الدراما التلفزيونية والواقع السياسي العربي   
السبت 1427/9/28 هـ - الموافق 21/10/2006 م (آخر تحديث) الساعة 14:09 (مكة المكرمة)، 11:09 (غرينتش)

- الشعوب العربية في الغيبوبة
- تابوهات المجتمعات العربية على الشاشة

- خيبتنا العربية على المسرح

- التنوع داخل الوحدة في الواقع والدراما العربيين


[شريط مسجل من مسرحية كارمن]

أحمد منصور: أستاذ محمد مرحبا بك.

محمد صبحي - فنان مصري: أهلا وسهلا أستاذ أحمد أهلا وسهلا.

أحمد منصور: الشعوب العربية ليه ما بتقولش لا؟

الشعوب العربية في الغيبوبة

محمد صبحي: تقول لا لمَن؟ لازم السؤال يكمل، لا الشعوب زي ما أي حاجه في العالم تتطور ويحصل لها مستجدات ومناطق خسوف ومناطق مد وجزر هي أيضا الشعوب العربية يحصل لها نوع من أنواع الموات الوقتي أو غيبوبة الإعاشة يعني الناس عايشة ولكن في غيبوبة الناس نفسها تقول لا، بس أنا أعتقد أن لا دي تقال لماذا؟

أحمد منصور: لكل اللي أنت قلته.

محمد صبحي: نعم يعني أقصد أن الناس يعني كانت محتاجة أنها تقول لا جوه المجتمعات الصغيرة يعني جوه المواطنة الصغيرة يعني كان تأثرها بما يحدث في العالم كله بطيء على بال ما يوصل لك آثاره اليوم أنت مرتبط بالحركة العالمية أولا خارج حدود بلدك ما يحدث في أطراف القطب ممكن يؤثر على حارة في بلدك أو في مجتمعك.

أحمد منصور: لكن فيه شعوب في مناطق كثيرة من العالم بتقول لا؟

محمد صبحي: كثير وده يعني ده اللي يخلي الواحد يخجل لا ده يقولوا لا لك يعني يقولوا لا بدالك يعني يحملوا قضاياك أنت.

أحمد منصور: يعني الآن فنزويلا تحمل القضايا العربية؟

محمد صبحي: فنزويلا تحمل القضايا العربية وقضايا المنطقة وقضايا المستضعفين وقضايا المغلوبين على أمرهم والمظلومين والواقع عليهم ظلم هي مكانك تقول لا فتستغرب من فرق الخطابين يعني أنت ما بقتش حاضر في أنك تقول لا بوجدانك حتى أو بإحساسك أو تقول عن طريق مظاهرة أو عن طريق شعارات أو عن طريق فم يعني كان زمان يقال إيه؟ نحن نشجب كنا نسخر كنا نتريق في الإعلام ونتريق في..

أحمد منصور [مقاطعاً]: نشجب وندين ونحتج..

محمد صبحي: نشجب وندين ونحتج تتصور بقى دي قمة الشرف ده إحنا اللي كنا يعني نقعد نتريق عليه يعني إحنا بس نشجب وندين ونحتج النهارده..

أحمد منصور: دلوقتي..

محمد صبحي: يا ريت يعني يا ريت يبقى فيه شجب وفيه إدانة وفيه احتجاج وللأسف يمكن كلامي منصب على الاحتجاج والشجب على المآسي الإنسانية المآسي الإنسانية اللي هي لأخوك الإنسان في أي حتة في العالم..

أحمد منصور: لكن الأقرب لك يعني الآن ما يحدث في فلسطين ما يحدث في لبنان..

محمد صبحي: حتى لو أميركان حصلت كارثة أنت ممكن بدنك يقشعر لهذا الإنسان اللي أصيب بسوء ما بالك النهارده بقى فيه آلة جهنمية داخل العقل البشري هي التفنن في التعذيب والإذلال والظلم ومنصب ده يعني بقى فيه فَتوَنة على منطقتنا العربية..

أحمد منصور: أنت مسلسل عايش في الغيبوبة هل هو منعكس على عايش فقط بطل المسلسل ولا العالم العربي كله الشعوب العربية الناس كلها عايشة في الغيبوبة..

محمد صبحي: ده قيمة الاسم يعني عايش هو يمكن يبقى اسم شخص ممكن يبقى فعل يعني عايش في الغيبوبة ممكن يبقى حاضر بحاله ممكن يبقى مجتمع بحاله ممكن يبقى وطن بحاله ممكن يبقى العالم نفسه أجمع الكون اللي إحنا عايشين فيه لا أنا حاسس أو ده شعوري أن إحنا في مرحلة لما قبل الموت إحنا محتاجين علاج وبسرعة بس إحنا واقفين كلنا متلخبطين نبص لبعض ونقول الدواء إيه؟ ونسأل على الدواء والدواء في أيدينا بس ساعات الغيبوبة تبقى مريحة قوي يا أستاذ أحمد..

أحمد منصور: يعني كأن عملية التسطيح التي يتعرض لها العقل العربي من خلال الكم الهائل من المسلسلات الفارغة التي تأتي إلى الناس في شهر رمضان أكثر من مائة وعشرين مسلسل أنتجت لرمضان خصيصا بحيث أن الإنسان لا يكاد يفيق من الغيبوبة من غيبوبة البقاء والنافع في هذا أو الثمين قليل جدا والباقي كله يعني لجنة المسلسلات في التليفزيون المصري قالت ثلاث مسلسلات من بين ستين شاهدتها هي التي ترقى إلى الدرجة الأولى، أيضاً عملية التسطيح هذه تدخل في إطار الغيبوبة التي يعيشها الإنسان العربي؟

محمد صبحي: هو أولا ما نقدرش نفصل التسطيح الفني عن باقي عناصر المجتمع..

