نذير رشيد.. ذكريات تاريخية   
الاثنين 1/2/1428 هـ - الموافق 19/2/2007 م (آخر تحديث) الساعة 16:25 (مكة المكرمة)، 13:25 (غرينتش)

- أبعاد وتداعيات مناورة هاشم
- خطة خيانة الجيش

- سر اغتيال وصفي التل

- دور الفلسطينيين في الأردن

سامي كليب: مرحبا بكم أعزائي المشاهدين إلى حلقة جديدة من برنامج زيارة خاصة، نحن هنا في منطقة الصلط الأردنية وقد سبقتنا إليها كما تلاحظون الثلوج، برد الطقس وصقيعه لا يوازي شيئا إذا ما قورن بحرارة الملفات الساخنة والنار التي أُضرمت مرارا في التاريخ الأردني وكان لضيفنا دور إضرامها مرة ومرات إطفائها، إنه مدير المخابرات السابق في الجيش الأردني نذير رشيد الذي أصبح وزيرا للداخلية وسفيرا لبلاده في المملكة المغربية يفتح لنا اليوم صفحة ذكرياته.

أبعاد وتداعيات مناورة هاشم

نذير رشيد - مدير مخابرات الجيش الأردني السابق: شكرا لك أستاذ سامي.

سامي كليب: شكرا لك.

نذير رشيد: حقيقة أنا يعني بالبيت إحنا فقط نرى الجزيرة بنتابعها باستمرار يعني هي مصدر أخبارنا الوحيد، يا ريت فيه جزيرة ثانية كمان حتى تحرك المستنقع الهادئ نعرف شو فيه في الدنيا.

سامي كليب: شكرا، باسم الجزيرة أشكرك.

نذير رشيد: نعم، عفوا..

سامي كليب: باسم الجزيرة أشكرك.

نذير رشيد: الله يبارك فيك وأنت بأعرف يعني الشباب اللامعين اللي بتيجي على موضوعك وأنت دارسه كويس..

سامي كليب: الله يخليك، شكرا..

نذير رشيد: والنماذج اللي قدمتها كمان من أرقى ما يكون حقيقة، اختلفت معها أو حبيتها هي من القادة ومن اللي خدموا بلادهم كثيرا وأشكرك اللي أنا استضفتني معهم.. يعني بمعيتهم..

سامي كليب: بالعكس، تاريخك يعني يستحق..

نذير رشيد: كيف يلح عليّ كثير من أصدقائي أنه لازم تنشر ولازم تكتب مذاكرتك مثلما تفضلت، مررت بمرحلة غنية، حقيقة بثلاث مراحل مفصلية، أول مرحلة الضباط الأحرار وكان دوري رئيسي فيها، بعدين مرحلة السبعين وكان كمان دوري أساسي فيها ومرحلة ما بعد يعني هأنقول عودة البلد إلى الديمقراطية والانتخابات وده كمان كان دوري مهم فيها، أنا من الأعيان من 1989 إلى 1992، عُينت 12 سنة ومررت بتجارب كثيرة، أما السبب المباشر فهو في آخر احتفال للمرحوم الملك حسين دار المدرعات اللي كنت قائدها، فكرمني وطلب مني أن أكون بمعيته لما استعرضنا عشان نستعرض قوات الكتيبة، كان سمو الأمير حمزة موجود وكان كثيرا من الأمراء بس أنا انتبهت لسمو الأمير حمزة وكان معه مرافق يعني.. كبير مرافقين هناك..

سامي كليب: نعم..

نذير رشيد: فبأقول للأمير حمزة بيقول له شايف عظمة أبوك يعني هذا الزلمة تآمر على أبوك وكان بده يقعد محله ومع ذلك هو قاعد بيستعرضنا فأنا قررت وقتها وبدأت أفكر جديا أن أكتب المذكرات ولاسيما وأنا عندي الوثائق الأساسية لمناورة هاشم هذه اللي بلينا فيها..

سامي كليب: مناورة هاشم التي بدت عادية وصُورت على أنها محاولة انقلابية شكلت نقطة سوداء في تاريخ نذير رشيد الذي بدأ حياته عسكريا حبا للفروسية ودرس في الكلية العسكرية في بغداد وكان مع ثلاثة من رفاقه في طليعة مؤسسي الضباط الأحرار في الأردن تيمنا بتنظيم ضباط مصر بقيادة محمد نجيب وجمال عبد الناصر، كان هدف ضباط الأردن تعريب الجيش الأردني الذي كان آنذاك بقيادة الضابط البريطاني ذي الأصل الأيرلندي جلوب باشا ولكن ما أن تحركت الدبابات في مناورة هاشم وكان ضيفنا قائد لكتيبة الدبابات فيها حتى صُور الأمر وكأنه محاولة انقلابية على الملك حسين.

نذير رشيد: هي قطعا مجرد مناورة وموافَق عليها من رئاسة الأركان وهي ضمن التدريب الإجمالي للكتيبة والكتيبة موافق عليها قبل شهر ووثائق المناورة معي هذه اقرأها، المناورة بدأت يوم 8/4 وانتهت صباح يوم 9/4 وكان مش بس بالضفة الشرقية والضفة الغربية كان ساريتين هنا وساريتين هنا، وقتها سوينا مرتب الكتيبة كان قراءتهم لطيفة فسوينا نماذج لحصاد السيارات يمثلوا بنموذج بتشوف الأردن هذا الوقت والأردن يعني مرة يحط مثلا إشارة أنه هذه مرت، بكل الحركة اللي صارت 24 ساعة بالمملكة أقل من ألف سيارة تصور حضرتك الوحدة خلال ساعة واحدة بتمشي وبعدين لم يكن معهم طلقة واحدة، كانوا بدون ذخيرة، موافقة المناورة لكن شوف اللي صار.. اللي صار وزير داخلية المفروض كان يبلغ رئيس وزراء أنه فيه مناورة طالعة هكذا ورئيس الوزراء يبلغ الديوان، هذا ما صارش..

سامي كليب: شو السبب؟

نذير رشيد: السبب كان الحكومة، حكومة النابلسي وكان يعتبر الحكومة حكومة وطن اشتراكي يعني إحنا إخوان يعني المفروض فيه أسس وفي (System)، هذا الـ (System) ما كان موجود، عشيرة وبتحكم والله ما كانت رجالة الرياني كلهم يعني ندرات ياريت.. ندرات من الندرات اللي ما تكررت من بعدها، كان فيه عداوة شديدة بين رئيس ديوان ملكي وبين سليمان النابلسي رئيس وزراء، يعني دائما كان فيه عداوة كل واحد بيحفر للثاني..

سامي كليب: مَن كان رئيس الديوان الملكي؟

نذير رشيد: كان الله يرحمه بهجت تنهوني، كان من القضاة اللامعين كان وكان علي أبو نوار بيكره الاثنين والاثنين بيكرهوه..

سامي كليب: رئيس الأركان؟

نذير رشيد: رئيس الأركان..

سامي كليب: حضرتك تكره كمان؟

نذير رشيد: أنا عندي أسبابي شايف، برضه كانت.. المهم وأنا أثناء المناورة اتصل في مساعد الليحاري، أنا رئيس وذاك لواء بيقول لي هل..

سامي كليب: مساعد علي أبو نوار.

