جورج قرم.. المسار الفكري ج1   
الأحد 1426/8/8 هـ - الموافق 11/9/2005 م (آخر تحديث) الساعة 11:12 (مكة المكرمة)، 8:12 (غرينتش)

- منطق المشرق العربي
- انتقاد مفهوم روح الشعب لهيغل
- سقوط الفكر الغربي في النرجسية

مالك التريكي: بمثل ما يتزايد الحصار والتهميش في العالم الغربي ضد ما تبقى من أصوات الفكر النقدي، يتزايد الحصار والتهميش في الوطن العربي ضد ما تبقى من أصوات الفكر التنويري التي تسعى إلى وصل ما انقطع مع فكر النهضة، لهذا يبدو المفكر السياسي والخبير الاقتصادي اللبناني جورج قرم كما لو أنه يغرد خارج السرب أو كما لو أنه يعزف خارج المقام عندما ينطلق في مقاربته للظواهر السياسية والثقافية والتاريخية في الوطن العربي من مقولة أن انشغال الفكر الغربي بما يسمى بعودة المُقدس أو بالصحوة الدينية هو تكريس لأسطورة عقلانية الغرب في مقابل لا عقلانية مجتمعات الشرق وبما أن الفاعل أو الكائن الذي يجدر
بعلم التاريخ أن يدرسه في المنطقة العربية لا يزال موضع سؤال معرفي، فإن جورج قرم المسيحي الديانة، الإسلامي الثقافة، المعجب بابن جرير الطبري والمتأثر بأحمد أمين قد حاول معالجة المأزق الناجم عن استحالة كتابة التاريخ العربي من منظور الدولة القُطرية وعن افتقار المنطقة العربية لتقاليد الكتابة التاريخية من منظور الدولة القومية، حاول معالجة هذا المأزق عن طريق تجربة كتابة تاريخ المجتمعات ولهذا فإنه قد عَمد في أشهر مؤلفاته الموسوم بانفجار المشرق العربي إلى اعتبار المشرق كيانا تاريخيا قائم الذات يصلح مجالا للتأريخ ومنطقا للتحليل.


منطق المشرق العربي

جورج قرم- المفكر السياسي والخبير الاقتصادي اللبناني: منطق المشرق العربي.. كمنطق بنظري لتاريخ المنطقة غير مثلا أنطون سعادة مؤسس الحزب القومي السوري تقريبا مش موجود عند المؤرخين العرب، أنا استعملته كثير التعبير، أنا عجبني هذا التعبير، في شيء اسمه مشرق عربي ما فيه شك طبعا مع تميزات حتى بقلب المشرق العربي.

مالك التريكي ]مقاطعاً[: بداخله..

جورج قرم ]متابعاً[: فأنت بتشوف في ميل عند المؤرخين العرب أو المثقفين اللي بيهتموا بالشؤون القُطرية والقومية وكذا، إنك تبسط مثلا وقت ما بتشوف هذا التعقيد بتقول هذا إسلام مثلا هو الرابطة بتقول إسلام بتكون أنت أبعدت غير المسلمين وما بتكون حليت مشكلة مثل المذاهب الإسلامية، إذا قلت لغة الضاد.. ما عندك مشكلة مع الأكراد بالمشرق العربي، مع العنصر البربر بالمغرب العربي وأنا يعني من الداعين إنه مقولاتنا اللي بنتعامل فيها وبدنا نبني عليها مثلا حضارة، ثقافة وتاريخ مشترك، بتيجي تحكي بالمشرق العربي أنت عندك ثقافة عربية سوريانية يعني آرامية سوريانية.. بالمغرب هي عربية بربرية.. وقت ما بتجعل من الإسلام عنصر مركزي أنت بتُضعف وضعك، لأنه شو ساعتها إذا الإسلام عنصر مركزي طب شو بيفرقنا نحن كعرب من الباكستانيين، من الإندونيسيين؟ يعني من الأقوام أو الأعراق الثانية مش العربية شايف كيف؟ وبطبيعة الحال.. يعني أنا التركيز المستمر على الإسلام بيخليني ما أرتاح لأنه بطبيعة الحال نحن مسلمين يعني حتى أنا كمسيحي عم بعتبر حالي مسلم ثقافيا، فأنا ماني شايف ضرورة إن كل مرة.. مثلا بالثقافة العربية الإسلامية بطبيعة الحال يعني.. عربي يعني فيه نبي محمد فيه ديانة وهي ديانة كونية، يعني أكبر بكثير من العروبة.