أحمد منصور: يعني التسطيح إفراز للمجتمع؟

محمد صبحي: نعم المناخ هو الذي يولد أو يفرز العبقريات هو.. الذي يفرز التفاهات هو الذي يفزر التسطيح أنت تتكلم عن مسلسلات لشهر رمضان هذه العبارة في حد ذاتها فيها شيء غريب مسلسلات لرمضان ليس ياميش يعني ما هواش طقوس رمضانية نمارسها إحنا عندنا 12 شهر فلنجعل هذا الشهر الفضيل يعني كنا زمان يتقدم مسلسلين نتخانق الفنانين يتخانقوا أي مسلسل سيذاع على القناة الأولى وعلى القناة الثانية يعني بالكثير قوي تبقى الخناقة محصورة في ده إنما النهارده أنت في وسط هذا الزخم سوق عكاظ أنت تحضر لرمضان زي ما أنت قلت مائة وعشرين أو أكتر من مائة وعشرين مسلسل ومنهم اللي بايت اللي بايت يعني من السنين اللي فاتت فتبقى قديمة ويتم عرضه..

أحمد منصور: ولم يتم عرضه أخروه لرمضان..

محمد صبحي: بالضبط فهذه العقلية الإعلامية العبقرية في المنطقة العربية إنها بتصنع أعمال والأعمال أنا لا أتكلم على المسلسلات أنا أتكلم على البرامج أنا أشوف برامج أنا ده رأيي الشخصي يعني أشوف برامج فعلا تدعو على التخلف العقلي برامج تافهة وسخيفة..

أحمد منصور: تكرار واستنساخ..

محمد صبحي: وهي هي..

أحمد منصور: يعني خاصة البرامج التي تسخر من الإنسان زي ما يسمى بالكاميرا الخفية..

محمد صبحي: ما تسمى بالكاميرا الخفية إحنا شفنا الكاميرا الخفية في أوروبا وفي أميركا وفي تليفزيونات و(VHS) قبل ما يطلع قبل ما تظهر الفضائيات كنا نعجب بها ما فيهاش ولا موقف يسخر من عقلك ولا يبرز هذا المواطن اللي أنت جايبه بتعمل عليه هذه الهزاراية إنك تطلعه تافه أو أهبل إحنا البرامج اللي معمولة فعلا تُخجل وللأسف الشركات الإعلانية لا تدعم إعلاناتها إلا للأعمال اللي مثيلة الكاميرا الخفية..

أحمد منصور: هل هذا إفراز لما يقال بأنه الجمهور عايز كده أم إفراز للنظام السياسي النظام السياسي يفرز المناخ الذي يؤدي إلى هذا؟

"
المجتمع حلقات متشابكة لا يمكن فصلها، لذلك لا نستطيع القول إن المسرح هابط أو الأغنية هابطة فهناك هبوط في كل شيء حتى في الاقتصاد
"
محمد صبحي: هو أنا أقول إن حركة المجتمع أساسية المجتمع حلقات متشابكة ما نقدرش نفصل حلقة واحدة ما نقدرش نقول ليه المسرح هابط ليه الأغنية هابطة ما نقدرش نقول الفن مسطح ما تقدرش تقول ده في أي مجتمع أنت لازم تقول إشمعنا الفن ما يبقاش هابط فيه هبوط في كل حاجه عندك في الاقتصاد في تناولك في فكرك لتنمية الاقتصاد يعني لما نقول إن حصيلة الضرائب أنت بتخاطب المواطن وتقول له زود الضرائب وخليك أمين وادفع ضرائبك عشان تأخذ حقوقك ده غلط لا أنت تقول له نمي إنتاجك وإنتاج وموارد بلدك عشان تعيش حياة أحسن ولكن لا يمكن أعتمد على الضرائب وإلا يبقى أي وزير اقتصاد في العالم ممكن أي بني أدم ممكن يبقى وزير اقتصاد لو هو سيعتمد على زي النظام التركي والعثماني الجباية تلم فراخ وبيض وحاجات زي كده ولكن أنت محتاج اقتصاد قوي الاقتصاد القوي ده يصنع إنسان الاقتصاد القوي هو..

أحمد منصور: النقطة المهمة الإنسان العربي الآن الإنسان العربي الذي لا يتم فيه أي استثمار العقل العربي الناضج يهرب إلى الخارج الموجود من الناضجين محبطين يشعرون بأنهم حتى في مجال الفن يعني حتى في مجال الفن المتميزين يشعرون أنهم منبوذين في هذا الوسط؟

محمد صبحي: أيوه أنت لو قدمت عمل فني راقي سيذاع الساعة أربعة الصبح وفي مواعيد سيئة يعني مواعيد الناس نايمة عشان ما يصح الناس تتعلم حاجة كويسه أو تتربى على وجدان أرقى يعني الحاجات التافهة هي اللي تأخذ الوقت المتميز على فكرة ده في كل التليفزيونات العربية المحك في تقديم الأعمال ناضجة أو فيها كلمة أو فيها رؤية توضيحية أو أعمال تنور عقلك يعني أو تستنير بها لا يقول دي قدمها بقى الساعة ثلاثة أو أربعة تكون الناس نامت يعني هذا المنطق الإعلامي مخيف، فيه فنانين كثيرين محترمين ما بقوش يقدموا أعمال أو يخجلوا أنهم يقدموا أعمال وتتعرض في وسط الأعمال..

أحمد منصور: كانت دائما يا أستاذ محمد هناك يعني محرمات وأشياء ثابتة لا يتم التطرق لها في المسلسلات التعري مثلا الرقص القبلات الآن المسلسلات التي تعرض في نهار رمضان حتى والناس صائمين مليئة رقص وعري ويعني أصبح هناك حتى تنافس ما بين.. على قدر ما تكشف كل ممثلة وعلى قدر ما يتم الابتذال حتى في السيناريو؟


تابوهات المجتمعات العربية على الشاشة

محمد صبحي: هو إحنا مررنا بكذا مرحلة، مرحلة كان الاثنين في حجرة والباب مقفول يرفض المسلسل العمل الفني لازم يبقى فيه محرم فكنا نوقف ساعي على الباب..

أحمد منصور: والمصورين..

محمد صبحي: مكتب يعني مكتب موظفين فموظفة وموظف قاعدين في مكتب يقول لك ده سيرفض، ليه؟ لازم يبقى فيه محرم فأوقف ساعي أثناء المشهد ده ما يعمل يعني..

