا بالستينات وبالسبعينات وبالثمانينات كنا عندنا ثقة إنه إحنا.. نحن نستطيع أن نغير هذا العالم.. إلى عالم أفضل بكل حالات اليأس راحت فلسطين وصار فيه حروب داخلية وحروب خارجية، حروب هامجية، حروب عالمية.. صار ها القاسم المشترك من إيماننا بوطننا.. نفقده، لذلك رجعت مرة ثانية ألتجئ إلى الشعر.. إلى الإنسان.. إلى اللغة خاصة بعد 11 أيلول.

كوثر البشراوي: نعم، يعني على ذكر 11 أيلول عندي هنا مقولة لمسرحي ألماني شهير (إرنست توللر).

نضال الأشقر: نعم.

كوثر البشراوي: يقول: المسرح في جوهره هو الصراع، هو تغيير الواقع تغييراً جذرياً أو لا نكون. وهنا شمل الجميع، هل.. يعني نحن نتحدث الآن لا عن إحباط تشعر به امرأة لبنانية بعد حرب بيروت ولا عن إحباط.. الإحباطات المزمنة من الستينات إلى اليوم.. نتحدث عن تراكم هذا العبء من الإحباطات.. يعني طبقة على أخرى لأن كتمت أنفاسنا.

نضال الأشقر: صح.. صح..

التغيير وعلاقته بالمسرح الناجح

كوثر البشراوي: هل مازلت تؤمنين بفعل التغيير اللي هو أساساً شرط من شروط المسرح؟

نضال الأشقر: أنا أؤمن بشرط التغيير، بشرط التنوير، بشرط الإيصال مع الآخر أو الاتصال، بكل الطرق.. أنا مؤمنة بكل هاي الأمور ولكن توقفت، لماذا تريدين أن أصبح نوع من المتحف المسرحي الذي يقدم مسرح مُحنَّط خالي من الموضوع الذي يدخل إلى صميم الإنسان؟! إذا ما كان المسرح تغيير، معه حق الكاتب الألماني.. إذا ما كان تغيير.. مش بس هو قال، (براشت) قال وكل الكتاب الكبار، (شكسبير) عمل كتب، إذا واحد ما بده يغير بالقليلة.. بالقليلة يشير.. يشير.. يدل.. أوقات بندل، أوقات بنحط سطر.. تخين تحت الكلمة.. أوقات بنلتجئ إلى الشعر، أوقات بنلتجئ إلى العنف في الكلمة، إلى العنف على المسرح، إلى.. إلى كل شيء كي نحرك كل ما هو يعني.. كل ما مات في أنفسنا، أو كل ما يريد.. يريد الحكام العرب إنه يقتلوه فينا، لأنه لاشك الشعوب في مكان والحكام في مكان آخر، هايدا يعني ما.. ما اكتشفنا البارود مثل ما بيقولوا اللبنانيين، لاشك إنه نحن بحاجة إلى.. إلى أننا نجتمع حول قاسم مشترك نلجأ له لحتى نقدر نقوم.. نقوم من الكبوة اللي إحنا واقعين فيها، خاصة بعد 11 أيلول، يعني ليش عم بأقول 11 أيلول لأنه هناك تفسير خطأ.. عن يعني الناس تبلبلوا وضاعوا وتشتتوا، والناس خافوا وشعروا إن هايدا البوليس العالمي، هاللي بيدخل بالنوافذ ويقتل الناس فرداً فرداً، يقتل الشعوب.. يدخل في.. في الحفر.. يصعد إلى الجبال، واحد عم بيكتب بيفوت بيقتله وعم بيكتب عرفتي، يعني فيه ها النوع من الخوف، وما عم بيشعروا العرب أو الناس في عالمنا، مش عم بيشعروا إنه هن أي إنسان عم بيعطيونه الأمان، مش عم بيشعروا بالأمان، مش عم بيشعروا بو لا نوع من.. من.. لا الأمان.. ولا الإيمان..

كوثر البشراوي: ولا الحلم أصلاً.

نضال الأشقر: ولا الحلم.. الحلم.. من زمان قُتل، هلا نحنا نستعيده من وقت إلى آخر، نستعيد الحلم، عندنا إيمان، الحمد لله.

كوثر البشراوي: أنا.. أنا طبعاً سعيدة أنه نلتقي في إطار هذه الحالة المميتة التي نمر بها جميعاً بعد 11 سبتمبر وفي.. على ذكر 11 سبتمبر الجميع –مثقف وغير مثقف- يشعر إنه هناك إنهزام لأي مشروع سياسي، يليه انهزام آخر لأي مشروع اقتصادي، هل في إطار ها الحالة.. حالة الشلل هذه نجرؤ ونتحدث عن إمكانية إنقاذ مشروع ثقافي.. مشروع إبداعي.. مشروع فكري؟

إمكانية عمل مشروع ثقافي إبداعي في الوقت الراهن

نضال الأشقر: عزيزتي.. ليس لنا خيار، إذا ما عندنا إيمان إنه في أيدنا نرجع نستعيد مشروع ثقافي.. فنحن نروح نموت أحسن لنا، إذا المثقفين العرب هلا.. هلا كل العالم العربي مكتف، عم بيتفرج.. بيتفرج على فلسطين عم بتموت، ببطء، عم بتتفرج على باقي الأماكن العربية.