نذير رشيد: علي أبو نوار آه، قال لي سيدنا وافق على تغيير بهجت طبال ويجئ محمد معه ولكن عشان تسحب الكتيبة، قلت له اسمع هذا الحكي أنا ما بأحب أسمعه، هذا حكي ما لي علاقة فيه نهائيا ولا بدي اسمي يتذكر فيه نهائيا، المناورة موافق عليها وأنت بتعرف وبتستمر لآخر ثانية..

سامي كليب: يعني كان فيه محاولة لتوريطك؟

نذير رشيد: لسحب الكتيبة باعتبار أنا يعني ولا يقبل.. بأترجاك يعني وظل.. قلت الكتيبة ستظل لآخر ثانية وظلت لآخر ثانية..

سامي كليب: بالرغم إن رئيس الأركان أعلى منك رتبة، هو الذي يقرر..

نذير رشيد: رئيس الأركان كلفني برضه أمام محمود وأمام ضافي .. ضافي كاتب مذاكرته، طلب مني أهاجم التبوك قلت له خير إن شاء الله؟ قال بيحكوا عليّ قلت له طب احكي عليهم، لما أسحب هذه الكتيبة وأفوت على تبوك 200 كيلو ما بيصير نهائيا.. أترجاك يعني..

سامي كليب: طب رئيس الأركان يطلب منك أن توقف المناورة وحضرتك تستمر؟

نذير رشيد: طبعا بأستمر، لما يكون أمر غلط أعوذ بالله، بعدين عيب يستغل اسمي يستغل مناورة لغير أسبابها، هذا مش خلق.

سامي كليب: طب، حضرتك كتبت في الكتاب وبررت طويلا وعندك الوثيقة في الواقع..

نذير رشيد: بالوثيقة..

سامي كليب: موجودة بالكتاب، بس ما بتشعر اليوم إنه فيه ناس استغلوك من أجل محاولة الانقلاب على الملك؟

نذير رشيد: أينعم، أولهم رئيس الأركان..

سامي كليب: على أبو نوار..

نذير رشيد: ثانيا، سيدنا لما عرف على.. يعني ما بتعرف التلهوني الله يرحمه ما هذا الكرسي شوف كرسي رئاسة الوزراء مهم، يعني رئيس ديوان ملكي دائما عينه على كرسي الرئيس هذا كان زمان أول.. شايف فمين يقعد على الكرسي..

سامي كليب: الكراسي في الأردن ترنحت كثيرا ففي الداخل كان بعض الضباط يضغطون على الملك حسين وفي مقدمهم رئيس الأركان على أبو النوار وفي الخارج كان الأردن محاطا بدول أقوى منه تناصبه أو يناصبها العداء، في هذه الأجواء حصلت مناورة هاشم عام 1957 واتُّهم ضيفنا نذير رشيد بالتآمر على الملك وهرب إلى سوريا وحُكم عليه غيابيا بالسجن.

نذير رشيد: التطورات اللي صارت اليوم 10/4 لم أكن أعلم بها إلا فيما بعد اللي طلب علي أبو نوار إن سيدنا يؤلف حكومة من سعيد المفتي أو عبد الحليم النمر أو يرجع يكلف سمير، دريت بها فيما بعد والدكتور كمال الشاعر حكى لي على المقابلة فيما بعد، لم أكن على دراية وقتها، المهم هذه المضاعفات لما كنا على الأمام لكن بأعرف أنه صارت مناورة وكانت مهمة حِرفية 100% وكان فيها موافقات كاملة من رئاسة الأركان وأنا غير مسؤول ليش ما بلغت الجهات المعنية مثلا رئيس.. شوف لما طلبوا سيدنا رئيس الحكومة يسألوه عنها قال له أنت مطوقها عشان أستقيل، أنا قول لي بأستقيل قال له لا أنا بأسألك عن المناورة، أنا بديأسالأس أسألك، ملاحظ كيف؟

سامي كليب: طب عال، لما وصلت على سوريا حاولت الاتصال وتوضيح وجهة نظرك؟

نذير رشيد: خلينا أوضحها الله يطوِّل عمرك..

سامي كليب: تفضل.

نذير رشيد: لما سيدنا استدعى سليمان النابلسي يوم 10/4 قبل ما يبلغه يستقيل، سليمان النابلسي قال كان يفكر إن سيدنا مطوق عمَّان عشانه، شايف؟ وسيدنا بده يسأل سليمان النابلسي رئيس الوزراء عن المناورة، ملاحظ كيف؟

سامي كليب: نعم.

نذير رشيد: فقال له أنت قل لي إذا كان هذا مش محتاج تطوق عمَّان بأستقيل تحرك.. بأستقيل قل لي استقيل..

سامي كليب: هذا النابلسي عم بيقول للملك؟

نذير رشيد: آه قل لي بأستقيل، فهذا يقول له أنا جايبك أسألك عن المناورة، قال له كان عبد الحليم نمر الله يرحمه ما أخبرني هذا وبعدين مش تطويق عمَّان، هم كان بعاد عن الطرق الرئيسية حوالي 100 متر ولم يكن مع أحدهم طلقة واحدة عشان مش تطويق، الانقلابات مش هكذا.




خطة خيانة الجيش

سامي كليب: ينفي نذير رشيد أن تكون مناورته عام 1957 قد هدفت للانقلاب على الملك، لا بل يروي في مذاكرته أنه كان وفيا جدا للملك حسين وأن وفاءه دفعه لأي يسرق من قيادة الجيش وثائق سرية جدا ليُطلع الملك على خلل آنذاك في الإعداد للمواجهة مع إسرائيل.

نذير رشيد: سرقت الوثائق من قيادة اللواء وأعطيته إياها على دفعتين وقرأها وتأثر فيها وبعدين..

سامي كليب: أي وثائق؟

نذير رشيد: واحدة عن الخطة الاستراتيجية تبع الدولة الذي تقضي بانسحاب القوات الأردنية من الضفة الغربية إلى المرتفعات اللي إحنا عليها.

سامي كليب: هذه أي سنة؟

نذير رشيد: هذه بالـ 1955 وكمان سرقت وثيقة الذخيرة ولحسن الحظ برضه ضابط الأسلحة والذخيرة لا يزال أخونا وزميلنا وحبيبنا محمد عربية الطيب كان هو وصورته موجودة لما زارهم سيدنا بالقيادة، لما شاف الموجود بالأردن من ذخيرة مثل أقل من هذه مكتوب بخط اليد..

سامي كليب: بس خلينا نفهم لو سمحت لي، كتبت له وثائق..

نذير رشيد: أينعم.

سامي كليب: استراتيجية؟

نذير رشيد: أينعم.

سامي كليب: ليش الملك كان غير مطَّلع على الوثائق؟

نذير رشيد: لا أعلم، لكن أنا اطلعت عليها بحكم أني كنت مساعده للحكم العسكري وكان لما..

سامي كليب: يعني سرقتها من رئاسة الأركان؟

نذير رشيد: من قيادة اللواء، كان لما يطلب شيء يطلبه مني فأنا أروح أجيب له إياه، فصرت أفتش أنا، جئت على الخطة هذه اهتميت فيها كثيرا، درست دراسة كويسة وهي دراسة الذخيرة، درست دراسة كويسة فحكيت له عنها فوداني وياه.

سامي كليب: شو كان الخطير في ها الوثائق؟

نذير رشيد: أولا فيه خطة إنه إذا صار اشتباك واسع في الضفة الغربية سيتم الانسحاب للضفة الشرقية وترك الضفة لغربية بالكامل.