أحمد منصور: ومجموعة المصورين والمخرج والدنيا دي كلها..

محمد صبحي: ما خلاص دول مش موجودين بقى ده دول وظيفتهم بايخة، بعد كده كنا يعني لو كتف يعني للنموذج بتاع الملابس بس كده متعري شوية يقول لك لا سيرفض في كل المحطات العربية النهارده ما فيش حد يقول يعني مطنشين لا هي مفتوحة ومن حقك تعمل اللي أنت عايزه وده فن وأنا شخصيا مش شايف شيء ضد التعري لو كان التعري ده موظفا فنيا يعني أنا مش عقلي مش مغلق لهذه الدرجة ولكن أن تكون سياسة إعلامية عربية لدرأ تهمة الإرهاب زي ناس بتقول لك والله العظيم إحنا إرهابيين يعني إحنا مش إرهابيين يعني إحنا مش إسلاميين يعني إيه إحنا مش إسلاميين يعني إحنا ما لناش دعوة بالدين وبالتحبيكة بتاعة الدين..

أحمد منصور: يعني خروج من الدين نفسه كمان..

محمد صبحي: أيوه أنت بتثبت عشان تثبت أنك مش ما إحنا أصلنا مشكلتنا أن إحنا صدقنا التهمة إحنا اتهمنا إننا أي مسلم أو عربي خلاص يساوي إرهابي فإحنا صدقنا مش ندافع إحنا صدقنا إن إحنا إرهابيين وعشان نمحي هذه التهمة حاليا إحنا نبقى ناس هلس يقول لك شفت الهلس إحنا أهو ناس هلس أهو ولا نفكر ولا لينا دعوة بالدين ولا الحشمة ولا الاحتشام ولا غيره أنا ضد وضع صورة للمتدين أنا ضد وضع صورة ثابتة للمتدين وأيضا ضد..

أحمد منصور: يعني الدين سلوك أكثر منه الدين..

محمد صبحي: سلوك في كل حاجة في الملبس وفي الأكل والشراب وفي التعامل..

أحمد منصور: الدين المعاملة في النهاية..

"
هناك جبهتان للإعلام، جبهة تنادي بالفضيلة وجبهة تقاوم الفضيلة على أنها صورة من الصور التي تثبت تهمتنا بأننا إرهابيون، ويعد ذلك من أكبر المشاكل التي أثرت على الفن
"
محمد صبحي: فأصبحنا النهارده جبهتين جبهة تنادي بالفضيلة دي ما بتقدمش إعلام طبعا ما لهاش دعوة وجبهة تقاوم الفضيلة عن أنها نوع من أنواع أو صورة من الصور اللي تثبت تهمتنا إن إحنا إرهابيين فأنا شايف إن هي دي أكبر مشكلة أثرت على الفن أن أنت عايز..

أحمد منصور: في المقابل الخط الجاد لتقديم أعمال جادة أعمال متوازنة ما الذي يجده من الآخرين هل تجد فرصة لأن الأعمال الجادة الآن هناك احتجاجات كثيرة جدا قرأتها من كثير ممن قدموا أعمال يعني جادة إنهم همشت أعمالهم كما تقول استبعدت في بعض المحطات من التي من المفترض إنها محطات مشاهدة بشكل كبير جدا يشعروا إنهم مهمشين يشعروا أن هم الأعمال المبتذلة بتقدم فعلا في الأوقات الرئيسية؟

محمد صبحي: هو المشكلة بقى..

أحمد منصور: فيه ثمن يدفع؟

محمد صبحي: يعني تعالى نعيش يا أستاذ أحمد أي مؤلف النهارده قاعد كده أمامه ورق وسيكتب عمل فني كان محاصر بقوانين رقابية في كل بلد حسب كل مجتمع يعني تلاقي النهارده محاصر بقوانين عالمية أنت محاصر بالقانون اللي حطاه أميركا واللي ترعبك في إسرائيل أنت لو وصل أنا حاسس قربت قربت إنك لازم تروح السفارة الإسرائيلية والأميركية تقول لهم العمل ده سيضايقكم ولا لا قبل ما تقدمه دي مصيبة..

أحمد منصور: يعني بعد فارس بلا جواد دفعت ثمن والآخرين أيضا تخوفوا من أنهم..

محمد صبحي: والشتات والطريق إلى كابل وحاجات كثير في المنطقة العربية بعد فارس بلا جواد حاولوا يقدموا هذا الاتجاه لأن مسلسل هز هذا الكيان لا هو سلاح ولا كيماوي ولا نووي ده حتة سلاح بسيط قوي نملكه نحن نملكه وعلى ذكر مثل لما إيران أصدرت فتوى بقتل وإهدار دم سلمان رشدي لأنه كتب كتاب آيات شيطانية هاجت العالم وأميركا بالتحديد الرأي الأميركي والرأي الإنجليزي بريطانيا قالت خليكوا متحضرين خليكوا متحضرين قابلوا الكتاب بالكتاب والفيلم بالفيلم والعمل الفني بالعمل الفني طيب النهارده إحنا ما قلناش ليه لإسرائيل ده حرية إبداعنا وإحنا نقدم عمل؟ أولا عمل لا يمس الدين من قريب ولا بعيد عمل مالوش علاقة بالدين فطيب ليه ما تردش عليهم إن هم كمان يقدموا ويردوا علينا عشان يبقوا متحضرين لا النهارده بقى في فوبيا خوف لو مسيت إسرائيل أو مسيت أميركا عملك سيرفض ويقول لك بطل بقى اعمل لنا حاجات خفيفة علشان نرضى عليك وتبقى لطيف ونحبك فلازم تبقى تافه لأنك لو ما بقيتش تافه أو بلاش نتفه عشان ما أظلمش في فنانين محترمين بيقدموا أعمال عادية وأعمال اجتماعية وحاجات زي كده تبقى لطيف بالنسبة لهم إنما ستدخل دماغك وتقرفنا وتتكلم عن حبيبتنا وصديقتنا فده من المحظورات والممنوعات..