كوثر البشراوي: نتقن فن الفرجة.

نضال الأشقر: آه، نتفرج من بعيد، ما حدا عم بيعمل شيء مثل أنت عم بتلاحظي مثل ما العالم، يعني شيء مخجل حقيقة، ونحن كمان مخجلين المثقفين، نحن كمان عم نتفرج، وأنا بس أعمل "كلمات تعشق النغم"، وبأهجم بروحي على الجمهور، بأهجم فيه.. بأهجم على الجمهور لحتى.. أنا وياه.. أو نحن جميعاً نسقي البقية الباقية من شتلة الأمل ها اللي بعد موجود بنفسنا.

[مختارات من كلمات تعشق النغم]

نضال الأشقر: شعراء الأرض المحتلة

يا من أوراق دفاتركم بالدمع مغمسة والطين

يا من نبرات حناجركم

تشبه حشرجة المشنوقين

نتعلم منكم كيف الحرف يكون له شكل السكين

شعراء الأرض المحتلة

يا أجمل طير يأتينا من ليل الأسر

يا حزناً شفاف العينين

نقياً مثل صلاة الفجر

يا شجر الورد النابت من أحشاء الجمر

يا مطراً يسقط رغم الظلم ورغم القهر

نتعلم منكم.. كيف يغني الغارق من أعماق البئر

نتعلم.. نتعلم.. كيف يسير على قدميه القبر

نتعلم كيف يكون الشعر

محمود الدرويش سلام

توفيق الزيات سلام

سمية القاسم سلام

يا فدوى طوقان سلام

يا محمود الدرويش سلام

يا توفيق الزيات سلام

يا من تبرون على الأضلاع الأقلام

دور المثقفين العرب في أزمة الثقافة الحالية

كوثر البشراوي: الوضع يقول أنه المثقفون.. أن المثقفين العرب لا يلتقون في عمل مشترك في فكر مشترك في حلم مشترك، أعتقد هذا ماله دخل في عام 2001، هذا منذ الستينيات وأنتِ أدري مني بذلك.

نضال الأشقر: نعم.. نعم..

كوثر البشراوي: يعني لا أتذكر يوم أي مشروع بدأ بنوايا حسنة وبدأ بجماليته وجمالية حلمه إلا وانهار، كل مشاريعنا الجميلة تبدأ جماعية وتتكسر فُرادي فرادي مثل الناس.

نضال الأشقر: لأقول لك ليش، لأنه كان فيه عمل مركز من بداية القرن الماضي، يعني من بداية القرن العشرين كان فيه عمل مركز لقتل كل ثورة، وكل فكر مستنير، وكل فكر علماني، وكل إنسان يريد أن يُغير، كان هناك تركيز من كل حكم عربي لقتل رجالات، وسجن، وإجهاض كل فكر جديد.

كوثر البشراوي: أنا أعتقد سيدة نضال أنه لم ينجو أحد من مجرَّة الإحباط.

نضال الأشقر: أبداً.. أبداً.

كوثر البشراوي: لا تقولي لي علماني ولا غير علماني.. يعني..

نضال الأشقر: ولا شيء لأ.. لأ عم بأقول لك بالعكس عم بأقول لك بالعكس، عم بأقول لك: كل إنسان أُحبط بالقرن الماضي، كل إنسان أراد أن يُغير، مين ما كان يكون، إذا كنا معه أو ضده، كل إنسان بدأ في حركة تنويرية ثورية ثقافية اجتماعية من بداية القرن العشرين لهلاَّ كل حكم عربي لجأ إلى إجهاضه، لجؤوا إلى إجهاض كل شيء عام، شو ظل؟ الخاص المادي: البيت، الزوجة، السيارة، المادة، الأكل، وأما كل ما هو نقابات المقاهي، المسارح، الحركات العامة، الأحزاب كلها أجهضوها.

كوثر البشراوي: يعني أنتِ.. أنتِ..

نضال الأشقر: بقوا شو شافه، شو ضل فيهم العرب؟

كوثر البشراوي: أنتِ تتطلعي المسؤولية، يعني تنقدي.. يعني هذا الجيش من المثقفين وأسماءهم وطوابير هذه الأسماء كثيرة، يعني تُسقطي عنهم المسؤولية أيضاً.

نضال الأشقر: لا لا، شو عم بأسقط.. منهم المسؤولية، لا.. لا

كوثر البشراوي: يعني أنتِ ما تقدري تنكري إنه عندنا نصف هؤلاء من التجار والنصف.. وجزء من النصف الآخر همَّ أبناء الحكومات أصلاً، ولم يبرزوا بدون إذن أو الولادة في حضن هذا الحاكم، وأنتِ تعرفي كثير من هذا.. هذه الأسماء

نضال الأشقر: لأ لأ، بس بدي أقول لك شيء، أنا عم بأحكي عن شيء أبعد من هيك.

كوثر البشراوي: والنظيف نظيف، نظيف انتهى مُنتحراً فكرياً أو جسدياً أو..