سامي كليب: شو يعني.. خيانة من قِبل الجيش؟

نذير رشيد: هذه الخطة الموجودة، خيانة ما غير خيانة ما بأعرف أنا بأتعامل مع حقيقة، الحقيقة كانت هيك.

سامي كليب: مَن كان وضعها الخطة؟

نذير رشيد: الخطة رئاسة الأركان اللواء جلوب وجماعته، الشغلة الثانية الذخيرة كمان إديته إياها، قام متأثر بشكل كبير، المهم راجعنا الأوراق إلي محلها حتى على دفعتين.

سامي كليب: صار فيه حوار بينك وبينه؟

نذير رشيد: أنت شايف.. أنت شايف ما ها الشيء الموجود الأسلحة هذه الخطة تعبر عن نفسها وهاي الموجود من الذخيرة..

سامي كليب: شو كان ردة فعله؟

نذير رشيد: انفعل كثيرا خاصة يعني انفعل كثيرا في الطرفين..

سامي كليب: شو قال؟

نذير رشيد: يعني انفعل كثيرا، مش مواضيع أناقشه وآخذ رأيه وشو، لا بس انفعل كثيرا واضح تماماً اللي صار بعدين، شوف ماذا كنا نيجي دائماً من السلطة على قاعدة المغربي نجتمع فيها يعني كل الشباب من جيل واحد ونلعب شدة ولعب..

سامي كليب: كانوا عاملين لك طاولة خاصة فيها.

نذير رشيد: آه، قديم أنا من زبائنه القديمين، لقيت أبو عرب، قلت له أخبارك؟ وما قلت له إنه..

سامي كليب: مَن أبو عرب؟

نذير رشيد: محمد عربية الملازم اللي كان مسؤول ركن الذخيرة بالقيادة، قال لي والله امبارح سيدنا جاء على القيادة..

سامي كليب: لجلوب باشا؟

نذير رشيد: قلت له كيف قال جاء عندي اثنين وطلبوا مطلوب الذخيرة وأعطتهم إياها وإذا ما فيها يعني.. يعني والله كلها أربع خمس ورقات وبعدين مكتوب بخط اليد خاصة اللي كانت عندها شوية منها ما فيه، قلت له جلوب شو حكى؟ ده صار يتحجج إنه الحكومة تعطينا مصاري نشتري وفيه دفعة اشتريناها، حجزوها لما صاروا بقناة السويس هيك قال، هذا الحكي اللي حكاه وبعدين قرر حاسبهم حساب الملكين يعني هاي من الأسباب الرئيسية اللي طلب يكتبها..

سامي كليب: طيب كنت تسرق وثائق وتعطيها للملك للإطلاع..

نذير رشيد: هنا كانت..

سامي كليب: طيب اسمح لي وتعطيها للملك للإطلاع على وضع الجيش والاستراتيجية الموجودة التي هو ربما لم يكن موافقا عليها، كانت استراتيجية عسكرية موضوع من قبل جلوب باشا ولم يعلم بها..

نذير رشيد: لم يعلم بها.

سامي كليب: طيب، كان واضحا إنه هناك نوع من التخاذل كان ممكن يعني إنه لو حصل حرب فعلاً حصل انسحاب، ألم تخبره بوجود الضباط الأحرار؟

نذير رشيد: هو يعرف، أنا حكيت له..

سامي كليب: حكيت له متى؟

نذير رشيد: بهذه الفترة.

سامي كليب: بعد ما سمعت أنت.

نذير رشيد: أساساً شوف اللي كان مرافقه مازن عجلوني كان منا، فكان هو ييجي يأخذني بسيارته من الديوان.. كنت أستناه الونش الحديد بتاع المطار، هناك كان فيه كثير واستنى مازن ييجي يأخذني بسيارته فنفوت على الديوان بسيارته الخاصة كان يعرف حكاية التنظيم كاملا..

سامي كليب: شو كان رأيه؟

نذير رشيد: رأيه اللي ترجمه فيما بعد يعني استخدم التنظيم وحرر.. قرر إخراج الإنجليز الضباط الإنجليز من الجيش واللي هما نفذوه أمرهم ونفذوه وسيتبعها إلغاء المعاهدة كمان مع إنجلترا.

سامي كليب: طيب حين يقال..

نذير رشيد: أكمل لك الجواب، أنت الجواب هذا جزء، أما الفطريات اللي نبتت فيما بعد إنه فيه تنظيمات للضباط أنا لا أعلم عنها وقد تكون موجودة وأنا لا أعلم عنها، أما أنا بأعرف الأشياء اللي كنت بأعرفها أنا واللي أنا مشارك فيها واللي كانت فاعل أساسي فيها وهما اللي أمرهم سيدنا ونفذوا تعليماته.

سامي كليب: طبعاً حين نسمع إنه حضرتك كنت رجل الملك في تنظيم الضباط الأحرار، هل الأمر يسعدك ولا تعتبره..

نذير رشيد: كل الفخر، هو لم ينكر الجميل الملك حتى يوم إخراج الإنجليز.. الضباط الإنجليز ما كنت.. ما شاركت، كنت في الحجاز كان أخوي بده يخطب ويتزوج فكنت معه، يعني الملك هو اللي قرر التاريخ وقرر الأسلوب وهو اللي أمر والضباط نفذوا.

سامي كليب: طيب، كنتم داخل الضباط الأحرار تفكرون بقلب الملك؟

نذير رشيد: قطعاً لا مش وارد هذا يعني.

سامي كليب: في كتابك اتهامات لبعض زملائك السابقين، مثلاً ضافي الجمعاني اللي كان أحد الضباط الأحرار الأربعة في البداية، تقول عنه إنه لم يكن من أنصار التعريب وكل ما يحكي عن ديمقراطية وما ديمقراطية ما كان بيعرف عنه شيء؟

نذير رشيد: هذا صحيح، هو بيعرف الحقيقة.

سامي كليب: كان ضد تعريب الجيش الأردني؟

نذير رشيد: يعني خليني أقول هو دائماً حيادي دائما حذر كثيرا ودائماً حيادي وبعدين بعد ما حكيت عنه أثناء الجيش وحكيت بعده.. بعده هو كان قائد قوات صاعقة بالأردن بالـ 1970 ومع ذلك ما دخل كان بره من بعيد وكان يتكلم على الديمقراطية والله أنا أول مرة بأسمع بالديمقراطية وأنا برة أول مرة سمعته بيقول كلمة جديدة طالعة، فرُحت لأستاذ إبراهيم حباشة الله يرحمه كان مثاليا وكان مثقفا إلى آخره، اشرح لنا هذه البلوة اللي جاءتنا، فشرح لي لا هو شرحها كويس ولا أنا فهمتها، لو أحد الزملاء مستحيل ما كانش وارد اللي جاي أبداً..

سامي كليب: بس الرجل كان يعني على الأقل ممَّن كنا نسأل عنه قبل أن نلتقيه بالسابق، كانوا يقولون إنه رجل نظيف الكف ومع ذلك حضرتك مُشوه صورته بالكتاب يعني لا تتحدث عن تحقيقات مالية وإدارية..

نذير رشيد: أنا ما حكيت أنا.. هاي موجودة في مذكراته ومذكراته عندي، أنا نقلت الموجود بمذكراته ومذكراته عندي.