أحمد منصور: وهل هذا الذي أدى إلى الرمزية التي أصبحت في معظم الأعمال؟

محمد صبحي: مضبوط..

أحمد منصور: حتى عايش في الغيبوبة؟

محمد صبحي: ده إفراز طبيعي، إفراز طبيعي إنك أنت تلجأ زي أيام بداية الثورة علشان تعمل أي حاجة تنقد فيها النظام كنت بس كفاية إنك تتكلم عن الموضوع اللي أنت عايز تقوله بس في العهد البائد..

أحمد منصور: فيه وقفت أنا على كم يعني مشهد من المشاهد اللي فيها نوع من الرمزية حتى في ما قدمته أنت والآن نشوف مع بعض نعم..

محمد صبحي: أيوه طبعا ما أنا غصب عني، أنا غصب عني لازم تلجأ إنك أنت كمان تبقى جبان يعني يعلموك فنا جبانا فأنا جبان..

أحمد منصور: نشوف المشهد فيه إسقاط أيضا على الأمة العربية..

[شريط مسجل من مسلسل عايش في الغيبوبة]

أحمد منصور: أستاذ محمد أنا لاحظت كم من الدموع في هذا المسلسل أنت جبت الدموع كلها منين؟

محمد صبحي: مع أن ده متعارض مع الاسم..

أحمد منصور: ده كل مشهد..

محمد صبحي: أصل اللي يدمع دائما ده ما يبقاش في الغيبوبة ده يبقى واعي..

أحمد منصور: كل مشهد وبعدين أنت تجيبها منين ده كم عالي قوي كل شوية أبص لوجهك ألاقي الدنيا مغرقة دموع بس في نفس الوقت اللي أنت تبكي فيه حجم السخرية والضحك والفكاهة في وسط الدراما المبكية دي عالي جدا..

محمد صبحي: هو الحقيقة ده ستايل أو نموذج أنا متبعه من زمان اللي هي نسميها البلاك كوميدي..

أحمد منصور: الكوميديا السوداء..

محمد صبحي: أو الكوميديا السوداء ما هو أنت ما تقدرش تضحك الناس زي دائما أقول إيه؟ أنا ممكن أقول لك كلمة فتسمعها فتضحك وممكن أقول لك جملة تسمعها وبعدين تفكر وبعدين تضحك هذا هو الضحك الصاحي اللي نحاول نقدمه لأنك لازم تفكر عشان تضحك أن تتخيل أن يكون هناك صورة يعني فآه هو يمكن ده ملمح أساسي في كل أعمالي إن زي ما الدكتور لويس عوض وكان رجاء النقاش علقوا على هذه المسألة قال لك إحنا لسه نعيش المسألة وسنبدأ نتأثر وندمع فنلاقي نفسنا منفجرين في الضحك وإن يبقى فيه صراع ما بين إن إحنا نضحك..

أحمد منصور: إحنا ضحكنا وإحنا نشوف المشهد ده رغم الدراما بتاعته كل ما نعيده عشان يعني نختاره يعني نغرق من الضحك رغم إن المشهد بكائي جدا ودرامي جدا وفيه إيحاء في المشهد يعكس واقع يعني أنت أدخلت كم حاجة العربية دية وضع الأمة العربية يعني طبعا الرمزية عالية جدا ومن السبب؟ السبب جاءت الشقراء أم عيون خضر اللي جاءت راكبة العربية ولا حتى رضيت تعطي لك عشرة جنيه..

محمد صبحي: ولا عشرة جنيه كمان لا ما هو حتى كلام اللي هو اللي عرفان اللي هو المغيب ده علطول في المسلسل هو لأن قضيته..

أحمد منصور: بس ده حكيم ده يقول حكم كثير قوي..

محمد صبحي: هو يتكلم يقارن اللي معذبه يقارن ما بين حضارة الأندلس الحضارة العربية والإسلامية وإزاي وصلنا ويعمل مقارنة بينه وبين نفسه لوحده لما حرقت التاكسي العربية اللي هي بتآكل العائلة دي هو في وادي وده في وادي بس التقاء المنطقين أو الحوارين يصنع الرمز اللي حضرتك تتكلم عليه.

أحمد منصور: إحنا من زياراتي المتكررة لك وعدتني إن إحنا سنرى خيبتنا قريبا إحنا متى سنرى خيبتنا.. خيبتنا اللي ما وردتش على حد؟

محمد صبحي: أنت تقصد إيه؟

أحمد منصور: أنا أقصد خيبتنا اللي شافها خمسة مليار..


خيبتنا العربية على المسرح

محمد صبحي: طب أنت عارف لما جئت أسمي المسرحية أنا اكتشف أن المشاهد سيشارك فيها زي ما أنت شاركت دلوقتي..

أحمد منصور: يعني مثلا ممكن أنا أقول لأولادي تعالوا نشوف خيبتنا عند محمد صبحي..

محمد صبحي: بالضبط لا دي مسرحية صحيح بقى لي سنتين يمكن أكلمك عنها كنت أحضر فيها ويمكن بدأت بروفات وعملت جزء من الديكور ولكن المشكلة إن ما فيش مسرح إن ما عندناش مسرح بالنسبة لي باني مسرح طبعا في الصحراء..

أحمد منصور: على الفكرة المسرح الحلم اللي من عشر سنين وأنا يعني أتردد عليك وأشاهده وهو أول مسرح مفتوح في العالم العربي ربما..

محمد صبحي: أول مسرح بالشكل ده إن يبقى الـ (stage) أو خشبة المسرح والجمهور في وسط بحيرة صناعية كبيرة وتشاهد يعني يعطي مساحة إبداع في المسرح ما تخليش شبكية عينك ثابتة يعني بتجدد شبكية العين يعني من مطاردة خيول لحرق مراكب لحرق لنشات.

أحمد منصور: طبعا لأن أنا رحت المكان ربما المشاهدين معظمهم أو ما حدش راح كتير يعني..

محمد صبحي: هو لسه ما فتحش لسه..