نضال الأشقر: إيه مضبوط بس.. نحنا عم نحكي ليش وصلنا لهون؟ لماذا وصل العالم العربي إلى ما نحن إليه الآن؟

كوثر البشراوي: لأنه المثقف أيضاً ساهم هو..

نضال الأشقر: لا.. لا.. لا.. قبل.. قبل المثقف، المثقف.. قبل المثقف، المثقف تابع لفكر معين، المثقف ما بينزل بالبارشوت، المثقف عنده وعي ضمن وعاء فكري ثقافي اجتماعي مستنير، ما فيه إنسان مثقف بدون.. بدون فكر وراه، فيه فكر.. فيه فكر سياسي اجتماعي، هايدا اللي قُتل، يعني الأحزاب ها اللي كانت ممكن إنه تكون بالقليلة تكون موجودة مش يصير عالمنا عالم مُسطح من.. من لا شيء، ما بقى فيه فكر.

كوثر البشراوي: إلا..

نضال الأشقر: ما بقى فيه حوارات، يعني إحنا على شو؟ إحنا على شو بنلتجأ؟ إلى الحوار، الحوار مع بعض، مع الآخر، مع العالم، هذا الحوار الدائم هو الحالة الثقافية اللي نحنا نحب إنها تكون، هايدا كله قُتل من زمان، عم بأقول لك ما بقى فيه مقهى، حتى فيه رقابة على كل شيء، بس هايدا نتيجة اللي أنا عم بأقول لك إياه، نتيجة هذا التركيز لقتل، يعني عم بأحكي لك بالثورة العربية الكبرى من بداية القرن الماضي هناك أنا عم بأروح؟ جدودنا.. جدودنا اللي حبوا، بعدين الأدباء الكبار بلبنان، وبسوريا، وبمصر، وبكل العالم العربي اللي حملوا فكر جديد هو اللي مسيسين بدون ما يكونوا تابعين إلى حزب سياسي، ولكن كانوا بيعرفوا إنه هذا العالم العربي الجميل.. بأقلياته.

كوثر البشراوي: بتنوعه..

نضال الأشقر: بأديانه، بتنوعه، وحدويته هي باحترام ها المواطن العربي وها الوحدة العربية اللي ممكن إنها.. إنها تبلور لنا فكرنا السياسي، وفكرنا الاجتماعي، وفكرنا الثقافي.

يعبرون الجسر في الصبح خفافاً

أضلعي امتدت لهم جسراً وطيد

من كهوف الشرق من مستنقع الشرق

إلى الشرق الجديد

أضلعي امتدت لهم جسراً وطيد

[فاصل إعلاني]

نضال الأشقر:

أصيح بالخليج يا خليج

يا واهب اللؤلؤ

والمحاري والردى

فيرجع الصدى كأنه النشيج يا خليج

يا واهب المحاري والردى

أكاد اسمع العراق يخر الرعود

ويخزن الوروق في السهول والجبال

حتى إذا ما انفض عنها ختمها الرجال

لم تترك الرياح من ثمود في الوادي من أثر

أكاد أسمع النخيل يشعر بالمطر

وأسمع القرى تأن

والمهاجرين يصارعون بالمجاديف

وبالقلوع

عواصم الخليج والرعود من جديد

مطر.. مطر.. مطر.. مطر

في كل قطرةٍ من المطر حمراء أو صفراء

مطر.. مطر.. مطر..

كوثر البشراوي: هل هناك عشرات من الأعمال.. لا أقول حتى ولو استنسخناها يا أخي، حتى ولو قلدناه، حتى لو سرقنا فكرتك، هل هذا متوفر في السوق الثقافية العالمية؟

نضال الأشقر: لأ.. لأ، هلا لأ، بأعتقد بكل تواضع إنه لو كان فيه في العالم العربي.. يعني وعي كامل عند الحكام يعملوا حالة من التوعية العامة لدى.. بكل الميادين.

كوثر البشراوي: أنا.. أنا استغرب إصرارك سيدة نضال، يعني على التفكير في هذه الفرضية أنه لو حكامنا العرب مش عارفه إيش يعملوا وإيش.. وإيش..

نضال الأشقر: لأ، هلا عم بأقول هلا.

كوثر البشراوي: معقولة.. معقولة يعني ممكن إحنا كجيل ثائر على جيلكم، كجيل نرفض هذا الإرث السيئ، هذا الإرث الرديء والمخزي نريد أن نكذب على أنفسنا، لنا الحق في أكذوبة مثل ما كذبتم أنتم على أنفسكم.

نضال الأشقر: نحنا ما كذبنا على نفسنا، نحن جردبنا.

كوثر البشراوي: أنتوا كذبتوا علينا إحنا مش على أنفسكم

نضال الأشقر: نحنا جربنا، نحنا حاولنا محاولة قصوى.

كوثر البشراوي: اجتهدتوا..

نضال الأشقر: إلى تغيير أوضاعنا..

كوثر البشراوي: والنتيجة ورطونا إحنا.

نضال الأشقر: النتيجة كانت إنه –قلت لك- كبت، قتل، سجون، خلصت الأحلام.