سامي كليب: بس هو بيعتبرها تجلِّي، أنت اعتمدت على إنه كانت ضده..

نذير رشيد: أنا ذكرت اللي ذكره هو ولا كلمة واحدة زيادة وأنا استغربت كيف ينشر هيك؟ استغربت يعني حدا بيدين حالة استغربت كيف نشرها.

سامي كليب: طيب، وصلت إلى سوريا هل حاولت توضيح وجهة نظرك بالنسبة للعملية الانقلابية أو المناورة؟

نذير رشيد: لا قطعاً لا مش مسألة.. وصلوا كثير ناس إلى آخره وإن كان الوقت ما كانش مهيأ وكان ما اتخذه الأردن بده غطاء كبير يعني فما كانش فيه مجال..

سامي كليب: كيف يعني ما فيه مجال للاتصال؟

نذير رشيد: ما فيش مجال لتوضيح الأمور في ذات الوقت.

سامي كليب: ما فيه كان ولا أي وسيلة بالاتصال بالأردن بالملك؟

نذير رشيد: ما كانش فيه اتصال موجود، ما كانش فيه مجال لتوضيح الأمور ذات الوقت لأن إنه الأمور تطورت عندنا بالأردن أو سيدنا الله يرحمه كان يهاجم اليساريين، ما عادش فيه يسار فيعني هنقول سوى الإجراءات التي تمكن من السيطرة الكاملة وهذا حقه.

سامي كليب: على أبو النوار، مَن كان في خلفه؟

نذير رشيد: ما تسألني ما بأعرف والله، أنا إذا كان يعني أنت بتعرف إني كنت أرضى أوامري فما بأعرف يعني لم أكن أهتم باللي خلفه واللي كان خلفه رأسه، عنده طموحات عجيبة.

سامي كليب: والله تاريخك مَن يقرأه يعني شويه صعب على الفهم، يعني من جهة ترفض أوامر رئيس الأركان، من جهة ثانية تُتهم بالانقلاب عليه.

نذير رشيد: أسألك بالله لو أنت محلي ويقول لك فوت روح على تبوك وهاجم، بتروح؟

سامي كليب: طبعاً لا.

نذير رشيد: هذا أنا اللي سويته.

سامي كليب: بس أنا مكن أفهم إنه..

نذير رشيد: وبعدين مش بيني وبينه، كان ضافي ومحمود وعفت موجودين..

سامي كليب: بس أنا مكن أفهم تمردك على أوامر رئيس الأركان، معناتها حضرتك كنت مسنود الظهر وتحديداً من قِبل الملك؟

نذير رشيد: لا أنا تركيبتي هيك أنا، يعني معقول يلا يعني فوت على تبوك يعني ليه بأفوت على تبوك مثل.. مش واردة يعني هيك زي ما بيضحكوا عليه، طيب اضحك عليهم أنت.

سر اغتيال وصفي التل

سامي كليب: مَن يزور نذير رشيد المدير السابق للمخابرات الأردنية في أحد منازله الأردنية سيجده مطبوعاً على عادات القبائل العربية القديمة من حب الضيافة والفروسية والنخوة، نخوة قادته لإنقاذ عبد الحميد السراج رجل جمال عبد الناصر من السجون السورية أو دَفعته لمناصرة ثورة لبنان بقيادة الزعيم اليساري كمال جنبلاط ضد رئيس الجمهورية كميل شمعون وما عُرف آنذاك بحلف بغداد وحين عاد من منفاه السوري بعفو من الملك حسين ومر في مصر تم تعيينه مديراً عاماً للمخابرات وبات يملك الكثير من الأسرار وبينها مثلاً سر اغتيال رئيس الوزراء الراحل وصفي التل في القاهرة.

نذير رشيد: شوف اللي صار، أنا كنت دائماً في عمَّان، وصفي الله يرحمه كان يعتقد إنه ممكن يخرج بمفاوضات وهو رئيس الحكومة وكان أذرعه بالتفاوض مع المنظمة كمال الشاعر ونجيب المصري يعني..

سامي كليب: إنه كان يعتقد التنظيمات الفلسطينية ممكن تخرج بمفاوضات.

نذير رشيد: آه هو كان يعتقد، المعلومات اللي عندني بالدائرة تختلف، أنا قلت مرة بجلسة من الديوان مختصرة كمان وجاءني عشان يخرج وفيه الإشارات الإيجابية، قلت له بس المعلومات اللي عندنا إحنا بالدائرة تختلف.

سامي كليب: بدائرة المخابرات؟

نذير رشيد: يعني ما راح يخرجوا وإذا خرجوا راح يرجعوا وصداعهم هيظل في عمَّان وبنرجع للمشكلة من أولها، قال لي بتزاود عليَّ قلت له حاشى، أولاً أنت أستاذي وثانياً أنت رئيس الحكومة، إحنا بننفذ سياسة ولا نرسم سياسية، أي شيء بترسمه بننفذه، أما أنا المعلومات اللي عندي هذه هي المعلومات شو بتقرروا وأنا بأفعل، فسيدنا الله يرحمه قال خذوا بتوصية أبو جعفر، أنا..

سامي كليب: إنه ما راح يخرجوا بالمفاوضات.

نذير رشيد: وهو كمان واعد الوعد إنه ممكن تخرجوا بمفاوضات خاصة أبو إياد، لما تفاجؤوا وصفي قبل ما يدخل الجيش أخذهم ولففهم وداخلين بكرة الساعة ستة والتعليمات الجيش خلاص يبرد.

سامي كليب: لمَن أخذهم للمنظمات؟

نذير رشيد: للمنظمات وكانت المنظمات اللي هناك.

سامي كليب: إنه تحذير نهائي.

نذير رشيد: نهائي، فيعني أبو إياد اعتبرها تراجع من وصفي عن موقفه، لم يكن يعرف إنه هذه سياسة جديدة يعني وصار هذا اللي حكيت لك إياه، فوقتها حكم على وصفي بالإعدام.

[فاصل إعلاني]

نذير رشيد: فوقتها حكم على وصفي بالإعدام وسوى أيلول الأسود وكنا نعرف الأسماء الأربعة.

سامي كليب: شو الأربعة؟ اللي بدهم يغتالوا وصفي؟

نذير رشيد: اللي بدهم يغتالوه أينعم، كانوا بييجوا لعندنا شعروا إنه نحن بنراقبهم بنستناهم..

سامي كليب: مَن كانوا؟ كانوا فلسطينيين؟

نذير رشيد: أينعم.

سامي كليب: كانوا من وين جايين؟

نذير رشيد: جايين من سوريا ومن لبنان من هناك جايين وبالمناسبة كاتبها بالتفصيل هناك شايف؟ ويفتخر فيها وكتابه متوزع في عمَّان تحب أجيب لك نسخة؟

سامي كليب: لا عندي نسخة.

نذير رشيد: فبأقول لوصفي هذه المعلومات عندنا، قال ما بيصير إحنا ما بيصير ما نقدرش نعزل حالنا عن العالم، قلت له بتروح ما بترجعش، فقلت له يا سيدي إذا راح الرجل والله ما بيرجع هنجيب سفينة من القاهرة يشرح لك الوضع ويشوف القضية، المعلومات اللي عندنا إذا راح ما بيرجع، فاستدعى وقتها على الحياري كان سفيرنا بالقاهرة..