أحمد منصور: لكن يعني الأحلام المجنونة دي يعني اسمح لي في الكلمة..

محمد صبحي: طبعا ده أنا أسمح لك قوي..

أحمد منصور: من أول ما جئت والمكان اللي أنت فيه كان صحراء إلى أن يعني شيئا فشيئا الآن بتصور مسلسلاتك وجئت وقلت لي المكان ده سيبقى كذا المكان ده سيبقى كذا كل شيء يعني شفته الآن المسارح كلها بتقدم هزل أنا واحد من الناس وأعرف يعني الآلاف مؤلفة من الناس ما يرضوش يأخذوا أولادهم مسرح لأن مش هيشوفوا مسرح هيشوفوا مسخرة وعري..

محمد صبحي: هو يعني إيه المشكلة ما بقاش في حركة مسرحية ولا حركة نقدية يعني حضرتك تعرف أستاذ أحمد إن أوروبا بكل المسارح العريقة اللي فيها اللي هي قبل ما تتفرج على الرواية أنت الواحد ملووح بالمعمار والتكنولوجيا اللي فيه..

أحمد منصور: نعم طبعا..

محمد صبحي: أوروبا بقى لها تقريبا سبعين سنة لم تبنِ مسرح لم تبن مسرحا ولكن حافظت على ما تملكه من مسارح..

أحمد منصور: يا سلام إحنا ندمر يعني ما مضى كله ولا نبني لما هو آت..

محمد صبحي: إحنا عندنا ثلاثين سنة كنا في أول ما طلعت أنا..

أحمد منصور: يعني مشكلتك عدم وجود مسرح للعرض..

محمد صبحي: أيوه أنا أول ما ظهرت كده وبدأت أبقى يعني بمواصفات السوق نجم يعني وبدأت أشتغل مسرح كنا نصرخ..

أحمد منصور: أنت عملت 28 مسرحية..

محمد صبحي: 28 مسرحية..

أحمد منصور: وده طبعا كم هائل جدا لأي فنان مسرحي طبعا..

محمد صبحي: آه رقم كبير بقينا نصرخ ونقول لهم عايزين نبني مسارح عايزين في كل شارع مسرح مش عجبنا العدد الموجود النهارده بعد ثلاثين سنة في 28 مسرح ما بين الهدم والحرق والتحويل إلى مول أو تحويل إلى جراج أو تحويل إلى سينمات صغيرة تلاشوا أنت خسرت 28 دار عرض وأنا في رأيي كمان في مسارح موجودة بس أنا لا أسمح إني أقدم عملا فنيا..

أحمد منصور: كمستوى..

محمد صبحي: والناس قاعدة في كراسي ممكن تقطع جاكتتها ولا تبقى أنت في مكان يعني المسرح ده حاجة متكاملة احترام آدمية المشاهد واحترام عقل الفنان..

أحمد منصور: وإحنا نناقش الرواية الآن في الدراما عفوا في رواية تبث الآن حدائق الشيطان يمثل فيها ممثل سوري جمال سليمان يقوم بدور شخصية صعيدية أنا لما قرأت نقد على الموضوع فشاهدته ولقيته بارع جدا.. جدا في تقديم الدور أنت في 1992 قدمت بالعربي الفصيح لماذا لم تلجأ للممثلين عرب للقيام بأدوار العرب اللي كانوا موجودين في المسرح؟

محمد صبحي: والله بالعربي الفصيح كانت تجربة أساسا علشان تقديم وجوه جديدة في المسرح قدم منهم ممثلين كثير دلوقتي وبقوا نجوم يعني صحيح أنا ولينين الرملي كان حلمنا نقدم بالعربي الفصيح سنة 1970.. سنة 1970 بالتحديد ورحنا لجأنا لجامعة الدول العربية وقلنا لهم إحنا عايزين ممثلين حتى هواة بس جامعة الدول العربية علشان إحنا ما معناش فلوس إحنا لسه متخرجين وكده تصرف على المشروع فجامعة الدول العربية كان حد اسمه حاجة خوريس أمين عام جامعة الدول العربية وقتها فالرجل تحمس وعملنا بروفاتنا في نادي الطلبة الوافدين نادي الطلبة الوافدين ده كان يجمع كل الطلبة اللي يتعلموا من الدول العربية..

أحمد منصور: زمان كانت مصر الأم للكل..

محمد صبحي: الأم الريادة فطبعا مش هتلاقي مرتع أكثر من كده نادي الطلبة الوافدين وحاولنا نوزع الأدوار لأن هي كانت التيمة اثنين من كل جنسية عربية كلهم متجمعين في فندق في لندن فقلنا حلو يعني الشخصيات بطبيعتها الجزائري التونسي السوداني السعودي الخليجي يعني السوري كل الجنسيات كان وقتها 22 دولة مش 21 عشان كان يمن شمالية ويمن جنوبية ما إحنا احترنا في الأعلام بصراحة، فبعد شهر من البروفات لقينا سيحصل مذبحة في النادي..

أحمد منصور: ليه؟

محمد صبحي: تشاجروا ليه أنا أعمل الدور ده وليه تحط الجزائر وده يقول لك ليه السوداني مهمش يا أخي يعني حاجات من دي فهم توحدوا لأنه مش محترفين توحدوا فقالوا لا هو ده يعني الواقع السياسي..

أحمد منصور: منعكس بشكل أساسي..

محمد صبحي: هو نفسه اللي لما جئنا نقدمه في المسرحية لما جئنا نقدمها بشكل تجاري بقى وبشكل محترف يعني أنا ولينين أخذنا قرار اللي يقدموا وجوه جديدة خالص عشان تصدقهم..

أحمد منصور: وأنت نجحت وقدمت فعلا وجوه جديدة كان من بينهم هاني رمزي..

محمد صبحي: منى زكي ورمزي..