كوثر البشراوي: وشعارات حتى المشاريع انتهت..

نضال الأشقر: خلصت حتى الشعارات، خلصت الأحزاب، خلصت النقابات، تفرغ كل شيء من مضمونه، أُجهض كل شيء..

كوثر البشراوي: طيب بكل اللي تقولي فيه كيف تسمحي لنفسك بفرضية مثل هذه؟

نضال الأشقر: ما بأقدر لازم أفترض وإلا.. بيروح الأمل، يعني فيه أشياء بدنا نعملها نحنا الأفراد ما فينا نعملها، نقدر نعملها جماعات، أو جماعات مثقفين أو جماعات ضمن فكر سياسي واضح، أو حكام وعيوا بعد 11 أيلول إنه هايدي المسيرة مسيرة كارثة، هايدي مسيرة انتحارية للعالم العربي، انتحار إحنا عم ننتحر، يعني إذا نحنا التجأنا إنه خبينا راسنا أول خمسين سنة وبعدين خمسين سنة ثانية جسدنا صار تلَّة، آه، وجينا زرعنا على التلة خضار وزرعنا فواكه، بيظل الجسم تحت، يعني.. ما.. فينا لازم.. لازم نقدر نلاقي فكر جديد لما بعد 11 أيلول، لازم نحنا شو بدنا إذا الحكام بعد ما.. ما أخذوا أمثولة؟ الحكام العرب كلهم أخذوا أمثلولة، خلينا نقول بعضهم مخمنين إنه حق على العالم.

كوثر البشراوي: بالعكس يعني بعد 11 أيلول أو سبتمبر اللي إحنا طبعاً نتحدث.. نعطيه الكثير من الأهمية لأنه كل شيء، يعني ملامح الكون تتغير..

نضال الأشقر: اتلخبطت، مضبوط..

كوثر البشراوي: بمفهم الـ (Cow Boy) يعني أعتقد حكامنا في الفترة الحالية همَّ أشرس من قبل، لأنه لابد أن يثبتوا ولاءهم لسيد ما بقمعن أكثر وأكثر، وبلجم الأفواه أكثر وأكثر، وبقمع الحريات أكثر وأكثر لكي يسمحوا للبوليس العالمي بالتصرف بحرية.

نضال الأشقر: طيب إذا صار هيك كمان نقدر نربح إنه ها الشعوب كلها اللي نحنا قاعدين وساكتين وتعبانين من.. من عشرات السنين من.. من.. من الحرب ومن السجن مركب يسير في تحرك شعبي من جديد، لا نستطيع أن نغير شيء إذا ما كنا ضمن.. ضمن وحدات نظامية نحن أو جماعات بتقدر تغير شيء أما كأفراد بنقدر نعمل قصيدة.. نقدر نعمل مسرحية، نقدر نعمل مقابلة تليفزيونية، ولكن لا نستطيع أن نغير شيء عشان هيك بأول الحديث قلت لك نحنا المثقفين كمان ما بقى مجتمعين، بالستينات والسبعينات وبالثمانينات، رغم كل شيء بس يكون نحن بحاجة ندعم فلان، نجتمع كلنا ببيروت أو بالقاهرة أو بأي مدينة تانية.

يا أيها الولد المكرس للندى

قاوم

يا أيها البلد المسدس في دمي

قاوم

الآن أكمل فيك أغنيتي

وأذهب في حصارك

والآن أكمل فيك أسئلتي

وأولد من غبارك

فأذهب إلى قلبي

تجد شعبي شعوباً في انفجارك

ترتيب الفن في الحياة

كوثر البشراوي: بعد الحرب العالمية الأولى تجدين شخص مثل المسرحي (إدون بسكتورجي) ويقول: الرسالة السياسية قبل الرسالة الفنية في العمل..

نضال الأشقر: (بسكاتور)، (برشت)، (جون ليكل وود)، المخرجة (هيلي سارت) تكتب مع هذا، حتى (بيتر بروك)، حتى الأوائل، حتى أول المسرح مش اليونان.

كوثر البشراوي: وما أردت الإشارة إليه السيده نضال أنه بعد كل الهزات الكبيرة في المجتمعات يأتي قوم مثل هؤلاء يريدون تحريك وتغيير الوضع، نحن –ما شاء الله- هزاتنا كثيرة ومتزامنة ومش متباعدة زمنياً، وبالرغم من ذلك مازلنا نطرح الأسئلة من بداياتها!!

نضال الأشقر: بس ما عندنا الجو، أول شيء ما عندنا الجو يخلق المناخ، هذا مش مناخ..

كوثر البشراوي: يعني ألمانيا عام 1919 يعني مختلفة عنا نحن الآن؟

نضال الأشقر: حبيبتي ألمانيا، كيف لا كان.. كيف لا كان؟ أكيد نحنا هون 1919 كانت الحالة أحسن من هلا، نعم، كان عندنا ببداية القرن جبران خليل جبران، مي زيادة، شِبل جميل، يعقوب صروف، أكبر أدمغة مستنيرة، مطران، أكبر شعراء القرن. بعدين إيجي وراهم الأخطل وسعيد عقل وإيجي أكبر كُتَّاب بالقصة.. بالقصة القصيرة، بالقصة الطويلة، هايدي بداية القرن، هلا شو عندنا نحن؟ ما عندنا شيء، ما عندنا شيء، يعني تصوري إنه هودا الكبار العظام اللي كانوا عايشين وين مكان متناثرين بالكون، قدروا يعملوا فكر واضح، الفكر النهضوي الكبير..