سامي كليب: الملك حسين؟

نذير رشيد: الملك حسين، فجاء الحياري إلى هون وحكى لسيدنا أنه أقل ما فيها ما راح يحترموه، شايف، وحاولنا مع وصفي والله مرة فات علينا أبو شاكر وأنا قاعد يقنع وصفي بالمكتب..

سامي كليب: مَن أبو شاكر؟

نذير رشيد: شريف زيد أبي شاكر، بأقول له يا أبو شاكر ساعدنا عليه والله ده راح ما بيرجع وحاول معي ورفض وصفي وأبو شاكر حكى قبل ما يتوفى لعدد من الناس أنا بأعرفهم لو حبيت بأعطيك أسماءهم تتصل فيهم شايف، فأسرع الرعاة والله بمطار ودعناه الوداع الأخير اسأل عدنان أبو عودة عدنان كان مسافر لأسبانيا ودعناه الوداع الأخير شايف، وصفي أصر أنه يروح وهناك لمع يعني الرسالة اللي حملها وقدمها وشرحها لمع يعني وكان من أشد المعجبين فيه مصطفى طلاس، أبو وصفي..

سامي كليب: وزير الدفاع السوري..

نذير رشيد: وزير الدفاع السوري وإنما المؤامرة استمرت فاتوا بالمطار فاتوا بأسلحتهم وقتلوه بأوتيل الشيراتون وهم يتفرجوا..

سامي كليب: طيب، بتقول حضرتك إن النظام المصري متورط في العملية..

نذير رشيد: أينعم، فاتوا من المطار بأسلحتهم واغتالوه بإشرافهم.. بعلمهم..

سامي كليب: كيف عرفتم؟

نذير رشيد: فاتوا من المطار بأسلحتهم واتمسكوا واتحكى معاهم وتركوهم بأسلحتهم..

سامي كليب: بس كيف عرفتم حضرتكم بهذه المعلومات؟

نذير رشيد: عرفنا من مكان ما عرفنا، إحنا شو شغلتنا إحنا شايف، وقتها وديت طارق علاء الدين بعدين صار مدير مخابرات شارك بالتحقيق، إذا حد سأل الحيط سألوه سؤال، راح هناك وجاء ما حد سأله كانت واضحة تمام وبعدين..

سامي كليب: وقتها على العكس..

نذير رشيد: وافتخروا فيها، مش بس هيك وافتخروا فيها وجاء القذافي من ليبيا هناك على الأبطال وجاء راح تصور وياهم … شايف يعني كانت واضحة تماما..

سامي كليب: بس وقت على العكس حتى صدرت بعض الاتهامات لي إدارة المخابرات أنه والله المخابرات الأردنية هي اللي اغتالت وصفي التل..

نذير رشيد: لا.. لا..

سامي كليب: من أجل تقديم الخيار الآخر يعني الحل العسكري..

نذير رشيد: لا.. لا شو أي خيار.. صار وصرنا منتهيين منه من زمان الحل العسكري من زمان انتهينا منه وأطلعناهم من عمَّان وانتهى، بنحكي بعد ست شهور عليها الحكاية دي لا أبدا لا والله أنا لو فقدت ولادي ولا راح وصفي، أقسم لك بالله والله في والدي ما بكيت في وصفي بكيت، حقيقة كنت أحبه كانت صارت بينا علاقة عجيبة..

سامي كليب: علاقة عجيبة مع وصفي التل قابلتها علاقة معقدة وصعبة لا بل ودموية أيضا مع الفدائيين الفلسطينيين ونذير رشيد الذي ومن موقعه في قيادة المخابرات الأردنية في رئاسة فرع إسرائيل في هذه المخابرات كان قد عرف عن قرب قصة تلك العلاقة التي بدأت متوترة وانتهت بحمام دم عام 1970 ومَن يقرأ مذكراته سيجد كلاما قاسيا ضد التنظيمات الفلسطينية ومن هذا الكلام مثلا، أن هذه التنظيمات كانت خطابية فقط وأنها لم تشارك مطلقا في معركة الكرامة الشهيرة في الأردن.

نذير رشيد: شوف، كان رئيس الأركان عامر حماش، كان مشهور قائد فرحة وكان قائد اللواء.. لما شعرنا أن اليهود بدهم يفوتوا.. بدهم يفوتوا حشودهم باينة على لنبي وعلى داميا وعلى جسر الملك حسين اللي على طريق القدس فاتصل عامر حماش كلف غازي عربيات مدير استخبارات العسكرية اجتمع بقادة منظماته قل لهم اليهود فايتين وخاصة على الكرامة وأنتم ما أنتو مهيأين لا عندكم أسلحة ولا عندكم تدريب كافي، فأنتم اتركونا خففوا الخسائر شايف، فغادروا شايف، غادروا قبل يوم مش بس هم غادروا والأمن العام اللي عندنا هناك هرب كمان أصل بأقول أحكي لك كيف شايف ولما بدأت المعركة كان مدفع بين جيش وجيش، ليس انتقاصا من دول الفدائيين وإنما لم يكونوا مؤهلين لحرب هيك، حرب دبابات وحرب مدفعية..

سامي كليب: ما شاركوا مطلقا؟

نذير رشيد: في ما أعلم الله شوف فيه 13 منهم من جبهة أحمد جبريل وهمَّا ساحبين وقعوا في كمين إسرائيلي فاستشهدوا والبقية اللي في سكان المنطقة تجمعوا بالجامع ففات اليهود وقتلوهم، أنا شايفهم بعيني شايف..

سامي كليب: وكان فيه مدرسة لتدريب الكوادر قُتل فيها 25..

نذير رشيد: أنا أول مرة بأسمع ها الحكي..

سامي كليب: أحمد جبريل حكى..

نذير رشيد: أقرأ كتاب فلسطين باليهود هتشوف أن أبو إياد قال بتخبنيا راح قال هو.. مش قادر أفهم عربيات الناس راح قالوا بتخبوا وراء الصخرة بعدين جاء اليهود وشافونا وتخبينا وسحبت المسدس وكنت بدي أطلق النار، بعدين قال حملوني.. حملوه في العربية بس ما خبرني كيف طلع يعني، عيب.. عيب..

سامي كليب: حضرتك وين كنت؟

نذير رشيد: أنا كنت مدير شعبة إسرائيل بالمخابرات العامة وأنا مطَّلع شايف، كان تنسيقا كبيرا بيننا وبين الاستخبارات العسكرية..

سامي كليب: طيب، الرئيس ياسر عرفات رحمه الله راح قدَّم عصا الجنرال الإسرائيلي اللي قُتل قال، قائد عسكري إسرائيلي قُتل في معركة الكرامة قدمها للشاذلي بن جديد للرئيس الجزائري..

نذير رشيد: والله أول مرة بأسمع عن ها الحكي، يا رجل هذا عنده قدرة على اختلاق..

سامي كليب: مَن، أبو عمار؟

نذير رشيد: أبو عمار أيوه، عجيب المخلوق ده..

سامي كليب: كنت تعرفه؟

نذير رشيد: كنت أعرفه معرفة كويسة ويعني وبعدين زهقت منه بالاجتماعات كنت أودي أحمد عباداتي يروح يحضرها، ما كنتش أطيقه..

سامي كليب: ليش، شو صار بينكم؟

نذير رشيد: يا رجل مش شو صار بيني وبينه بتحكي مع واحد اللي معروف دين الله وما أصير أحكي صفاته لا يطاق يعني.. لا يطاق..