مالك التريكي: رسالة قومية.

جورج قرم: فأنا مش مرتاح لهذه المقولات عم أجرب أشتغل على إدخال هذه المقولات الجديدة اللي حكينا عنها، بالمغرب العربي مقولة إنه الحضارة أو الثقافة العربية البربرية كل ما بحكيها في تصفيق بالقاعات بالمحاضرات، هذا بيدل وأنا أكيد بالمشرق العربي إذا أدخلنا الثقافة اللي كانت تاريخيا كثير مرتبطة بالثقافة العربية بالثقافة الآرامية السريانية واللي هيك..

مالك التريكي: بالأصل.

"
طريقة كتابة التاريخ إذا مزجت بالنظرة الدينية فلن تنتج تاريخا صحيحا، فالنظرة الدينية فيها سمة صوفية وأمور لا تتعلق بالحياة البشرية
"
جورج قرم: أيوه وهي ثقافة الطوائف المسيحية معظمها مش كلها، هذا كمان بيعمل ارتياح كبير، فليش نحن ما بانجرب، ما فيه شك إنه المقولات اللي بنستعملها فاشلة.. يعني ما بتعطيك إدراك للواقع بالمعنى الصحيح.

مالك التريكي: في إطار ذكر المقولات الفاشلة، طبعا هناك إجماع على حدود الموضوعية في التاريخ وهذا عنوان فرعي للكتاب الشهير (كلمة بلغة أجنبية) عن فلسفة التاريخ والحدود الموضوعية في التاريخ، مما تذكره عن كتابة التاريخ في الغرب، أن محاولات كتابة التاريخ الكلي بدايةً من بوسييه فشلت ولم تعد لديها مصداقية، طبعا اهتمامك بها كان أن هذه محاولات كتابة التاريخ الكلي تتعرض للمشرق في علاقته بالغرب في إطار هذه النظرة للتاريخ الكلي، لكن أليس من اللافت للنظر أن المحاولة الوحيدة التي تعتبر ربما من الناحية النظرية لها قيمة تأويلية وتفسيرية في التاريخ العربي هي محاولة ابن خلدون في المقدمة وقد تُرجِمت إلى اللغة الفرنسية (كلمة بلغة أجنبية) ترجمها على أنها مقدمة للتاريخ الكلي، يعني ألا توافق أن هنالك توقا إنسانيا مفهوما إلى محاولة انتظام شتات الوقائع في نسق كلي؟

جورج قرم: بس أنا هون يعني ليش وذكرت حضرتك بوسييه اللي هو كان شخصية دينية كاثوليكية مسيحية ضخمة وله كتابات روعة كجمال لغوي باللغة الفرنسية، بس طريقة كتابة التاريخ إذا أمزجناها بالنظرة الدينية ما بتقعد تكتب تاريخ، الأشياء الدينية فيها صوفية، فيها أشياء ما بتتعلق بحياتنا البشرية، يعني تقدر تؤمن.. تكون مؤمن، بس إذا بدك وقت ما بتيجي للشؤون البشرية في أشياء موضوعية بدك توصفها كمؤرخ لسبب يعني بوسييه مثل الفشل لأنه إذا بدك ثقافة التنوير بأوروبا أبطلت هذا التفكير، هلا أبطلته شكليا ما أبطلته بالعمق وهذا موضوع كتاب الثاني آخر..

مالك التريكي: سوف نأتي إلى ذكرها.