كوثر البشراوي: الثوري يعني..

نضال الأشقر: لهلك، حملوا ها اللغة العربية الرائعة، وجالوا فيها بالعالم. عملوا المجلات وعملوا الكتب، وعملوا المسرح، هلا نحن بحالة كتير صعبة.. كتير صعبة، لذلك لازم نجد الزواريب الضيقة التي نستطيع أن نلج منها إلى النور، لا نستطيع أن نقوم بأعمال كبيرة مثل ما أنت متصورة، لأ، لا نستطيع، من الصعب جداً إنه نقدر بها الوقت هيدا، لأنه نحنا ما عندنا قاسم مشترك، ما عندنا.. حتى فلسطين بطلت قاسم مشترك، يعني عرفتي كيف، بدنا نلجأ إلى.. إلى ما نستطيع، ما.. ما يستطيع أن يوقظ الحميَّة العربية بالمعنى الحقيقي للكلمة، لأنه فيه ناس مخمنينها قلقانين إنه إحنا فينا نعمل سلم مع إسرائيل، ليش لأ.. ليش لأ؟ نعمل سلم. وإذا حاصروا له ياسر عرفات، وإذا مات 100 ألف، 200 ألف، 300 ألف فلسطيني شو عليه؟ ما حدا عم بيتحرك، ما حد عم بيقول كلمة بالعالم العربي!! لأنه ظلوا 100 سنة يقتلوا كل ما يرفض فينا، لذلك نحن نقبل بكل شيء، نقبل بالمسرح الهابط، بالقصيدة الهابطة، بالحكام الهابطين، بالحكومات الهابطين، رجعنا 100 سنة لورا، المرأة حقوق المرأة رجعت لورا، حقوق الطفل ما فيه..

كوثر البشراوي: صحيح..

نضال: صحيح، أو لأ؟

كوثر البشراوي: لأ.. مُحزن، أنا ما..

نضال الأشقر: ليه.. ليه نحنا.. ليه نحنا بدنا نظلنا متشبثين بشيء من الأمل وإلا نكب حالنا عن عاشر طابق، نحنا هنا تاسع طابق بدنا عاشر طابق بنكب حالنا ونخلص من ها القصة، إذا ما قدرنا يعني عيونك عم بيتطلعوا على المسرحية امبارح بيعطوني أمل إنه ما بأقدر أكفي.

هنا على صدوركم باقون كالجدر

وفي حلوقكم كقطعة الزجاج كالصبار

وفي عيونكم زوبعة من نار

هنا على صدوركم باقون كالجدار

نجوع، نعرى، نتحدى، ننشد الأشعار

ونملأ الشوارع الغضاب بالمظاهرات

ونملأ السجون كبرياء

ونصنع الأطفال جيلاً ثائراً وراء جيل

كأننا عشرون مستحيل

في (اللد) و(الرملة) و(الجليل)

إنَّا هنا باقون.

بدي أقول لك إنه نحنا بدنا نرمي سلاحنا بالمعنى المجازي.

كوثر البشراوي: طبعاً لأنه ما فيه سلاح أصلاً.. طبعاً..

نضال الأشقر: بالمعنى المجازي، ونقعد نتفرج على بعض!! طيب يعني لازم نقدر بالقليلة ضمن مجتمعاتنا نعمل.. نعمل هه...

كوثر البشراوي: ما يمكن أن..

نضال الأشقر: ما يمكن أن نعمله.. وأنا عم بأقول لك المسرحيين محبطين، المسرحيين محبطين، كتير صعب الإنسان ما يكون محبط ما أنت عارفه، يعني لا يمكن أنا فيه ناس انتقدوني كتير، إنه أنا عم بأعمل مسرح كتير بينقد مثل طقوس الإشارات والتحولات تنقد المجتمع العربي، وها.. وها المثلث الجهنمي الموجود بالسلطات المالية والسلطة، والشيء الثالث الذي ما فينا نقول اسمه.

كوثر البشراوي: لأ.. لأ قولي.. عشان أفهم.. لا مش عاملين برنامج فوازير رمضان إحنا حذر فزر، لا.. لا ما تورطيني مع الناس.

نضال الأشقر: لا.. لا.. مش كده ورطة.

كوثر البشراوي: هادي مش وشوشة بيني وبينك

نضال الأشقر: طقوس الإشارات والتحولات كانت السلطة، الدين، (الإكليروس) يعني والمال.

كوثر البشراوي: أيه وين المشكلة؟ آه.. آه، طبعاً.

نضال الأشقر: هأقول السلطة ما فيه مشكلة، حبيت.. حبيت هأتطلع فيه.

كوثر البشراوي: آه، طبعاً.