سامي كليب: الغريب أن معركة الكرامة جاءت بعد مشاكل بينكم وبين المنظمات الفلسطينية في منطقة الكرامة، يعني كنتم حاولتم إخراج المنظمات عسكريا من المنطقة..

نذير رشيد: لا ما حاولنا، اسمح لي..

سامي كليب: هذا الكلام حكاه كذا مسؤول فلسطيني..

نذير رشيد: يا سيدي همَّا يحكوا زي ما بدهم يعني خذ مني أنا.. أنا بأعرف اللي بأحكيه بدهم يبرروا موقفهم كان 1968 كان حتى العمل الفدائي بداية..

سامي كليب: أرى.. سأعتمد على ما تتفضل به يعني فقط لنقدم وجهت نظرك وجهة نظر الأردن آنذاك أيضا، كنت رئيس شعبة الاستخبارات ضد إسرائيل يعني طبعا على إسرائيل في المخابرات الأردنية وهذا منصب مهم جدا، بس تقول في العمل الفدائي، خلينا نسلم أنه والله الكرامة كما تتفضل كانت معركة الجيش الأردني وطبعا كما قلت منذ قليل إنه لحد الآن للأسف ما فيه حد غيرك في الأردن يتحدث بهذا التفصيل عن العلاقة مع الفلسطينيين، طيب في توصيفك للعمل الفدائي تقول إن المظاهر العسكرية والقتالية الفارغة المحتوى كانت هي المسيطرة على تنظيمات المنظمات الفدائية ونشاطاتها وإن الإعلام الكاذب كان وسيلتهم للإعلان عن عمليات فدائية وهمية..

نذير رشيد: هذا صحيح..

سامي كليب: أعطينا أمثلة، بشكل ما يبين وكأنه اتهامات فقط..

نذير رشيد: على المحل اللي إحنا فيه هون، إحنا طبعا مشرفين على الضفة الغربية مباشرة والله كان البيان بيطلع من عمَّان الظهر أنه اللي يضربنا تجهزوا له بكره كان وقتها طالع، قصفونا مهاجع راح كذا قتيل وكذا شهيد وعادت قواتنا سالمة، الطوفين هنقول كانت عن منطقة داميا، فكنت آجي هون وكان ضابط المخابرات من العبادات محمود عبادات وكنت استني ها القصف يبدأ، إحنا عارفين البيان جاهز والله طول الليل ما أسمع وبعدين يسمعوا هنقول فتح صدرت ييجي الصهاينة يقول أهم فتحوا أكثر منا وحنا هيك مع ها البيان شايف، تيجي الجبهة الديمقراطية كان شو مناورات بالذخيرة الحية بعمَّان..

سامي كليب: طيب حرب..

نذير رشيد: أكمل لك..

سامي كليب: معنويات.. رفع معنويات..

نذير رشيد: هأكمل لك الأمور مش هيك، يعني مش هيك العمل الفدائي..

سامي كليب: كنتم بالمخابرات مخترقين المنظمات الفلسطينية؟

نذير رشيد: طبعا على الآخر مين مش بس إحنا وغيرنا مين مش مخترقهم؟

سامي كليب: كنتم تعرفوا ما يحصل داخل الاجتماعات؟

نذير رشيد: بالتفصيل وفورا..

سامي كليب: بس أعطني مثلا؟

نذير رشيد: حكيت لك عن أبو إياد: أبو إياد.. صحبة حتى بعد هذه يقول يا أخي أنتم مشكلتكم أولا كل مخازننا كشفتوها، مستودعاتنا كشفوتها رأسا وكاتب في كتابه لكن كل المعلومات قلت له اجتماع الجاي خلاص عجلون قال لي بعد ثلاثة أيام قلته بأخبرك..

سامي كليب: لإحراج عجلون؟

نذير رشيد: آه والله وبعدين قلت له طب اجتمعتوا أربعة أنت وفلان حكيك وفلان حكيك..

سامي كليب: طيب، سيد نذير رشيد..

نذير رشيد: شوفت..

دور الفلسطينيين في الأردن

سامي كليب: فقط لكي يفهم مشاهد عربي مشاهد هذه الحلقة حضرتك كمسؤول سابق للمخابرات الأردنية طبعا جرى حديث كثير عن دور الفلسطينيين في الأردن وأنهم كانوا يتآمرون على النظام وأنه ما كانوا بيقاتلوا إسرائيل وما إلى ذلك كل الاتهامات التي سمعناها من الأردنيين ضد الفلسطينيين، فقط وددت أن أسألك اليوم هل لديك معلومات محددة أنهم فعلا تآمروا على الأردن أنه فعلا هم سبب أحداث أيلول الأسود؟

نذير رشيد: أيلول الأبيض، أينعم.

سامي كليب: تفضل، أعطني مثلا..

"
في أيلول الأسود
كل مفاصل الدولة كانت محتلة بالكامل داخل عمَّان وخارج عمَّان
"
نذير رشيد: يا سيدي أولا هم يعني احتلوا جميع مفاصل الدولة الأردنية ما فيه محل ما بتلاقي عليه من الكفاح المسلح حراسة بما فيه وزارة الداخلية ووزارة الأشغال كانوا بعمارة واحدة لسه فيها مجلس النواب، كل مفاصل الدولة كانت محتلة بالكامل داخل عمَّان وخارج عمَّان، بإربة، بالطور كلها كانوا محتلينها بالكامل، بلدنا هون واسأل الشباب خلي أهلهم يقولوا لهم شايف وكانت الأمور مستوية عندهم لدرجة طبعا بالتنسيق مع السوريين كانوا اتفقوا أنه تدخل أربعة ألوية دبابات سورية لاكتساح شمال الأردن وكانت قوات عراقية عندنا هون فسحولهم مكان انسحبوا من المفرق للزرقا، كان صالح مهدي عماش وحداد تكريتي مقيمين هنا كان لهم لواء بعمان لواء مظلين يقاتل بجبل الحسين واللي بيقاتلوا بعضهم طيبين بأعرفهم اللي كانوا يقاتلوا بهذا شايف، الجمعيات الخيرية كانت كلها تابعة لهم الحكومة الأردنية كانت معينة من قبلهم، حكومتنا..

سامي كليب: طيب..

نذير رشيد: أكمل لك يا سيدي شايف، فقرروا إسقاط النظام كل الأمور مستوية طبعا الجيش بجيبهم، دافعين ثمنهم، شكلوا حكومة عسكرية ياسر أبو عمار وأظن محمود الروسانلي لإدارة الحاكم العسكري العام وهو حسن خرسلي الدكتور حسن خرسلي لإدارة المناطق المدنية وكان.. وكان فيها واحد من الفاهوم من إربد لإدارة المناطق المحررة ودخلت القوات الإسرائيلية طبعا.. دبابات أربع ألوية دبابات ما عندنا جيش شو فانسحب جيشنا للكفاءة وكان عين العراقيين القوات السورية، التقدم إلى أبو الجرش مع إنهم لإسقاط النظام بأيديهم مش بيد الفرقة الثانية من حزب البعث بسوريا، كان أيام صلاح ديدو وماخوس والأتاسي وإلى آخره شايف، هكذا صار فاتوا أبدا أنا شايف دبابات.. وسلمنا بره ما عندهم قدرة يعني كتيبة اللواء دبابات..