جورج قرم: أيوه نأتي إلى ذكرها.. كيف أبطلته بالشكل الفقر، إنه إذا بدك الرواية الإيمانية اللي أكثر من محترمة.. يعني شرعية، شايف كيف؟ بس الرواية الإيمانية طبعا معنى التاريخ، هو كله معنى ديني بكل مستوياته من أدنى المستويات لأكبر المستويات في بداية كون، في نهاية كون، في الفكر اللي بيسموه باللاهوت المسيحي اسكتولوجي.. يعني نهاية التاريخ مع عودة المسيح، عند المسلمين ما فيه هذه النظرة، بس فيه نفس نوع النظرة التوحيدية إنه الله هو اللي بيسير كل الأمور فساعتها حتى وقت ما بتيجي كل شو بتكتب تاريخ يعني إذا كل الأشية مسيرة وما في حرية للإنسان إنه يغير مجرى التاريخ، ما هو الله عطى للإنسان البصيرة، فأنا من هذه الناحية.. يعني بدي أبعد كتابة التاريخ عن.. إذا بدك النظرة الدينية اللي ممكن تكون موجودة عندي باللاوعي، فتأخذ أنت ثقافة التنوير هي تكملة لثقافة الديانات التوحيدية الثلاثة وخصوصا المسيحية والإسلام، إنه معنى التاريخ هو معنى وجود الله الواحد، نبي شعب يحمل الرسالة للبشرية جمعاء، طيب هذه تعلمنت.. يعني صارت إنه بدل ما يحكوا عن الله بيحكوا مثلا على الازدهار الاقتصادي، بيحكوا عن مساواة البشر، بيحكوا عن كذا، هذه إذا بدك علمنة المثاليات الدينية.. الموجودة الدينية طريقة اشتغال أيدلوجية ثقافة التنوير اللي معرضه لكتير انتقادات اليوم وخاصة بأوساط.. إذا بدك السلفية الإسلامية الجديدة، هي بالنهاية نقلت نفس الآلية بالتفكير ولهذا سبب صار في كمان نفس الحدة وقت ما أجت الشيوعية.. الشيوعية هي خمنت إنه لقت الحل لراحة البشرية، وقت ما انهار الاتحاد السوفيتي كان عندك الفوكوياما مؤرخ، فيلسوف، سياسي أميركي من أصل ياباني، عمل لك كتاب أسمه نهاية التاريخ ماهذا التفكير نهاية العالم اللي بعضه موجود.


انتقاد مفهوم روح الشعب لهيغل

مالك التريكي: عودا إلى هيغل، طبعا وهنا وصلنا إلى نقطة مرتبطة لأنك تنتقد هيغل سيرا على نهج كارل بوبور في نقده لهيغل ونقده للفكر الغربي بصفة عامة، ترى أن فكرة هيغل عن مفهوم روح الشعب وعبقرية الشعب، تنقدها وتصل ذلك وصلا نقديا بالتقاليد الاستشراقية التي كانت تحدد للشعوب ماهية وأوصاف وتعتبر أن ذلك سبب في نوع من.. إضفاء نوع من الصفات الجامدة على الشعوب.

جورج قرم: ما فيه شك إنه في شخصين من كبار الفلاسفة بالغرب وهنا ضمن ألمان هيغل وفيبر بعده اللي هما خلقوا أساطير القبط الغربي، أسسوا للنرجسية الغربية تجاه كل الشعوب الأخرى، يعني لما بتقرأ فيبر عنده كتب على الأديان التانية غير التوحيدية، لأ.. بيظلوا بيشوفوا الأديان التانية مع إنه مثلا البوذية شو عندها مائة ملايين من المؤمنين، الديانة الهندوسية مئات الملايين، الديانة الشنتاوية باليابان، الديانة الكونفوشيانية بالصين، هذه مليارات من البشر بيشوفوا هاي ما بتوصل حد أدنى من المقارنة مع الديانة التوحيدية، ما هو هما بيركزوا كتير على..

مالك التريكي ]مقاطعاً[: ماكس فيبر يتحدث على الديانة التوحيدية، لكن هيغل يتحدث عن الديانة المسيحية لأنه كان يعتقد أن الديانة البوذية متخلفة ولم تستطع..