نضال الأشقر: هو ده (تريو) الجهنمي، ما هو بيسندوا بعضهم بكل المجتمعات بكل الحكم، ما بيخلي واحد منه للتاني يفشل، لأنه إذا واحد وقوع بيقعوا الثلاثة، لذلك طقوس الإشارات والتحولات كانت مبنية على هيك، بقى بس بني المسرحي سعد الله ونوس مش أنا، أنا كنت مخرجة العمل أكيد، قرأته بشكل بأعتقد إنه كان حلو وناجح يعني، هذا.. هذه الأمثولة المسرحية ما بأقدر أقول لك شو هزت الناس، شو هزت الحكام، شو هزت رجال الدين والمال، لأنه فرجيناهم على المسرح يقول له السلطة لا المال.. لا.. لا.. لا، مين طلب منك تفشله أنت؟! ولو عمل غلط المال ما تفشله، لأنه بنقع كلنا سوى، الدين والمال والسلطة مع.. مع بعضهم مربوطين.

كوثر البشراوي: لكن أيضاً هذا.. الثالوث ممكن يكون فيه صالح.

نضال الأشقر: إيه إذا كان فيه صالح تحفة، بس لحديت هلا ما شوفنا ها الشغلة

كوثر البشراوي: آه.. آه لا، أنا، أنت تحكي في.. يعني.. يعني معلش أنتِ تحلمي للصبح وأنا أحاول أكذب على نفسي.

نضال الأشقر: لا.. لا فيه شيء بلد واصل وأنا مش انتبهت له؟

كوثر البشراوي: ما أعرف، أنت أدرى مني.

نضال الأشقر: أنا مش عارفه أنا، يعني إذا فيه شيء مطرح دليني، بأروح بأعمل دراسة اجتماعية سياسية، بس لحديت هلاَّ المجتمعات اللي بتقوم على الطائفية وعلى التعصُّب مش ممكن تنجح، مجتمعاتنا إذا قامت على التسامح وعلى الحوار وعلى الانفتاح تقدر نوصل يوماً ما إلى.. إلى خلق مواطن جديد.

كوثر البشراوي: مش بمفهوم (بوش) طبعاً.

نضال الأشقر: لأ، مش بمفهوم (بوش).

كوثر البشراوي: آه بمفهومنا الخاص.

نضال الأشقر: لأ، بوش؟ بوش.. صار لنا عم نحكي كل ها الحكي لتقولي لي (بوش)!!

كوثر البشراوي: لأ، ما بتعرف الآن لما تشوفي التليفزيون كثُرت يعني المصطلحات اللي هي الانفتاح والحوار مع الآخر.. ومش عارفه إيش يعني فخ وراء فخ..

نضال الأشقر: لا.. لا دخليك.. دخليك أبداً.. أبداً بالعكس، يعني (بوش) بيقول لك:بدنا نقتل وبدنا نعمل، وبدنا.. بالعكس (بوش) رئيس عصابة عالمية لابسة ثياب أنيقة، بس من عيونها بتشوفي جماعة.. عصابة عالمية، بيسموها أسماء وأنت شايفة الناس اللي حولي أقطع منه.. جؤة من المجرمين العالميين، وعم بيفرضوا وجودهم على العالم كله، ما حدا عم بيستجري يفتح تمه، حدا قال له شيء (لبوش)؟ حد ضربه بوردة مثل ما بيقولوا بلبنان؟! حد ضربه بوردة؟! (بوش) قاعد بيجول، وبيصول، وبينزل، وبيطلع، وبيدمر، وبيهدد، وبيشرد مثل ما قلت أنا بقصيدة سميح القاسم، بيشرد وبيقتل وبييتم، وبيجوع هذا بيعطيه كيس طحين بيضربه 100 قنبلة، هذا بيعطيه كيسين بيضربه 200 قنبلة!! رايح جاي، بيفوت بفلسطين بيقتلوا الواحد وهو قاعد جوه، حدا قال شي كلمة ضد (شارون) بها المدة؟ بس الشغلة الوحيدة ها اللي صارت ببلجيكا، صح أم لأ؟ ها اللي صارت ببلجيكا.

كوثر البشراوي: والتجربة لم تنتهِ بعد، ربما تُجهض.

نضال الأشقر: ربما تجهض.. ربما تجهض، هايدي نقطة أمل، مش نقطة أمل إنه بهايدا العالم.. هلا.. هلا البوليس العالمي وكلابه هاجمين على الكون، مش على مكان واحد، على الكون، وما بنعرف لو لوين بيهجموا مرة ثانية، شوي بيطلع واحد بيقول لك.. بدي نحاكم.. كنت راح أقول (بوش) لاحقاً.. (شارون).. (شارون) عرفتِ كيف؟ (شارون) ونحنا وبيجوا كل ها الشباب والصبايا اللي عاشوا هاي المجزرة المروَّعة بصبرا وشاتيلا بيجوا على بلجيكا، ما بيها شيء ها الفكرة، فكرة كتير صغيرة.