أحمد منصور: ومنى زكي طيب أنا الآن أكثر من 120 مسلسل يا أستاذ محمد أكثر من 50 مسلسل مصري أكثر من 40 مسلسل سوري أكثر من 20 مسلسل خليجي حتى تونس الآن دخلت في إنتاج المسلسلات وناقص كل دولة عربية تعمل كل مسلسلاتها بلهجتها بكذا بحيث إن الواقع السياسي الممزق ده ينعكس عليه..

محمد صبحي: لا.. لا ما هو أصل الوطن العربي فضل..

أحمد منصور: أنت قلت لي الآن آه أنت قلت لي الآن إنك لجأت للجامعة العربية نفرض الآن إن فيه زعيم عربي من الزعماء انتفض دلوقتي وقال إحنا سنلغي المسخرة اللي موجودة دي إيه سوري وإيه لبناني لازم نعمل مسلسل واحد كل العرب يشوفه ويمثل فيه كل الممثلين العرب ودعا الجامعة العربية للانعقاد حتى تبحث هذا الموضوع واجتمعوا الزعماء العرب الزعماء دي ثقيلة شوية ولا..

محمد صبحي: بس أسألك سؤال بس أنت شطحت في الحلم أصل ده مش واقعي..

أحمد منصور: ده ما مش مشكلة..

محمد صبحي: ده مش سيحصل..

أحمد منصور: لو الزعماء اجتمعوا الزعماء ممكن ولا ثقيلة شوية الزعماء؟

محمد صبحي: لا لن يجتمعوا الزعماء ما أعتقدش إنما سيبقى مندوبين عن الحكومات يعني..

أحمد منصور: نقول مندوبين الآن اجتمع مندوبين من الدول العربية ويتناقشوا في مسلسل عربي إيه الشكل اللي ممكن يكون عليه النقاش سأترك لك الفرصة دي بعد الاستراحة شوف لنا الحوار سيكون إزاي نعود إليكم بعد فاصل قصير فابقوا معنا..

[فاصل إعلاني]

أحمد منصور: أهلا بكم من جديد بلا حدود من القاهرة ضيفنا هو الفنان البارز محمد صبحي نتناول واقع الدراما التليفزيونية والآن مندوب الدول العربية..

محمد صبحي [مقاطعاً]: أنت حطتني في مشكلة يا أستاذ أحمد..

أحمد منصور: لا أنا..

محمد صبحي: هو المشكلة..

أحمد منصور: إحنا يعني إيه زي ما يقولوا يعني إيه؟ الزعماء كنا سنروح في ستين داهية دلوقتي المندوبين يعني خفيفة شوية عشرين داهية ثلاثين داهية يعني..

محمد صبحي: لا هو التصور والله واقعي ومش واقعي هو واقعي لأنه خلاص الوطن العربي بقى مش فاضي غير للمسلسلات..

أحمد منصور: طبعا ما عادش ورانا حاجة..

محمد صبحي: لا لا ما وراناش حاجة وبقينا فاضيين والمندوبين جاهزين..

أحمد منصور: دول ينتجوا والشعوب تتفرج وحاجة آخر حلاوة..


التنوع داخل الوحدة في الواقع والدراما العربيين

محمد صبحي: لا هو يعمل مسلسلات كثير بس هو لو فكرة فعلا لو فكرنا بشكل واقعي إن إحنا ليه نعمل مائة مسلسل لو مائة مسلسل يفرزون واقعنا ويفرزون تقاليدنا وتراثنا مع اختلاف إقليميتنا لأن فيه ناس فاهمة التوحد العربي أو الوحدة العربية غلط الوحدة العربية مش معناها أن نكون متساويين أو أشباه ولكن لابد أن نكون متكاملين يعني الاختلاف هو الذي يصنع هذا التوحد العربي لأننا مختلفين ولكن لا نصل إلى شيفونية زي ما حصل دلوقتي بين الشعوب العربية إن كل شعب عنده شيفونية وحب الجنس وطبعا ده مخطط مدروس حتى لو قالوا الناس اللي هم ضد المؤامرة وحاجات زي كده لا هو مدروس ومصنوع إن كل شعب يقول لك أنا عندي المطربين بتوعي وأنا عندي كده وبقى فيه حرب أنا شايفها مفتعلة يعني..

أحمد منصور: الآن أنا سأرجع دلوقتي..

"
لو اجتمع مندوب من كل دولة لعمل مسلسل واحد يمثل الوحدة العربية فسنكتشف المرار
"
محمد صبحي: ما دام فيه حرب يعني فلو مندوب كل دولة فعلا اجتمعوا عشان يعملوا مسلسل واحد يمثل الوحدة العربية بما أننا مش قادرين نعملها سياسيا فسنكتشف المرار يعني أنا لو قاعد في وسطيهم يعني فعلا سنرى المرار يعني..

أحمد منصور: ورينا المرار مع أن إحنا شاربينه بالليل وبالنهار..

محمد صبحي: يعني أتصور إن أول خناقة عشان نفضها مين اللي سيخرج المسلسل؟ بس دي أول خناقة لو المصري قال أنا اللي سأخرجها يقول له ليه.. ليه ستخرج؟ فالمصري سيرد سيقول أن أنا عندي سبعين مليون يقول له هو بالعدد؟ لا مش بالعدد وسيبقي فيه ردح بقى وبلد صغيرة على الخريطة تقول لك أنا بلد غلبانة أنا بلد صغيرة وغلبانة بس لي دوري أعمل دوري فأعتقد أن..

أحمد منصور: لا قل لي دلوقت السوري مثلا سيقول إيه؟

محمد صبحي: لا السوري سيقول أنا لن أشترك في المسلسل ده إلا..

أحمد منصور: لا هو سيقول كده بالشكل ده؟

محمد صبحي: شو يا أخي شو والله ما بدنا نشترك في ها المسلسل إلا بدنا نرجع الجولان..

أحمد منصور: والمصري؟

محمد صبحي: لما نرجع الجولان عشان فيها لوكيشن يعني..

أحمد منصور: المصري سيقول له إيه؟

محمد صبحي: المصري سيقول يعني أولا بس عشان ندرسها مين اللي سيشترك كممثلين؟ عايزين نعرف اللي سيشترك من فلسطين ومن لبنان بالتحديد..