"
نجاح الديانة الإسلامية يكمن في أنها عملت على التوفيق بين اليهودية والمسيحية وجاءت بنظرة ارتاح لها الناس
"
جورج قرم ]متابعاً[: إيه المسيحية، بس بشوف هلا بالمسيحية في.. عندك تقليدين في تقليد بروتستانتي وفي تقليد مسيحي كاثوليكي، التقليد البروتستنتي أنا بنظري كتير خطير، لأنه له عودة لجذور العهد القديم.. التوراة، بينما من تربيتي الكاثوليكية للمسيحيين، تربيت إنه أجى المسيح مش ألغى العهد القديم، بس قال العهد القديم إحنا داخلين بمرحلة جديدة، العهد القديم بده الواحد يأخذه برمزيته مش بحرفيته وده سببه البروتستنت بعودتهم للعهد القديم، طبعا رجعوا اليهودية كالمنبع الأساسي، هلا أنا بنظري الديانة الإسلامية اللي أجت تلي الديانة التوحيدية، نجاح الديانة الإسلامية إنه عملت التوفيق بين اليهودية والمسيحية وجت بنظرة إذا بدك ارتاحوا الناس إليه، لأنه نحن ما بدنا ننسى إنه بالمشرق العربي كان في كنائس مختلفة عندها تصورات لاهوتية مضادة وبعدها لليوم هذه الكنائس موجودة الكردان بالعراق شيء، السريان بسوريا شيء، الأقباط بمصر شيء، كان في خلافات في الإمبراطورية البيزنطية بين المسيحيين، طبيعة المسيح واحد بثلاثة، المسيح اثنين.. تعبوا الناس، عبقرية رسالة النبي إنه حسم المواضيع كلها وهاي..

مالك التريكي: ببساطة..

جورج قرم: ببساطة، عملت راحة كتير كبيرة وأنا بظل أقول بالديانات التوحيدية الثلاثة الديانة الإسلامية بالفعل دين وسط مثل ما عم بيتقال بالقرآن الكريم، دين بيأمر حتى التحدثية بالاجتهادات، يبقى لازم ننسى نحن نسيانين ماضينا ما هاي في انقطاع بتراثنا، أد أيش كان في ملل ونحال وكانت شغلة طبيعية، يعني تروح تقرأ مثلا ببلاط المأمون، الأمين، الكذا، كانوا يتباروا بالاجتهاد الديني، كبار علماء المسلمين كل واحد على اجتهاد.. مع كبار علماء اليهود العرب والنصارى العرب، كلهم كانوا ما كان في أي مشكلة، نحن نسينا هذا التراث كله التعددي وحتى بالقرآن الكريم أنت عندك آيات ما وجدت لها مثيل بالديانات التانية إنه {ولَوْ شَاءَ اللَّهُ لَجَعَلَكُمْ أُمَّةً واحِدَةً} الله بده التعددية {وجَعَلْنَاكُمْ شُعُوباً وقَبَائِلَ لِتَعَارَفُوا} أنا ما شفت بديانات تانية هذا الانفتاح واليوم اللي أنا بنصدم فيه إنه وقت ما بشوف شو ها تراث الحضارة الإسلامية وبشوف شو صورة الإسلام أو ممارسات بعض المسلمين بديار الإسلام.

مالك التريكي: وهذا هو التحول من الجوهر العالمي للرسالة الإسلامية إلى شبه شكل الأيدلوجية القومية، مشاهدينا الكرام سوف نعود للحوار حول المسار الفكري للدكتور جورج قرم بعد الفاصل.


[فاصل إعلاني]

سقوط الفكر الغربي في النرجسية

مالك التريكي: الفكر الغربي نرجسي، تقول أنه سقط في النرجسية مرة أخرى..

جورج قرم: نرجسية قاتلة..

مالك التريكي: سقط من النرجسية مرة أخرى والذي يغذي هذه النرجسية هو تقاليد في التفكير الغربي العام والتفكير الأكاديمي، ذكرت ماكس فيبر.. نعود إليه تقول إن ماكس فيبر وإميل دوركيم مسؤولان عن ذلك بحكم تقسيمهما للمجتمعات هي مجتمعات متحضرة ومجتمعات بدائية ما هو..؟