كوثر البشراوي: صحيح

نضال الأشقر: بس إذا نجحوا فيها بيكون شغلة مليحة ما بها شيء، يعني.. يعني إحنا ها الآنية أنا وياكِ.. بتعرفي شو عم نعمل؟ نازلين ببركة وحل وغاطسين فيها ونازلين نازلين.. نازلين.. نازلين حتى نشوف وين فيه نبع نظيف، بس لنقدر لحتى ما نختنق، وهيك كل الناس عم بيعملوا مش إحنا بس، كل الناس عم بيعملوا هيك، فيه منهم حتي مش عارفين.. أول مرة بحياتي بأحس ناس يائسين وخايفانين.. ها.. لها الدرجة إنه نحنا شو بدنا نعمل؟ طب.. لوين بدنا نروح؟ انتبهوا.. انتبهوا.. انتبهوا.. انتبهوا

أعمدة النور لها أظافر

وللشبابيك عيون عشر

والموت في انتظاركم

في كل وجه عابر أو لفتة أو خصر

يا آل إسرائيل لا يأخذكم الغرور

عقارب الساعة إن توقفت لابد أن تدور

إن اغتصاب الأرض لا يخيفنا

فالريش قد يسقط من أجنحة النسور

والعطش الطويل لا يخيفنا

فالماء يبقى دائماً في باطن الصخور

هزمتم الجيوش إلا أنكم

لم تهزموا الشعور

قطعتم الأشجار من رؤوسها

وظلت الجذور

* * *

ما بينا وبينكم لاينتهِ بعام

لا ينتهِ بخمسة أو عشرة ولا بألف عام

طويلة معارك التحرير كالصيام

ونحن باقون على صدوركم كالنقش في الرخام

باقون في صوت المزاريب وفي أجنحة الحمام

باقون في ذاكرة الشمس وفي دفاتر الأيام

باقون في شيطنة الأولاد في خربشة الأقلام

باقون في شعر امرئ القيس، وفي شعر أبي تمام

باقون في شفاه من نحبهم

باقون في مخارج الكلام

ليه نحنا ما.. قعدنا على هامش الحياة؟ يعني إذا الحكام قالوا لنا ما تشتغلوا سياسة أقعدوا على جنب نحن بنتولى أمركم، نحن بنظبط الأمور مع (بوش) وبنبعت له ملبس، ونبعت له قطايف، ونبعت له أشياء طيبة بنطبخها بالبيت.

كوثر البشراوي: من لحوم شعوبهم طبعاً

نضال الأشقر: إيه، شو ما.. كانت تكون!! أنتوا شو بدكم؟ أنتوا اقعدوا ربوا أولادكم، واعتنوا بحالكم وانسوا كل ما هو عام، أنتوا اهتموا بنفسكم فقط، هيك عم بيصير، ما بقى فيه شيء خاص.. ما بقى فيه شيء عام، كله خاص، المثقفين بلبنان، بسوريا، بالأردن كدنا نظل على اتصال دائم بواسطة المهرجانات، بواسطة اللقاءات، بواسطة الأمور المطروحة، واحد بيفوتوه على الحبس نقف معه، واحد بده.. عنده مشكلة نقف معه، واحد وقفوا له قصيدته، واحد.. يعني هلا شو بدي أقول لك؟ إذا مضطر الواحد، بس إذا مش مضطر ليش يقول؟!

كوثر البشراوي: أنت امرأة مسرح وبتسمعي عن مئات المسرحيات التي تُعرض فيها من.. من التهريج الكثير، فيها من تغييب السؤال الكثير، فيها من التخدير الكثير، هل هذا اللي.. ما يحدث ردة فعل أيضاً للإحباطات؟ هل الهروب جزء من.. من ردود فعل الإحباط؟

نضال الأشقر: هايدا مش هروب عزيزتي، المسرح دخيل على عالمنا، المسرح بشكله الأوروبي، وقبل ما يطير هذا الطفل، قبل ما يسير شاب صغير أُجهض، لأنه.. يعني لزَّقوه بوزارات الإعلام. هلا أنتِ شايفه بأوروبا فيه وزارة إعلام؟ مفيش حدا فيه عنده وزارة إعلام.. الوزارات القمعية هي وزارات الإعلام، يعني هاي وزارات قمعية رقابية تمارس الرقابة، ومين بيمارس الرقابة؟ مش رقابة لا.. مش رقابة للأمن القومي، إنه –لا سمح الله- عم نعمل شيء ضد بلادنا. إذا واحد بيجوز فنان يغلَّط يعمل شيء مثلاً، رقابة على كل شيء.. كل شيء، كل موضوع. طبعاً شو هو الفنانين بيشتغلوا؟ الجو العام بكل مدينة عربية ما بيعطيكي مجال تشتغلي، أبداً، نحن عالم بدنا ننفي نهائياً، لا.. ليس من الممكن يكون عندنا مسرح عربي، أبداً، لأنه كل معطياتنا، كل الحالة اللي إحنا عايشين فيها ضد حرية المسرح، ها اللي هو تاج كل الفنون.

كوثر البشراوي: الفكر بصورة عامة مش فقط المسرح.

نضال الأشقر: كيف لكان، الفكر كمان.

كوثر البشراوي: لكن ما تنسي إنه المسرح وفنون أخرى مرتبطة بوزارة الثقافة والإعلام، يعني الكثير من..