أحمد منصور: ليه؟

محمد صبحي: ليكون ممثل من حماس أو ممثل من حزب الله تبقى كارثة سوداء وستعمل إحراج مالوش معنى يعني أعتقد أن مصر والأردن والسعودية سيراقبون المسألة دي كويس قوي ويشوفوا مين اللي سيمثل عشان مش عايزين مشاكل.

أحمد منصور: واحد يطلع اسمه نصر الله ولا حاجة..

محمد صبحي: لو خليفة نصر الله ولا بتاع يقول له يغير اسمه لا سيشترطون لازم تغيير اسمه يعني ولو من حماس بلاش حماس علشان ما تعملناش مشاكل مع إسرائيل يعني السودان هيقول لك والله يا زول يعني أنتم ما سائلين فينا في مشكلة دارفور وسنبدأ نتقسم والله ما فاضيين لمسلسلات والله علشان نشتغل في المسلسل يا أخي بصوا لنا شوية قبل ما نتقسم ونبقى ثلاث أربع ممثلين نرازيكوا بيهم يعني.

أحمد منصور: والليبي هيتفرج؟

محمد صبحي: لا أنا سأقول لك بس النهاية المسلسل مش هيتعمل زي العادة يعني إنما سيؤخذ فيها قرارات..

أحمد منصور: إيه أهمها؟

محمد صبحي: أولا شمال أفريقيا سيقول لك لا عشان نعمل المسلسل ده ونقدمه بشكل جميل وبرشا فيه مصداقية نقدمه مع مجموعة الدول الفرانكفونية ودول الخليج يقول لك والله يا أخي ما بدنا فلوس ولا بدنا أموال إحنا ننتج المسلسل تبع الاتحاد..

أحمد منصور: الخليجي..

محمد صبحي: مجموعة..

أحمد منصور: دول الخليج..

محمد صبحي: دول الخليج ليبيا أعتقد أنها ستنسحب كالعادة..

أحمد منصور: ليه؟

محمد صبحي: عشان تقدمه مع الاتحاد الأفريقي وأعتقد المسلسل في الآخر سيبقى في أيدي فقط الصومال وجيبوتي وموريتانيا.. الصومال وجيبوتي وموريتانيا ما معهمش فلوس عشان ينتجوا أعتقد في الآخر اللي ستنتجه إسرائيل..

أحمد منصور: كارثة بلاش الاجتماع من أساسه..

محمد صبحي: ناوي تخش في فقرة ثانية؟

أحمد منصور: لا صحيح ده تعبير عن الكارثة اللي العرب يعيشوها..

محمد صبحي: لا خلاص أنت لو تكلمت عن مسألة المنطقة العربية تبقى مجرم يا أستاذ أحمد أنا في أعمالي وأنادي في كذا ندوة أنادي بلاش نلوك في على لساننا كلمة الشرق الأوسط أنا أرفض كلمة الشرق الأوسط..

أحمد منصور: طبعا..

محمد صبحي: أنا تربيت على كلمة الوطن العربي مش عايزين تسموه الوطن العربي سموه أي تسمية ثانية غير الشرق الأوسط..

أحمد منصور: إسرائيل هتروح فين؟

محمد صبحي: لأن إسرائيل هتروح فين أنا أتمنى أن كل أولادنا وأحفادنا ما ينسوش كلمة الوطن العربي إنما فعلا عشان تتكلم عن التآخي العربي أو الأخوة العربية دي بقت مهزلة وبقت نكتة بقت نكتة إن إحنا نبقى أخوات..

أحمد منصور: تعالى عند نبقى أخوات دي يعني في مشهد الحقيقة أنا وقفت عنده كثير قوي.. قوي.. قوي في عايش في الغيبوبة هو شعب الأمة كلها عايشة في الغيبوبة دلوقتي خلينا نشوفه على موضوع الأخوات دول إزاي الأخوات يتعاملوا مع بعض وانطباق ذلك على..

محمد صبحي: لو أخوات..

أحمد منصور: على الأخوات العرب نشوف المشهد مع بعض..

محمد صبحي: ما أعرفش ده تفسيرك أنت..

أحمد منصور: نشوفه والمشاهدين يحكموا..

[شريط مسجل من مسلسل عايش في الغيبوبة]

محمد صبحي: ما فيهاش حاجة ما فيهاش رمز خالص.. أنا أقترح حاجة والله أنت أوحيت لي بها دلوقتي..

أحمد منصور: أنت خليت نهايتها..

محمد صبحي: طب ليه ده ما يبقاش الشعار بتاع جامعة الدول العربية يعني يبدؤوا الاجتماع..

أحمد منصور: بالدعاء ده..

محمد صبحي: بالدعاء ده وينهوا بيه يعني سيبقى منطق والله..

أحمد منصور: إحنا نقدمه لعمرو موسى الآن..

محمد صبحي: والله ده شعار جاهز يعني..

أحمد منصور: في اجتماع جامعة الدول العربية هم مش محتاجينه ده متحقق..

محمد صبحي: هو ده متحقق طبعا..

أحمد منصور: أنت مش خايف ده يتحقق يعني؟

محمد صبحي: لا ما فيش خوف من دعواتي لن تستجاب لأن هي مستجابة أصلا يعني..

أحمد منصور: لا ده أنت سرك باتع بصراحة..

محمد صبحي: يعني تخيل هل فيه واقع غير يا أستاذ أحمد فيه واقع مرير غير ده؟ أنا أعتقد أن يعني..

أحمد منصور: أنت جبت شوية الدعوات الحلوة دي منين؟

محمد صبحي: دول أخوات وفعلا هم مهتمين أن هما يبقوا أخوات إنما يعني أنا متخيل إحنا كمية البوس اللي بنشوفهم في التليفزيون بين الأخوة العرب التصافح والقبلات كثيرة قوي يعني كثيرة دي تبين يعني إن هذه الأمة بخير يعني إنما أنا مش متصور أنها قبلات ولا مصافحات لا خلاص يعني دلوقتي هو فعلا يعني المشهد أعتقد أنت اللي أوحيت لي بده والله أنا ما كنتش واخد بالي..