سامي كليب: كنتم خائفين يسقط النظام فعلا؟

نذير رشيد: لا..

سامي كليب: ليش؟

نذير رشيد: جماعتنا مقاتلين، جماعتنا بيقاتلوا..

سامي كليب: بس كان موازين القوى مش لصالحكم.

نذير رشيد: حتى لو كان برضه بيقاتلوا شايف وبعدين إحنا مش فراغ مش عايشين فراغ إحنا، فيه حوالينا عالم..

سامي كليب: صحيح إنه حضرتك قلت للملك اضرب الآن أو ستخسر السلطة؟

نذير رشيد: لا، قبلها.

سامي كليب: قبلها؟

نذير رشيد: لا شوف لما صارت المعلومات عندنا هؤلاء وكان عندهم نية يفوتوا كان المعلومات كلها متوفرة عندنا شايف..

سامي كليب: مَن كان مصدر المعلومات؟

نذير رشيد: يعني المصدر كان جهاز كبير جهاز فاعل يعني..

سامي كليب: بس مين القيادات الفلسطينية كان عندكم مصادر؟

نذير رشيد: كان عندنا منين العمل بنعرف بننجم؟

سامي كليب: من القيادات البارزة؟

نذير رشيد: بنعرف عاد منين نعرف تفاصيلها؟

سامي كليب: من اللي بنعرفها اليوم.

نذير رشيد: بنلم على أسامي لا مش هأريح يا سامي هيك.

سامي كليب: لا بس من القيادات البارزة؟

نذير رشيد: لكن يعني منين هذه التفاصيل هذه يعني تشكلت حكومة عسكرية لإدارة المرافق المحررة وأسمائها شايف؟

سامي كليب: هكذا أصبح كل شيء جاهزا لوقوع المواجهات بين الجيش الأردني والمنظمات الفلسطينية، كان كل شيء جاهزا في الداخل والخارج ورغم كل الاتصالات التي جرت بين الملك حسين والرئيس المصري الراحل جمال عبد الناصر إلا أن المواجهة وقعت وكان ضيفنا نذير رشيد من المؤيدين للحسم العسكري وللضرب بيد من حديد.

نذير رشيد: بأقول له ترى هذا الوضع يعني إحنا الأمور استوت في الأخير، إذا سيدنا عنده بيعتقد إن عنده مجال لمناورة هو القائد هو اللي بيقرر لكن عندنا ميشال المرحلة اللي بأقدر أخدمك فيها، أعلنوا الإضراب العام يوم 17-9 وراح تنهار الدولة وبعدين راح يكون صعب لملمتها، إذا سيدنا ناوي يأخذ إجراء أنا على يمينه، فقال لي استنى، كان شوف وقتها كان جاي من بيت الأميرة عاليا، من بيت أبو شاكر، شريف زيد، الأمير زيد فيما بعد ومركب الأمير علي وراءه على الموتوسيكل كان طفلا صغيرا يعني فأبو شاكر بيركِّبنا، قال لي سيدنا استناه ما تروحش وانفعل قام قال لي أبو شاكر شو حكيت له؟ قلت له اسأله، بعدين روحت أنا وياه نادى وقعدنا بره بجنينته كان فيه شجرة فلفل صغيرة قعدنا تحتها وقرر.

سامي كليب: قرر الملك حسين آنذاك الضرب بيد من حديد، خاطر في المعركة غير أنه اعتبر أن ذلك هو الخيار الأخير، أراد أن ينهي الدولة الفلسطينية التي كادت تقوم داخل الدولة الأردنية، وقعت حرب أيلول الأسود، تلتها تبعات كثيرة ومن تلك التبعات مثلا حين سعى أبو داوود لاعتقال مجلس الوزراء الأردني لمبادلة الوزراء بأسرى فلسطينيين ولكن العملية التي كانت معدة بإتقان باءت بالفشل وكان لنذير رشيد الدور الأبرز في إفشالها وذلك فيما كان الملك حسين يمضي شهر العسل في الولايات المتحدة الأميركية.

نذير رشيد: أبو داوود كان طالع ومسكوه عند دوار الداخلية هويتك وما هويتك الحقنا، كنا معتقلين جماعته البقية، فحطوه بالاستعلامات في غرفة اللي.. فروحت شوفته أنا فيها، قلت له يجيب النظارات، أبو داوود إحنا عارفينك وعارفينك لسه جاي وعارفين كل جماعتك والكل مسكناهم.

سامي كليب: كان خائفا؟

نذير رشيد: هو تفاجأ، قلت له اسمع أنت.. أنا فلان بدك تحكي بالتفصيل أنت كل شيء أنت جاي علشانه وإلا ما حدا بيحميك مني، زين؟ تعرفني كويس؟ قال آه، قال اعطوني ورق، أقسم لك بالله..

سامي كليب: هو طلب ورق؟

نذير رشيد: والله أعطيناه وثلاثة أيام ويكتب، بعدين هو اقترح يطلع على التلفزيون والله ..

سامي كليب: غريب شو انهار يعني من..

نذير رشيد: والله هذا اللي صار..

سامي كليب: عذبتموه؟

نذير رشيد: ولا والله ينضرب كف والله ولا حدا أصابه، شايف وهذا اللي صار، بعدين تبين إنه طالع يتعذب وينضرب إلى آخره كله كذب.

سامي كليب: لأن هو نفى فيما بعد كل الاعترافات.

نذير رشيد: خليه جيبه خليه يشوف مين ضربه، بعدين لما جاء استلم منا إحنا اختلفنا مع هيك كان نقطة خلاف كبيرة فاللي بعدين نقلوه على.. أنا طبيعتي بأحب أكون مستقلا بعملي ما أحبش حد يتدخل بعملي، يعني بأحب الدائرة تشتغل على أصولها.

سامي كليب: طيب، بالحديث عن تشكيل الحكومة العسكرية 16-9-1970 برئاسة محمد داوود..

نذير رشيد: محمد داوود، آه..

سامي كليب: تصف وزير الإعلام في تلك الحكومة الرائد آنذاك عدنان أبو عودة اللي أصبح رئيس الديوان الملكي في الأردن واللي استضفناه في حلقة سابقة من البرنامج تقول، كان أبو عودة مثقفا وذكيا ويخدم وظيفته باحتراف وكفاءة، عال..

نذير رشيد: ولا زال..

سامي كليب: دون أي اعتبار للمبدأ، شو يعني ما عنده مبادئ؟

نذير رشيد: هذا صحيح شوف لأنه بعدين غيَّر، لأنه بعدين غيَّر شايف وبعدين عنده شطحات وبيعتقد بلباقته وهذا بيمشِّي الأمور، أنت بالمناسبة أنت من أول دقيقتين يعني سيطرت على الموقف معه..

سامي كليب: لا هو اسم الله عليه كان كويس..

نذير رشيد: لا اللي سمعناه من عدنان مش عدنان اللي بنعرفه، عدنان واحد ثاني، اللي حكاه عدنان فيما بعد ظل طول المقابلة على طول متأثر بسؤالك الأول..

سامي كليب: بس قدم وجهة نظره.

نذير رشيد: دهورته دهورة كبيرة أنت وإلا لولا سؤالك..

سامي كليب: أنا عملت واجبي كصحفي وهو واجبه كسياسي كان..