نضال الأشقر: لأ.. لأ.. لأ، وزارة الثقافة موجودة، بس بدك تفصلي، ما فيه الثقافة والإعلام.

كوثر البشراوي: فيه بعض الدول فيه مزج.

نضال الأشقر: الإعلام هو الرقابة، أقولك بصراحة، إعلام يعني رقابة، يعني بيقرأ لك الورقة، بيتسمع على تليفونات الناس، بيراقب..

كوثر البشراوي: طيب سيدة نضال، وزارة الثقافة لما هي تتبنى ميزانيات، أو تحتضن بعض الأعمال، لا تقوم بذلك لله.. في سبيل الله، يعني نصوص كثيرة، يعني تسير لها مجزرة في الطريق، أو يُدفع بهؤلاء إلى القول بما يريده الناس لفوق.

نضال الأشقر: حبيبتي.. دا مش هناك عم بأقول لك مش ممكن يسير عندنا مسرح، عم أكون أقول لك.. عم أكون معك صريحة كأنما عم بأحكي مع نفسي.

كوثر البشراوي: لا مسرح ولا شعر، ولا سينما، ولا شيء.

نضال الأشقر: ما ممكن، لأ، الفنون الفردية ممكنة، شاعر بيقعد ببيته بيكتب قصيدة، إذا ما نشرها هلا بينشرها بعد عشر سنين.

كوثر البشراوي: أو ينشرها من لندن.

نضال الأشقر: ينشرها من لندن، بيشيرها من اليابان، مطرح ما بيلاقي له شيء (….) من العالم.

كوثر البشراوي: يعني.. يعني يدفع.. يدفع ثمن.

نضال الأشقر: الفنون الفردية شيء، والفنون الجماعية التي تغير، والتي يعني تزرع،.. والفنون الجماعية ها اللي بتحاور وبتقرب الناس لبعضها، والناس بيغضبوا أو بينبسطوا، أو المهم كل الفنون الجماعية اللي هي المسرح أكترها لأنه حي، أنت عم بتقولي لي كل وقت أنت بتحلمي.. بتحلمي، هاي شغلتي أحلام.. شغلتي أحلم، وأجرِّب كل جهدي إنه حُلمي أقدر أوصله للآخر، حتى الآخر كمان يقدر يحلم، لأنه إذا بطلنا نحلم بتسير الكارثة اسمها كارثة، والفستان اسمه فستان، وكل شيء بيرجع لحقيقته المحزنة، نحنا كل عالمنا محزن ومحبط.

كوثر البشراوي: ولابد أن نبحث عن مشرق فيه.. نصنع مشرق

نضال الأشقر: بنجرب.. بنجرب، في بعض الأحيان إحنا بحاجة حتى لو كنتِ صار عندك شجن وحزن مثل بس سمعتِ "كلمات تعشق النغم"، بس قلت هي هودي كانوا موجودين، بدر شاكر السباب من 30سنة قال هيك، وأُنس الحاج، وسعاد الصُباح، ومحمود درويش، وسميح القاسم، وفدوى طوقان الرائعة.

كوثر البشراوي: ورابعة العدوية.

نضال الأشقر: ورابعة وكلهم قاعدين حد بعضهم، كلهم قاعدين حد بعضهم، عندهم نفس الهم. عرفتي.. هايدا الشيء، يعني أوقات بنلجأ إلى شوية أمل، أوقات بنفرج الإحباط، أوقات بنفرجه شو ممكن نعمل بعالمنا، هايدا المسرح ما عم بنقدر نعمله.

تقدموا.. تقدموا.. تقدموا.. تقدموا

كل سماء فوقكم جهنم

وكل أرض تحتكم جهنم

تقدموا.. تقدموا

يموت منا الطفل والشيخ ولا يستسلموا

وتسقط الأم على أبنائها القتلى ولا تستسلم

تقدموا.. تقدموا

بناقلات جندكم وراجمات حقدكم

وهددوا وشردوا.. ويتمو وهدموا

لن تكسروا أعماقنا

لن تهزموا أشواقنا

من شارع لشارع

من منزل لمنزل..

من جثة لجثة

تقدموا.. تقدموا

يصيح كل حجر مغتصب..

تصرخ كل ساحة من غضب

يضج كل عصبي

الموت لا الركوع.. الموت لا الركوع

تقدموا.. تقدموا.. تقدموا

ها هو ذا تقدم المخيم

تقدم الجريح والذبيح و

الثاكل والميتم

تقدمت

حجارة المنازل

تقدمت

بكارة السنابل

تقدم الرُّضع والعُجز والأرامل

تقدمت أبواب (جنين) و(نابلس)

أتت نوافذ القدس، صلاة الشمس

والبخور والتوابل

تقدمت

تقاتل

تقدمت

تقاتل

لا تسمعوا.. لا تفهموا..

تقدموا.. تقدموا

كل سماء فوقكم جهنم.. وكل أرض تحتكم جهنم

تقدموا.. تقدموا

[في الحلقة القادمة]

نضال الأشقر: إن شاء الله نضل عندنا ها الطاقة إلى الرفض وإلى الشراسة وإلى قول الحق، هايدي شغلة أهم شيء.