أحمد منصور: لا فعلا يعني أنا وقفت عنده كثير جدا وبعدين استرجعته كم مرة وفي كل مرة لا أتمالك نفسي مطلقا لأن كمان في.. فيه انفعال يعني كل ما يمكن أن يجمع الأخوان ببعض كل ما يمكن أن يجمع أو يقرب بينهم ده حتى كمان يتمنوا يعني الإسقاط اللي موجود في كل جملة في هذا المشهد هو موجود على الواقع العربي..

محمد صبحي: أيوه مش عايزين يشتغلوا مع بعض لأن كل ما بيشتغلوا ما بعض بيسرقوا بعض مش عايزين يتناقشوا مع بعض عشان ساعات كل واحد بيضايق الثاني في المناقشة خلاص ما فضلش حتى الزيارة بيقول لك لما بنزور بعض..

أحمد منصور: ده حتى بيقولوا عايزين اجتماع للجامعة العربية عشان يناقشوا مثلا فلسطين مذبوحين الفلسطينيين ما حدش عايز يقعد..

محمد صبحي: لا.. لا خلاص..

أحمد منصور: لبنان فين ما حدش مش قضية..

محمد صبحي: لا هي طبعا عشان بس نبقى يعني منصفين هي مش جامعة الدول العربية لا عمرو موسى ولا أي أمين عام سيستطيع أنه يقوم بدوره كجامعة دول عربية لأن هي شيء أجوف لأن هي راجعة لقرارات الحكام ما ينفعش جامعة الدول العربية تعمل شيء أو قرارات عكس إرادة الحكام العرب بس..

أحمد منصور: ما هم دول الحكام العرب؟

محمد صبحي: لا ما أقصدش ده..

أحمد منصور: أنت كل ما نقرب من الحتة دي حتى فيه حتة كده في ماما أميركا عايز أحطها بس أنت يعني إيه..

محمد صبحي: لا.. لا ما ينفعش..

أحمد منصور: تقول لي أنت هتودينا في ستين داهية.. أنا أكلت علقة قبل كده ومش فارقة معايا..

محمد صبحي: لا ما أنت متعود ما أنت تعودت خلاص.. أنت تعودت..

أحمد منصور: لو عايز يعني أشوف انعكاسات الواقع العربي على الدراما اللي موجودة أكثر من مائة وعشرين مسلسل ما فيش مسلسل يعكس الواقع العربي بشكل مباشر كلها تجتزئ أشياء يعني عندي بعض المسلسلات زي سكة الهلالي حضرة المتهم أبي مواطن بدرجة وزير حدائق الشيطان أشباح المدينة نور الصباح درب الطيب هي عدد قليل من المسلسلات فيه تعرض بشكل غير مباشر لبعض القضايا السياسية..

محمد صبحي: أنا سأقول لك بصراحة الحقيقة الفنان مظلوم عندك مبدعين كثير على الأقل بشكل حر عايز تقول رأيك ورأيك يعني دائما نقول إيه؟ إن الفن ما يقومش مظاهرة ما فيش مسرحية أخرجت مظاهرة ما فيش عمل فني عمل انقلاب انتم خائفين من إيه؟ يا أخي ده بذكاء شديد جدا أنت تعمل زي ما هم يعملوا المجتمع الإسرائيلي مبنى على إنه يقول لك (ok) إحنا موافقين بس ما نقدرش لازم نأخذ رأي الناس طب اعملوا زيهم..

أحمد منصور: ما هي الناس هنا في الغيبوبة..

محمد صبحي: يعني هنا أنت عارف لو إيه لو بتقول أن أطلقوا أفكارنا إحنا لا ندعو لحرب مع إسرائيل نحن نطالب فقط أن يكون لنا كرامة وعزة نفس أمام عدونا إحنا كل اللي يهمنا أن عدونا يحترمنا بس إحنا مش طالبين أكثر من كده ما يضربناش على قفانا ونسكت ده كل اللي طالبينه حتى المحاور اللي في الفن لما نتكلم على إسرائيل هنا من حقنا يا أخي انتم رافضين الوحدة العربية والقضايا العربية إحنا مش رافضينها إحنا سنفضل نتكلم عن قضية فلسطين وسنتكلم عن الواقع الفلسطيني وسنعري الممارسات على الفلسطينيين مش هنسيب العراق ولا هنسيب شعب العراق يعني ما حدث أنا كان نفسي أصدق كان نفسي أنا أتكلم عن نفسي كان نفسي أصدق ما حدث في أفغانستان الحلم الأميركي الأسفلت في الشوارع الأطفال سيلبسون ويعيشوا حياتهم والمرأة تعيش حريتها ما حدث في أفغانستان إيه اللي يحصل في أفغانستان؟

أحمد منصور: والعراق..

محمد صبحي: في العراق ننتهي من ظلم الطاغية انتهى الطاغية وخلص والشعب بقى في أيدي مين؟ في أيدي طاغية أكبر ما يحدث من ممارسات في الشعب العراقي أبشع بكثير من أي نظام أو أي عهد فات أنا والله عايزين نصدق الأميركان علشان إحنا محتاجين فتوة إحنا محتاجين في العالم فتوة عادل.

أحمد منصور: أستاذ محمد أنا أشكرك شكرا جزيلا على هذه الحلقة..

محمد صبحي: أنا أشكرك..

أحمد منصور: دائما أنت كل كام سنة كده تخليني أضحك بلا حدود..

محمد صبحي: ما هو الناس تشكرني على فكرة قالوا لي أنت الوحيد اللي خليت أحمد يضحك.

أحمد منصور: شكرا جزيلا..

محمد صبحي: شكرا..

أحمد منصور: كما أشكركم مشاهدينا الكرام على حسن متابعتكم في الختام أنقل لكم تحيات فريقي البرنامج من القاهرة والدوحة وهذا أحمد منصور يحييكم بلا حدود من القاهرة والسلام عليكم ورحمة الله وبركاته.

جميع حقوق النشر محفوظة، الجزيرة