نذير رشيد: لا هو وهو ده اللي بنعرفه مش عدنان اللي بنعرفه إحنا، إحنا بنعرفه معرفة كويسة، عدنان لو انطلق ترك على.. بيحكي غير بيحكي أقوى فمضى خليته كل الوقت دفاع أنت..

سامي كليب: بس توصيف له إنه بدون مبادئ؟

نذير رشيد: دون اعتبار لمبدأ مضبوط، هذا هو ليش فيه عنده شطحات ويسويها خليه يرد عليّ خليه يرد..

سامي كليب: بس حضرتك يعني بالكلام اللي حكاه إنه فيه تمييز بين فلسطيني وبين أردني وبين شرق الأردن وما بأعرف شو، يعني انتقدته؟

نذير رشيد: أنا بأسألك وهو وين كان؟ حتى قانون الانتخابات اللي كان.. اللي صار مؤخرا اللي صارت عليه انتخابات سنة 1900 كانوا بالدولة هو أطول واحد مضى خدمة، أنا قعدت خمس سنين هو قعد 25 سنة من الخدمة.

سامي كليب: دليل إخلاص للملك.

نذير رشيد: طيب، ما إحنا حكينا له ما قلنا لا ما قلنا إنه..

سامي كليب: يعني حين يتحدث لو يحث له الحديث؟

نذير رشيد: هذا بيؤكد وجهة نظري إنه زلمة كفؤ ويخدم لما طلع صار أخذ موقفا ثانيا يا رجل، خليه يقول لا.

سامي كليب: أنا راح أسألك نفس السؤال اللي بأسأله إياه في المقابلة يعني الفلسطينيون موجودون في الأردن بتاريخ الأردن بتطوره، بواقعه الحالي، أولا لا أدري ما هي نسبتهم في الأردن لأنه فيه كلام كثير، البعض يقول 80% البعض يقول 50 البعض 70، أولا كنت بدائرة المخابرات عندك تحديد فعلي لنسبة الفلسطينيين أو من أصل فلسطيني وليس أردني..

نذير رشيد: لا، أنا بأجوابك بطريقة ثانية، أيام المملكة العربية المتحدة كان لهم نصف أغلبية المقاعد في المجلس النيابي، بعدين اختلفت التركيبة السكانية صار فيه لهم دولة شايف وبيصوتوا هناك في الدولة، يعني ما سحبنا الجنسية، هم أصروا على دولة وحقهم فتصويتهم هناك فعددهم قل هون شايف، عددهم قل هون وبعدين أنا يعني حتى بده يقول لك إحنا فرنسا وإنجلترا وبإنجلترا بيعيدوا تركيب الدول بين كل انتخابات والثاني..

سامي كليب: بس اليوم تقريبا قد إيه نسبتهم؟

نذير رشيد: يعني قد اللي يعني أقل من 50%..

سامي كليب: نذير رشيد المدير السابق للاستخبارات الأردنية والسفير السابق الذي عمل في المملكة المغربية لفترة قصيرة ولم يعجبه السلك الدبلوماسي كان وصل إلى مجلس الأعيان الأردني بتعيين من قِبل الملك حسين وأثناء عمله في المغرب حاول أبو نضال اغتياله بسبب مواقفه من الفلسطينيين وهو يروي كل تلك الأسرار في كتابه ولكن اللافت أني حين وصلت إلى الأردن لم أجد الكتاب في الأسواق الأردنية وقيل إنه مُنع لأن نذير رشيد الذي ابتعد عن السلطة وصار يهتم أكثر بتجارة السيارات وركوب الخيل اعتبر أن الأمير حسن كان في إحدى مراحل البلاد قد أصبح المرجع الأول ولأنه قال أيضا إن بعض الأشراف تخلوا عن مراكزهم وهربوا في خلال أزمات الأردن، سألته في ختام هذا الحوار هل يعرف تماما لماذا يُمنع بيع الكتاب في عمَّان؟

نذير رشيد: يعني ما بأعرف، صدقني ما بأعرف.

سامي كليب: مش صحيح.

نذير رشيد: والله صحيح بشرفي، يعني أقول لك إنه هذه الشغلة لا سبب هذا..

سامي كليب: حضرتك دبلوماسي وبدك تقول..

نذير رشيد: لا والله شايف أنا ما بأعرف ليش شايف لكن هذا ما بيؤثر علي أنا أولا..

سامي كليب: بيقولوا لأنك حكيت ربما عن بعض الشخصيات لها علاقة بالعرش..

نذير رشيد: أنا أولا أنا أقول لك شغلة، أولا أنا ابن النظام يعني قبل هؤلاء الأطقم ما تيجي يعني وبأحب النظام كثيرا وبعدين هذه الأيام مين بيقدر يمنع؟ ما حدا بيقدر يمنع كتاب هذه الأيام، مين؟

سامي كليب: بعض المستشارين؟

نذير رشيد: لا ما حدا مين، ما حدا بيقدر يمنع كتاب، بده ينتشر.

سامي كليب: بس هو في الواقع لا ممنوع ولا مسموح بنشره.

نذير رشيد: أولا أنا حابب أعرف ليش؟ أما إذا كانت منشان الأمير حسن فهي أعوذ بالله مصيبة، يعني الأمير حسن لما كان بالسبعين هون عندنا كان هو مرجعنا كان سيدنا راح يتعالج بإنجلترا وكان رجال الحكومة وقتها فكان لابد من مرجع لهم الأمير حسن ما فرض حاله يدنا اللي..

سامي كليب: بس حضرتك قلت في الكتاب أمرين، إنه الأمير حسن كان مرجعك هون في مرحلة معينة..

نذير رشيد: كان مرجعي في وقت السبعينات..

سامي كليب: الأمر الثاني إنه بعض الأشراف تخلوا عن ألقابهم.

نذير رشيد: وهذه حقيقة خليه يقول لهم لا بيعرفوا حالهم وبعدين الأمير حسن ما هو عيَّن حاله، سيدنا اللي عيِّنه وإحنا هذا اللي صار إذا كان.. أعوذ بالله شغلة لا..

سامي كليب: صداقتك مع الأمير حسن أبعدتك عن السلطة فيما بعد؟

نذير رشيد: لا، ما لها علاقة هذا بهذه، إحنا ما بعدنا دورنا بأعتقد إنه جيلنا دوره..

سامي كليب: انتهى.

"
أنا خدمت مع الملك عبد الله المؤسس ومع أبي الدستور الملك طلال ومع الملك حسين فترة طويلة لكن دورنا انتهى فلابد من دم جديدة

"
نذير رشيد: انتهى، أنا خدمت مع الملك عبد الله المؤسس ومع أبو الدستور الملك طلال ومع الملك حسين فترة طويلة ومع ذلك الملك عبد الله يعني إحنا دورنا انتهى بهذا بأعتقد، لابد من دم جديدة.

سامي كليب: لابد من دم جديد ونذير رشيد هو واحد من أولئك الذين أخلصوا كثيرا للعاهل الراحل الملك حسين ودعموه في صلحه مع إسرائيل وصاروا اليوم يشعرون بأن العهد الجديد مع الملك عبد الله الثاني بحاجة إلى رجال جدد وأفكار جديدة تقدم الرفاهية الاقتصادية على الأيديولوجيات التي عرَّضت الأردن لهزات وخبطات كبيرة عبر تاريخه الحديث.

جميع حقوق النشر محفوظة، الجزيرة