"
الفكر الغربي يعيش في نرجسية وخيال نسجه مفكروه لأنه أسس على أساس الثنائية وعلى اعتبار أن الغرب متفوق على العالم بسبب تقاليده التوحيدية
"
جورج قرم: قطعا يعني الغرب وهيدي شوف الخطير الكبير على أي حضارة أو أي ثقافة، هو تأسيس ثنائية، الغرب أسس ثنائية، نحن وبقية العالم ونحن تفوقنا بالنسبة لتقاليدنا التوحيدية، إذا أنت بروتستنتي بتقول يهودية مسيحية، ما أنك بروتستنتي بتقلل من محتوى.. وسائر العالم ما عنده.. إذا بدك ما أنه محظوظ لأنه ما عنده ها التراث ونحن متفوقون لأنه نحن كان عندنا الديانة التوحيدية اللي هي أساس تقدم البشرية، هذا تبسيط يعني مش مقبول، هلا بتقرأ هيغل أنا عم برجع.. عم بقرأ كمان في جمال اللغة، في روعة لما بتقرأ سيد قطب مثلا مع أنه..

مالك التريكي: وتعقيد اللغة أيضا برتراند راسل له رأي شهير في هيغل يقول أنه غير قادر على التعبير عن نفسه لذلك..

جورج قرم: لا بس أحيانا إله بعض الكتابات..

مالك التريكي: إشراقات.

جورج قرم: أيه له بعض التاريخ الفلسفي مثلا سهل قرأته ولوحة كثير جميلة، بس طبعا لوحة ما بتعكس تعقيدات الواقع والتاريخ.

مالك التريكي: وفلسفة القانون كمان.

جورج قرم: فلسفة القانون أعقد، بس فلسفة التاريخ عنده فلسفة التاريخ فهو بيشوف أنه الشعوب المسيحية هي بتقود البشرية وهو هيغل قبل ماركس بكثير، أنه في مراحل بتطور البشرية ويعتبروا أنه مرحلة الديانة التوحيدية مرحلة أساسية وهون إذا بدك بحوار بيننا نحن وبين الغرب فينا نيجي نقول (Ok) ديانة توحيدية، ما نحن ديانة توحيدية وأنا مشكلتي ولا بكل محاضراتي بالغرب أقول طيب شو ها القصة معكم، يعني كيف ممكن تستبعدوا الديانة التوحيدية الثالثة اللي هي ديانة النبي محمد اللي هو بيقول ما نحن كلنا منحدرين من إبراهيم، يعني الديانات الإبراهيمية الثلاثة، لا كأنه هيدي غير ديانة وهيدي كلام مش منطقي.

مالك التريكي: لأن النظرة وهذه يذكرها أيضا المفكر الفلسفي المرحوم محمد العزيز الحبابي في كتاب (كلمة بلغة أجنبية) من المنغلق إلى المنفتح.

جورج قرم: تماما وعندك الأب واكيم مبارك الله يرحمه، أديش أول شيء أثر على كنيسة روما والفاتيكان اللي وهو تحت تأثيره وتحت تأثير غيره أعترفت وأخيرا الفاتيكان بصحة الديانة الإسلامية وبعدين صار هو كل كتاباته فيها تحدى للمسيحيين للعقل المسيحي، أبن عمي انتووا لهلا ما تحاورتوا مع المسلمين لأنه سيكولوجيا من الناحية اللهوتية النبي محمد بيطرح كثير أشياء وبيعترف بالمسيح بشكل آخر، بيعترف بالعذراء، بيعترف بالكذا وهو طالب أنه الديانتين التانيين اليهودية والمسيحية يعترفوا بالإسلام كمان.. بعد بالعمق ما في اعتراف بالكينونة الإسلامية كجزء من منظومة التوحيد.

مالك التريكي: ومن الغريب أن هذا الحوار لا يزال مستمرا أو هذا عدم الحوار.. انعدام الحوار لا يزال مستمرا لأسباب دينية رغم أن المجتمع الغربي أو الغرب بصفة عامة يدرك نفسه الآن على أنه مجتمع ما بعد ديني.. تجاوز مسألة الدين، هذا إدراكه تصوره عن نفسه هو يتصور نفسه كذلك، لكنك ترى أن المقولات الدينية انتقلت إلى المقولات المُعلمنة ولازال.. توراتية خاصة.

جورج قرم: لا واليوم إذا بدك مع انهيار الاتحاد السوفيتي أو بالمرحلة الأخيرة من الحرب الباردة، أميركا كانت عندها سياسة ثقافية حضارية دينية واضحة هي إثارة السلفيات والتشدد الديني المسيحي لدول أوروبا الشرقية الإسلامي لمحاربة الماركسية والتيارات العلمانية بالعالم الثالث.. القومية العلمانية بالعالم الثالث واليهودية بطبيعة الحال واليوم يعني واليوم نحن عم نظهر كأنه شيء كثير غريب ها البوش اللي إيجا لا الواحد بده يجي يمسك الخيط من بدايته وأنا ماسك الخيط من بدايته اللي هو وقت ما الرئيس كارتر كان إنسان كثير متدين، طلب أنه نرجع نفتح ملفات الحرب العالمية الثانية وإبادة اليهود اللي صار وعمل المتحف للمحرقة.. الهولوكوست وبدأ شيء أنا سميته ثقافة الهولوكوست واللي عم بيندرج وراها بشكل خجول المسيحيين لأنه بيشعروا بشعور الذنب، المسيحيين الغربيين طبعا نحن العرب ما إيلنا علاقة بكل ها الشيء، فاليوم وعندك أنت السلفية الجديدة البروتستنتية اللي بينتمي إليها بوش وكان ريغان منتمى إليها، هذا شيء كثير قديم وهذه نزاعات بروتستنتية.. يعني عم تتفاقم وأنت فيك تطرح السؤال مين عم بيأكل الثاني؟ هل اليهودية عم تأكل البروتستانتية أو البروتستانتية عم بتجرب تسيطر على اليهودية؟ في أشياء يعني عملاقة عم بتصير ما حداً بيسترجي يحكي.

مالك التريكي: هذا يفسر نوعا ما درجة من التمايز ليست كبيرة بالضرورة، لكن درجة من التمايز في التماهي مع إسرائيل لكي لا أقول التعاطف.. التماهي مع إسرائيل موجودة بدرجة أكبر في الثقافة البروتستنتية.

جورج قرم: طبعا ما هو فتح أميركا من قِبل البروتستنت هم الإنجليز البروتستنت إيجا تحت غاية التوراة أنه هيدا أرض ميعاد جديد، الله بيعطينا إياها والأدبيات القومية الأميركية مليئة بالصور التوراتية بالنمط التوراتي، فأنا.. وأنا كثير أحيانا بيجي بحكي المفكر ما ممكن يوقع بالنمط التوراتي ما لازم يوقع بالنمط، النمط التوراتي نمط تبشيري ديني إيماني بالشؤون البشرية تعرف الواحد بده يحترم المؤمن، بس كمان في تعددية بدها تديرها وهاي رفض التعددية ظاهرة جديدة خصوصا عندنا نحن، نحن حضارتنا بالشرق مبنية على التعددية، أوروبا قضت على التعددية بعد الحروب الدينية، ما الحروب الدينية كانت شغلة مائة وثلاثين سنة حروب متواصلة لإلغاء الآخر، هيدا طبعا إذا بدنا نفهم أوروبا بدك ترجع مش بس الثورة الفرنسية خلافا لما يقال، ترجع للحروب الدينية اللي الحمد لله ما صارت عندنا نحن ما صار إي شي، الحروب الصليبية بس غير شيء.. بس بالمجتمع الإسلامي كمجتمع إسلامي في مذاهب بس عمره ما صار فيه تقاتل متواصل شرس بإلغاء الآخر.

مالك التريكي: لم تقع حروب دينية.

جورج قرم: اليوم عم نرجع مع الهجمة الأميركية الثقافية وطبعا أميركا بتهيمن على الثقافة العالمية النظرة التوراتية عم ترجع تهيمن، يعني كتاب هنتنغتون بالنهاية كتاب توراتي والخطأ أنه كلنا ركضنا بدنا نجاوب على هنتنغتون، هيدا كتاب سخيف ما بده جواب.

مالك التريكي: سوف نأتي إلى هنتكتون لأن له وجودا سواء أحببنا أم كرهنا، بهذا مشاهدينا الكرام تبلغ هذه الحلقة من برنامج مسارات تمامها، سيكون لنا من الحوار المزيد مع الدكتور جورج قرم الأسبوع القادم، حتى لقائنا الأسبوع القادم هذا مالك التريكي يحيكم، دمتم في أمان الله.

جميع حقوق النشر محفوظة، الجزيرة